Peʼureeroʼu

Saashin tü Wiwüliakat, lotusü sukuwaʼipa wanee kasa watuma wanaa sümaa waaʼinrüin tü nüchekakat Maleiwa sümaa nnojoluin koʼuin wakuwaʼipa sümüin wayuu. Sükajee tü naaʼinrakat Jesuu, wayaawataka akajee anashiin nümüin lotule sukuwaʼipa wanee kasa. Soʼu tia, üttüsü naaʼin nekiipüʼü na judíokana nanain na wayuu naatakana oumain, nalerajüin wayuu eekai mojuin jee mojutsalii na jieyuukana natuma. Akaisaʼa Jesuu, nnojotsü koʼuin nukuwaʼipa sümüin wayuu otta lotusü sukuwaʼipa tü kasa naaʼinrakat. Nnojoishii letüin naaʼin na wayuu kanoulakana nünain jaʼitasü naatain noumain (Mat. 8:5-10, 13). Aküjashi nia pütchi nümüin eekai washirüin otta nümüin eekai maʼletsein (Mat. 11:5; Luc. 19:2, 9, 10). Nnojoishii mojutuin nümüin na jieyuukana jee nnojoishi eʼrüin wayumüin namüin. Kojutushii naya nutuma otta kamaneeshi nia namüin, jaʼitashii mojutuin naya sutuma wayuu (Luc. 7:37-39, 44-50). Eesü süpüla müin wakuwaʼipa maʼaka naaʼin Jesuu nnojoliire koʼuin wakuwaʼipa sümüin wayuu jee waküjale pütchi namüin na aapajeekana wanüiki, jaʼitasü naatain nakuwaʼipa jee nanoula. Akaʼaya na anoujashii tooloyuukana, kojutuinjana na jieyuukana natuma maʼakaapuʼu shia nutuma Jesuu. w19.05 2 püt. 1; 5 püt. 15-17

Müsia neʼe nakuwaʼipa na laülaashiikana maaʼulu, kamaneeshii naya otta anasü nanüiki nakaalinjapa na nawalayuukana sükajee tü sümakat tü Wiwüliakat. Nnojoliipejeʼe nayainjanain neʼe na laülaashiikana akaalinjain na ataüjaanakana. Anuu tü waaʼinrajatkat wayakana wapüshuaʼa: «Anakaja jooluʼu jütütülaajiraale [jaaʼin]» (1 Tes. 4:18). Na jieyuu laülaakana aaʼin sünain anoujaa, eesü süpüla nakaalinjain na wawalayuu jieyuukana. Naashin Jeʼwaa, müshi nia aka saaʼin wanee eyüü amüliajaka saaʼin süchonnii (Is. 66:13). Aashajaasü tü Wiwüliakat nachiki jieyuu amüliajaka naaʼin na mojukana aaʼin (Job 42:11). Talatüshi Jeʼwaa sutuma niʼrüin na wawalayuu jieyuukana sünain akaalinjaa na mojukana aaʼin. Eeshii süpüla nasakirüin na laülaashiikana wanee wawala eekai laülaain saaʼin sünain anoujaa müleka eere süpüla sükaalinjain wanee wawala eekai mojuin saaʼin. Wakaalinjapa wanee wawala, wayaawatüinjatü wanüiki suulia wasakirüin nia sünain wanee kasa nnojotka naashajaweein achiki (1 Tes. 4:11, TNM). w19.05 16, 17 püt. 10-12

Süpüla noutkajaain apünüinshii laülaashii nümaa chi kaainjalashikai, ¿jamüsü choʼujaaka piamashiinjanain na wayuu atüjaakana saaʼu kaainjalain nia? Shia sukuwaʼipainjatka tia saashin tü Wiwüliakat. Tia shia süpüshi tü kasa lotuinjatkalü akuwaʼipa naashin Jeʼwaa. Nnojorüle nüküjain wanee anoujashi süchiki tü naainjalakat, choʼujaashii piamashiinjanain na wayuu aküjakana süchiki tia süpüla noutkajaain apünüinshii laülaashii nümaa (Deut. 19:15; 1 Tim. 5:19). Naattajaale chi kaainjalashikai süchiki tü achuntunakalü anain nia, naya asakinnaka na wayuu atüjaakana saaʼu tü naainjalakat. Outkajaashii apünüinshii laülaashii nümaa chi kaainjalashikai müleka eere piamashii wayuu aküjakana nüchiki, eeinjachi chi aküjakai nüchiki palajana otta chi apansaajakai müleka shiimainre tia otta kojuyashiire na tepichi makana nutuma. Nnojotsü joo maluʼuluin alawaain neʼe tü nüküjakat wanee wayuu nüchiki chi ataüjaashikai müleka nnojoire wane apansaajakai tia. Jaʼitashi waneeshin neʼe chi aküjakai süchiki nütaüjaain tepichi wanee anoujashi, nayaawatüinjatü aaʼu na laülaashiikana müleka kaainjarale chi aküjünakai achiki otta mojushaatain naaʼin na waneinnua nutuma. Müshiijeseʼe nakaalinjain na laülaashiikana na müliakana atumawaa otta eejüsü naaʼin süpüla naaʼinmajüin na anoujashiikana suulia jamajüin naya nutuma chi aliʼrajünakai sünain nütaüjaain tepichi (Aluw. 20:28). w19.05 11 püt. 15, 16

