Maatsoʼu

Eesü süpüleeruaanüle waaʼin natuma na wapüshikana shiiʼiree sünainpünaain waya tü kasa mojusü naaʼinrakat nikiira müliashii. Shiapejeʼe waaʼinrüin tü nümakat Maleiwa süka alin wapüla nia otta kojutuin wamüin tü Wiwüliakat. Eeshiijaʼa namüle wamüin maalin wapüla müliashii jee mojutuin nia wamüin. «Püsirü jamajüle nakuwaʼipa na waneinnua», eeshii namüle wamüin. Eeshii na eʼitaakana naʼatoʼu müliashii eküülü, yootshi jee waneirua korolo eepuʼuka nümaʼana. Naaʼinrüin tia süpüla suʼunüinjatüin tü naaʼinkat süka anaka akuwaʼipa jee nnojoluinjatüin süleʼejüin süchikuaʼa naashin. Eeshii na oʼyotokana yootshi mmoluʼu namüin na outushiikana otta wainma kasa naaʼinraka nekiira süpüla talatüin naaʼin. ¿Jamüsüche naaʼinraka tia? Shia süka waraittüin tü naaʼinkat naashin. Waya anoujashiikana nünain Jeʼwaa, nnojotsü waaʼinrüin tü kasa sünainpünaakat naʼalain Satanaa (1 Cor. 10:21, 22, TNM). w19.04 16 püt. 11, 12

Niʼiküin na nikirajüinkana sünain pütchi oʼunirajatka nakuwaʼipa, anainjatka atuma tü kasa naaʼinrakat. Nikirajüin naya sünain naaʼinrajatüin kasa anasü sümüin wayuu maʼaka nacheküin saainjünüin kasa anasü namüin. Saaʼujee shiain wacheküin saainjünüin kasa anasü wamüin, müinjatia tü waaʼinrakat namüin na waneinnua. ¿Kasache weʼreetka suluʼujee tia? Loteerü sukuwaʼipa tü kasa aainjünakat wamüin. ¿Jama saainjünüle wamüin wanee kasa nnojotka lotuin akuwaʼipa? Nüküjain Jesuu namüin na nikirajüinkana neʼitaainjatüin naaʼin sünain nunouteʼereerüin Jeʼwaa tü kasa mojusü aainjünakat namüin na achuntakana waneepia soʼukai jee saʼwai (Luc. 18:6, 7). Tia pütchikat, shia tü naaʼinrajatkat Maleiwa wapüleerua. Nütüjaa aaʼu kasain alatüin wamüin otta nunouteʼereerü akuwaʼipa tia anashiipa shia nümüin (2 Tes. 1:6). Woʼunirüle wakuwaʼipa wanaapünaa sümaa tü nikirajakalü anain Jesuu, loteerü sukuwaʼipa watuma tü kasa waaʼinrakat namüin na waneinnua. Otta eerejeʼe wanee kasa mojusü aainjünaka wamüin, amülialaasü waaʼin sutuma watüjaain saaʼu nunouteʼereerüin Jeʼwaa tia. w19.05 5 püt. 18, 19

Jimaʼaire jee majayürüle pia, eeshii nanoujayaa namüle na koleejiajiraakana pümaa sünain sukumajaain wanee kasa sümüiwaʼa. Pikirajeein na waneinnua sünain tü sümakat tü Wiwüliakat, isapejeʼe shia püchiki paaʼinruʼu. Müshijeseʼe pikirajaainjachin sünain tü Wiwüliakat. Piamasü tü kasa puunteekalü amüin sünainjee pikirajaain. Tü palajatkat shia püchecheraain süchiirua tü punoujakalü anain, niain Jeʼwaa kakumalain kasa süpüshuaʼa. Otta tü wanee shia püküjainjatüin jamüin sünüiki tü Wiwüliakat süchiki wanee kasa (Roma 1:20). Püsakirüinjatü paaʼin palajana jamüin nanoujaka na koleejiajiraakana pümaa sünain sukumajaain kasa sümüiwaʼa. Jee süchikijee tia, ekirajaainjachi pia sünain jamüin sünüiki tü Wiwüliakat süchiki tia. Piyaawateerü aaʼu nnojoluin kapüleein asoutaa saaʼu tü punoujakalü anain. Wainma wayuu anoujaka sünain sukumajaain kasa sümüiwaʼa süka naküjalain shia na wayuu kojutukana namüin. Pütüjaajeerü aaʼu jamüinjatüin pünüiki namüin na asakirakana pia sükajee pikirajaain sünain tü pütchikat (Col. 4:6). w19.05 29 püt. 13

Mojushaatasü naaʼin Elías, chi nünüikimaajachikai Maleiwa süka nuʼutunajachin aaʼin, müshijeseʼe nuʼluwataain jee naapüin naaʼin sünain outaa. Nuluwataaka Jeʼwaa wanee aapiee süpüla nütütüleʼerüin naaʼin. Saapünaka eküülü jaʼisü nümüin Elías nutuma chi aapieekai (1 Rey. 19:5-8). Eesü tü watüjakat sünainjee tü naaʼinrakat chi aapieekai. Eeshi süpüla wakaalinjain wanee wawala mojukai aaʼin müleka kamaneere waya nümüin. Eeshi süpüla wekirüin nia, wasülajüin wanee kasa nümüin jee shiale washajüin karaloʼuta nümüin eere waküjain alin nia wapüla otta kachipünaain nia waaʼin. Eesü süpüla waaʼinrüin tia müleka nnojorüle wasakireein nia sünain wanee kasa nnojotka nüküjeein achiki jee mojuka atuma naaʼin. Nükaalinjain nia Jeʼwaa sükajee nüpülain süpüla nuʼunuinjachin saaʼumüin tü uuchikat Horeb, eejatüle nüpansaajüin paala Jeʼwaa nünüiki namüin na israeliitakana. Eesüjaʼa anale naaʼin Elías suluʼu tia mmakat, jama wattajachin nia noulia na oʼuteekana naaʼin. ¿Kasa watüjaka sünainjee tia? Wakaalinjeere na wayuu mojukana aaʼin sutuma nataüjaanüin, wachajaainjatü sukuwaʼipa süpüla anain naaʼin watuma. Eesü anashiire sümüin wanee wawala saashajaain süchiki tü alatakat sümüin shipialuʼu, eepejeʼe wawala eekai anain saaʼin sünain yootoo süchiki tia suluʼu tü outkajaaleekat. w19.05 16 püt. 11; 17 püt. 13, 14

