Juulioʼu

Shapaasü maʼin waaʼin airuʼurule pütchi wamüin otta müliale waaʼin atumawaa. Shialeekajaʼa niale wanee waʼaleewain jee niale wanee wapüshi müin atuma waya. Shapaale waaʼin eesü süpüla washatüin sukuwaʼipa Ana, müliasü maʼin saaʼin sutuma shimeeʼerainpalain tü shipiamüinkat (1 Sam. 1:12). Eeshii süpüla kamaʼain waya sünain aküjaa nümüin Jeʼwaa süchiki tü shapaakalü atuma waaʼin otta tü mmoluwaakalü atuma waaʼin. Nnojotsü choʼujaain kemeʼeriainjatüin maʼin wanüiki. Eeshiijaʼa wachuntule nümüin Jeʼwaa sümaa üttüin maʼin waaʼin otta sümaa ooʼintüin waya. Nnojoleetpejeʼe akulajaain naaʼin Jeʼwaa sümaa wanüiki. Nnojotsü shiainjatüin neʼe waküjain achiki nümüin tü müliakalü atuma waaʼin, jülüjeesü waaʼin tü sümakat Filipos 4:6, 7. Nüküjain chi aluwataaushikai Pablo suluʼu tia pütchikat, waapüinjanain analuʼut nümüin Jeʼwaa wachuntapa nümüin. Watta maʼin saalii tü kasa waapüinjatkalü aaʼujee analuʼut nümüin Jeʼwaa, saaʼu katüin woʼu nutuma, saaʼu tü kasa nukumajalakat, saaʼu alin waya nüpüla otta saaʼu tü kasa eejeetkat mapeena nutuma. w20.02 21 püt. 3, 6

Nukumajüin waya Jeʼwaa süpüla kanüikinjanain waya (Éx. 4:10, 11; Alat. Map. 4:11). Nüküjain wamüin Jeʼwaa sükajee tü Wiwüliakat tü waaʼinrajatkat süpüla anainjatüin sukuwaʼipa wanüiki. Aküjainjana waya waneepia pütchi nüchiki Jeʼwaa otta süchiki nukuwaʼipa sünain aluwatawaa (Mat. 24:14; 10:14, TNM). Washatüin nukuwaʼipa Jesuu waaʼinrapa tia. Wanee kasa nüntaka apüla Jesuu, shia süpüla nüküjain sümüin wayuu tü shiimainkat nüchiki chi Nüshikai (Juan 18:37). Soto waaʼin aneein wanüiki sümüin wayuu waneepia. Kojutuinjatü wayuu wamüin jee kamaneeinjana waya sümüin waküjapa pütchi nüchiki Jeʼwaa. «Mojusü tia», nnojoishii müinjanain waya süchiki tü nanoujakalü anain, kachipünaainjatü waaʼin nakuwaʼipa (1 Ped. 3:15). Müle shia watuma, nnojoleena yootuin neʼe waya namaa na wayuukana, eejeerü tü natüjakat sünainjee tü wamakat namüin otta eesü süpüla watanalüin naaʼin. Eeshi chi wawala choʼujaakai amüin achiaanaa natuma na laülaashiikana. Nachiaainjaipejeʼe nia anashiipa shia otta nnojoishii naya yootuinjanain nümaa suʼupala wayuu, suulia joo japüijain nia natuma. w20.03 18, 19 püt. 2-4

¿Kasa eeka süpüla wachuntuin nümüin Jeʼwaa? Eesü süpüla wachuntuin nümüin kooʼomüin sütsüin wanoula (Luc. 17:5; Juan 14:1). Choʼujaasü wamüin tia süka nuuʼulakeerüin waaʼin Satanaa (Luc. 22:31). ¿Jamüsü aneetka waaʼin kooʼomüinre wanoula? Süchikijee wachajaain sukuwaʼipa süpüla walatüin süchikumüin, weʼitaajeerü shia najapuluʼu Jeʼwaa süka watüjaain saaʼu nükaalinjeenain waya sünain tü alatakat wamüin (1 Ped. 5:6, 7). Jaʼitairü kasain alatüin wamüin, aneerü waaʼin woʼuraajüle nümüin Jeʼwaa. Anuu tü naainjakat Robert, wanee laülaashi, alatüirü suulia 80 nuuyase. Anuu nünüiki süchiki tü naaʼinrakat süpüla anain naaʼin: «Eejiraashi taya sümaa tü kasa alatakat tamüin sutuma tü sümakat Filipos 4:6, 7. Choʼujaʼawaisü nneerü tamüin jee nnojoipünaashi laülaashin taya suluʼu tü outkajaaleekat». Anuu sooʼomüin nünüiki: «Oʼuraajüshi taya nümüin Maleiwa wanaa sümaa shapaain taaʼin. Sutuma toʼuraajüin waneepia nümüin, anasü taaʼin». w19.04 9, 10 püt. 5-7

Nütaüjaale tepichi wanee wayuu, kaainjalashi nuulia Jeʼwaa. Kaainjarale wanee wayuu nümüin wanee, kaainjalashi niaʼaya nümüin Jeʼwaa. Joʼu weʼrai wanee sukuwaʼipa sükajee tü Pütchi aapünakat namüin na israeliitakana. Saashin tia pütchikat, wanee wayuu eekai nuʼluwajüin jee nimeejüin na waneinnua, kaainjalashi nuulia Jeʼwaa (Lev. 6:2-4). Nütaüjaale tepichi wanee anoujashi, kaainjalashi nuulia Jeʼwaa jee mojusü pütchi nüchiki nutuma otta nnojotsü anain naaʼin na tepichikana nutuma. Müsüjeseʼe kashüülain maʼin nümüin Jeʼwaa tü naaʼinrakat chi eekai nütaüjaain wanee jintüi jee shiale wanee jintut, müsia shia wamüin. Kakaliairü süküjain nupueulose Jeʼwaa sükajee Aapiria Wayuu otta ¡Eeja Waaʼin! tü naaʼinrajatkat na wayuu ataüjaanakana süpüla nnojoluin mojuin maʼin naaʼin, tü naaʼinrajatkat na waneinnua süpüla nakaalinjain naya jee namülialüin naaʼin otta ashajünüsü kasain naaʼinrajatüin na kachonshiikana süpüla naaʼinmajüin nachonnii. Jaʼitakajaʼa na laülaashiikana, aküjünüsü namüin tü naaʼinrajatkat müleka nütaüjaale tepichi wanee anoujashi. Akaʼaya tü nupueulosekat Jeʼwaa sünaʼlawalin tü naaʼinrüinjatkat na laülaashiikana. w19.05 9, 10 püt. 8, 9

