યિર્મેયા યહોવાનો સંદેશો આપતા રહ્યા

યહોવા વિશે આપણે લોકોને જણાવીએ છીએ. પણ, કોઈ વાર તેઓ આપણી મશ્કરી કરે છે. અથવા ગુસ્સે થઈ જાય છે. એના લીધે યહોવા વિશે વાત કરવાનું મન ન થાય. તમારી સાથે કદી એવું થયું છે?— બાઇબલ એક યુવાન વિશે જણાવે છે. તેમનું નામ યિર્મેયા હતું. તે યહોવાને ખૂબ જ ચાહતા હતા. પણ, તેમણે યહોવા વિશે વાત કરવાનું લગભગ બંધ કરી દીધું હતું. ચાલો યિર્મેયા વિશે શીખીએ.

યુવાન યિર્મેયાને યહોવાએ કહ્યું: ‘લોકોને ચેતવણી આપ કે તેઓ ખરાબ કામો બંધ કરે.’ યિર્મેયા માટે એ ચેતવણી આપવી અઘરી હતી. તે ડરતા હતા. તેમણે યહોવાને કહ્યું: ‘શું કહેવું એ મને ખબર નથી. હું તો હજી બાળક છું.’ યહોવાએ કહ્યું: ‘ડરીશ નહિ. હું તને મદદ કરીશ.’

યિર્મેયાએ લોકોને ચેતવણી આપી: ‘ખરાબ કામ નહિ છોડો તો, યહોવા તમને સજા કરશે.’ શું લોકોએ યિર્મેયાની વાત સાંભળી?— ના. લોકોએ તેમની મજાક ઉડાવી. તેમના પર ઘણા ગુસ્સે થયા. અરે, અમુક લોકો તો યિર્મેયાને મારી નાખવા ચાહતા હતા! યિર્મેયાને કેવું લાગ્યું હશે?— તે ડરી ગયા. યિર્મેયાએ કહ્યું: ‘હું યહોવા વિશે ફરી વાત કરીશ નહિ.’ શું સાચે જ તેમણે એવું કર્યું?— ના. યિર્મેયા યહોવાને ખૂબ ચાહતા હોવાથી તેમનો સંદેશો જણાવતા રહ્યા. એટલે યહોવાએ પણ તેમનું રક્ષણ કર્યું.

એક સમયે, અમુક ખરાબ માણસોએ યિર્મેયાને ઊંડા ખાડામાં નાખી દીધા. એ ખાડામાં બહુ જ કાદવ-કીચડ હતો. તેમના માટે કશું જ ખાવા-પીવાનું ન હતું. એ ખરાબ માણસો ચાહતા હતા કે યિર્મેયા ખાડામાં જ મરી જાય. પણ, યહોવાની મદદથી યિર્મેયા બચી ગયા!

યિર્મેયાના દાખલામાંથી તમને શું શીખવા મળે છે?— ખરું કે યિર્મેયા અમુક સમયે ડરી ગયા હતા. તોપણ, યહોવા વિશે બોલવાનું તેમણે બંધ ન કર્યું. તમે પણ યહોવા વિશે લોકોને જણાવો છો. કદાચ તેઓ તમારી મજાક ઉડાવે. ગુસ્સે થઈ જાય. તમને ડર અને શરમ લાગી શકે. પણ, યહોવા વિશે હંમેશાં જણાવતા રહો. કદી ચૂપ ન રહો. યહોવાએ યિર્મેયાને મદદ કરી. તમને પણ કરશે.