Jülüjataa waaʼin waashajeʼerüin tü nüküjakat Zacarías süchiki outajachin chi Mesíaskai (Zac. 12:10). Waashajeʼerüin sünain tü wetsiikulokot 12, naʼyalajeenain na nüpüshikana Natán sünainjee outuin chi Mesíaskai. Nnojotsü walatirapünaainjatüin tia pütchikat, shia anaka aluʼu wasakireʼerüle waaʼin sünain tüü: «¿Kasaichi chi Mesíaskai nanain na nüpüshikana Natán?». Shiakalaka anain wekirajaale sünain tia. Eesü wanee pütchi pasanain sünain süpana tü Wiwüliakat eere süküjünüin süchiki 2 Samuel 5:14, sünain tia wetsiikulokot aküjünüsü nüchoin David chi kanüliakai Natán. Tü wane pütchikat shia Lucas 3:31, eere süküjünüin nuuʼuliwoʼuin Natán Jesuu saaʼujee sutuushin nia María. Anashaatasü maʼin tia. Watüjaa aaʼu nuuʼuliwoʼuin David Jesuu (Mat. 22:42). Alanaʼaleepejeʼe na nüchooinkana David suulia 20. Sutuma watüjaain saaʼu niain Natán kapüshin María, wayaawata aaʼu jamüin nüküjaka Zacarías naʼyalajüinjanain na nüpüshikana Natán saalinjee nuʼutunajachin aaʼin Jesuu. w19.05 30 püt. 17

Shiimainjeerü wamüin tü sümakat tü Wiwüliakat wekirajaale sünain waneepia. Jee müsia watüjaajeerü aaʼu süpülajatüin anain wakuwaʼipa tü nuluwataakalü anain Jeʼwaa. Sünainjee tia, meena waya maʼaka saaʼin wanee wunuʼulia eekai ichein suurala. Icheena waya waneepia sünain tü kasa nikirajakalü anain waya Maleiwa (Col. 2:6, 7). Nnojoishii nayainjanain na waneinnua icheka atuma tü wanoulakat, wayainjana icheka atuma shia. Makalaka wachajaainjatüin sukuwaʼipa süpüla weeʼiratüin tü kasa mojusü jülüjakat waaʼin. Woʼuraaja waneepia nümüin Jeʼwaa jee wachunta nümüin chi naaʼinkai. Wasakireʼera suluʼu waaʼin, weeʼirata tü kasa mojusü jülüjakat waaʼin otta tü waaʼinrakalü anainjee wanee kasa. Aleewa waya namaa na aikana apüla Jeʼwaa, namaa na akaalinjeenakana waya sünain eeʼirataa tü kasa mojusü jülüjakat waaʼin. Waaʼinrüle tia wayouteerü tü alawaa nekirajakalü anain na manoujainsaliikana otta wasünneʼereerü «waneirua kasa nnojotka pansaain sümaa tü ekirajünakat nüchiki Maleiwa» (2 Cor. 10:5, TNM). w19.06 13 püt. 17, 18

Wakaalinjainjana na wawalayuu anaajaakana aʼwayuuse, maʼaka sükaalinjünüin Noemí sutuma Rut (Rut 1:16, 17). Anuu sünüiki Paula: «Süchikijee nünaajaain chi taʼwayuusekai, wainma na wayuu antakana jee natütüleʼerüin taaʼin. Shiasaʼa mapa, aʼwalakajaayaa müsü wayuu. Nnojotpejeʼe müin tü takuwaʼipakat maʼakaapuʼu, eeʼiratüsü. Na wayuu anaajakana apüshi, choʼujaasü namüin nakaalinjünüin kojuya kashi jee kojuya juya. Tia shia wane kasa natüjaainjatka aaʼu na waneinnua». Naatayaa müsü sukuwaʼipa wayuu, eeshii na kakaliakana mojuin aaʼin otta eeshii na anamaatakana aaʼin. Eepejeʼe na aikana amüin nümüliala müliashii naaʼinrajatpa wanee kasa naaʼinrapuʼukat nümaa. Soto waaʼin nüküjain wamüin Jeʼwaa wamüliajüinjatüin naaʼin na wawalayuu anaajaakana aʼwayuuse. w19.06 24 püt. 16

Soʼu süpülajünüin waʼyataain nümüin Jeʼwaa, koʼutuinjana waya müleka wasakinnüle süchiirua tü waaʼinrakat (Ecl. 3:7). Wounjulajüinjatü süchiki jalain woutkajaain, kasain waaʼinrüin süpüla waküjain pütchi, jalejeekualüin wapüla tü wekirajaakalü anain otta kasaichin nanülia na wawalayuukana. Nnojotsü waküjainjatüin tia namüin na pulusiiakana, namüin waʼaleewainyuu jee namüin wapüshi jaʼitashii kepiain naya suluʼu wanee mma naatajatü. Waküjale süchiki tia, eeshii süpüla jamüin atumawaa na wawalayuukana. Nnojo mojujiraain waya sünainjee kasa eekai eein neʼe. Nütüjaa aaʼu Satanaa mojuin nakuwaʼipa na wayuukana müleka mojujiraale naya (Mar. 3:24, 25). Makalaka mojujiraweein waya nutuma. Nnojotsü shiain keeʼireein naaʼin watkaainjanain nümaa, atkaajiraweeshii waya nutuma. Jaʼitakajeʼe na anoujashii laülaakana aaʼin sünain anoujaa, eejüinjatü naaʼin suulia mojujiraain naya namaa na waneinnua. Wanoutule sukuwaʼipa wanee kasa mojujiraaka atuma waya namaa na wawalayuukana, paaʼinweena waya otta nnojoleena nimeejüin waya Satanaa (Col. 3:13, 14). w19.07 11, 12 püt. 14-16