Tü Nünüikikat Maleiwa müsü aka saaʼin wanee chajaruuta ajaʼlajeʼeraka naʼalain Satanaa (Éf. 6:17). Jamüsüjaʼa shia süküjain wamüin nnojoluin süpüla naashajaain wamaa na outushiikana (Sal. 146:4). Otta süküjain wamüin niain neʼe Jeʼwaa chi atüjaakai saaʼu kaseerüin alatüin mapeena (Is. 45:21; 46:10). Süpüla walerajüin otta wayoutuin tü alawaa nekirajakalü anain na yolujaakana, waashajeʼerüinjatü tü Wiwüliakat otta wasakireʼerüinjatü waaʼin sünain tü sümakat. Müsüjeseʼe nnojoluinjatüin waaʼinrüin wanee kasa sünainpünaaka yolujaa. Waya anoujashiikana nnojoishii waya ooʼulakirüin ouutsü otta nnojotsü wachajaain sukuwaʼipa süpüla waashajaain namaa na outushiikana. Nnojoishii waya sünainpünaain tü aaʼinnakat nikiira wanee wayuu outapa nia, süka sunoujünüin anain sujuʼitüin naaʼin wanee wayuu outapa nia. Otta nnojoishii waya ooʼulakirüin süka jolotsü süpüla watüjaain saaʼu tü alatajatkat mapeena. Nnojoishii waya sünainpünaain tia, süka watüjaain saaʼu mojuin maʼin shia otta eeshii süpüla nünainpünaain waya Satanaa namaa na yolujaakana sutuma. w19.04 21, 22 püt. 8, 9

Na aaʼinrakana tü namakat na manoujainsaliikana, mojutusat namüin tü sümakat tü Wiwüliakat süchiki wuleinjatüin sukuwaʼipa wayuu otta alawaa neʼe tü süküjakat naashin. Eeshiijaʼa namüle: «Nialejeʼe Maleiwa keʼitaalain shikii tü aainjirawaakalü akuwaʼipaa, ¿jamaka nüchecherüinjatka naaʼin wanee wayuu suchuntaapa shia naaʼin?». Müsü nanüiki na wayuukana sutuma nanoujain sünain naaʼinrajatüin wanee wayuu tü suchuntaakat naaʼin. Nnojotpejeʼe müin tia saashin tü Wiwüliakat. Shikirajüin waya sünain nnojoluinjatüin waaʼinrüin süpüshuaʼa tü suchuntaakat waaʼin, shia waaʼinrajatka tü kasa anasükat, suluʼujee tia wuleerü wakuwaʼipa noʼuluʼu Maleiwa (Col. 3:5). Niʼitaain shikii Maleiwa tü kaʼwayuuseekat, eekalaka süpüla naainjiraain neʼe nukuwaʼipa wanee wayuu sümaa nuʼwayuuse süka nnojoluin mojuin tü naaʼinrakat (1 Cor. 7:8, 9). Naata maʼin tü sümakat tü Wiwüliakat suulia tü namakat na manoujainsaliikana süchiki tü aainjirawaakalü akuwaʼipaa. Saashin tü Wiwüliakat anasü naaʼin wanee wayuu sutuma naainjiraain nukuwaʼipa sümaa nuʼwayuuse (Prov. 5:18, 19). Süchiaapejeʼe waya suulia wanee kasa, anuu sünüiki: «Jiakana waneʼewai jukua, wuleinjatü tü jukuwaʼipakat otta kojutuinjatü shia jümüin, nnojotsü suchuntaainjatüin jaaʼin jümaʼüjiraain jukuwaʼipa maʼaka suchuntaain naaʼin na wayuu nnojoliikana eʼraajüin Maleiwa» (1 Tes. 4:4, 5, TNM). w19.05 22, 23 püt. 7-9

Nnojoleerü nuuʼulaain Jeʼwaa sajaʼttinnüin tü nupueulosekat natuma na sülaülashiikana mma, jama kojutuin maʼin namüin na aʼyataaliikana nümüin Jeʼwaa nünülialuʼuin naya. Otta sükajee noonooin sümaa tü nümakat sünain nojuʼitajanain suluʼujee Babilonia tü Miyoʼusükat (Aluw. 15:16, 17; Alat. Map. 18:4). Jee süka nakaalinjain wayuu süpüla sujuʼitüin suluʼujee Babilonia, nnojoleerü antüin nanainmüin «tü müliaa antajatkat sünainmüin saaliijee saainjala». Mayaainjeʼe naaʼinmajüneenain nutuma Jeʼwaa na anoujashiikana, nakatchinrajatü nanoula süpüla eejiraain naya sümaa tü alatajatkat süchikijee tia (Ezeq. 38:2, 8). Sajaʼttinnapa nutuma Jeʼwaa tü iküleesia ekirajakalü alawaa, shia eejeetka neʼe sümüiwaʼa nupueulose Jeʼwaa yaa saaʼu tü mmakat. Jashicheechi maʼin Satanaa sünainjee tia, müshijeseʼe niʼikeʼereenain na sülaülashiikana mma namaa na namaajanakana süpüla nashutüinjanain saaʼu nupueulose Jeʼwaa. Nuunteerü tia sükajee naʼalain na yolujaakana (Alat. Map. 16:13, 14). «Gog chi chejeʼewaikai Magog», münüshii na sülaülashiikana mma namaa na namaajanakana. Oʼtteerü Armagedón sushutünapa aaʼu nupueulose Jeʼwaa natuma na sülaülashiikana mma (Alat. Map. 16:16). w19.09 11 püt. 12, 13

