Oʼutuupüroʼu

Tü kekiwaakat nümaʼanajeejatü Jeʼwaa otta müsia naapüin shia namüin na achuntakana shia nümüin. Kekiijeena maʼin waya waapaale sümaa tü nüchiaakalü anain waya Jeʼwaa. Waaʼinrüle tia saaʼinmajeena waya suulia waaʼinrüin kasa mojusü otta aleeweena maʼin waya nümaa Jeʼwaa (Prov. 2:10-12). Müle shia watuma kateerü woʼu süpüla kaʼika süpüshuaʼa (Jud. 21, TNM). Sutuma kaainjaraliin waya jee shiale süka naatain wepijia, kapüleesü wamüin aapawaa sümaa tü achiaanakalü anain waya otta nnojotsü anain shia wamüin. Jülüjale waaʼin tü kasa anasü weʼrakat sünainjee wachiaanüin nutuma Maleiwa, wayaawata aaʼu alin maʼin waya nüpüla. Müsü suluʼu Proverbios 3:11, 12, TNM: «Tachonchee nnojo piyoutajaain sümaa tü nüchiaakalü anain pia Jeʼwaa». Süka jamüin, «nüchiaain Jeʼwaa chi wayuu aikai nüpüla». Soteesü waaʼin nücheküin Jeʼwaa anainjatüin wakuwaʼipa waneepia (Heb. 12:5-11). Süka niʼraajüin maʼin Jeʼwaa wakuwaʼipa, nüchiaain waya wanaapünaa sümaa tü choʼujaakat wamüin. Sünain ekirajaayakat tüü, wekirajaajeerü anain pienchisü kasa. w18.03 27 püt. 1, 2

Ashajüshi chi aluwataaushikai Pedro namüin na aneekajuushikana nutuma Maleiwa. Naatawai tü mma kaluʼujeejanakat naya anoujashiikana. ¿Kasache akaaliinjaka naya suʼunnaa tü alatakat namüin? (1 Ped. 4:4, 7, 12). Naashin Pedro, kamaneeinjana naya «waneʼewai nakua» namüin na neʼraajüinkana. ¿Kasa anasü neʼreetka kamaneere naya? Kotteena maʼin naya namaa na nawalayuukana. Jama piakai, ¿jamüsüche paaʼin soʼu nuunejaain pia wanee wawala nipialuʼumüin sünain ekaa? ¿Sotoyülia paaʼin tü kasa anasü alatakat pümüin soʼu tia? Kamaneere waya namüin na wawalayuukana eeshii süpüla weʼraajüin maʼin naya. Nükalioʼu Pedro choʼujaasü maʼin kottuinjanain na anoujashiikana süpüla eejiraain naya sümaa tü kasa mojusü alatakat namüin. Müinjanaʼaya neʼe waya maaʼutpünaa, kottuinjana waya namaa na wawalayuukana süka «sülüʼülüin sükalia sajaʼttüinjatüin tü kasakat süpüshuaʼa» (2 Tim. 3:1). w18.03 15, 16 püt. 1-3

Naashin Jesuu, talatüshi wanee wayuu eekai jüüjüüin nümüin chi naaʼinkai Maleiwa. Jee müsia suluʼu Roma 8:6 süküjain jamüin anaʼleeka jüüjüwaa nümüin chi naaʼinkai Maleiwa, müsü mayaa: «Masütaajule wane wayuu sünain jülüjüin naaʼin tü nüchekakat chi Naaʼinkai Maleiwa, aapüneerü wane anaa nümüin nütüma Maleiwa saaʼu taashiichipain nia suulia tü ouktaakat. Akaajasa chi eekai masütaajuin sünain jülüjüin naaʼin kaainjalaa, oukteechi nia saaliijee tia». Jüüjüüle waya nümüin chi naaʼinkai Maleiwa, anajiraajeena waya nümaa Maleiwa, aneerü waaʼin otta kateerü woʼu waneepia mapeena. Sutuma saʼakain waya wayuu mojutkana amüin tü nümakat Maleiwa, eesü süpüla sumojujaain wanoula, müsüjeseʼe wachajaainjatüin maʼin sukuwaʼipa süpüla nnojoluinjatüin sumojujaain tü jülüjakat waaʼin. Müleka wooʼulaale suulia jülüjain waaʼin tü jülüjakat naaʼin Jeʼwaa, shieerü antajaaka wekiiruʼumüin tü kasa mojusü suchuntaakat waaʼin otta shieerü waaʼinraka tia. Naashin Judas, nnojoishi «eein chi Naaʼinkai Maleiwa suluʼu naaʼin» naya wayuukana (Jud. 18, 19). w18.02 17 püt. 5; 18 püt. 7, 8

Na tottootkana otta na perümeerakana neiyajüin wayuu kanainka ayuulii mojusü. Naaʼinrüin tia süka nakaaliinjeein naya. Aaʼinmajiraapejeʼe naya suulia suʼttüin nanain tia ayuuliikat. Müsia neʼe wakuwaʼipa waya aʼyataakana nümüin Jeʼwaa, saʼakashii waya wayuu mojuka maʼin akuwaʼipa nuʼupala Jeʼwaa otta eeshii waʼyataale namaa. Kapüleesü maʼin tia wamüin süka eein süpüla washatüin tü nakuwaʼipakat. Alüʼütsü maʼin sükalia süpüla sajaʼttüin tü kasakalüirua jee nnojotsü kasajatüin sümüin wayuu tü kasa anakat otta tü mojukat nümüin Maleiwa. Suluʼu tü chiiruaajatkat karaloʼuta nüshajaka Pablo nümüin Timoteo, nüküjain jamüinjatüin sukuwaʼipa wayuu maaʼutpünaa yaa (2 Tim. 3:1-5). Mayaainjeʼe wayoutuin nakuwaʼipa naya wayuukana, eeinjatü waaʼin suulia wanaawain waaʼin namaa, suulia washatüin tü nanüikipalakat otta tü nakuwaʼipakat (Prov. 13:20). Eepajaʼa tü waaʼinrajatkat suulia washatüin tü akuwaʼipaa mojusükat otta tü waaʼinrajatkat süpüla wakaaliinjain wayuu sünain eʼraajaa Jeʼwaa. w18.01 27 püt. 1, 2