Naapaa amaalü na wayuukana tü pütchi waküjakat namüin sükajee anain sukuwaʼipa wanüiki, nnojotsü shiain sükajee tü wamakat namüin. Shia kamalainka namüin kamaneein waya, watüjain süpüleerua wanüiki otta kachipünaain waaʼin nakuwaʼipa. Nnojotsü wapüleeruain naaʼin süpüla naapajüin wanüiki. Shia anaka aluʼu wayaawatüle saaʼu jamüin manoulaka naya otta jamüin jülüjaka naaʼin tia, kojuteeshii naya wamüin. Jamüshijaʼa Pablo nnojotsü nüküjain wanee kasa mojushiika namüin na wayuukana. Soʼu nüküjain pütchi namüin na judíokana, nüküjain namüin jamaluʼuluin tü sümakat tü karaloʼuta Nüchikimaajatkat Maleiwa. Eekajasaʼa soʼu nüküjain pütchi namüin na atüjakana naʼakajee na griegokana chaa suluʼu tü kanüliakat Areópago, nnojotsü naashajeʼerüin namüin tü karaloʼuta Nüchikimaajatkat Maleiwa (Aluw. 17:2, 3, 22-31). ¿Kasa waaʼinrajatka süpüla müin wakuwaʼipa maʼaka naaʼin Pablo? Waashajaale nümaa wanee wayuu manoujainkai sünain tü Wiwüliakat, anasü nnojorüle waashajeʼerüin shia nümüin. Mojushiire namüin na wayuukana neʼnnüin sünain aashajeʼeraa tü Wiwüliakat, anasü weeʼiyatüle namüin tü sümakat sükajee serulaat jee sükajee tableta. w19.07 21 püt. 5, 6

Nimeejeein Satanaa na israeliitakana süpüla naʼwaajüin maleiwayaasü. Najayatüin naya soʼu choʼujaain eküülü namüin. Nantapa suluʼumüin tü Mma Aapünakat namüin ekirajaainjana naya sünain wanee jeketü sukuwaʼipa apünajaa. Jamüsüjaʼa chaa Egipto, apalajünapuʼusü wüin saaʼu tü pünajütkat sükajee tü süchikat Nilo. Aluʼusaʼa suluʼu tü Mma Aapünakat namüin na israeliitakana, nnojotsü süchi eekai miyoʼuin, anasü neʼe aʼttiee sutuma tü joojotshikat otta juyapoʼu (Deut. 11:10-15; Is. 18:4, 5). Makalaka nekirajaainjanain na israeliitakana sünain tü naaʼinrüinjatkat süpüla anainjatüin naʼttia. «Jalia jia suulia juʼwaajüin maleiwayaasü», ¿jamüshiche nümaka Jeʼwaa namüin sümaa shiain nikirajüin anain naya tü naaʼinrüinjatkat süpüla anain naʼttia? Nütüjaa aaʼu Jeʼwaa eein süpüla noʼunüin na israeliitakana namaʼanamüin na cananeokana süpüla nekirajaain sünain tü sukuwaʼipainjatkat apünajaa. Chi maleiwa nanoujakai anain na cananeokana nia Baal, nia sülaülaka tü sirumatuʼukat otta chi aʼitirakai juya naashin. Nnojotsü nücheküin Jeʼwaa napüleerua na israeliitakana nemeejünüin. Macheʼepejeʼe naya sümüin nünüiki, kojuyatua naʼwaajüin Baal (Núm. 25:3, 5; Juec. 2:13; 1 Rey. 18:18). w19.06 3 püt. 4-6

Nüntapa Pablo, Silas, Lucas otta Timoteo chamüin Filipos, watta maʼin naalii na wayuu aapajeekana süchiki Nuluwataainjachin Maleiwa. Sünainjee naküjain maʼin pütchi naya anoujashiikana eeinapa na wayuu anoujakana suluʼu tia mmakat. Eeshiijaʼa noutkajaale naya anoujashiikana shipialuʼu wanee wayuu kamaneeka maʼin, Lidia sünülia (Aluw. 16:40). Wainma kasa mojusü alataka namüin naya wayuu jekenakana sünain anoujaa. Nootuin Satanaa na wayuu mojulaashiikana süpüla nayoutuin tü pütchi nüküjakat Pablo, Silas, Lucas otta Timoteo. Nütaʼünakalaka Pablo nümaa Silas. Naʼyaajünaka süka wunuʼu jee püreesaka naya atumawaa. Nojuʼitapa, oʼunushii naya sünain atütüleʼeraa naaʼin na wayuu jekenakana sünain anoujaa. Süchikijee tia, oʼunushi Pablo, Silas otta Timoteo Filipojee. Eeshijaʼa niale Lucas apütüüin chayaa. ¿Kasakaʼa naaʼinrüin naya wayuu jekenakana sünain anoujaa? Ayatüshiʼiya naya sünain aʼyatawaa nümüin Jeʼwaa sükajee naapüin chi naaʼinkai namüin (Filip. 2:12). Talatüsü naaʼin Pablo sutuma tü naaʼinrakat naya anoujashiikana. w19.08 8 püt. 1, 2

Eeshi naʼanapajüle nneerü wanee wayuu nukolojooinjachire, jama kojutuin maʼin süsapia. Nnojo waʼanapajüin nneerü süpüla wayaʼlajüin wanee kasa nnojotka choʼujaain maʼin wamüin (Prov. 22:3). Shapaale waaʼin sutuma waaʼinmajüin wanee wapüshi ayuuikai, kapüleesü wamüin wayaawatüin saaʼu jeʼrainjatüin nneerü waʼanapajaka. Süpülapünaa waaʼinrüin tia, anashii woʼuraajüle nümüin Jeʼwaa jee wachuntule maʼin nümüin süpüla anainjatüin sukuwaʼipa tü kasa waneekakat. Naapeerü wanee anaa wamüin, jimateerü waaʼin jee wayaawateerü saaʼu tü kasa anakat süpüla waaʼinrüin (Filip. 4:6, 7; 1 Ped. 5:7). Pütünajutuinjana na wayuu aneenakana atuma pukuwaʼipa. Waküja namüin na watünajutkana jamüin waaʼin jee tü alatakat wamüin, shialeekajaʼa namüin na alatüinnakana amüin tü alatakat wamüin (Ecl. 4:9, 10). Na wawalayuu woutkajaapuʼukana amaa, ayateena waʼaleewain. w19.08 22 püt. 9, 10