Atüjainjana na tepichikana süpüleerua ekeraajaa tü ekirajaanajatkalü anain sünain tü outkajawaakat otta atüjainjana naya ekirajawaa süchiki tü asakinnakalü anain naya suluʼu nakoleejiase (Heb. 5:14). Nekirajaale sünain wanee pütchi suluʼujeejatka tü Wiwüliakat chaa nepialuʼu, mapüleejeerü namüin jülüjain naaʼin tü ekirajünakat sünain tü outkajawaakat otta sünain wanee outkajawaa miyoʼu. Jeʼrainjatüle sümaa tü wekirajaakalü anain nümaa wanee jintüi, oʼunusü süchiirua jeʼrain nuuyase, keiwaʼarale jee meiwaʼarale nia. Akaʼaya na wayuu wekirajakana sünain tü Wiwüliakat, atüjainjana ekirajawaa. Noʼttaiwaʼaya sünain ekirajawaa, talatüshii waya namaa süka nejeettüin susoutia tü pütchi nekirajaainjatkalü anain jee shiale tü ekirajaanajatkalü anain sünain tü outkajawaakat. Shiapejeʼe choʼujaain natüjainjanain ekirajawaa namüiwaʼa süpüla kooʼomüinjatüin tü natüjaakalü aaʼu. Nekirajaweerü anain tia suluʼu tü karaloʼuta ayuʼluushikat suluʼujee tü Wiwüliakat otta natüjaweerü aaʼu tü naaʼinrajatkat. w19.05 26 püt. 2; 28 püt. 10, 11

Soto waaʼin nimeejeein waya Satanaa shiiʼiree wanaawain wakuwaʼipa sümaa tü keeʼireekat naaʼin. Watta saalii tü alawaa nikirajakalü anain shiiʼiree nnojoluinjatüin waapaain sümaa Nünüiki Maleiwa. Tü asakinnakalü anain Eva nutuma Satanaa shiaʼaya neʼe tü asakinnakalü anain waya maaʼulu: «¿Shiimüinsaʼaya nümüin [Maleiwa] jümüin...?» (Gén. 3:1). Wainma na wayuu manoujainsalii asakirakana waya shiiʼiree woʼtchejaain sümaa tü wanoujakalü anain. Müshii naya: «¿Shiimainjasaʼaya nümüin Maleiwa jümüin mojuin wainmale nuʼwayuuse wanee wayuu? ¿Shiimainjasaʼaya nümüin Maleiwa jümüin mojuin jaainjale miʼiraa süntia juya jee shikeraajia juuyase? ¿Shiimainjasaʼaya nümüin Maleiwa jümüin mojuin shiʼitaanüle isha jünain? ¿Shiimainjasaʼaya nümüin Maleiwa jümüin mojuin jaashajaale nümaa eekai nujuʼitinnüin jaʼakajee?». Shiimainjatü wamüin tü wanoujakalü anain. Wainmajeerü waaʼin jee eemiajaajeerü wanoula nnojorüle wayaawatüin saaʼu tü wanoujakalü anain. w19.06 12, 13 püt. 15-17

Aishaatashii waya nüpüla Jeʼwaa (Juan 3:16, TNM). Washatüin nukuwaʼipa Jeʼwaa, müsüjeseʼe sümülialaain waaʼin naalin, alin wapüla otta wamüliajüin naaʼin na wawalayuukana jee müshiʼiya na waneinnua (Gal. 6:10). Wakaalinjeein na wawalayuukana soʼunnaa neʼrüin müliaa. Tü waaʼinrüinjatkat palajana süpüla wamülialüin naaʼin wanee wawala anaajaakai aʼwayuuse, shia yootuin waya nümaa jaʼitairü kapüleein wamüin tü wamüinjatkat nümüin. Anuu sünüiki Paula: «Sünaajaale süpüshi wanee wayuu, kapüleesü sümüin yootoo süchiki tü alatakat. Wainmajüsü saaʼin wayuu saaʼu tü sünüikinjatkat. Anapejeʼe yootule waya sümaa, jaʼitairü palitchoin wanüiki». Nnojotsü choʼujaain wainmainjatüin wanüiki sümüin wanee wayuu. «‹Aluʼuwatsü pia›, tamünüle amüin, anasü taaʼin sutuma», müsü Paula. w19.06 20 püt. 1; 23 püt. 14

Süpülajünüle woulia tü waʼyataainkat nümüin Jeʼwaa, nakumajeerü sukuwaʼipa na laülaashiikana süpüla nnojoluin weʼnnüin sünain outkajawaa. Eeshiijaʼa naküjeenale wamüin paliʼirawalinjanain waya sünain outkajawaa otta naatawalinjatüin tü piichi woutkajaainjatkalü aluʼu jee naatawalinjatüin tü oora woutkajaainjatkalü oʼu. ¿Ayateenache waya aküjain pütchi? Aa, wachajaweerü akuwaʼipa tia süka alin wapüla Jeʼwaa otta aashajaweeshii waya süchiki nukuwaʼipa sünain aluwatawaa (Luc. 8:1). Eesü wanee wayuu ashajüt süchiki kasa alatüirü, Emily Baran sünülia. Anuu tü süshajakat süchiki tü naaʼinrakat na Aküjalii pütchi chajanakana suluʼu tü mma Unión Soviética münapuʼukat: «Wanaa sümaa süpülajünüin noulia na anoujashiikana naashajaainjanain süchiki tü nanoujakalü anain, aashajaashii na Aküjaliikana pütchi süchiki tü nanoujakalü anain namaa na kepiakana naʼütpünaa, na naʼyataajiraakana amaa otta namaa na naʼaleewainyuukana. Wanaa sümaa püreesain naya atumawaa nekirajüin na wane püreesashiikana süpüla nanoujiraain wanaa namaa». Ayatüshii aküjain pütchi naya wawalayuukana mayaapejeʼe süpülajünüin noulia. Shia waaʼinrajatka tia müleka süpülajünüle woulia waküjain pütchi eere kepiain waya. w19.07 11 püt. 12, 13