Süpüla anashiinjatüin namüin na israeliitakana aʼluwajirawaa akuwaʼipaa, niʼikeʼerüin naya Satanaa sükajee tü iküleesia nnojotkat shiimain. Müsia nutuma Satanaa maaʼulu. Na suluʼukana tü iküleesia nnojotkat shiimain, anashiisü namüin tü aʼluwajirawaakalü akuwaʼipaa. Müshiijeseʼe eein na wayuu nnojoliikana wulein akuwaʼipa sümaa nanoujain nünain Maleiwa naashin. ¿Kasa eeka sünainjee tia? Nüküjain shia chi aluwataaushikai Pablo suluʼu tü karaloʼuta nüshajakat namüin na romaanokana (Roma 1:28-31). Süpüshi tü kasa «mojusü jülüjakat waneepia naaʼin» shia süpüshuaʼa tü kasa sünainpünaakalü aʼluwajirawaa akuwaʼipaa, maʼaka saaʼin nuʼluwajiraain nukuwaʼipa wanee toolo nümaa wanee toolo otta wanee jierü sümaa wanee jierü (Roma 1:24-27, 32; Alat. Map. 2:20). Shiakalaka anain woonoole sümaa tü sümakat tü Wiwüliakat. Nnojotsü pansaain tü nikirajakalü anain Jeʼwaa naashin na ekirajakana sünain alawaa. ¿Kasa eeka sünainjee tia? Nnojotsü jaralüin jülüjain aaʼin tü akuwaʼipaa eekat nutuma chi naaʼinkai Maleiwa, shia jülüjaka neʼe naaʼin na wayuukana naaʼinrüin kasa mojusü (Gal. 5:19-23). Yaletüsü naaʼin jee aʼwaataashii suluʼu nakuwaʼipa, makalaka kapülain naaʼin nakuwaʼipa neʼe namüiwaʼa (2 Tim. 3:2-4). Niyoutapejeʼe Jeʼwaa tia wapüleerua, shia keeʼireeka naaʼin anamiain waya jee nnojoluinjatüin yaletüin waaʼin (2 Sam. 22:28). w19.06 5, 6 püt. 12-14

Wainma kasa mojusü alataka soʼu niʼyataain Elías nümüin Jeʼwaa otta eesü tü alatakat nümüin. «Anashi paapüle süpüshi tü piʼyataainkat nümüin Eliseo», müshi Jeʼwaa nümüin Elías. Aneekünüshi Eliseo nutuma Jeʼwaa süpüla naʼaleewainjachin nia Elías. Wanaa sümaa mojuin naaʼin Elías, atütüleʼennüsü naaʼin nutuma Eliseo. Akaʼaya wayakana, eere wanee waʼaleewain, nütütüleʼereerü waaʼin soʼu weʼrüin müliaa (2 Rey. 2:2). ¿Jama nnojoire wanee waʼaleewain anakai süpüla waküjain amüin tü alatakat wamüin? Wachunta kaalinwaa nümüin Jeʼwaa süpüla aleewain waya nümaa wanee wayuu laülaakai aaʼin sünain anoujaa jee atütüleʼereechika waaʼin soʼu weʼrüin müliaa. Akaalinjünüshi Elías nutuma Jeʼwaa süpüla ayatüinjachin nia sünain aʼyatawaa nümüin jee süpüla nnojoluinjatüin yüülain naaʼin sutuma shapaain naaʼin. Atütülaasü waaʼin sutuma tü nukuwaʼipakat Elías. Eeshiijaʼa mapüsale waya jee mojule waaʼin sutuma shapaain waaʼin. Katchinjeetpejeʼe waaʼin süpüla waʼyataain nümüin Jeʼwaa müleka weʼitaale waaʼin nünain (Is. 40:28, 29). w19.06 15 püt. 4; 16 püt. 9, 10

Meimmoluinjeena waya müleka waküjale pütchi süchiki tü sukuwaʼipakat Aluwatawaa nutuma Maleiwa. Waaʼinrüle tia, weʼitaajeerü waaʼin nünain Jeʼwaa otta yalayaleerü waaʼin sünain aashajawaa sümaa wayuu. Jamüshijaʼa wanee wayuu naainjale ejercicio, katchinsü naaʼin, akaatajaʼa waya, katchinjeerü waaʼin süpüla meimmoluinjanain waya waküjale pütchi sainküin piichi, suluʼupünaa oikaalee, eere jouluin wayuu otta eepünaale waya. Meimmoluinre waya sünain aküjaa pütchi maaʼulu, wounteerü waküjain pütchi süpülajünapa woulia (1 Tes. 2:1, 2). Jülüja waaʼin sukuwaʼipa wanee wawala meimmoluinka maʼin, Nancy Yuen sünülia. Wanee meetüro shiatapünaamüin sajaʼapüin, meimmoluinpejeʼe shia. Püreesasü shia soʼu 20 juya chaa China sünainjee süküjain pütchi. «Macheʼekatche maʼin», müshii na pulusiia asakiijakana shia. w19.07 5 püt. 13, 14

Eeshii wayuu atüjaweekana saaʼu tü sümakat tü Wiwüliakat. Eepejeʼe na nnojoliikana aapajeein paala tia pütchikat, shiakalaka anain kemeʼeriale wanüiki namüin süpüla naapajeein nünüiki Maleiwa. Acheküsü watüjainjanain süpüleerua tü wanüikinjatkat süpüla naapajüin tü pütchikat. Shia anaka waneeküle tü pütchi kamalainjeetkat namüin na wayuukana jee wakumaja sukuwaʼipa tü wanüikinjatkat namüin. Eesü süpüla müin wanüiki namüin: «Watta saalii kasa mojusü alataka wamüin maaʼulu yaa. ¿Choʼujaashiche wanee aluwataai ajaʼttirajachika tü wamülialakat? ¿Jamüsüjaʼa saaʼin pümüin?». Jee süchikijee tia, eesü süpüla waashajeʼerüin tü sümakat Daniel 2:44. Anuu sooʼomüin tü eekat süpüla waashajaain achiki: «¿Kasache anaka sümüin tepichi süpüla anainjatüin shipijia?». Eekalaka süpüla waashajeʼerüin tü sümakat Deuteronomio 6:6, 7. Jaʼyasü waaʼu talatüin waya sutuma wekirajüin na wayuukana süpüla noushikajaain süchiirua nukuwaʼipa Jesuu. w19.07 15 püt. 4, 6, 7