¿Jamüsü sünainpünaaka nutuma Jeʼwaa tü nükaliakat sümaa tü alatakat chaa Meguidó? Shia süka wainmain atkawaa eejatka chaa Meguidó otta suluʼu tü nasapüshii eejatkat chaa Jezreel. Kojuyatua nükaalinjain Jeʼwaa tü nupueulosekat süpüla sükanajüin tia atkawaakat. Jamüsüjaʼa süʼütpaʼa tü süchikat Meguidó, akaalinjünüshi Barac nutuma Jeʼwaa süpüla niyamülüinjanain na kananeokana. Nia Sísara nekiipüʼüka naya surulaatkana. Naapüin analuʼutka Barac sümaa Débora nümüin Jeʼwaa saaʼu nükaalinjain naya. Anuu neeʼirain nümüin: «Müsü sütkaakai aaʼin tü shüliwaikalüirua chejee iipünaajee [...] nümaa Sísara [...]. Jeʼwaakalee, sülata namüin püʼünüü tü alatakat nümüin Sísara. Akanasaʼa na wayuu aikana apüla pia, kasataalejeseʼe müin naya maʼaka naaʼin chi kaʼikai niweetapa» (Juec. 5:19-21, 31). Soʼunnaa Armagedón, najaʼttireena Jeʼwaa na nüʼünüükana, akanasaʼa na aikana apüla nia oʼttaajeena nutuma. Naateerü sukuwaʼipa Armagedón suulia tü alatakat soʼu nütkaain Barac. Soʼunnaa Armagedón, nnojoliinjana atkaain na aʼyataashiikana nümüin Jeʼwaa otta nnojoliinjana naya kaʼapülajüin. Neʼitaainjatü naaʼin nünain Jeʼwaa otta nanain na nümaajanakana jee nnojoliinjana mmoluin naya (Is. 30:15; Alat. Map. 19:11-15). w19.09 9 püt. 4, 5

Wanee sukuwaʼipa süpüla warütkaain nünainmüin Jesuu shia wekirajaale süchiki tü nümakat jee tü naaʼinrakat (Luc. 1:1-4). Müshiijeseʼe wekirajaainjanain sünain tü sümakat tü Wiwüliakat nüchiki. Jee müsia, arütkaashii waya nünainmüin Jesuu wanaa sümaa woushikajaain süchiirua nukuwaʼipa jee woutiisain waya. Wanee kasa waaʼinrajatka süpüla warütkaain nünainmüin Jesuu shia wachuntule kaalinwaa namüin na laülaashiikana choʼujaapa shia wamüin. Naya wawalayuukana niʼinaajala naya Jesuu süpüla naaʼinmajüin waya (Juan 21:16; Éf. 4:7, 8, 11; 1 Ped. 5:1-3, TNM). Choʼujaale kaalinwaa wamüin, waküjainjatü shia namüin. Nnojoishii kayaawasein naya süpüla natüjaainjatüin neʼe saaʼu tü alatakat wamüin. Anuu tü nümakat wanee wawala Julian nünülia: «Tachuntuin namüin na laülaashiikana nalapalaaiwa taaʼu. Anasü taaʼin sutuma nakaalinjain taya, müshii naapakai saaʼin wanee kasa anasü tamüin». Na laülaashii waneepiakana nümaa Jeʼwaa maʼaka naaʼin na piamashii alapalaakana naaʼu Julian, nakaalinjeena waya süpüla wayaawatüin saaʼu tü «kasa jülüjakat naaʼin Cristo» jee tü nukuwaʼipakat (1 Cor. 2:15, 16; 1 Ped. 2:21). Nakaalinjale waya, aneerü waaʼin natuma, meena naapakai saaʼin wanee kasa anasü wamüin. w19.09 21 püt. 4, 5

Aküjünüsü suluʼu tü Wiwüliakat nachiki waneinnua tooloyuu otta jieyuu oʼuninnakana akuwaʼipa nükajee chi naaʼinkai Jeʼwaa. Naʼaka naya wayuukana eeshi Juan chi Awoutisaajüikai otta David, mayaainjeʼe müin nakuwaʼipa, nnojoishii naya napüshin na 144.000 chainjanakana iipünaa (Mat. 11:11; Aluw. 2:34). Asoʼiraajeerü naaʼin naya wayuukana yaa saaʼu tü Mmakat paʼaraiisüpa shia. Waneepiainjana naya nümaa Jeʼwaa otta anashiinjatü namüin niain Laülaain naaʼu. Naaʼinreerü tia wanaa namaa na wayuu wattakana maʼin naalii. Nükotchojüin Jeʼwaa wayuu sainküinjee mmakat süpüshuaʼa süpüla suʼwaajüinjachin nia. Nnojotsü alatüirüin nutuma wanee kasa eekai müin aka saaʼin tia. Jaʼitaina yaainjanain waya saaʼu tü Mmakat jee chainjanale waya chaa iipünaa, aküjainjana waya pütchi sümüin wayuu maʼleekalia süpüla naʼakainjanain naya na wayuu wattakana maʼin naalii, na «anneerüiruayaʼa waneejannuu» sümakana amüin tü Wiwüliakat. Nüjüteerü achiki Jeʼwaa tü müliaa miyoʼusükat süpüla sajaʼttinnüin naluwataaya na wayuukana otta sajaʼttinnüin tü iküleesia ekirajakalü alawaa, tü müliakat maʼin atuma wayuu. Na wayuu wattakana maʼin naalii aʼyataajeena nümüin Jeʼwaa yaa saaʼu tü Mmakat süpüla kaʼika süpüshuaʼa (Alat. Map. 7:14). w19.09 31 püt. 18, 19