¿Kasache waaʼinrajatka süpüla alinjachin Maleiwa napüla na wayuu manoulakana jee süpüla noushikajaain nüchiirua Kürisüto? Shia jülüjeeka maʼin waaʼin naateerüin tü namakat shiʼipajee tü wamakat namüin, tia oʼunusü süchiirua jamüin nakuwaʼipa eejanale joʼuuin naya. Jamüshiijaʼa na joʼuushiikana Europa naata nanüiki süchiki tü anoujaakat noulia na chajanakana joʼuuin Asia. Chaa Europa, wainma na atüjaakana saaʼu süpüshi sünüiki tü Wiwüliakat otta eeshii naapüle süchiki niain Maleiwa kakumajalain kasa süpüshuaʼa. Akaajasaʼa chaa Asia, wainma na nnojoliikana atüjaain saaʼu sünüiki tü Wiwüliakat jee nnojotsü nanoujain anain niain Maleiwa kakumajalain kasa süpüshuaʼa. Jülüja waaʼin eejeenain na wayuu anoujakana. Wainma na wayuu aneekakana naküjaliin pütchi nüchiki Jeʼwaa mayaainjeʼe manoulain naya paala. Eeshii na anakana akuwaʼipa, müsüjeseʼe mojushiin namüin tü kasa mojusü naainjakat na shikiipüʼükana tü iküleesiakat otta eeshii na wayuu mojupuʼukana akuwaʼipa. Wainma na ooʼulaakana suulia tü yarüttapuʼukalü atuma nakuwaʼipa. Nükaalinjeena waya Jeʼwaa süpüla wantüin nanain na wayuu «kettaakana süpüla katüin noʼu waneepia» (Aluw. 13:48, TNM; 1 Tim. 2:3, 4). w19.07 20, 21 püt. 3, 4

Na wawalayuu chainjanakana iipünaamüin otta wayakana yaainjanakana kepiain saaʼu tü Mmakat Paʼaraiisüpa shia, waneepiainjana waya süchiirua wasaʼwatüin tü aapünajatkat wamüin. Jaʼitairü kasain alatüin wamüin, nnojo jülüjain waaʼin tü kasa ataʼülakat wakuwaʼipa suulia kooʼomüin wanoula (Filip. 3:16). Jaʼitairü nnojoluin weʼrüin ekeraajüin maalü tü kasa waʼatapajakat jee maʼlainre waaʼin sutuma laülaain waya. Jaʼitairü wainmain tü kasa mojusü weʼrakat jee müliain waaʼin atumawaa soʼu wainma juya. Nnojo shapaain waaʼin, waküja nümüin Maleiwa süpüshuaʼa tü alatakat wamüin. Naapeerü wanee anaa wamüin (Filip. 4:6, 7). Jülüja maʼin waaʼin tü naapüinjatkat Maleiwa wamüin, alüʼülaasü maʼin sükalia. Maa waya maʼaka naaʼin chi ayoujiraai jülüjakai aaʼin tü nüsaʼwatüinjatkat nülüʼülaapa maʼin süpüla akanajaa. Ayataʼaya wakooʼomüinrüin wanoula jee waʼyataa maʼin süchiirua tü naapüinjatkat Maleiwa wamüin jaʼitairü kasain alatüin wamüin. w19.08 7 püt. 16, 17

Eesü isale wachiki tü wanüikinjatkat weʼrüle mojuin maʼin naaʼin chi wawalakai. Waʼyalajüle wanaajiraa nümaa nütüjaajeerü aaʼu alin wamüin tü alatakat nümüin. Aʼyalajüsü María sümaa Marta soʼu outuin Lázaro, chi nawalakai otta aʼyalajüshii waneinnua wayuu yalajanakana jutkatüin. Pienchi kaʼi süchikijee tia antüshi Jesuu. Mayaapejeʼe nütüjaain aaʼu nüsoʼireʼerüinjatüin naaʼin Lázaro, aʼyalajüshi nia wanaajiraa sümaa María otta Marta (Juan 11:17, 33-35). Sünainjee niʼyalajüin Jesuu, jaʼyasü saaʼu mojuin maʼin naaʼin Jeʼwaa sutuma outuin Lázaro. Jee alin nüpüla Jesuu Marta sümaa María otta amülialaasü naaʼin sutuma tü naainjakat Jesuu. Akaajaʼa müle wakuwaʼipa namüin na wawalayuukana, natüjaweerü aaʼu wakaalinjeein naya jee alin naya wapüla. Wamülialüin naaʼin wanee wawala waapajale nünüiki. Waapaja tü nümakat wamüin jee nnojo mojuin wamüin nnojorüle niyaawatüin saaʼu nünüiki otta nujuʼitirüle pütchi airuʼulu (Job 6:2, 3). Eesüjaʼa shapaale maʼin naaʼin sutuma nüpüleeruaanüin aaʼin natuma na nüpüshi manoujainkana. Makalaka woʼuraajüinjanain nümaa jee wachuntajanain nümüin Jeʼwaa süpüla katchin naaʼin jee süpüla niyaawatüin saaʼu tü alatakat nümüin (Sal. 65:2). w19.04 18, 19 püt. 18, 19