Eeshi wanee wawala kakaliaichikai aküjain pütchi namüin na wayuu manoulasalii chakana Asia, anuu nünüiki: «Yaʼayaa, wanaa sümaa nüküjain wanee wayuu manoulain nia nünain Maleiwa, shia nüküjeeka achiki nnojoluin choʼujaain naʼwaajüin na maleiwayaashii sunoujakana anain wayuu. Taküjawalin namüin nnojoluin shiimain tü namaleiwasekat süka sukumajalain shia wayuu. Taashajeʼerawalin namüin Jeremías 16:20 jee süchikijee tia tasakirüin naya kasain waaʼinrajatüin süpüla watüjaain saaʼu jaralin chi Maleiwa shiimainshikai. Jülüjasü taaʼin jamüin nasoutia otta taashajeʼerüin namüin Isaías 41:23: ‹Jüküja süchiki tü kasa alatajatkat mapeena, watüjaaiwa saaʼu shiimain maleiwain jia›. Taashajeʼerüin namüin wanee pütchi nikeraajüinjatka Jeʼwaa». Anuu nünüiki wane wawalaya: «Shia taashajeʼeraka namüin pütchi eekai anain maʼin suluʼujee tü Wiwüliakat, tü pütchi ekeraajüitpakat otta anain maʼin sukumajia tü jolotsükalüirua sümaa waneirua kasa chakat iipünaa nutuma Jeʼwaa. Süchikijee tia, taküjain namüin eein wanee Maleiwa kakumajalakai kasa süpüshuaʼa sümaa nütüjain maʼin. Anashiipa namüin na wayuukana shiimain eein chi Maleiwakai, taashajeʼerüin namüin tü sümakat tü Wiwüliakat nüchiki Jeʼwaa». w19.07 23, 24 püt. 14, 15

Süpüshi tia kasa alanaʼaleekat suluʼu anain, shia kojutuinjachin Maleiwa sutuma wayuu, shikeraajüinjatüin tü keeʼireekat naaʼin, paaʼinwainjanain jee anajiraainjanain na anoujashiikana (Mat. 6:9, 10, TNM; Juan 13:35). Shiale waaʼinmaain maʼin tia, shiimainjaʼa alin wapüla Jeʼwaa. Nüküjainya Pablo lotuinjatüin wakuwaʼipa. Nnojotpejeʼe maluʼuluin tia nnojoleenain woʼtchejaain sümaa wanee kasa. Loteetpejeʼe wakuwaʼipa noʼuluʼu wakooʼomüinrüle naalin wapüla jee waaʼinmaale maʼin tü kasa alanaʼaleekat suluʼu anain. Aire wapüla Jeʼwaa, nnojoleerü waaʼinrüin wanee kasa eeka süpüla sükaaʼinjaain anainjee wayuu nuulia. Aküjünüsü wamüin nnojoluinjatüin waaʼinrüin wanee kasa sükaaʼinjaajeetka anainjee wayuu nuulia Jeʼwaa, nnojotsü ashaitaain tia. Eesü süpüla sükaaʼinjaain wayuu nuulia Jeʼwaa sünainjee tü wanajakat, tü waapajakat, tü washeʼinkat jee tü kasa waʼyataakalü anain. Eesüjaʼa nnojorüle mojuin tü kasa waaʼinrakat, mojeetpejeʼe shia mojule nakuwaʼipa na waneinnua sünainjee tü waneekakat (Mat. 18:6). w19.08 10 püt. 9-11

Soʼujee juyakat 1935, nayaawata aaʼulu na aküjaliikana pütchi nüchiki Jeʼwaa yaainjanain kepiain saaʼu tü Mmakat na wayuu wattakana maʼin naalii, na waneepiakana nümaa Jeʼwaa. Wayuukana naainnua naya na niʼrakana Juan (Alat. Map. 7:9, 10). Süpüla noʼttaainjanain süchikumüin tü müliaa miyoʼusükat, ekirajaainjana naya nüchiki Jeʼwaa otta naʼwaajüinjachi nia. Naaʼinrüinjatü tia süpülapünaa nuʼttüin Jesuu sünain aluwatawaa soʼunnaa tü miitkat juya (Luc. 21:34-36). Talatüsü maʼin naaʼin na wayuu wattakana naalii süka kepiainjanain naya yaa saaʼu tü Mmakat. Nayaawata aaʼulu niain Jeʼwaa aneeküin naʼakajee na aʼyataashiikana nümüin jaraliin chainjanain iipünaa otta jaraliin yaainjanain saaʼu tü Mmakat. Nayaawata aaʼulu na anoujashii chainjanakana iipünaa otta müshiʼiya na wayuu wattakana maʼin naalii, neʼreenain kasa anasü süka anamiain Jeʼwaa namüin, müshijeseʼe naapüin nikii Jesuu süpüla taashinjanain naya (Roma 3:24). w19.09 28 püt. 10; 29 püt. 12, 13