Maaʼutpünaa yaa, sülüʼütpa maʼin tü müliaa miyoʼusükat, mülieena maʼin waya atumawaa süpüla nnojoliinjanain waneepiain waya nümaa Jeʼwaa. Eeshiijaʼa ayateenale waya meeʼerapalain. Meerü wakuwaʼipa atumawaa süka nnojoliin waya sünainpünaain tü kasa mojusü naaʼinrakat na wanaawakana aaʼin nümaa Satanaa. Waneepiainjana waya nümaa Jeʼwaa maaʼulu süpüla waneepiain waya nümaa soʼunnaa tü müliaa miyoʼusükat. Soʼunnaa tü müliaa miyoʼusükat, ¿kaseerü alataka namüin na wawalayuu oʼunirakana sukuwaʼipa nupueulose Jeʼwaa maaʼulu yaa? Napüshuaʼa na wawalayuu chainjanakana iipünaa, na yaayüliikana saaʼu tü Mmakat, oʼuneena iipünaamüin süpüla natkaainjanain soʼunnaa Armagedón (Mat. 24:31; Alat. Map. 2:26, 27). Nnojoleena yaain wamaa na Laülaashii Jülüjakana Aaʼin na Aküjaliikana Pütchi sainküin Mma. Nnojoleetpejeʼe walakatüin tü nupueulosekat Jeʼwaa. Nayeena oʼuniraka sukuwaʼipa nupueulose Jeʼwaa na «wane anneerüiruayaʼa waneejannuu» sümakana amüin tü Wiwüliakat. Wakaalinjeena naya wawalayuukana otta waaʼinreerü tü namakat wamüin. Waaʼinrüle tia, waneepieena waya nümaa Jeʼwaa jee oʼttaajeena waya. w19.10 17 püt. 13, 14

Noemí, shia wanee wayuu aika maʼin apüla Jeʼwaa. Süchikijee nünaajaain chi suʼwayuusekai jee na piamashiikana süchonnii, suchuntuin namüin na wayuukana «Mará» sümünüinjatüin amüin süka mojuin maʼin saaʼin (Rut 1:3, 5, 20, noota, 21). Soʼunnaa shiʼrüin müliaa Noemí, akaalinjünüsü shia sutuma Rut, tü saʼütkat. Nnojotsü akaalinjünüin neʼe Noemí sutuma Rut, sümülialüin saaʼin süka sünüiki. Süküjain sümüin alin maʼin shia süpüla. Wakaalinjainjana na wawalayuu anaajaakana aʼwayuuse. Jamüsüjaʼa nukuwaʼipa wanee wayuu sümaa nuʼwayuuse, müsü aka saaʼin sukuwaʼipa piamasü wunuʼulia eekai kourulajiraain. Sututuʼunüle waneesia, ojulujaasü süpana tü wanee süchiirua. Akaataajaʼa wanee wayuu sünaajaale nuʼwayuuse, kakalia mojuin naaʼin süchiirua. w19.06 23 püt. 12, 13

Nnojotsü shiain neʼe jülüjainjatüin waaʼin tü kasa waapajakat, tü washaitakat jee tü wanajakat. Jülüjainjatü waaʼin jetsüin wamaʼa sünain aapajaa, ashaitaa jee anajaa wanee kasa. Nnojorüle jülüjain waaʼin tia, alanaʼaleejeeria sujutü wamüin tü waapajakat jee tü wanajakat suulialeʼeya tü waʼyataainkat nümüin Jeʼwaa. Jülüjainjatü waaʼin jetsüin wamaʼa sünain anajaa. Eesü süpüla washajüin sünain karaloʼuta tü oora walatirakat sünain anajaa telewisoot, sünain anajaa suluʼupünaa Internet jee sünain ashaitaa suluʼu serulaat soʼu wanee semaana. Wainmale tü oora walatirakat sünain tia, acheküsü wakumajüin sukuwaʼipa. Washaja palajana tü alanaʼaleekalü ojutü jee süchikijee, washaja tü waapajüinjatkat jee tü wanajüinjatkat. Wachunta nümüin Jeʼwaa süpüla waaʼinrüin tia washajakat. Müle shia watuma, eejeerü kaʼi süpüla wekirajaain sünain tü Wiwüliakat, süpüla waʼwaajüin Maleiwa sümaa wapüshi, woʼunuin sünain tü outkajawaakat, wojuʼitüin sünain aküjaa pütchi otta süpüla wekirajüin wayuu. Shiasaʼa waapajüinjanapa, washaitüinjanapa jee wanajüinjanapa wanee kasa, nnojoleerü mojuin waaʼin sutuma waaʼinrüin tia. w19.10 30 püt. 14, 16, 17

Soʼu juyakat 55, na anoujashii chejeʼewaliikana Corinto, naainjee amüinrü wanee kasa anashaatasü maʼin napüleerua na nawalayuu chajanakana Jerusalén otta Judea. Naapa achikit müliain sutuma maletsein na nawalayuu chajanakana Jerusalén otta Judea. Jee müsia sükotchojünüin tü nasülajakat na anoujashii kepiakana suluʼu waneirua mma (1 Cor. 16:1; 2 Cor. 8:6). Kojuya kashi mapa, naapüin chi aluwataaushikai Pablo süchiki nnojoluin naainjain tü namakat paala. Sünainjee tia, eesüjaʼa nnojorüle kettaamaatüin tü nasülajüinkat süpüla shiʼikajaanüin chaa Jerusalénmüin sümaʼaleʼeya tü naapajalakat na wane anoujashiikana (2 Cor. 9:4, 5). Anashaatasü maʼin tü naainjeekalü amüin na corintojeʼewaliikana, anasü maʼin nünüiki Pablo namüin saaʼu kanoulain maʼin naya otta saaʼu nasülajeein. Nüküjapejeʼe namüin nekeraajüinjatüin tü naküjakat achiki paala (2 Cor. 8:7, 10, 11, TNM). Wayaawatüin sükajee tia, wachajaainjatüin sukuwaʼipa süpüla wekeraajüin tü wamakat. Eesüjaʼa kapüleere wamüin wekeraajüin wanüiki sutuma joʼuuin waya sümaa tü kaainjalaakat otta sutuma «waainjeerü mapa» wamüin sümüin wanee kasa. Jee shiale sutuma wanee kasa alatalaʼa makat (Ecl. 9:11). w19.11 26, 27 püt. 3-5