Waʼyataale suluʼu Weteet jee sünain waneirua aʼyatawaa nümüin Jeʼwaa, aishii wapüla na wayuukana jee ekiʼralaashii waya suluʼu tü mma kaluʼukat waya. Makalaka mojuin waaʼin wooʼulaainjatüle waʼyataain sutuma waneirua kasa. Wasukajüin na wayuu wapütakana jee shapaasü waaʼin naaʼu, shialeekajaʼa sülatüle tia wamüin sünainjee süpülajünüin woulia tü waʼyataainkat nümüin Jeʼwaa (Mat. 10:23, TNM; 2 Cor. 11:28, 29). Eesü kapüleere wamüin wekiʼralaain suluʼu wanee mma süka naatain nakuwaʼipa na kepiakana suluʼu, shialeekajaʼa waleʼejüle suluʼumüin woumain kakalia mapa. Eeshiijaʼa müliale waya sutuma sülatalaʼa sümüin kasa wamüin, maʼaka saaʼin manneetseraʼa wamüle, mmorüle waya jee mojule waaʼin. ¿Kasa akaalinjeenaka waya sülatüle wamüin tia? Ayata warütkaain nünainmüin Jeʼwaa (Sant. 4:8). ¿Kasa waaʼinraka warütkaale nünainmüin? Weʼitaain waaʼin nünain Jeʼwaa «chi Aapajakai sünüiki wayuu suʼuraajapa» (Sal. 65:2). Nnojotsü kasain isain nüchiki Jeʼwaa. Naaʼinreerü tü kasa anasükat wamüin waneepia (Éf. 3:20). Nnojotsü naapüin neʼe Jeʼwaa wamüin tü wachuntakat nümüin, naaʼinreerü wapüleerua waneirua kasa süpüla nunouteʼerüin tü alatakat wamüin, wanee kasa nnojotka antapünaain suluʼu wekii. w19.08 21 püt. 5, 6

Naashin wainma wayuu tü kanüliakat Armagedón shia wanee atkawaa ajaʼttirajatka wayuu süpüshuaʼa sainküin mmakat jee ojuttirajatka tü mmakat süka wüin, wawai jee sutuma sukutkujaain. Naatapejeʼe tü sümakat tü Wiwüliakat süchiki tia. Nnojotsü ayoʼujaainjatüin waaʼin süpüleerua (Alat. Map. 1:3). Talatüinjatü waaʼin süka watüjaain saaʼu nnojoluinjatüin sajaʼttirüin wayuu, oʼttaainjatü wayuu sutuma. ¿Jamüsü süpüla müinjatüin tia? Naya ajaʼttinnajanakana soʼunnaa Armagedón na aluwataashiikana saaʼu tü mmakat otta na mojulaashiikana. Nayainjana oʼttaaka na wayuu lotokana akuwaʼipa otta nnojoleerü jaralüin amojujüin sukuwaʼipa tü mmakat (Alat. Map. 11:18, TNM). Tü pütchikat Armagedón uwatua neʼe süküjünüin suluʼu tü Wiwüliakat. «Uuchi Meguidó» maluʼulu shia suluʼu hebreo (Alat. Map. 16:16). Meguidó shia wanee pueulo eepuʼukat suluʼu Israel sümaiwa (Jos. 17:11). Nnojotpejeʼe shiain wanee mma tü kanüliakat Armagedón. Armagedón shia tü alatajatkat nakotchojiraapa napüshuaʼa na sülaülashiikana mma süpüla nashutüin saaʼu nupueulose Jeʼwaa (Alat. Map. 16:14). w19.09 8 püt. 1-3

Choʼujaasü kaalinwaa sümüin tia wayuukot. Mayaainjeʼe wainmain na tottoolu suʼunakana amaʼanamüin, ayatsia shia ayuulin, polooirü piamamüin juya amülain isha sümüin. Saashin tü Pütchi aapünakat nümüin Moisés, alerajünüinjatü wanee wayuu eekai amülain isha sümüin (Lev. 15:25). Saapapa tü wayuukot süchiki anain wayuu nutuma Jesuu, suʼunaka sünain achajawaa nüchiki. Süntapa nünain shipettüin nüsheʼin jee anaka shia. Nnojotpejeʼe anain neʼe shia nutuma Jesuu, anasü saaʼin nutuma süka kapülain naaʼin sukuwaʼipa jee kojutuin shia nümüin. «Nii waaʼiraa», müshi nia sümüin süka niiʼiyatüin sujutu nümüin jee alin shia nüpüla. Anakajasaʼa maʼin saaʼin tia wayuukot sünainjee tü naaʼinrakat Jesuu süpüleerua (Luc. 8:44-48). Nnojotsü jimatüin neʼe tia wayuukot, süchajaain nüchiki Jesuu. Müinjanaʼaya waya wachajaainjatü sukuwaʼipa süpüla warütkaain nünainmüin Jesuu. Mayaainjeʼe nnojoluin anaʼlaa nameenain suulia ayuulii na arütkaakana nünainmüin Jesuu, ayatshia müin nia wamüin: «Jürütkaa tanainmüin [...] aneerü jaaʼin tatuma» (Mat. 11:28, TNM). w19.09 20 püt. 2, 3