Eʼreena waya kasa anasü jeketüle tü waʼyataainkat. Nnojo jülüjain waaʼin mojuin watuma sukuwaʼipa tü waʼyataainkat paala jee nnojo jülüjain waaʼin mojutuin shia. Shia jülüjainjatka waaʼin nükaalinjain waya Jeʼwaa jee ayatüin waküjain pütchi. Maa waya maʼaka naaʼin na anoujashii eejanakana soʼu nakalia na nikirajüinkana Jesuu jaʼitaina jalapünaain naya, aküjashii naya pütchi eepünaale naya (Aluw. 8:1, 4). Ayatüle waya sünain aküjaa pütchi, eʼreena waya kasa anasü sünainjee. Jamüshiijaʼa waneinnua pürekutsoot ojutunakainka suluʼujee wanee mma eepuʼule naküjain pütchi, akolojooshii naya suluʼumüin wane mma eere choʼujaain maʼin Aküjalii pütchi suluʼu tü anüikii natüjakalü apüleerua. Maʼaka jeʼra kashi süchikijee tia, awainmalaashii na wayuu outkajaakana namaa naya wawalayuukana. Shia talatüinjatka atuma waaʼin aleewain waya nümaa Jeʼwaa. Talateere waaʼin, ayata waya nümaa Jeʼwaa jee weʼitaa waaʼin sünain naapeerüin wamüin kekiiwaa, nikirajeenain waya otta nükaalinjeenain waya. Soteesü waaʼin talatüin waya sümaa tü waʼyataainkat süka wakaalinjeein na wayuukana. Nükaalinjeena waya Jeʼwaa süpüla talatüin waaʼin sümaa tü jeketkat waʼyataain wakaalinjeere maʼin na wayuukana (Ecl. 7:10). w19.08 24, 25 püt. 15, 16

Jüüjüüinjana waya nümüin Jeʼwaa süka niain Kakumalain waya. Nia neʼe Jeʼwaa chi anakai süpüla aküjaa wamüin tü waaʼinrajatkat (Alat. Map. 4:11). Jee müsia, jüüjüüinjana waya nümüin süka niain neʼe nümüiwaʼa anakai süpüla aluwatawaa waaʼu. Nnojotpejeʼe müin nakuwaʼipa na wayuu aluwataakana naaʼu na waneinnua. Atüjaleeshia maʼin Jeʼwaa, aipürai nia, kojutusü wayuu nümüin otta amülialaasü naaʼin saalin (Éx. 34:6; Roma 16:27; 1 Juan 4:8). Jüüjüüshii waya nümüin Jeʼwaa wachajaale maʼin sukuwaʼipa süpüla woonooin nümaa waneepia otta nnojorüle waaʼinrüin tü anakat neʼe saaʼin wamüin (Prov. 3:5). Mapüleejeerü wamüin jüüjüüin waya nümüin Jeʼwaa watüjaale saaʼu anain maʼin nukuwaʼipa, jama weʼrüin shia sünain süpüshuaʼa tü naaʼinrakat (Sal. 145:9). Weʼraajüle maʼin nukuwaʼipa Jeʼwaa akooʼomüinraajeerü maʼin naalin wapüla. Aire wapüla Jeʼwaa nnojoleerü choʼujaain süküjünakuʼu sümünüin wamüin tü waaʼinrajatkat jee tü nnojoluinjatkat waaʼinrüin. w19.09 14 püt. 1, 3

Müliasü maʼin saaʼin wayuu sutuma tü alawaa nikirajakalü anain Satanaa. Jamüsüjaʼa naashin, nnojotsü motuin naaʼin Jeʼwaa tü kasa mojusü waaʼinrakat otta maaliinsalii waya nüpüla Jeʼwaa naashin. Mojusü maʼin saaʼin wayuu sutuma tia alawaakat (Juan 8:44). Warütkaapa nünainmüin Jesuu, alaʼajaanüsü woulia tü waainjalakat (Mat. 11:28, TNM). Aitaʼaleeshiijaʼa waya nüpüla Jeʼwaa (Roma 8:32, 38, 39). Naata sümüin tü aʼyatawaa naapakat Jesuu wamüin suulia waneirua aʼyatawaa. Eeshii mapüsale maʼin waya süchikijee aʼyatawaa otta nnojorüle talatüin waaʼin sutuma tü waʼyataakalü anain. Anapejeʼe maʼin waaʼin sutuma waʼyataain nümüin Jeʼwaa otta nümüin Jesuu. Eeshiijaʼa mapüsale maʼin waya otta kapüleere maʼin wamüin oʼunaa sünain tü outkajawaakat. Aneetpejeʼe waaʼin otta katchinjeerü waaʼin woʼunüle sünain tü outkajawaakat. Akaataajaʼa wojuʼitüle sünain aküjaa pütchi otta wekirajaale sünain tü Wiwüliakat wamüiwaʼa, aneerü maʼin waaʼin. w19.09 20 püt. 1; 23 püt. 15, 16

Naashin Jeʼwaa waaʼinmaainjatü tü aküjaakat pütchi sümaʼinruʼu süntüin tü nükaliakat. Wachajaweein sukuwaʼipa süpüla waʼyataain maʼin nümüin chi Senyotkai (1 Cor. 15:58). Wanaa sümaa nüküjain Jesuu süchiki tü alatajatkat sülüʼütpa süpüla sajaʼttüin kasakat süpüshuaʼa, nüküjaleʼeinya tü waaʼinrajatkat. Anuu tü nümakat: «Aküjüneerü palajana tü pütchi anasükat sainküin tü mmakat» (Mar. 13:4, 8; Mar. 13:10, TNM; Mat. 24:14). Wojuʼitapa sünain aküjaa pütchi, aʼyataashii waya süpüla shikeraajüin tü nümakat Jesuu. Juyawai, watta maʼin naalii na wayuu aapaakana sümaa tü pütchi anasükat, tü süchikikat nukuwaʼipa Maleiwa sünain aluwatawaa. Akooʼomüinraashii maʼin na aküjaliikana pütchi nüchiki Jeʼwaa sainküin mmakat süpüshuaʼa. Jamüsüjaʼa soʼu 1914, eejana neʼe 5.155 aküjalii pütchi suluʼu 43 mma. Shiasaʼa maaʼulu yaa, eeshii maʼaka saaʼin 8.500.000 aküjalii pütchi suluʼu 240 mma. Isayütpejeʼe sooʼomüin waʼyataain. Ayatüinjanaʼaya waya aküjain pütchi süchiki najaʼttirajatüin Jeʼwaa tü kasa müliakalü atuma saaʼin wayuu (Sal. 145:11-13). w19.10 8-10 püt. 3, 7, 8