Soʼu tü juyakat 33, süchikijee nüsoʼiraain aaʼin Jesuu eeʼiyataashi nia namüin maʼaka 500 wayuu. Eejana tooloyuu, jieyuu jee waneinnua tepichi naʼaka naya wayuukana. Eesüjaʼa shiale wanaa sümaa nüküjain tü wetsiikulo waashajeʼerüitpakat (1 Cor. 15:6). Nuluwataain Jesuu na nikirajüinkana sünain ekirajaa wayuu nüchiki. Naashin niakai, na wayuu oushikajaweekana süchiirua nukuwaʼipa ekirajaainjana nüchiki otta woutiisainjana naya (Mat. 11:29, 30). Na wayuu aneekana akuwaʼipa noʼuluʼu Maleiwa, nayaawatüinjatü saaʼu niain aneekünüin Jesuu nutuma Maleiwa süpüla shikeraajüin tü keeʼireekat naaʼin. Nayaawatüle saaʼu tia, aneerü noʼuluʼu Jeʼwaa woutiisale naya. Watta maʼin naalii na wayuu aküjünakana achiki suluʼu tü Wiwüliakat, ayaawatakana saaʼu kasain sünainpünaain tü woutiisaakat otta nnojoishii kakaliakuʼu müin süpüla woutiisaa (Aluw. 2:41; 9:18; 16:14, 15, 32, 33). w18.03 5 püt. 8

Suluʼushi waya wanee mma eere jouluin maʼin tü amaʼüjirawaakalü akuwaʼipa otta shikirajünüin maʼin alawaa nüchiki Maleiwa. Eesü tia sutuma tü iküleesiairua nnojotkat shiimain, tü kanüliakat Babilonia tü Miyoʼusükat, tü shipiakat yolujaa saashin tü Wiwüliakat (Alat. Map. 18:2). Akanasaʼa wayakana, müshi aka saaʼin wayuu suluʼujeejana mma naatajatü, naata wakuwaʼipa noulia na wayuu manoujainsaliikana, müshiijeseʼe nemeeʼerainpalain waya (Mar. 13:13). Warütkaa nünainmüin Jeʼwaa maʼaka naaʼinrüin shia Daniel. Weʼitaale maʼin waaʼin nünain Jeʼwaa, nnojorüle yaletayaain waaʼin jee woonoole sümaa tü nuluwataakalü anain waya, kojuteena maʼin waya noʼuluʼu (Ageo 2:7). Wainma kasa eeka süpüla natüjain na wayuu kachonshiikana nünainjee nüshi otta nii Daniel. Aitüjüiya Jeʼwaa nüpüla Daniel jintüliiwaʼaya nia eerejeʼe saʼakajachin nia wayuu mojulaasüirua. Niapejeʼe ekirajüin nia chi nüshikai sümaa tü niikat süpüla alinjachin Jeʼwaa nüpüla (Prov. 22:6). Jaʼyasü naaʼu naya wayuukana alin maʼin Jeʼwaa napüla, müsüjeseʼe neʼitaain Danielüin nünülia chi nachonkai. «Nia Maleiwa Akaaliinjaka taya», maluʼut tia anülieekat (Dan. 1:6, TNM, noota). Jiakana kachonshiikana, nnojo süshapalaain jaaʼin jikirajapa na jüchonniikana nüchiki Jeʼwaa. Jee ayataʼaya jikirajüin naya waneepia (Éf. 6:4). Juʼuraaja namaa otta juchunta nümüin Maleiwa naaʼu. Jüchajaale maʼin sukuwaʼipa süpüla kojutuinjatüin namüin tü shiimainkat, eʼreena jia kasa anasü sünainjee tia (Sal. 37:5). w18.02 6 püt. 12; 7 püt. 14, 15

Asülajüshii waya nümüin Jeʼwaa süka shiain wanee sukuwaʼipa süpüla waʼwaajüin nia. Niʼrüin chi aluwataaushikai Juan nutuma Jeʼwaa tü namakat na nüchepchiakana Maleiwa chaa iipünaa, wanaa sümaa namüin: «Maleiwakalee, waʼwaajüin pia süka piainjaʼa neʼe piakai aluwataain waaʼu. Alanaʼaleeshia maʼi pia sünain anain je sünain pülashin, süka piainjaʼa kakumalain kasakat süpüshua suluʼu tü püchekakat paaʼinyaka. Je ayatsüjaʼa shia waneepia maaʼulu yaa süka alejatüinjaʼa shia pütüma» (Alat. Map. 4:11). Shiimain niain neʼe Jeʼwaa nümüiwaʼa anaka süpüla waʼwaajüin, müsüjeseʼe waapüin nümüin tü kasa kojutusü eekat wamaʼana. Jamüshiijaʼa na israeliitakana, nuluwataain naya Jeʼwaa nükajee Moisés süpüla naainjawalin apünüinsü miʼiraa süpüla juyaka. Sünain tia miʼiraakalü asülajünapuʼu amüinchi Jeʼwaa, müsüjeseʼe nnojoliipuʼuin noʼunuin na israeliitakana sünain tia miʼiraakat sümaa majapüitpain naya (Deut. 16:16). Akaʼaya maaʼulu yaa, waʼwaajüin Jeʼwaa sükajee tü kasa wasülajakat nümüin otta nnojotsü waʼatapajüin keeʼirakain shia wamüin. Sükajee tia, weeʼiyatüin kojutuin wamüin wakaaliinjain nupueulose Jeʼwaa sünain tü aʼyatawaa saaʼinrakat. w18.01 16 püt. 4, 5

Anuujeseʼe nünüiki Jesuu: «Anakaja joonoole sümaa tanüiki [...]. Müleka jüüjüüle jia tamüin, taapeerü jümüin tü eemerawaakat süka anamiain maʼi taya» (Mat. 11:29-30). Eeshii mapüsale maʼin waya, ayatapejeʼe oʼunuin waya sünain tü outkajawaakat jee ayatshii waya aküjain pütchi. Shiasaʼa waleʼejapa sünainjee tü outkajawaakat jee sünainjee aküjaa pütchi, anasü waaʼin jee katsüinsü waaʼin süpüla eejiraain waya sümaa tü kasa alatakat wamüin. Shiimain katsüin waaʼin waʼyataale nümüin Jeʼwaa. Jülüjaa waaʼin sukuwaʼipa wanee wawala. Mapüsawaisü maʼin saaʼin (síndrome de fatiga crónica, sünülia tü sünainkat), mojusü saaʼin otta aiwaisü shikii waneepia. Isawaisüjeseʼe süchiki oʼunaa sünain tü outkajawaakat. Shiasaʼa soʼu wanee kaʼi süchikijee suʼunuin sünain tü outkajawaakat, müsü sünüiki: «Tü pütchi taapajakat sünain tü outkajawaakalü aashajaasü süchiki matsüinre nunoula wanee wayuu. Anasü maʼin süküjia tia pütchikat, antüsüjeseʼe shia suluʼu taaʼin. Tatüjaaitpa aaʼu choʼujaain maʼin toutkajaain namaa na tawalayuukana». Talatüsü maʼin saaʼin tia wawalakat saaʼu suʼunuin sünain tü outkajawaakat. w18.01 5 püt. 6, 7