Tia meematüsü aka saaʼin tü nümakat Zacarías. Anuu nünüiki: «Soʼu kaʼikat tia eejeena polooshii wayuu saʼakajee shiʼirukukat tü wayuukalüirua süpüshuaʼa, sainküinjee mmakat süpüshuaʼa, achecheraajeena sünain nüsheʼin wanee wayuu judío, achecheraajeena naya otta meena naya: ‹Oʼuneeshii waya jümaa süka waapüin süchiki eein chi Maleiwakai jümaa›» (Zac. 8:23). Watüjaa aaʼu choʼujaain süküjünüin pütchi sümüin wayuu maʼleekalia süpüla sükotchojünajatüin sainküinjee mmakat süpüshuaʼa. Makalaka süshajünüin karaloʼuta süchiki tü sümakat tü Wiwüliakat suluʼu wainma anüikii. Wayaawata aaʼulu suluʼujee tia niain Jeʼwaa akotchojüin na wayuu wattakana maʼin naalii sainküinjee mmakat süpüshuaʼa. Paaʼinwashii sünain aʼyatawaa nümüin Jeʼwaa na wayuu wattakana maʼin naalii, süka jamüin, eeitpain suluʼu wainma anüikii tü Wiwüliakat jee tü karaloʼuta ashajünakat suluʼujee. Sütüjaa aaʼulu wayuu naküjain pütchi otta aijiraain maʼin na aküjaliikana pütchi nüchiki Jeʼwaa. Akatsüinraasü maʼin wanoula sutuma watüjaain saaʼu tia (Mat. 24:14; Juan 13:35). w19.09 30 püt. 16, 17

Ayoʼujaajeerü naaʼin na wayuukana neʼrapa sajaʼttinnüin tü kasa sünainpünaakat poliitika, sukuwaʼipa oikawaa otta waneirua kasa neʼitaapuʼuka anain naaʼin. «Mülieerü maʼin naaʼin» otta ayoʼujaajeerü naaʼin süka neʼreerüin tü outaakat nooʼomüin (Sof. 1:14, 15). Eeshiijaʼa weʼreenale maʼin wamüliala. Eeshiijaʼa mülieenale waya sutuma nnojolin waya sünainpünaain tü kasa naaʼinrakat na manoujainsaliikana. Eesüjaʼa kapüleejeerüle wamüin wousütüin sünain weküin, washeʼin otta waneirua kasa choʼujaajeetka maʼin wamüin. Nikirajüin waya «chi achepchiee oonookai otta kekiikai maʼin» süpüla waneepiainjanain waya nümaa Jeʼwaa soʼunnaa tü müliaa miyoʼusükat (Mat. 24:45). Wainma sukuwaʼipa nutuma süpüla eejüinjatüin waaʼin. Jamüsüjaʼa sünain tü outkajawaakat miyoʼu apünüinka kaʼi eejatka soʼu juyakat 2016 sünainmüin 2018, aküjünüsü wamüin tü wakuwaʼipainjatkat sümaʼinruʼu sülüʼülaain tü nükaliakat Jeʼwaa. w19.10 14 püt. 2; 16 püt. 10; 17 püt. 12

Tü kasa waapajakat, tü washaitakat jee tü wanajakat, müsü aka saaʼin sukuwaʼipa eküülü. Jamüshiijaʼa weküle, wayaawata aaʼu tü weküinjatkat. Shiasaʼa wemiralapa shia, nnojotsü süpüla waleʼejirüin shia süchikuaʼa, jama wemiralüitpain shia. Süchikijee tia, oʼunusü wataluʼupünaa, makalaka anain waya anale tü weküinkat otta ayuulin waya mojule tü weküinkat. Nnojoliipejeʼe anamaateenain jee ayuimaateenain waya sutuma. Wanaa sümaa waapajüin, washaitüin jee wanajüin wanee kasa, nnojotsü wanajüin kasa eekai eein. Jamüsüjaʼa wanajüle kasa eekai mojuin, mojeerü tü jülüjakat waaʼin jee tü suluʼukat waaʼin. Anasü waaʼin sutuma tü kasa eekai anain jee mojusü wakuwaʼipa sutuma tü kasa eekai mojuin (Sant. 1:14, 15). Nnojotpejeʼe amojujaamaateerüin wakuwaʼipa sutuma, mojeerü shia mapa. Anuujeseʼe sünüiki tü Wiwüliakat: «Jamüshijaʼa nüpünajüle wanee wayuu, shia nütpajaka achon tü nüpünajakat. Akaataajaʼa chi jülüjakai aaʼin tü kasa mojusü suchuntaakat naaʼin, shieerü naaʼinraka tia mapa» (Gal. 6:7, 8, TNM). Makalaka nnojoluinjatüin wanajüin, washaitüin jee waapajüin tü kasa nülerajakat Jeʼwaa (Sal. 97:10). w19.10 29, 30 püt. 12-14

Aishaatasü wayuu nüpüla Jeʼwaa müshijeseʼe nüjütüin chi nüchonkai süpüla naapajiraain nikii saaʼu wayuu (Juan 3:16, TNM). ¿Kasa waaʼinrajatka süpüla alin wapüla wayuu maʼaka naaʼinrüin shia Jeʼwaa? Kojutuinjana wamüin na wawalayuukana jee talatüinjana waya namaa na ayaawajaakana suulia naainjala süka naleʼejüin nachikuaʼa (Sal. 119:176; Luc. 15:7, 10). Jaʼyasü suluʼu wakuwaʼipa alin wapüla na wawalayuukana soʼu wamüliajüin naya (1 Juan 3:17). Nuluwataain Jesuu na nikirajüinkana sünain aijiraainjanain maʼin naya (Juan 13:34, 35). Jeketü tia pütchikat namüin na nikirajüinkana Jesuu süka nnojoluin shia paala saʼaka tü Pütchi aapünakat nümüin Moisés. Naashin Jesuu, alinjana wapüla na wawalayuukana maʼaka alin waya nüpüla. Aireʼeinjana naya wapüla suulialeʼeya tü waalinkat wapülajiraa, shiimainre alin naya wapüla aapajiraajeena waya wekii naaʼu maʼaka naaʼinrüin shia Jesuu. w19.05 4 püt. 11-13