Nükaalinjain Jeʼwaa chi aluwataaikai David nükajee Barzilái. Nükaalinjain David namaa na nümaajanakana wanaa sümaa neipiijünüin nutuma Absalón, wanee nüchon David. Mapüsashii naya, süsitshii naya jamü jee wüinyaasü. Mayaainjeʼe laülaachon Barzilái, oʼunushi nia namaa waneinnua wayuu sünain eʼikajawaa nayaalujut. Naaʼinrüin tia mayaainjeʼe natüjaain saaʼu eein süpüla noʼutunüin aaʼin. Nnojotsü jülüjain naaʼin Barzilái nnojolin jaloulin nia nümüin Jeʼwaa sutuma laülaaichin nia. Asülajüshi nia süpüshi tü kasa eekat nümaʼana süpüla nükaalinjain na aʼyataashiikana nümüin Maleiwa, na eʼrakana müliaa soʼu tia (2 Sam. 17:27-29). ¿Kasa watüjaka sünainjee tia? Jaʼitaina laülaain jee tepichin waya, jalouijeena waya nümüin Jeʼwaa süpüla wakaalinjain na wawalayuu eʼrakana müliaa sainküin tü mmakat (Prov. 3:27, 28; 19:17). Wattale naya suluʼu wanee mma naatajatü, eeshii süpüla wejitüin nneerü suluʼu tü kaaja eʼitaanakat suluʼu tü outkajaaleekat. Sükajee tia nneetkat, akaalinjüneena naya sünain tü kasa choʼujaakat namüin (2 Cor. 8:14, 15). w19.10 21 püt. 6

Eeshii na mojushiikana amüin naküjakuʼu namüinjanain sümüin wayuu süchiki nakuwaʼipa otta süchiki tü alatawaikat namüin. Eeshiijaʼa müle naya sutuma saainjünüin namüin wanee kasa mojushaatasü maʼin (Prov. 18:19). Eesüjaʼa jülüjale waaʼin mapüsain maʼin waya otta nnojoluin süpütaain kaʼi süpüla kaʼaleewain waya. Nnojotpejeʼe anain jülüjakuʼu müle waaʼin tia. Nakaalinjeena waya na wawalayuukana süpüla wachecherüin waaʼin soʼunnaa müliaa. Choʼujaapejeʼe wekiʼralaain maaʼulu sünain waküjain namüin tü jülüjakat waaʼin süchiki wanee kasa otta jamüin waaʼin sutuma tü aainjünakat wamüin. Aleeweena maʼin waya namaa waaʼinrüle tia (1 Ped. 1:22). «Tatünajut», müshi Jesuu namüin na nikirajüinkana süka nüküjain namüin tü suluʼukat naaʼin otta nnojotsü kasain nuunjulajüin noulia (Juan 15:15). Washateerü nukuwaʼipa Jesuu waküjale namüin na watünajunnuukana tü talatakalü atuma waaʼin, tü shapaakalü atuma waaʼin jee tü mojukalü atuma waaʼin. Anasü waapajüle nanüiki na aashajaakana wamaa sümaa nnojoluin wasoutuin pejeewa neʼipajee, eesüjaʼa weʼreerüle sünain wanaawain tü jülüjakat naaʼin sümaa tü jülüjakat waaʼin süchiki wainma kasa. Yootiraale waneepia wanee wayuu namaa nütünajunnuu süchiki tü jülüjakat naaʼin, aleewaleejeena maʼin naya. Wayainjana achajaaka sukuwaʼipa süpüla yootuin waya namaa na wawalayuukana (Prov. 27:9). w19.11 4 püt. 8, 9

Eesü naateerüle sümüin tü pütchi waküjeetkat namüin na wayuukana soʼunnaa tü müliaa miyoʼusükat. Maaʼulu yaa, aküjashii waya pütchi süchiki nukuwaʼipa Maleiwa sünain aluwatawaa otta wachajaain sukuwaʼipa süpüla wekirajüin wayuu. Naateerü sukuwaʼipa tia mapa, eesüjaʼa lotoleejeerüle wanüiki, meerü aka saaʼin shiyeeloin tü juyakat saashin tü Wiwüliakat (Alat. Map. 16:21). Eesüjaʼa waküjeerüle süchiki najaʼttinnajanain na wayuu wanaawakana aaʼin nümaa Satanaa. Watüjaajeerü aaʼu mapa tü pütchi waküjainjatkat otta jameerüin sukuwaʼipa watuma. ¿Macheʼejeenache waya süchiirua tü sukuwaʼipapuʼukat aküjaa pütchi watuma? ¿Waaʼinrataajeetpa tü aküjüneetkat wamüin? Watüjaajeerü aaʼu tü waaʼinrajatkat süküjünapa wamüin. Choʼujaajeetpejeʼe meimmoluin waya süpüla waküjain sümüin wayuu tü alatajateetkat sümüin (Ezeq. 2:3-5). Eesüjaʼa mojushiijeerüle namüin na sülaülashiikana mma tü pütchi waküjeetkat. Sünainjee tia, nachajaajeerü sukuwaʼipa süpüla nooʼuleʼerüin waya suulia aküjaa pütchi. Weʼitaajeetpejeʼe waaʼin nünain Jeʼwaa soʼu tia maʼaka weʼitaain waaʼin nünain maaʼulu. Watüjaa aaʼu nükatchinreerü waaʼin süpüla wekeraajüin tü keeʼireekat naaʼin (Miq. 3:8). w19.10 16 püt. 8, 9