¿Kasa paaʼinrajatka wainmajüle naaʼin wanee püchon süchiki tü nunoujakalü anain süchikijee woutiisain nia? Eesüjaʼa kamalainre nümüin püchon tü naaʼinrakat na manoujainsaliikana. Eesüjaʼa wainmajüle naaʼin süchiki shiimainre anain sukuwaʼipa wayuu saaʼinrüle tü sümakat tü Wiwüliakat (Sal. 73:1, 3, 12, 13). Eeshi süpüla ayatüin jee nuuʼulaain suulia aʼyatawaa nümüin Jeʼwaa sutuma tü paaʼinrakat jee tü pümakat nümüin shiʼipajee tia. Nnojo jashichin pia nümüin saaʼu tia, jaʼitaichi jintülin jee jimaʼalin nia. Shia anaka püküjale nümüin alin nia püpüla jee pükaaliinjeein nia. Chi jintüi woutiisakai naapüin naaʼin nümüin Jeʼwaa. Nüpansaajüin nünüiki nümüin Jeʼwaa alinjachin nia nüpüla jee niʼyataainjachin nümüin sooʼopünaa kasa süpüshuaʼa (Mar. 12:30). Kojutusü nümüin Jeʼwaa wapansaajüle wanüiki nümüin sünain waapüinjatüin waaʼin nümüin jee kojutuinjatü shia wamüinya (Ecl. 5:4, 5). w17.12 19, 20 püt. 16, 17

Sütüjaa aaʼu Marta wanaa namaa na aʼyataakana waneepia nümüin Maleiwa süsoʼiraainjatüin saaʼin wayuu mapeena. Jülüjataa waaʼin tü nuchuntakat Jeʼwaa nümüin Abraham süchiki tü naaʼinrajatkat nüka Isaac, chi nüchon naʼatapajakai maʼin paala. «Je müshia Isaac, chi püchon waneeshikai, aishikai maʼi püpüla, anakaja jooluʼu pümaale nia chamüin suluʼumüin tü mma kanüliakat Moria. Je chaʼaya, saaʼu wane uuchi teeʼiyateetkat pümüin, puʼuteechi aaʼin sünain naʼajünüin süpüla piiʼiyatüinjatüin tojut tamüin», müshi Jeʼwaa nümüin (Gén. 22:2). ¿Jamakajasaʼa naaʼin Abraham sutuma tü aluwataanakalü anain nia? Nüpansaajüin nünüiki Jeʼwaa nümüin Abraham anakuwaʼipaleerüin wayuu sünainjee nuuʼuliwoʼu (Gén. 13:14-16; 18:18; Roma 4:17, 18). Akaʼaya shia, nüküjain Jeʼwaa nümüin shiainjatüin nakajee «na nuuʼuliwoʼukana Isaac» eeinjatüin tia anaakat (Gén. 21:12). ¿Jamataaleetka sukuwaʼipa tia nuʼutule naaʼin chi nüchonkai? Nüküjain mapa Pablo nunoujain Abraham eein süpüla süsoʼireʼennüin naaʼin Isaac nutuma Maleiwa (Heb. 11:17-19). Nnojotsü nütüjaain aaʼu Abraham joʼujeechin nüsoʼiraain aaʼin chi nüchonkai outule nia. Niʼitaapejeʼe naaʼin sünain nüsoʼiraajeechin aaʼin Isaac nutuma Jeʼwaa. w17.12 6, 7 püt. 12-14

Maʼaka naaʼin Pablo, washatüinjatü nukuwaʼipa Jeʼwaa, süka jamüin, keeʼireein naaʼin shiyaawajaain wayuu suulia saainjala süpüla katüin soʼu (2 Ped. 3:9). Süpüla washatüin nukuwaʼipa Jeʼwaa alinjatü wayuu wapüla. Sümülialaale waaʼin saalin wayuu, aküjeena maʼin waya pütchi anasü namüin otta talateerü waaʼin sutuma. Kojutusü wamüin katüin soʼu wayuu maʼaka kojutuin shia nümüin Jeʼwaa. Weeʼiyatüin tia wanaa sümaa keisalain waya sümüin wakuwaʼipa suulia eewawaa woʼunirapa weʼejena, waʼyataapa, wakumajapa wanee kasa otta woʼunapa sünain wanee outkajawaa eere waʼwaajüin Jeʼwaa. Kojutuinjatü wamüin katüin soʼu wayuu, keisalainjana waya sümüin wakuwaʼipa otta aaʼinmajiraainjana waya suulia ayuulii. Kojutuleeinjatü tia wamüin suulialeʼeya akanajaa nneerü otta ashapajawaa sünain aaʼinraa wanee kasa. Anainjatü waneepia watuma tü kasa waaʼinrakat maʼaka naaʼinrüin shia Jeʼwaa. Jamüshiijaʼa na laülaashiikana, jülüjainjatü naaʼin sukuwaʼipa napüshi otta nakuwaʼipa na wawalayuukana (Prov. 22:3). Naküjale pümüin na laülaashiikana tü sukuwaʼipainjatkat wanee kasa putuma jee shiale wanee pütchi suluʼuka tü Wiwüliakat, oonooinjachi pia namaa (Gal. 6:1). Kojutule wamüin katüin soʼu wayuu nnojoleena süsalain waya (Deut. 19:10). w17.11 18 püt. 11, 12

Anashaatasü maʼin tü naʼatapajakat na nuwalayuukana Kürisüto, chainjana naya chaa iipünaamüin wanaa nümaa. «Tü kasa anasü nünaajakat tapüla chi Maleiwakai» müshi Pablo süchiki tia (Filip. 3:14). Chainjana chaa iipünaa na wawalayuu aneekuushiikana süpüla aluwatawaa wanaa nümaa Jesuu otta nakaaliinjeena na wayuukana süpüla anainjanain maʼin naya (Alat. Map. 20:5, 6). Eekajasaʼa tü wane anneetkalüirua, shia naʼatapajaka katüinjatüin noʼu süpüla kaʼikat süpüshuaʼa yaa Mmapaʼa paʼaraiisüpa shia. Talatüshii maʼin naya waneepia saaʼu naʼatapajüin tia (2 Ped. 3:13, TNM). Nükaaliinjeein Pablo na nuwalayuu chainjanakana chaa iipünaa süpüla ayatüin waneepiain naya nümaa Jeʼwaa otta süpüla nasaʼwatüin tü naapajatkat Maleiwa namüin. «Ayata jülüjain jaaʼin tü kasa chakat iipünaa suulialeʼeya tü kasa yaakat mmoluʼu», müshi Pablo namüin (Col. 3:2, TNM). Shiainjatü jülüjaka naaʼin tü kasa naapajatkat Maleiwa namüin naashin Pablo (Col. 1:4, 5). Paʼatapajüle katüin poʼu waneepia yaa Mmapaʼa jee chainjachire pia chaa iipünaa, jülüjainjatü paaʼin waneepia tü kasa anashaatasü naapüinjatkat Jeʼwaa pümüin (1 Cor. 9:24, 25). w17.11 27 püt. 1, 2