Süpüla naapüin Jeʼwaa chi naaʼinkai wamüin wachuntuinjatü maʼin shia nümüin (Luc. 11:13). Tü watüjakat sünainjee tü nümakat Jesuu suluʼu Lucas 11:5-9 shia masütaajüinjanain waya sünain achuntaa nümüin Jeʼwaa süpüla nükaalinjain waya nükajee chi naaʼinkai. Naashin Jesuu, nnojotsü kasain nüsalijaainjatüin chia wayuukai niyaaluʼu chi nüpüshi antakai kaʼlepa aikat. Naapüin chi naʼaleewainkai nümüin tü choʼujaakat nümüin süka masütaajüin nia sünain achuntaa. ¿Kasa nikirajeeka anain Jesuu sükajee tia? Nükaalinjalejeʼe wayuu wanee naʼaleewain, nayeematataaka nnojoliin nükaalinjeematüin Jeʼwaa na masütaajuukana sünain achuntaa chi naaʼinkai nümüin. Watüjaa aaʼu naapeechin wamüin Jeʼwaa chi naaʼinkai wachuntule nia nümüin (Sal. 10:17; 66:19). Mayaainjeʼe nüchajaain sukuwaʼipa Satanaa süpüla nükayaleʼerüin waya nuulia Jeʼwaa nnojoleerü nountuin tia. w19.11 11 püt. 17-19

Nütüjaa aaʼu Jesuu choʼujaain nümüin otta namüin na nikirajüinkana neemeraʼawalinjanain. Eepejeʼe wainma wayuu makana akuwaʼipa maʼaka naaʼin chi wayuu washirü naashajaakai achiki Jesuu. Anuu nünüiki chia wayuukai: «Watta saalin korolo tamaʼana jooluʼu, tü tepijaajeetkat atüma süpüla wainma juya. Anakaja jooluʼu teemeraale, sümaa tekaain, sümaa tasaain sümaa talataa aaʼin» (Luc. 12:19; 2 Tim. 3:4). Tü naaʼinmaakat maʼin chia wayuukai shia eemerawaa otta nüshaitüin waneepia. Eekajasaʼa Jesuu namaa na nikirajüinkana, nnojotsü shiain naaʼinmaain tia. Süka washateein maʼin nukuwaʼipa Jesuu, aküjawaishii waya pütchi otta oʼunawaishii waya sünain tü outkajawaakat weemeraapa suulia waʼyataain. Wachajaain maʼin sukuwaʼipa süpüla waaʼinrawalin tia waneepia süka sünainpünaain shia waʼyataain nümüin Jeʼwaa (Heb. 10:24, 25). Jaʼitashii wakasioin waya, ayatüshii oʼunuin waya sünain tü outkajawaakat otta waküja amüinrü pütchi wayuu eekai wanaain wamaa (2 Tim. 4:2). w19.12 7 püt. 16, 17

Nuuʼulaain wapüla Jeʼwaa waneeküin tü waaʼinrüinjatkalü. Niʼiküin waya süpüla anainjatüin tü kasa waneekakat otta nükaalinjain waya süpüla anain wakuwaʼipa müleka anale nümüin tü waneekakat (Sal. 119:173). Waainjale tü sümakat tü Nünüikikat Maleiwa, aneerü tü kasa waneekakat (Heb. 5:14). Jaʼitairü anain tü waneekakat süpüla waaʼinrüin, eesü weʼrüle kapüleein wamüin wajaʼttirüin tü waainjainjatiaakat. Jamüshijaʼa wanee jintüi, eeshi süpüla naapaain aashajeʼeraa tü Wiwüliakat. Naaʼinrüinjaʼa tia soʼunnaa kojuya semaana, shiasaʼa mapa, nuuʼulaa nümüsüjaʼa. Eetaasü süpüla süneeküin wanee wawala pürekutsoolüin shia, shiasaʼa shiiʼiranaja sümüsü tü kaʼi suʼttüinjatkalü oʼu. Jee nayale na laülaashiikana, eesü nekeraajüle sukuwaʼipa nalapalaainjanain pejeewa naaʼu na wawalayuukana. Akatsaʼa sülata sülata sümüin tü kashikat sümaa nnojoluin eeyaain naainjain tia. Mayaapejeʼe naatawalin na wawalayuu makana akuwaʼipa eesü wanee kasa wanaawakalü aluʼu tü naainjakat. Nayakana naneeküin tü naaʼinrajatkat, nnojotpejeʼe nekeraajüin shia. w19.11 26 püt. 1, 2

Nüküjatüjülia Jesuu shiʼrüinjatüin wayuu müliaa maaʼulu yaa maʼaka shiʼrüin sümüliala wayuu nükalioʼu Noé (2 Tim. 3:1; Mat. 24:37). Müshiijeseʼe eein na wawalayuu machoinkana shiiʼiree nakooʼomüinrüin tü naʼyataainkat nümüin Maleiwa. Yootopa na kaʼwayuusekana süchiki kachonwaa, jülüjeesü naaʼin kapüleein epijaa tepichi (Luc. 14:28, 29). Na wayuu alatakana süchikumüin epijaa nachonnii, natüjaa aaʼu kapüleein epijaa tepichi, jama choʼujaain nneerü otta nakatalüinjanain kaʼi süpüla namaain naya nachonnii. Müsüjeseʼe jülüjainjatüin naaʼin na kaʼwayuusekana pütchikat tüü: «¿Aʼyataajeenache waya piamaleʼeya napüleerua wachonnii? ¿Wanaaweetche waaʼin sünain tü kasa choʼujaakat wamüin? Waʼyataainjanale piamaleʼeya, ¿jaraleena aaʼinmajaka wachonnii? ¿Jaraleena nashataka akuwaʼipa?». Na wayuu asakitkana naaʼin sünain tia süpülapünaa kachooin naya, jülüjasü naaʼin tü sümakat tü pütchi süpülajatkat soʼukai. w19.12 23 püt. 6, 7