Sünainjee tü pütchi «akatalaashii» makat, wayaawata aaʼu wakayalaweenain suulia anoujaa waʼyataale maʼin süchiirua wainmain korolo wamaʼana sümaa nnojoluin choʼujaain shia wamüin. Müle wakuwaʼipa, suchuntaajeerü waaʼin aaʼinraa kasa mojusü (1 Tim. 6:9). Wayoutajatü tia. Soteesü waaʼin najayatüin Satanaa tü kasa mojusü suchuntaakat waaʼin süpüla nümalajeʼerüin wanoula. Jülüjataa paaʼin wainmain nneerü pümaʼana süpüla piyaʼlajüin wainma kasa. ¿Mojusüche piyaʼlajüle tü kamalainkat pümüin sümaa pütüjaain saaʼu nnojoluin choʼujaain shia pümüin? Nnojotsiaajeʼe mojuin tia, wasakireʼerüinjatpejeʼe waaʼin sünain tüü: Eere tamaʼana süliapala wanee kasa otta tayaʼlajüle shia, ¿jalouijeetche shia tamüin? ¿Eejeetche kaʼi süpüla takumajirüin shia? ¿Alanaʼaleesüche maʼin sujutu tamüin tü kasa eekat tamaʼana suulialeʼeya taʼyataain nümüin Jeʼwaa? Sülanaʼaleere sujutü wamüin tü kasa eekat wamaʼana, ¿eesüche süpüla sülatüin wamüin tü alatakat nümüin chi jimaʼai washirü ayoutakai akooʼomüinra niʼyataain nümüin Jeʼwaa? (Mar. 10:17-22). Waʼyataa maʼin nümüin Jeʼwaa süka süpüshuaʼa waaʼin, jaʼitasü nnojoluin wainmain maʼin tü kasa eekat wamaʼana. w19.11 17, 18 püt. 15, 16

Wachunta kaalinwaa nümüin Maleiwa. Wounteerü waaʼinrüin tü wamakat müleka nükaalinjale waya Jeʼwaa (Filip. 2:13). Müsüjeseʼe anain wachuntule nümüin chi naaʼinkai süpüla nükatchinrüin waaʼin. Ayata woʼuraajüin jaʼitaichi müin nnojoikai nusoutamaatüin wamüin Jeʼwaa. Müsü nünüiki Jesuu: «Anakaja müleka jüchuntüle nümüin Maleiwa waneepia [...]. Naapeechi chi Naaʼinkai jümüin» (Luc. 11:9, 13). Anasü keraale watuma tü waaʼinrajatkat. Waainjainjanale wanee kasa jülüjaka waaʼin, choʼujaasü keraajüin watuma tü sukuwaʼipainjatkat jee shiainjatü waaʼinraka tia. Akaataajaʼa waneekapa tü waaʼinrajatkat, washajüinjatü waneʼewai sukua tü sukuwaʼipainjatkat watuma. Waainjale paliʼirüwai wanee kasa kapüleeka, weʼreerü sajaʼtta sajaʼtta sümüin shiʼipaʼaya. Nüküjain chi aluwataaushikai Pablo namüin na corintojeʼewaliikana, nakotchojowalinjatüin tü nasülajüinjatkat suʼttianainjee semaanaka suulia nakotchojüin shia nüntapa (1 Cor. 16:2). Waainjawaire paliʼirüwai wanee kasa, nnojoleerü shapaain maʼin waaʼin. w19.11 29 püt. 13, 14

«Teʼraajüin nukuwaʼipa Jeʼwaa», eeshijaʼa pümüle süka pütüjaain saaʼu kasaichin nünülia, pütüjaain saaʼu waneirua kasa nüküjaka achiki jee waneirua kasa naaʼinraka. Nnojotpejeʼe piʼraajüin nukuwaʼipa sünainjee tia. Süpüla piʼraajüinjachin nia, ekirajaainjachi pia nüchiki otta süchiki tü nukuwaʼipakat. Paaʼinrüle tia, piyaawateerü aaʼu jamüin nüküjaka wanee kasa, jamüin naaʼinraka wanee kasa otta pütüjaweerü aaʼu anale nümüin tü jülüjakat paaʼin otta tü kasa paaʼinrakat. Piyaawatapa saaʼu tü nüchekakat Jeʼwaa püpüleerua, paaʼinrüinjatü shia. Püküja jamüin naataka atüjawaa saaʼu wanee kasa nüchiki Jeʼwaa suulia eʼraajaa nukuwaʼipa. Eeshii meeʼeraparale waya sutuma waʼyataweein nümüin Jeʼwaa jee wapüleeruaanüle aaʼin sutuma woʼunuin sünain tü outkajawaakat. Weʼitaale waaʼin nünain Jeʼwaa, nnojoleena waya niyüülajüin. Müle shia watuma, waikaleʼerüin sukuwaʼipa süpüla aleewainjanain waya nümaa Jeʼwaa waneepia. ¿Eesüche süpüla weʼraajüin nukuwaʼipa Jeʼwaa? Aa, eesü süpüla weʼraajüin. w19.12 16, 17 püt. 3, 4

Eesüjaʼa shapaale naaʼin na kachonshiikana süka kapüleein namüin nepijain nachonnii, nüpaalapejeʼe naya Jeʼwaa namüin. Nükaalinjeena naya süpüla nountuin nepijain nachonnii. Naapajüin nanüiki nachuntapa nümüin jee asoutushi nia namüin sükajee tü Wiwüliakat, tü karaloʼutakalüirua otta sükajee nakuwaʼipa jee tü namakat na wawalayuu kachonkana. Nnojotsü motsomüin neʼe epijaa tepichi, kakaliasü tia, naashin waneinnua wayuu eesü maʼaka 20 juya nipijünaka oʼu wanee jintüi. Ayatapejeʼe jülüjain naaʼin nachonnii na wayuu kachonniikana. Süpüshi tü kasa eekat süpüla paaʼinrüin shia alin püpüla püchonnii, pülatirüin kaʼi namaa otta pikirajüin naya sünain tü Wiwüliakat. Eeshii tepichi eekai naapaamaatüin sümaa tü ekirajünakalü anain naya otta eeshii na nnojoliikana aapaamaatüin sümaa. Na anoujakana ashi jee ei müsü nanüiki maʼaka saaʼin tü sümakat tü wawalakat Joanna Mae, chejeʼewat shia Asia, anuu sünüiki: «Taapüin tü analuʼutkat nümüin taata sümaa maama saaʼu nachiaain taya jee nekirajüin taya süpüla alinjachin tapüla Jeʼwaa. Nnojotsü eʼraain neʼe taya namaa, nakaalinjain taya süpüla anainjatüin takuwaʼipa» (Prov. 23:24, 25). Wainma na wawalayuu makana anüiki maʼaka saaʼin Joanna Mae. w19.12 27 püt. 21, 22