Suluʼu tü karaloʼutakat Talata waaʼin sünain eeʼirajaa nümüin Jeʼwaa, wainma jayeechi makalü aka saaʼin nünüiki wanee wayuu eekai nuʼuraajüin. Müsü waküjakai saaʼin nümüin Jeʼwaa tü suluʼukat waaʼin weeʼirajapa tia jayeechikalüirua. Eesü waneirua jayeechi anaka süpüla watütüleʼerajiraain waaʼin namaa na wawalayuukana, waaʼinrüin kasa anasü otta aijiraain waya (Heb. 10:24). Müsüjeseʼe anain jülüjale waaʼin shiʼira tü jayeechikalüirua otta watüjale süpüleerua weeʼirajüin shia. Süpüla wountuin waaʼinrüin tia, waapajeein tü jayeechi suluʼukat jw.org tü kanainkat coro otta orquesta. Wekirajaale sünain tü jayeechikalüirua chaa wepialuʼu, atüjeena waya süpüleerua emetuluin weeʼirain otta eeʼirajeena waya süka süpüshuaʼa waaʼin. Nnojo motuin jaaʼin choʼujaain maʼin weeʼirajüinjanain nümüin Jeʼwaa süpüla waʼwaajüin nia. Tia shia wanee sukuwaʼipa süpüla weeʼiyatüin sünain alin wapüla Jeʼwaa otta waapüin analuʼut nümüin (Isa. 12:5). Weeʼirajüle süka süpüshuaʼa waaʼin, nashateerü tia wanainjee na waneinnua. Wayakana wapüshuaʼa eeshii süpüla waʼwaajüin Jeʼwaa sükajee weeʼirajüin nümüin, jaʼitainna jimaʼaliin, laülaayuuin otta jekenale waya sünain anoujaa. Weeʼiraja nümüin Jeʼwaa süka süpüshuaʼa waaʼin. Talata waaʼin sünain eeʼirajaa nümüin Jeʼwaa. w17.11 8 püt. 18, 19

Watta naalii na wayuu antakana suluʼujee mma eere süpülajünüin aküjaa pütchi. Eiwalajatia aküjünüin Nünüiki Jeʼwaa namüin süka eein wawalayuu aküjakana maʼin pütchi suluʼu tü mma nantakalü aluʼumüin (Mat. 13:19, 23). Wainma na atütülaakana aaʼin sutuma tü outkajawaakat jee nayaawatamaata aaʼu eein chi Maleiwakai wamaa (Mat. 11:28-30; 1 Cor. 14:24, 25). Waküjüinjanapa pütchi namüin na wayuu antakana suluʼujee wanee mma naatajatü, eejüinjatü waaʼin otta kekiinjana waya (Prov. 22:3). Waapajeein nanüiki naya wayuukana naküjapa wamüin süchiki tü shapaakalü atuma naaʼin, nnojoliipejeʼe waya aashajaainjanain süchiki poliitika. Waaʼinrüinjatü tü münakat wamüin sutuma Weteet otta tü namakat na aʼyataakana neʼipajee na sülaülashiikana mma suulia jamajüin waya atumawaa. Süka naatawalin tü nanoujakalü anain na antakana suluʼujee wanee mma naatajatü otta naatawalin nakuwaʼipa, jülüjeesü waaʼin wakuwaʼipa suulia mojuin naaʼin watuma jee müsia weeʼiyatüinjatü nojutü namüin. Jamüsüjaʼa suluʼu waneeirua mma, eesü tü kuluulu mojukalü süpüla saʼatüin tü jieyuukalüirua naashin na wayuu chejeʼewaliikana suluʼujee tia mmakat. Müsüjeseʼe jülüjainjatüin naaʼin na wawalayuu jieyuukana tü naʼanaayakat suulia mojushiin shia namüin na wayuu naküjakana amüin pütchi. w17.05 8 püt. 17, 18

Wachunteein nümüin Jeʼwaa chi naaʼinkai süpüla kamaneein otta anamiain waya namüin na wapüshikana waashajaapa namaa. Nnojoishii waya peʼipaainjanain namaa sutuma nnojoluin shiimain tü nanoujakalü anain. Akaʼaya airuʼurule nanüiki wamüin, anasü washatüle nakuwaʼipa na aluwataaushiikana. Anuu nünüiki Pablo: «Shiʼrüle wayumüin wayuu wamüin, achuntüshii waya wane anaa nümüin chi Maleiwakai saaʼu. Müleka jashichuukale wamüin sünainjee waküjain nüchiki Cristo, wachecherüin waaʼin süpüla. Je müleka mojule sünüiki wamüin wojuuna, anashii waya sümüin» (1 Cor. 4:12, 13). Shiimain aleewajiraain waya namaa na wapüshikana saaʼujee kamaneein waya namüin waashajaapa namaa. Shiapejeʼe anaʼleein maʼin laülaale waaʼin noʼupala (1 Ped. 3:1, 2, 16). Piiʼiyata namüin na püpüshikana sükajee tü pukuwaʼipakat, talatüin naaʼin wayuu sümaa nuʼwayuuse niʼyataale nümüin Jeʼwaa otta sutuma naaʼinrüin tü sümakat tü Wiwüliakat, anasü shipijia nüchonnii nutuma jee anasü naaʼin waneepia. Jaʼitainna nnojoluin naapaain sümaa tü shiimainkat na wapüshikana, talatüshii waya süka anain wakuwaʼipa noʼuluʼu Jeʼwaa. w17.10 12, 13 püt. 13, 14