Sutuma tü taapüla najapuluʼukat wanee surulaat nnojotpuʼusü alatüin najatüin na nüʼünüükana nünainmüin. Akaataajaʼa katsüinre wanoula, nnojoleena waya aʼluwajiraain wakuwaʼipa sümaa wayuu nnojotka waʼwayuusein, nnojoleena mojulaain waya jee nnojoleerü waaʼinrüin kasa eekai mojushiin noʼuluʼu Maleiwa. Icheere wanoula maʼaka ichein wanee taapüla sütkaayaka surulaat, yapeena waya süpüla eejirawaa sümaa tü yolujaakalüirua (Éf. 6:10-12). ¿Jamüsü süpüla pütüjaain saaʼu yapale pia süpüla eejirawaa sümaa tü ooʼulakünakalü aka paaʼin? Achuntajachi pia kaalinwaa nümüin Jeʼwaa. Jee müsia, pikirajaainjatü anain tü Wiwüliakat süpüla piyaawatüinjatüin saaʼu anale punoula noʼuluʼu Jeʼwaa (Heb. 4:12). Anuu sünüiki tü Wiwüliakat: «Piʼitaa maʼin paaʼin nünain Jeʼwaa, nnojo piʼitaain paaʼin sünain tü pütüjaakalü aaʼu» (Prov. 3:5, 6). ¿Eesia paaʼinrüin tü sümakat pütchikat tüü? Piʼrüichire müliaa saaʼu manneetsein pia, ¿eesia sotuin paaʼin tü nümakat Jeʼwaa suluʼu Hebreokana 13:5? Müsü sünüiki tia wetsiikulokot: «Nnojoleechi taya oʼunüin jümaʼanajee. Nnojoleena tapütüin jia jümüiwa». ¿Jülüjasüche paaʼin sutuma pütchikat tüü nükaalinjeechin pia Jeʼwaa? Müle shia, shiimainjaʼa maʼin katsüin punoula. w19.11 14 püt. 1, 4

Wanee wayuu sümaa nuʼwayuuse, choʼujaasü nalatirüin kaʼi namaa nachonnii otta naaʼinmajüin naya. Jamüsüjaʼa kachonle wanee wayuu, eesü mapüsawaire shia süpüla shikirajaain, suʼuraajawalin jee süpüla süküjawalin pütchi. Kapüleesü sümüin jülüjain saaʼin tü aküjünakat sünain tü outkajawaakat jee shiyaawatüin saaʼu tü ekirajünakalü anain. Chi wayuu aikai apüla nuʼwayuuse, nükaalinjain shia namaa na tepichikana sünain tü outkajawaakat otta nepialuʼu. Nükaalinjeerü shia sünain tü kasa aainjünakat miichipaʼa, sünain naʼwaajüin Maleiwa sümaa napüshi jee noʼunawalin sünain aküjaa pütchi. w19.12 24 püt. 8

¿Kasa anasü neʼraka na israeliitakana sünainjee tü kanüliakat Jubileo? Jülüjataa paaʼin tüü: wainmale maʼin nujuyaala wanee israeliita, nuikapuʼuin nuumain süpüla nuwalaajüin nujuyaala. Shiasaʼa soʼunnaa tü kanüliakat Jubileo, aleʼejinnüsü nümüin tü nuumainkat. Nnojoluitpa amüloulin tü nüpaalainjatkat namüin na nüchonniikana. Jee jülüjataa paaʼin nukuwaʼipa wanee israeliita eʼrakai maʼin müliaa: süpüla nuwalaajüin nujuyaala, nuiküin wanee nüchon süpüla achepchieeinjachin. Otta eeshijaʼa niale aapajiraain niakai süpüla achepchieeinjachin. Aleʼejapejeʼe nia nüchikuaʼa sümaʼanamüin nüpüshi soʼunnaa tü kanüliakat Jubileo (Lev. 25:10). Sünainjee müin sukuwaʼipa tia, nütüjaa aaʼu wanee wayuu eekai achepchieein taasheechin nia soʼu wanee kaʼi. Anuu nünüiki Jeʼwaa süchiki tia: «Nnojoishi eeinjachin wanee wayuu eekai maʼletsein jaʼaka, jama jiʼreenain anaa tatuma suluʼu tü mma taapüinjatkat jümüin» (Deut. 15:4). Naata maʼin sukuwaʼipa tia suulia tü alatakat maaʼulu. Jamüsüjaʼa maaʼulu, awashirülaashi maʼin chi eekai washirüin otta mülialeeshia maʼin chi wayuu eekai maʼletsein. w19.12 8, 9 püt. 3, 4

Soʼu müliain Jesuu, achuntapuʼushi nia kaalinwaa «nümüin Maleiwa sünain niʼyalajüin sümaa emetuluin nünüiki» (Heb. 5:7). Waneepiashi Jesuu nümaa Jeʼwaa sümaa nuʼuraajüin nümüin suluʼujee naaʼin, müshijeseʼe noonoweein waneepia sümaa nünüiki. Anasü maʼin nümüin Jeʼwaa tü nuchuntakat Jesuu nuʼuraajapa nümüin, müsü aka saaʼin tü wunuʼu jemetakalü eejuu. Talatüshi maʼin Jeʼwaa sutuma tü naaʼinrakat Jesuu otta sünainjee tia naaʼinrakat Jesuu, atüjaana aaʼu niain neʼe Jeʼwaa anakai süpüla aluwatawaa saaʼu kasakat süpüshuaʼa. Washateerü tü naaʼinrakat Jesuu wachajaale sukuwaʼipa süpüla woonooin sümaa tü nuluwataakalü anain waya Jeʼwaa otta waneepiale waya nümaa. Weʼrapa müliaa achunteeshii waya kaalinwaa nümüin Jeʼwaa süpüla waaʼinrüin tü talatakalü atuma nia. Sükajee tia, atüjaaneerü aaʼu shiain anain wamüin sukuwaʼipa nuluwataaya Jeʼwaa. Soto waaʼin nnojoleerüin naapüin Jeʼwaa wanüiki waaʼinrüle kasa mojusü. Aluʼujasaʼa waaʼinrüle waneepia tü nümakat wamüin, naapeerü wanüiki woʼuraajapa nümüin, meerü aka saaʼin wunuʼu jemeta eejuu nümüin. Talateechi maʼin Jeʼwaa woonoole waneepia sümaa nünüiki. w19.11 21, 22 püt. 7, 8