Kojuyatua najachijain Pablo (2 Cor. 11:23-28). Müliasü naaʼin sutuma wanee kasa müsü aka saaʼin keipüse asaʼijaka niʼiruku. Eesüjaʼa shiale wanee ayuulii tia nümakat (2 Cor. 12:7, TNM). Wanaa sümaa nuʼunuin Demas süchiirua tü washirüükat, mojusü maʼin naaʼin Pablo (2 Tim. 4:10). Mayaainjeʼe wayuuin meimmoluinsai Pablo, nütüjain akaalinjaa wayuu jee chainjachin nia iipünaa, eesü mojupuʼule naaʼin sünainjee tü alatawaikat nümüin (Roma 9:1-3). Amüliajünüshi Pablo nutuma Jeʼwaa. ¿Kasa naaʼinraka nüpüleerua? Naapüin nümüin chi naaʼinkai süpüla katchinjatüin naaʼin (2 Cor. 4:7; Filip. 4:13). Nükaalinjain nia nakajee na nuwalayuukana. Nüküjain Pablo namüliajüin nia na nuwalayuukana (Col. 4:11). Nuchuntuinjeseʼe nanülia napüshi na nuwalayuu amüliajakana nia jee akaalinjakana nia. Eejachi Aristarco, Tíquico nümaa Marcos. w20.01 8 püt. 2, 3

Naashin Jesuu, kapüleeshaatasü nümüin wanee anoujashi chainjachikai chaa iipünaa nüküjain nümüin wanee anoujashi yaainjachikai yaa Mmapaʼa kasain antajaain suluʼu naaʼin nüneekünapa nutuma Maleiwa (Juan 3:3-8). ¿Kasa eeʼiranajaaka suluʼu naaʼin wanee anoujashi aneekünakai nutuma Maleiwa süpüla oʼunaa chaa iipünaamüin? Süpülapünaa nüneekünüin nutuma Maleiwa, suchuntaapuʼuin naaʼin yaainjachin nia waneepia yaa saaʼu tü Mmakat. Niʼree amüinrü najaʼlajeʼerüin Jeʼwaa tü kasa mojusükat otta niʼree amüinrü Paʼaraiisüin tü Mmakat nutuma Jeʼwaa. Eesüjaʼa jülüjapuʼule naaʼin niʼrüinjachin nüchikuaʼa wanee nüpüshi jee niale wanee naʼaleewain asoʼiraakai aaʼin. Shiasaʼa nüneekapa nia Jeʼwaa, eeʼiranajaasü naaʼin, nnojoluitpa jülüjain naaʼin tia. Nnojotpejeʼe shiawalain sutuma nnojolujaain naaʼin shiiʼiree kepiaa yaa saaʼu tü Mmakat. Nnojotsü shiain sutuma shapaain naaʼin jee sutuma sülatüin kasa mojusü nümüin. Nia Jeʼwaa eeʼiranajeʼetka naaʼin chia anoujashikai nükajee chi naaʼinkai, müsüjeseʼe naataitpain tü jülüjakat naaʼin jee tü naʼatapajakat. w20.01 22 püt. 9-11

Sünain tü Pütchi aapünakat nümüin Moisés, naya eʼitaanaka na laülaashiikana süpüla nanoutuin wanee kasa sünainpünaaka nanoula na israeliitakana, kasale alatüin namüin jee shiale wanee kasachiki. Akaajasaʼa sünain tü nüchekakat Kürisüto, naata tü kasa eʼitaanakalü apüla na laülaashiikana. Jamüshijaʼa kaainjarale wanee anoujashi, aashajaashii naya nümaa süpüla anajiraain nia nümaa Jeʼwaa (Gal. 6:2). Natüjaa aaʼu na laülaashiikana nayain niʼitaain Jeʼwaa na sülaülashiikana mma süpüla nayainjanain süsalain atuma naainjala wanee wayuu. Müshiijeseʼe nayainjanain achekajüin nneerü otta püreesain atuma wayuu (Roma 13:2-4). Kaainjarale wanee anoujashi, ekirajaashii na laülaashiikana sünain tü Wiwüliakat süpüla natüjaain saaʼu tü naaʼinrajatkat. Natüjaa aaʼu süikaleʼennüin shikii tü nüchekakat Kürisüto sünainjee alin wayuu nüpüla Maleiwa. Müsüjeseʼe jülüjain naaʼin tü naaʼinrajatkat süpüla nakaalinjain eekai aainjünüin amüin kasa mojusü. Jülüjasü naaʼin na laülaashiikana müleka niyaawajaale chi kaainjalashikai suulia naainjala otta nakaalinjain nia süpüla nunoutuin nukuwaʼipa nümaa Jeʼwaa. w19.05 7 püt. 23, 24