Watta naalii wayuu eeʼiranajaaka akuwaʼipa maaʼulu yaa sutuma nekirajaain sünain tü Wiwüliakat. Nnojotpejeʼe jeketüin müin sukuwaʼipa wayuu, majanainka na anoujashii eejanakana nakalioʼu na nikirajüinkana Jesuu, neeʼiratüin nakuwaʼipa (1 Cor. 6:9-11). Süchikijee nüküjain Pablo süchiki nakuwaʼipa na wayuu nnojoliinjanakana suluʼuin Nuluwataaya Maleiwa, müshi nia namüin anoujashiikana: «Shia tü naaʼinrapüʼükat waneeirua jaʼaka paalainka». Neeʼiratüin nakuwaʼipa naya anoujashiikana sutuma Nünüiki Maleiwa jee nutuma chi naaʼinkai Maleiwa. Ayatapajaʼa eein na aaʼinrakana kasa mojusü süchikijee nekeroluin sünain anoujaa. Saashin tü Wiwüliakat, eejachi wanee anoujashii chainjachikai chaa iipünaa ojuʼitinnaka naʼakajee na wane anoujashiikana sutuma kaainjalain nia. Shiasaʼa niyaawajaapa suulia naainjala, ekerotushi nüchikuaʼa sünain anoujaa (1 Cor. 5:1-5; 2 Cor. 2:5-8). Talatüsü waaʼin sutuma wainmain na wawalayuu anouteʼerakana nakuwaʼipa sutuma tü Nünüikikat Maleiwa. Sutuma naapüin shia wamüin, atüjainjana waya ekirajaa tü shiimainkat süka. w17.09 21, 22 püt. 2, 3

Nia Jeʼwaa shikiishikai tü aliikalü apüla wayuu (1 Juan 4:7). Lotusü sukuwaʼipa tü saalinkat wayuu nüpüla Jeʼwaa, agápe sünülia tia saalinkat wayuu sutuma tü Wiwüliakat. Lotule sukuwaʼipa saalin wayuu wapüla, nnojoleena neʼe alin naya wapüla, aaʼinreena waya kasa anasü napüleerua. Akaʼaya waya, talateena maʼin sümaa anain waaʼin. Aitüjülia wayuu nüpüla Jeʼwaa süpülapünaa nukumajüin Adán sümaa Eva. Müsüjeseʼe anain maʼin sukumajia tü Mmakat nutuma. Nukumajüin shia süpüla eeinjatüin wayuu waneepia süpaʼa otta eesü nutuma süpüshuaʼa tü choʼujaakat süpüla katüinjatüin soʼu wayuu sümaa talatüin naya. Naaʼinrüin Jeʼwaa tia süpüla anainjatüin wakuwaʼipa, nnojotsü süpülajatüin anain nukuwaʼipa niakai. Akaʼaya nia, niʼitaain na palajanakana wayuu suluʼu tü paʼaraiisükat süpüla eeinjanain naya süpüla kaʼikat süpüshuaʼa. w17.10 3 püt. 1, 2

Anuu sooʼomüin nünüiki Santiago: «Kachekarale jia suʼutku wayuu, shiimüin sünain jiain kaainjaraliin sükajee tia. Je kasalajaneerü jümüin tia süka moonooloin jia sümaa tü ashajuushikat» (Sant. 2:9). Aire wapüla wayuu, nnojoleena mojutuin wamüin na nnojoliikana koleejiain namaiwa, na naatakana eʼiruku jee na maʼletsekana. Shiimainjatü alin wayuu wapüla süpüla nnojoliinjanain waya kachekalaʼatain wayuu. Shiimainre alin wayuu wapüla, nnojoleena waya akulajaain aaʼin sünain kamanewaa, nnojoleena waya achumujüin jee nnojoleerü pülayaain waaʼin (1 Cor. 13:4). Makalaka choʼujaain watüjain aʼatapajaa, waaʼinrüin kasa anasü sümüin wayuu jee nnojoluin yaletayaain waaʼin waküjapa pütchi (Mat. 28:19). Müle wakuwaʼipa, anajiraajeena waya namaa napüshuaʼa na wawalayuukana. Aijiraale waya, paaʼinwajiraajeena na wawalayuukana jee kojuteechi Jeʼwaa natuma, jee müsia poneerü maʼin saaʼin wayuu tü wakuwaʼipakat sümaa nekirajaweejeenain sünain tü shiimainkat. Anuujeseʼe sünüiki tü Wiwüliakat: «Aijiraale jia jüpüla, alanaʼaleejeeria maʼi sünain anain shia suulia süpüshua tü kasa anasü jaaʼinrakat, süka paaʼinwajiraajeenain jia sünain anoujaa sütüma. Je talateerü naaʼin chi Maleiwakai sütüma tia» (Col. 3:14). w17.08 26 püt. 18, 19

Akaʼaya wayakana, amülialaainjatü waaʼin naalin na wayuu nnojoyüliikana eʼraajüin Maleiwa, süka jamüin, eeyüliain süpüla neeʼiratüin nakuwaʼipa süpüla aleewain naya nümaa Jeʼwaa. Nnojotsü keeʼireein naaʼin Jeʼwaa amüloulin wayuu (2 Ped. 3:9). Ayatüinjanakalaka waya aküjain pütchi sümüin wayuu nnojoluiwaʼaya süntüin nükalia Jeʼwaa. Waaʼinrüinjatü tia süpüla anainjatüin nakuwaʼipa sünainjee sümülialaain naaʼin Jeʼwaa naalin. Eeshii süpüla wamüliajüliin wayuu washatüle nukuwaʼipa Jesuu. Wanaa sümaa niʼrüin Jesuu tü wayuu wattakat saalin oʼunaka nüchiirua, «nümüliajüin naya süka müliain saaʼin atümaa otta walakatüin shia maa aka saaʼin anneerü eekai marüleejuuin». Nuʼttakalaka Jesuu sünain ekirajaa naya sünain kasa wainma (Mat. 9:36; Mar. 6:34). Kaaliinsü wayuu nüpüla Jesuu, nnojotsü müin nukuwaʼipa maʼaka naaʼin na fariseokana (Mat. 12:9-14; 23:4; Juan 7:48, 49). ¿Müsüche wakuwaʼipa maʼaka naaʼin Jesuu sünain wakaaliinjeein na wayuukana süpüla neʼraajüin Jeʼwaa? w17.09 11 püt. 6; 12 püt. 9