Soʼu 1919, nüneeküin Jesuu waneinnua anoujashii chainjanaka chaa iipünaa süpüla nayainjanain «chi achepchiee oonookai otta kekiikai maʼin». Naya akumajakana sukuwaʼipa tü aküjaakat pütchi otta naapüin tü choʼujaakat sümüin nanoula na oushikajaakana süchiirua nukuwaʼipa Kürisüto. ¿Kasa piyaawataka aaʼujee eein Jeʼwaa nümaa chi achepchieekai? Nüchajaain maʼin sukuwaʼipa Satanaa otta na nümaajanakana süpüla namalajeʼerüin niʼyataain chi achepchieekai. Nnojoirejeʼe Jeʼwaa nümaa chi achepchieekai, isasüjeʼe nüchiki nikeraajüin tü niʼyataainkat. Mayaapejeʼe eeirüin piamasü atkawaa miyoʼu sainküin mmakat, joutpünaain müliaa sutuma alin shiiʼiree nneerü suluʼu waneirua mma otta müliain atumawaa na aʼyataashiikana nümüin Jeʼwaa, ayatüshi chi achepchieekai sünain aapaa tü choʼujaakat sümüin nanoula na oushikajaakana süchiirua nukuwaʼipa Kürisüto yaa saaʼu tü Mmakat. Jamüsüjaʼa maaʼulu, watta maʼin saalii tü karaloʼutairua aapünakat wamüin otta alatüsü suulia 900 anüiki süshajünaka aluʼu. Atüjaana aaʼu sükajee tia eein Jeʼwaa nümaa chi achepchieekai. Wane kasa nükaalinjaka anain Jeʼwaa chi achepchieekai shia sünain tü aküjaakat pütchi. Aküjünüsüjeseʼe tü pütchi anasükat «sainküin mmakat süpüshua» (Mat. 24:14). w19.11 24 püt.15, 16

Soʼu tü Kaʼi Alatinnakalü oʼu Naainjala na israeliitakana, naʼajapuʼuin chi laülaashikai napüleerua na sacerdootekana tü wunuʼu jemetakalü eejuu süpülapünaa nuʼutuin saaʼin tü mürüt naapüinjatkat nümüin Jeʼwaa. Naaʼinrüin tia süpüla talatüin naaʼin Jeʼwaa nümaa. ¿Kasa watüjaka sünainjee tia? Süpülapünaa naapajiraain nikii Jesuu, naaʼinrüin wanee kasa alanaʼaleeka ojutü suulialeʼeya aapajirawaa nikii saaʼu wayuu. Jamüshijaʼa nia, oonooshi waneepia sümaa nünüiki Jeʼwaa süpüla anain noʼuluʼu naapajiraainjachin nikii. Atüjaana aaʼu sükajee tia shiain anain nümüin wanee wayuu naaʼinrüle waneepia tü nümakat Jeʼwaa. Akaʼaya shia, atüjaana aaʼu niain neʼe Jeʼwaa anaka süpüla aluwatawaa saaʼu kasakat süpüshuaʼa jee lotuin maʼin sukuwaʼipa nuluwataaya. Soʼu yaajachin Jesuu saaʼu tü Mmakat oonooshi sümaa süpüshuaʼa tü nuluwataakalü anain Jeʼwaa. Mayaapejeʼe nuuʼulakünüin aaʼin Jesuu sümaa nütüjaain saaʼu müliainjachin nia nuʼutunapa aaʼin, ayatüsia naaʼinmaain sütüjaanüin aaʼu niain neʼe Jeʼwaa anain süpüla aluwatawaa (Filip. 2:8, TNM). w19.11 21 püt. 6, 7

Wainma tü kasa alatakat nümüin Jesuu soʼu nüküjain pütchi. Nakaalinjapejeʼe nia na nikirajüinkana, naaʼinrüin tü sümakat Proverbios 18:24, tü makat: «Eeshi chi wayuu aikai maʼin apüla naʼaleewain nuulialeʼeya wanee nuwala». Kojutushii maʼin naya nümüin Jesuu. Soʼunnaa niʼyataain nümüin Maleiwa, nnojoishii na nuwalayuukana anoujain nünain (Juan 7:3-5). «Maaʼinkai cheje aaʼin nia», müshii na nüpüshikana nümüin (Mar. 3:21). Nnojotpejeʼe müin nakuwaʼipa na nikirajüinkana, sutuma tia nüküjain Jesuu tü pütchi süpülajatkat soʼukai. Eeshii naainjale kasa mojuka atuma naaʼin Jesuu. Nnojotpejeʼe jülüjain naaʼin Jesuu tü kasa mojukat natuma, shia jülüjaka naaʼin kanoulain naya nünain (Mat. 26:40; Mar. 10:13, 14; Juan 6:66-69). Anuu nünüiki namüin soʼu tü ai outajachikalü oʼu nia: «‹Tatünajut› tamüshii jia süka taküjüin jümüin süpüshua tü aküjünakat tamüin nütüma chi Tashikai» (Juan 15:15). Atütüleʼennüsü naaʼin Jesuu natuma na naʼaleewainkana. w19.04 11 püt. 11, 12

¿Jamüsüche süpüla nütüjaain saaʼu wanee anoujashi nüneekünüin süpüla oʼunaa chaa iipünaamüin? Atüjaana aaʼu tia sutuma tü nümakat chi aluwataaushikai Pablo namüin na anoujashii chajanakana Roma, na aneekuushikana nutuma Maleiwa. Anuu wanee kasa nüküjaka Pabloya: «Saaʼu naapünüichipain wamüin chi Naaʼinkai, nnojoliinapa waya mmolüin sheema süchepchiaa kaainjalaa wachikua. Aluʼujasa jooluʼu, süka nüchooinapain waya Maleiwa, ‹Taata Maleiwa›, wainküin wamüin nümüin» (Roma 1:6, 7; 8:15). Nükajee chi naaʼinkai Maleiwa nüpansaajüin namüin na anoujashii nüneekakana sünain neenaküin naya süpüla chainjanain naya chaa iipünaa (1 Tes. 2:12). Na anoujashii nüneekakana Maleiwa süpüla oʼunaa chaa iipünaamüin, natüjaa aaʼu sünain shiimain naneekuushin süka nükaalinjain naya Maleiwa sünain ayaawataa saaʼu tia (1 Juan 2:20, 27). Nnojotsü choʼujaain süküjünüin namüin naneekuushin süpüla oʼunaa iipünaamüin. w20.01 22 püt. 7, 8