Nütüjaa aaʼu Jesuu niain Jeʼwaa chi shikiishikai tü kataakalü oʼuu, sutuma tia nüküjain tü pütchi süpülajatkat soʼukai. Niʼitaain maʼin naaʼin Jesuu nünain chi Nüshikai otta naapüin Jeʼwaa tü kasa choʼujaakat nümüin. Nükaalinjapejeʼe nia süpüla noonooinjachin waneepia sümaa nünüiki (Mat. 4:4). Nikirajüin waya Jeʼwaa süpüla aleewainjanain waya nümaa. Nüküjain wamüin suluʼu tü Wiwüliakat süchiki jamüin maʼin nukuwaʼipa, süchiki tü naaʼinrajatkat mapeena, jamüin nukumajaka waya otta nüküjain wamüin süchiki tü alatajatkat mapeena. Nükaalinjain waya Jeʼwaa woʼttaiwaʼaya sünain ekirajawaa sünain tü Wiwüliakat. Eeshiijaʼa nikirajüle waya nakajee na wayuu kachooinkana waya jee shiale nükajee wanee wawala. Ayatshiʼiya waya nükaalinjain Jeʼwaa süpüla aleewainjanain waya nümaa, naaʼinrüin tia nakajee na laülaashiikana, nakajee na wawalayuu laülaakana aaʼin sünain anoujaa otta sükajee tü outkajawaakat. Nikirajüin waya wanaa namaa na wawalayuukana. Sünainjee süpüshuaʼa tü kasa naaʼinrakat Jeʼwaa wapüleerua, wayaawata aaʼu kapülain naaʼin wakuwaʼipa waneʼewai wakua (Sal. 32:8). w20.02 3 püt. 8; 5 püt. 13

Nnojoleena waya anajiraain namaa na waneinnua suchunjale waaʼin. Wasünneʼera tia suluʼujee waaʼin otta nnojo weʼitaain shia suluʼu saaʼin wayuu. ¿Kasache waaʼinrajatka süpüla nnojoluinjatüin suchunjain naaʼin na waneinnua? ¿Kasa waaʼinrajatka süpüla anajiraain waya namaa na waneinnua? Shiʼrüin wayuu tü waaʼinrakat jee tü wakuwaʼipakat. Naashin na wayuukana aʼwaataainjana waya suluʼu tü kasa eekat wamaʼana (1 Juan 2:16). Achunjeetpejeʼe saaʼin wayuu waaʼinrüle tia. ¿Kasache waaʼinrajatka süpüla nnojoluinjatüin suchunjain naaʼin na waneinnua watuma? Nnojoluinjatü waküjakuʼu wamüin süchiki tü kasa eekat wamaʼana otta süchiki tü wayaʼlajeekalü amüin. Nnojoliinjana waya aʼwaataakuʼu müin suluʼu tü waʼyataakalü anain suluʼu tü outkajaaleekat. Waküjakuʼu wamüle süchiki tia, achunjeerü naaʼin na waneinnua watuma. Akaajasaʼa kapürale waaʼin nakuwaʼipa otta waküjale namüin anain tü kasa naaʼinrakat, aneerü naaʼin watuma, anajiraajeena waya namaa otta paaʼinweena waya namaa na wawalayuukana. w20.02 18 püt. 15, 16

Sükajee tü kasa nukumajalakat Jeʼwaa piʼraajeerü maʼin tü nukuwaʼipakat (Alat. Map. 4:11). Jülüja paaʼin kekiin maʼin Jeʼwaa sünainjee anain maʼin nutuma sukumajia tü wunuʼuliakalüirua, tü mürütkalüirua jee tü wüchiikalüirua. Pikirajaa sooʼomüin süchiki jamüin anaka maʼin nutuma Jeʼwaa wakumajia (Sal. 139:14). Soteesü paaʼin pülashaatain maʼin Jeʼwaa sünainjee nukumajüin chi Kaʼikai suluʼu jaʼishaatain maʼin nia. Nnojotpejeʼe moteein waaʼin eein waneirua jolotsü maʼaka naaʼin chi Kaʼikai (Is. 40:26). Jülüjale paaʼin tia jee piyaawatüle saaʼu pülain maʼin Jeʼwaa otta kekiin maʼin nia, kojuteechi nia pümüin. Choʼujaapejeʼe piʼraajüin maʼin nukuwaʼipa süpüla kooʼomüin naalin püpüla otta süpüla aleewain maʼin pia nümaa. Piyaawatüinjatü saaʼu alin pia nüpüla Jeʼwaa. Soto paaʼin nürütkaajeechin Jeʼwaa pünainmüin püchajaale nüchiki (1 Crón. 28:9). Nürütkeʼerüin pia Jeʼwaa nünainmüin (Jer. 31:3). Kojutule maʼin pümüin tü naaʼinrakat Jeʼwaa püpüleerua akooʼomüinraajeerü naalin püpüla. w20.03 4 püt. 6, 7

Eesü süpüla washatüin nukuwaʼipa chi aluwataaushikai Pablo. Soʼu chajachin nia Corinto, aʼyataashi nia sünain aainjaa loona süka palitchoin nneerü eejatka nümaʼana. Naaʼinrüin tia suulia nikeʼejüin saaʼin wayuu süchiirua tü niküinjatkat jee süpüla nüküjain pütchi namüin na chajanakana Corinto (2 Cor. 11:7). Mayaainjeʼe niʼyataain, kojutusü maʼin nümüin tü aküjaakat pütchi jee naaʼinrawalin tia saawanoʼu. Taashipa nukuwaʼipa Pablo suulia tü niʼyataainkat, oʼttüshi nia «sünain aküjaa waneepia süchikü tü nünüikükat Maleiwa. Nüküjain sümüin tü judíokalüirua tü nütüjaakat aaʼu nooʼopünaa Jesús sünain niain chi Nüneekajalakai Maleiwa» (Aluw. 18:3-5; 2 Cor. 11:8, 9). Shiasaʼa mapa, soʼu püreesain nia piama juya chaa Roma, aküjashi pütchi namüin na awaraijaakana naaʼu jee ashajüshi nia karaloʼuta (Aluw. 28:16, 30, 31). Shia naaʼinmaaka maʼin Pablo niʼyataain waneepia nümüin Maleiwa. w19.04 4 püt. 9