Jimaʼaishi nia soʼu chajachin püreesain nia chaa Egipto. Eetaayaai neʼe jülüjain naaʼin soʼu tia, niainjachin niʼipajanain faraón mapa. Jee nnojotsü jülüjain naaʼin niainjachin aneekünüin nutuma Jeʼwaa süpüla akaaliinjaa nüpüshi suulia outaa sutuma jamü (Gén. 40:15; 41:39-43; 50:20). Wainmaleesia tü naaʼinrakat Jeʼwaa nüpüleerua José suulialeʼeya tü nuchuntakat nümüin. Jülüjataa waaʼin jooluʼu tü alatakat sümüin Sara. Nnojotsü antayaain suluʼu saaʼin kachoinjatüin shia süka laülaairüin maʼin shia. Nükaaliinjapejeʼe shia Jeʼwaa süpüla kachoinjatüin. Talatashaatasü shia nümaa Isaac, chi süchonkai. Eeyaai kachoinjatüin shia saaʼinruʼu (Gén. 21:1-3, 6, 7). Watüjaa aaʼu nnojoleerüin naaʼinrüin Jeʼwaa wanee kasa pülasü wapüleerua maaʼulu. Nunouteʼereerü süpüshuaʼa tü müliaa weʼrakat suluʼupa waya tü mma jeketkat. Akaʼaya waya, nnojotsü wachuntuin nümüin Jeʼwaa naaʼinrüinjatüin wapüleerua kasa eekai ponuin saaʼin wayuu. Watüjaapejeʼe saaʼu wainmain kasa anashaatasü naaʼinraka Jeʼwaa napüleerua na aʼyataashiikana nümüin namaiwajannuukana. Jee matüjüinsai nia aʼwanajawaa nukuwaʼipa (Isa. 43:10-12). Sutuma tia, watüjaa aaʼu nükaaliinjeenain waya süpüla waaʼinrüin tü nuluwataakalü anain waya (2 Cor. 4:7-9). Jüüjüüle waya waneepia nümüin Jeʼwaa, nükaaliinjeena waya süpüla eejiraain waya sümaa tü alatakat wamüin. w17.08 13 püt. 13, 14

Piʼyataale waneepia nümüin Jeʼwaa, namaajeechi pia na wawalayuu aʼyataakana waneepia nümüin. Sutuma tia, laülaajeerü paaʼin sünain anoujaa. Wainma wawalayuu anakana akuwaʼipa sümaa naʼwayuuse sutuma noʼttatüjüliin sünain pürekutsooliin naya tepichijaiwaʼaya naya. Eeshii wawalayuu pürekutsoottüjüliikana süpülapünaa kaʼwayuusein naya otta ayatüshii naya pürekutsooliin sümaa naʼwayuuse (Roma 16:3, 4). Anuu sünüiki Salmo 20:4 nüchiki Jeʼwaa: «Kasataalejeseʼe naapüin Jeʼwaa pümüin tü keeʼireekat paaʼin sümaa anakuwaʼipalüin nutuma süpüshuaʼa tü paaʼinrakat». Püneeküinjatpa tü paaʼinrajatkat, anasü jülüjale paaʼin kasain maʼin tü paaʼinreekat. Anasü jülüjale paaʼin tü naaʼinrakat Jeʼwaa maaʼulu jee tü eekat süpüla paaʼinrüin sünain aʼyatawaa nümüin. Shiasaʼa süchikijee tia, shia püneeka aaʼinraa tü anakat noʼuluʼu Jeʼwaa. Piʼyataale waneepia nümüin Jeʼwaa otta kojutule nia pümüin, talateechi maʼin pia. Talateerü maʼin «paaʼin sünain aaʼinraa tü keeʼireekat naaʼin Jeʼwaa otta naapeerü pümüin tü suchuntakat paaʼin» (Sal. 37:4, TNM). w17.07 26 püt. 15-18

Anawaisü wanüiki nüchiki chi eekai naaʼinrüin wanee kasa anashaatasü maʼin jee shiale sutuma anain maʼin tü nunoulakat. Niapejeʼe waʼwaajüinjachika maʼin Jeʼwaa sükajee tü wanüikikat. Waʼwaajüinjachi süka pülashin maʼin nia; weʼrüin tia sünain tü kasa nukumajakat. Akaʼaya nia, waʼwaajüinjachi süka aishaatain waya nüpüla, nüjütüinjeseʼe chi Nüchonkai yaa mmapaʼamüin süpüla naapajiraain nikii waaʼu. Keeʼireeshaatasü naaʼin chi ashajakai Salmo 147, nuʼwaajüinjachin Jeʼwaa. Jee müsia, nütütüleʼerüin saaʼin wayuu süpüla saaʼinrüinjatüin tia (Sal. 147:7, 12). Nnojotsü watüjaain aaʼu jaralin kashajalain Salmo 147. Eesüjaʼa katüle noʼu soʼutpünaa taashin nutuma Jeʼwaa na israeliitakana Babiloniajee, wanaa sümaa nuʼunirüin naya Jerusalénmüin (Sal. 147:2). Nuʼwaajüin Jeʼwaa chi ashajakai Salmo 147 sutuma nuʼunirüin nachikuaʼa na wayuu nupueulosekana chaa noumainpaʼamüin süpüla naʼwaajüin nia. Nnojotpejeʼe shiain neʼe tia nuʼwaajaka anainjee Jeʼwaa wayuukai chia. ¿Jama piakai? ¿Kasa puʼwaajüinjachika anainjee Jeʼwaa? (Sal. 147:1). w17.07 15 püt. 1-3

Nütüjaa aaʼu Jesuu kapüleejeerüin namüin na nikirajüinkana ousütaa sünain tü kasa choʼujaakat namüin maʼaka naaʼin chi wayuu nukuentajakai achiki. ¿Jamüshi «tü washirüü mojusükat» nümaka Jesuu sümüin tü koroloirua sümaʼanaka wayuu? Nnojotsü süküjain tia tü Wiwüliakat. Shia süküjaka nnojoluin sünainpünaain tü keeʼireekat naaʼin Jeʼwaa tü sukuwaʼipakat washirüü. Jamüshijaʼa suluʼuiwaʼaya Adán otta Eva tü apainkat Edén, alanaʼaleesia sünain wainmain tü naapakat Jeʼwaa namüin suulialeʼeya tü choʼujaakat namüin (Gén. 2:15, 16). Mapa, naapapa Jeʼwaa chi naaʼinkai namüin na nikirajüinkana Jesuu «nnojoishi eekai sümüin naaʼin nüleʼeruʼu: ‹Takorolo tüü tamüiwa›. Napaajiraain süpüshuaʼa tü kasa eekat namaʼana» (Aluw. 4:32). Jee müsia, nüküjain Isaías süntajatüin wanee kaʼi eere shiküinjatüin wayuu süpüshuaʼa süchon süʼttia (Isa. 25:6-9; 65:21, 22). Sümaʼinruʼu süntüin tia, choʼujaasü kekiinjanain maʼin na nikirajüinkana Jesuu süpüla nepijaain süka «tü washirüü mojusükat» sümaa anain nakuwaʼipa noʼuluʼu Jeʼwaa (Luc. 16:8). w17.07 4 püt. 5, 6