Tü nüchekakat Kürisüto, anashaatasü süka süikaleʼennüin shikii sünainjee alin wayuu nüpüla Maleiwa (Gal. 6:2). Wainma kasa anasü naaʼinraka Jesuu süka alin wayuu nüpüla. Sükajee nümülialaain aaʼin saalin wayuu otta alin shia nüpüla, ekirajüshi nia, anasü wayuu ayuuisü nutuma, nikirüin naya jee nüsoʼireʼerüin naaʼin na outushiikana (Mat. 14:14; 15:32-38; Mar. 6:34; Luc. 7:11-15). Wainma kaʼi nülatiraka Jesuu sünain naaʼinrüin tia otta eeshi mapüsale nia. Naaʼinrapejeʼe tia süka kapülain naaʼin nakuwaʼipa na waneinnua. Otta müshia nia, naapajiraain nikii naaʼu na wayuukana süka alin maʼin naya nüpüla. Waaʼinreerü tü naaʼinrakat Jesuu müleka shiale kapülain waaʼin nakuwaʼipa na waneinnua. Otta eeshii süpüla wamülialaain naalin na wayuu waküjakana amüin pütchi. Waküjale namüin süchiki nukuwaʼipa Maleiwa sünain Aluwatawaa, oonooshii waya sümaa tü nüchekakat Kürisüto. w19.05 4 püt. 8-10

Nüjütüin Maleiwa chi Nüchonkai süpüla taashinjatüin wayuu nutuma suulia piamasü kasa. Tü palajatkat, shia suulia tü alawaa ekirajünakat natuma na fariseokana, na saduceokana otta na karaloʼutamaajanakana. Wainma na judío müliakana aaʼin süka noʼunuin süchiirua tü shikirajakalü anain wayuu otta tü alawaa ekirajünakalü anain (Mat. 5:31-37; 15:1-11). Nnojoishi naʼwaajüin Jeʼwaa na fariseokana otta na karaloʼutamaajanakana; ekirajülii naya wayuu nüchiki Maleiwa naashin. Müshiijeseʼe müin naya maʼaka naaʼin wanee wayuu eekai moʼuin. Sutuma nayoutuin Jesuu otta tü kasa nikirajakalü anain, nnojotsü neʼraajüin maʼin nukuwaʼipa Maleiwa otta ayatshii naya süchepchiain kaainjalaa (Juan 9:1, 14-16, 35-41). Nikirajüin Jesuu wayuu sünain tü shiimainkat nüchiki Maleiwa otta anasü nukuwaʼipa napüleerua. Nüküjain namüin na wayuu anamiakana tü naaʼinrajatkat süpüla taashin naya suulia tü alawaa ekirajünakalü anain naya (Mar. 1:22; 2:23–3:5). Tü wane kasa taashikalü oulia wayuu nutuma Jesuu, shia suulia saainjala. Süka naapajiraain nikii Jesuu eeitpa süpüla nülaʼajaain Jeʼwaa naainjala na wayuu kojutukana amüin tia naaʼinrakat Jesuu jee jayasü saaʼu nakuwaʼipa kojutuin tia namüin (Heb. 10:12-18). w19.12 10 püt. 8; 11 püt. 10, 11

Süpüla pansaainjatüin namüin naneekünüin nutuma Jeʼwaa, nüneeküin naya nükajee chi naaʼinkai. Naapüin chi naaʼinkai namüin süpüla nayaawatüinjatüin saaʼu chainjanain naya iipünaa süpüla kaʼikat süpüshuaʼa (2 Cor. 1:21, 22). Nüneekünüle wanee anoujashi süpüla nuʼunuinjachin iipünaamüin, ¿oʼuneeiche nia chamüin? Eeshijaʼa nnojoleechire nuʼunuin. Anuu wanee pütchi jülüjainjatka naaʼin: «Tawalayuwaa, shia anaka aluʼu müleka kachiiruale jaaʼin aaʼinraa tü nüchekakat chi Maleiwakai jüpüleerua [...]. Je sünainjee tü kasa anasü jaaʼinrakat, jütüjaa aaʼulu sünain shiimüin aneekuushin jia nütüma Maleiwa süpüla nüpüshinjanain jia» (2 Ped. 1:10). Nüneekünüle wanee anoujashi süpüla nuʼunuinjachin iipünaamüin, oʼuneechi nia waneepiale nia nümaa Jeʼwaa (Filip. 3:12-14; Heb. 3:1; Alat. Map. 2:10). w20.01 21, 22 püt. 5, 6.

Mojusü pütchi nüchiki Job natuma apünüinshii naʼaleewainyuu, nnojotsü natütüleʼerüin naaʼin. ¿Jamüsü nnojotka sümülialaain naaʼin naalin? Nnojotsü nayaawatüin aaʼu tü alatakat nümüin. Nnojotsü anain tü jülüjakat naaʼin nüchiki otta mojusü neʼe nanüiki nüchiki. ¿Kasa waaʼinrüinjatka süpüla nnojoluinjatüin waaʼinrüin tia? Palajana, wacheküinjatü achiki niain neʼe Jeʼwaa atüjaakai saaʼu süpüshuaʼa tü alatakat nümüin wanee wawala. Jee müsia, jülüja maʼin waaʼin tü nümakat wamüin wanee wawala eʼrakai müliaa. Nnojo waapajüin neʼe tü nümakat wamüin. Maa wayakai alatüin amüin tü alatakat nümüin. Waaʼinrüle tia, amülialaajeerü waaʼin naalin. Sümülialaale waaʼin naalin wanee wawala, nnojoleena waya aküjain perulaa süchiki tü alatakat nümüin. Na wayuu aküjakana perulaa, namojujain neʼe naaʼin na wawalayuukana, nnojotsü natütüleʼerüin naaʼin (Prov. 20:19; Roma 14:19). Mojuleesia naaʼin chi wawala eʼrakai müliaa sutuma tia perulaakat (Éf. 4:31, 32). Makalaka shiainjatüin jülüjain waaʼin tü kasa anasü naaʼinrakat chi wawalakai otta wachajaainjatüin sukuwaʼipa süpüla wakaalinjain nia. w19.06 21, 22 püt. 8, 9