Süküjain tü karaloʼutakat Job wanaawainjatüin tü jülüjakat waaʼin sümaa tü jülüjakat naaʼin Jeʼwaa. Suluʼu tia karaloʼutakat, nüküjain Satanaa nuuʼulaajeechin Job suulia aʼwaajaa Jeʼwaa müleka müliashaatüle nia. Nuchuntuin Satanaa nümüin Jeʼwaa naaʼinrüinjatüin tia kasa mojusükat nümüin Job, nnojotpejeʼe naaʼinrüin Jeʼwaa tia. Nuuʼulaain Jeʼwaa nuuʼulakünüin aaʼin Job nutuma Satanaa. Outushii na wayuu aʼyataakana nümüin Job, ajaʼttüsü süpüshuaʼa tü kasa nümaʼanajatkat jee outushii na polooshiikana nüchonnii. Sutuma tü kasa naainjakat Satanaa, müshi niakai aaʼin kasirüin Maleiwa tü kasa mojusü alatakat nümüin Job (Job 1:13-19). Mapa ayuuishi Job nutuma Satanaa, keemasü maʼin sümaa alin tia ayuuliikat (Job 2:7). Wanee kasa mülialeeka atuma naaʼin Job shia shiyoujuin nia tü nuʼwayuusekat otta na apünüinshiikana wayuu aleewayaakana nümaa (Job 2:9; 3:11; 16:2). ¿Shiimainche tü nümakat Satanaa? Nnojo, naʼalain neʼe. Ayatüshia waneepiain Job nümaa Jeʼwaa (Job 27:5). w17.06 17 püt. 9, 10

Akaʼaya maaʼulu yaa, aʼyataainjachi chi toolokoi süpüleerua nuʼwayuuse jee nüchonnii. Aʼyataashaatashii maʼin naya süpüla naapüin sümüin napüshi tü choʼujaakat sümüin. Shapaapejeʼe maʼin naaʼin sutuma tia. Maaʼulu yaa, aishaatasü maʼin shiiʼiree aʼyatawaa, naya neʼe wainmakana na achajaakana aʼyatawaa. Sutuma tia, wainma kasa saainjaka wayuu shiiʼiree saapünüin sümüin wanee aʼyatawaa. Wainma wayuu ouktiraaka sünain aʼyatawaa sümaa nnojoluin wainmain nakanain. Ooʼulaka müsia tü konpainyiiakalüirua, shiʼyateʼerüin maʼin wayuu süka nnojoluin shikerojireein sooʼomüin aʼyataannuu. Shiasaʼa sünainjee tia, shapaasü naaʼin na aʼyataakana suluʼu tü konpainyiiakat, mapüsashii otta ayuuishii naya sünainjee tü naʼyataainkat. Mmotshii nayayaa seema nojutünüin suulia naʼyataain sutuma nnojoluin naaʼinrüin süpüshuaʼa tü nuluwataakalü anain naya chi nalaamainkai. Wayakana anoujashiikana, nia woonooka amaa anüikii waneepia Jeʼwaa suulialeʼeya wayuu jee nuulialeʼeya chi walaamainkai (Luc. 10:27). Aʼyataashii neʼe waya süpüleerua tü choʼujaakat wamüin otta süpüla ayatüin waʼyataain nümüin Jeʼwaa. Eejüinjatpejeʼe waaʼin suulia sumojujaain wakuwaʼipa nümaa Jeʼwaa sutuma tü waʼyataainkat. w17.05 22, 23 püt. 5-7

Na wawalayuu jekenakana sünain aʼyatawaa nümüin Jeʼwaa, eeshii nachuntüle kaaliinwaa namüin na kakaliainakana anoujain süpüla nekirajüin nachonnii nüchiki Jeʼwaa. Nuchuntule wamüin wanee wawala wekirajüin wanee nüchon sünain tü Wiwüliakat, sotuinjatü waaʼin nnojoluin laülaain waya naaʼu chi nüchonkai (Éf. 6:1-4). Akaajaʼa neʼe suchuntunüle wamüin wekirajüinjachin nüchon wanee wayuu mamalainka amüin tü sümakat tü Wiwüliakat, acheküsü sotuinjatüin waaʼin nnojoluin wayain laülaain naaʼu chi jintüikai. Wekirajapa chi jintüikai, yalainjana waya namaa na wayuu kachonkana nia, nnojoliire naya, eeshi süpüla niain wamaain wanee wawala laülaakai aaʼin sünain anoujaa. Nnojoire chia, wekirajüinjachi chi jintüikai eere wainmain wayuu. Müinjatü sukuwaʼipa tia suulia mojujain pütchi wachiki. Mapa süchikijee tia, nayainjana ekirajaka nia na wayuu kachonkana. Süka jamüin, niain Jeʼwaa aluwataaka naya sünain tia. w17.06 8 püt. 15, 16

Nnojorüle wanaawain naaʼin na tepichikana sümaa nakuwaʼipa nashi jee nei, eeshii süpüla nnojoluin naashajaweein süka nanüiki otta nnojoluin nanoujeein. Shiainjatü kapülaleeka naaʼin na wawalayuu kachonshiikana «tü jalouikat» namüin na nachonniikana suulialeʼeya jülüjain naaʼin nakuwaʼipa neʼe namüiwaʼa (1 Cor. 10:24). Anuu nünüiki Samuel: «Tayaawata aaʼu sümaa taʼwayuuse jaralin tü anüikii atanatkat naaʼin na wachonniikana süpüla nekirajaain sünain tü shiimainkat. Woʼuraajaka nümüin Jeʼwaa süpüla wachuntüin kekiiwaa nümüin. Weʼrapa nnojoluin natüjain maʼin na wachonniikana sünainjee tü outkajawaa aainjünakat suluʼu wanüiki, alataashii waya suluʼumüin wanee outkajaalee eere saashajaanüin süka tü anüikii natüjakat. Oʼunawaishii waya namaa sünain tü outkajawaakat jee ojuʼitawaishii waya namaa sünain aküjaa pütchi. Wounejaʼawalin na wawalayuukana sünain ekawaa wepialuʼu otta oʼunawaishii waya sünain awaraijawaa wünaʼapü. Sutuma tia, neʼraajüin maʼin na wachonniikana tü wawalayuukalüirua otta aleewashii naya nümaa Jeʼwaa sümaa müin nia maʼaka naaʼin Nashi namüin, nnojoishi naʼwaajaʼalüin neʼe. Anaʼleesia tia wamüin suulialeʼeya natüjüin süpüleerua tü wanüikikat». w17.05 12 püt. 11-13

Soʼu palit kaʼi, nayeena kepieenaka saaʼu mmakat tüü, na wayuu aneekakana Jeʼwaa süpüla nuluwataainjachin naaʼu. Waʼatapatshaatain maʼin süntüin kaʼikat tia. Wanaawasü wanüiki sümaa Débora otta Barac wanaa sümaa namüin: «Jeʼwaa, anashii ouktüle napüshuaʼa na püʼünüükana otta müshiʼiya na aikana apüla pia, müinjana aka naaʼin chi kaʼikai niweetapa suluʼu chuwatashaatain maʼin» (Juec. 5:31, TNM). Pütchikat tia, ekeraajeerü nutuma Jeʼwaa najaʼttirapa süpüshuaʼa tü nuluwataakalü aaʼu Satanaa. Suʼttapa Armagedón, nnojoleerü choʼujaain wayuu süpüla najaʼttinnüinjanain na waʼünüükana. Soʼu kaʼikat tia, jimajimoluinjana neʼe waya, nieechi Jeʼwaa akumajaka sukuwaʼipa tia (2 Crón. 20:17). Maaʼulu yaa, choʼujaashii maʼin wawalayuu aʼyataainjanakana süpüleerua tü keeʼireekat naaʼin Jeʼwaa, yalayalainjana jee talatüinjatü naaʼin. Débora otta Barac naʼwaajüin Jeʼwaa palajana süka neeʼirain wanaa sümaa nakanajüin na naʼünüükana, nnojoishii nayain palajanain natuma na wayuukana. Müsü nanüiki: «Juʼwaaja Jeʼwaa süka sütkaain süka saaʼin sümüiwaʼa tü pueulokot» (Juec. 5:1, 2, TNM). Akaataajaʼa neʼe maaʼulu yaa, keeʼireesü waaʼin waʼyataainjanain nümüin Jeʼwaa jee anainjatüin sukuwaʼipa wayuu sümaa suʼwaajüinjachin nia. w17.04 32 püt. 17, 18

Nnojotsü üttakuʼu müin naaʼin José sutuma tü müliaa niʼrakat soʼu 13 juya (Gén. 45:5-8). Ayatüshia waneepiain nia nümaa Jeʼwaa, mayaapejeʼe mojuin tü kasa naainjakat na waneeinnua nümüin. Niʼrüin José mapa nunouktüin Jeʼwaa sukuwaʼipa tü kasa mojusü aainjünakat nümüin jee wainma kasa anasü naapaka Jeʼwaa nümüin jee sümüin nüpüshi. Kojutüinjatü wamüin aleewaa nümaa Jeʼwaa jee arütkaainjana maʼin waya nünainmüin. Sutuma alin wapüla Jeʼwaa otta waʼwaajüin nia, nnojo wakayalaain nuulia sutuma wanee kasa mojusü naainjaka na wawalayuukana wamüin (Roma 8:38, 39). Müleka naaʼinrüle wanee wawala wanee kasa nnojotka anain wamüin, washata nukuwaʼipa José, warütkaa maʼin nünainmüin Jeʼwaa. Wanaawa watuma tü jülüjakat waaʼin sümaa tü jülüjakat naaʼin Jeʼwaa. Wakumaja sukuwaʼipa wanee mojujirawaa nümaa wanee wawala sükajee waaʼinrüin tü sümakat tü Wiwüliakat. Süchikijee, weʼitaa najapuluʼu Jeʼwaa tia. Weʼitaa waaʼin nunoukteʼereerüin Jeʼwaa shia soʼu tü kaʼi anakat saaʼin wamüin. w17.04 19 püt. 12, 15; 20 püt. 16

Ayatüsia saainjain Ana tü sümakat nümüin Jeʼwaa. «¿Jameeiche nnojoire teʼikajaain nia?», nnojotsü shia müʼinya. Shiʼikajaamaatüin nia chaa Silómüin eere tü aʼwaajüleekat Maleiwa, saapüin nia nümüin Elí sünain maa: «Tachuntala chi tachonkai nümüin Jeʼwaa. Anii joo taapüinjachin nia nümüin Jeʼwaa süpüla niʼyataain nümüin süpüla kaʼikat süpüshuaʼa, achuntuushi nia nümüin Jeʼwaa» (1 Sam. 1:24-28, TNM). Ayatüshijaʼa jintüikai yala nümaa Jeʼwaa, emiyoʼulaashi shiʼipaʼaya (1 Sam. 2:21). Kapüleekajasaʼa sümüin Ana nnojoluin sümaainjachin chi süchonkai. Süchuntaainjaʼa saaʼin yalainjachin nia sutuʼu, süshaittajaain nümaa jee saaʼinmajüin nia, alejatüjaʼa sukuwaʼipa wayuu jierü shiʼrüinjachin süchon nimiyoʼulaain suʼupala. Saapüin Ana chi süchonkai nümüin Jeʼwaa, talatüsü saaʼin sutuma saaʼinrüin tü keeʼireekat naaʼin Jeʼwaa (1 Sam. 2:1, 2; Sal. 61:1, 5, 8). w17.04 5 püt. 7, 8

Naashin Pablo, müliainjatü saaʼin wayuu «sülüʼütpa sükalia sajaʼttüinjatüin tü kasakat süpüshua». Mojulaaleeinjatü wayuu maaʼulu naashin (2 Tim. 3:2-5, 13). Maaʼulu yaa, alatüsü tia makalü yaa. Eeshiijaʼa waʼluwajünüinnale sutuma kaʼruwarannuu, müliainnale waya sutuma wayuu eʼrünnüü wayumüin jee walerajünüle. Eeyaai neʼe japüikai saaʼin wayuukalüirua tüü, yüüü. Eetaalashii joo na akaaliinjayaakana wayuu, mojulaapajaʼa naya. Eeshiijaʼa nnojoyüliire weʼrüin wamüliala sutuma wayuu mojulaasü, mojupejeʼe wakuwaʼipa sutuma tü namaʼülakat. ¿Aashin müliain waaʼin sutuma neʼnnüin amüin na laülaacheinkana, na tepichicheinkana jee na wayuu jookana apülaa? Eesü wayuu mojulaaka maʼin, müsü aka saaʼin mürüt jashichi otta yolujaa (Sant. 3:15, TNM). Akalajasaʼa watüjaain saaʼu tü kasa anasü weʼreetkat saashin nünüiki Maleiwa. w17.04 11 püt. 4