Wainma na wawalayuu eekana süpüla wamüliajüin. Jaʼitaina mmoluwaain waya seema wakaalinjain na wawalayuukana, wachajaa sukuwaʼipa süpüla wamüliajüin naya. Eesüjaʼa mmoluwaale waaʼin sutuma nnojoluin watüjaain saaʼu jamüinjatüin wanüiki namüin jee nnojoluin watüjaain saaʼu tü waaʼinrajatkat napüleerua. Kachipünaale waaʼin na waneinnua wamülialeerü naaʼin. Soʼunnaa sülüʼülaain maʼin süpüla sajaʼttüin kasa süpüshuaʼa, akooʼomüinraajeerü maʼin kasa mojusü sainküin mmakat (2 Tim. 3:13). Sutuma waleʼeruʼuin tü kaainjalaakat, ayateena waya jooin süpüla aaʼinraa kasa mojusü. Sutuma müin wakuwaʼipa, ayateerü choʼujaain wamüin wamüliajünüin. Jamüshijaʼa chi aluwataaushikai Pablo, nüchecherüin naaʼin outaleepa nia. Nüchecherüin naaʼin süka nümüliajünüin natuma na nuwalayuukana. Washateerü nakuwaʼipa, wamüliajüle na wawalayuukana süpüla noonooinjanain waneepia sümaa nünüiki Jeʼwaa (1 Tes. 3:2, 3). w20.01 12, 13 püt. 17-19

Nnojotsü jülüjain naaʼin na chainjanakana iipünaa nayainjanain kojutuleein maʼin noulia na waneinnua (Filip. 2:2, 3). Nnojotsü nüküjain Jeʼwaa namüin na wawalayuukana nüneeküin wanee anoujashi. Nnojotsü ponuin naaʼin manoujuule sünain naneekuushin nutuma Maleiwa. Saashin tü Wiwüliakat nnojoluinjatü wanoujamaatüin nünüiki wanee wayuu eekai «aneekünüshi taya nutuma Maleiwa», nümüin wamüin. Na aneekuushikana nutuma Maleiwa nnojotsü naküjakuʼu namüin sümüin wayuu chainjanain naya iipünaa. Nnojotsü naaʼinrüin tia suulia kapülain maʼin naya saaʼin wayuu. Nnojotsü yaletüin naaʼin saaʼu naneekünüin nutuma Maleiwa (1 Cor. 4:7, 8). Na chainjanakana iipünaa nnojoishii nayain neʼe yootiraain amaa na aneekuushikana wanaa namaa otta nayain neʼe nekirajaain amaa sünain tü Wiwüliakat (Gal. 1:15-17). Naaʼinrüle tia, nnojoleena paaʼinwajiraain na wawalayuukana suluʼujee tia otta nnojoleerü wanaawain naaʼin nümaa chi naaʼinkai Maleiwa, chi anajiraakai otta paaʼinwajiraakai atuma na aʼyataashiikana nümüin Maleiwa (Roma 16:17, 18). w20.01 28 püt. 6, 7

Kanainjeena waya naaʼin na wayuu suluʼupuʼukana tü waneirua iküleesia ajaʼttinnakat, jama shieerüin eein neʼe tü iküleesia kaluʼukat na aküjaliikana pütchi nüchiki Jeʼwaa. Aapüneerü achiki tia sainküin Mmakat otta aküjüneerü shia suluʼupünaa Internet. Naʼürüleena waya na sülaülashiikana mma otta Satanaa, jama shieerüin eein neʼe sümüiwaʼa tü iküleesia kaluʼukat waya. Iseerü nachiki najaʼttirüin süpüshuaʼa tü iküleesia eekat saaʼu tü Mmakat, makalaka kanainjeenain waya naaʼin. Ashuteena waaʼu na sülaülashiikana mma, na kanüliakana Gog chi chejeʼewaikai Magog. Akotchojiraajeena naya palajana shiiʼiree najaʼttirüin nupueulose Jeʼwaa (Ezeq. 38:2, 14-16). Eesü shapaale waaʼin sutuma jülüjain waaʼin tü alateetkat, jama nnojoluin watüjaain saaʼu jameerüin sukuwaʼipa. Nnojotpejeʼe ayoʼujaainjatüin waaʼin süpüleerua tü müliaa miyoʼusükat, jama nüküjeerüin wamüin Jeʼwaa tü waaʼinrüinjatkat süpüla woʼttaainjanain soʼu tia (Sal. 34:19). w19.10 16 püt. 10, 11

Nnojotsü kojutuinjatüin neʼe wamüin tü naainjakat Jeʼwaa wapüleerua, jaʼyainjatü saaʼu wakuwaʼipa kojutuin shia wamüin. Nnojotsü wanaawain waaʼin namaa na wayuukana maaʼulu yaa süka mojutuin namüin tü naaʼinrakat Maleiwa napüleerua otta matüjainsalii aapaa analuʼut. Müsü sukuwaʼipa wayuu süka sülüʼülüin sükalia süpüla sajaʼttajatüin kasakat süpüshuaʼa (2 Tim. 3:1, 2). Jalia majayaai wakuwaʼipa maʼaka naaʼin. Tü nüchekakat Jeʼwaa wapüleerua, shia aijiraainjanain waya. Ayaawatünüshii na anoujashii shiimainshiikana sükajee aijiraain maʼin naya (Juan 13:35). Wanaawasüche waaʼin sümaa tü nümakat wanee wayuu aʼyataakai nümüin Jeʼwaa. Anuu nünüiki: «¡Anakatche maʼin kottiraale jee paaʼinwajiraale na wayuu pawalaawajiraakana!» (Sal. 133:1). Aire wapüla na wawalayuukana, aishia Jeʼwaa wapüla (1 Juan 4:20). Anamia maʼin na wawalayuukana otta aijiraashii maʼin naya. Talatüsü waaʼin süka napüshin waya na wayuu makana akuwaʼipa (Éf. 4:32). w20.02 9 püt. 6, 7

Nnojotsü anoutaamaatüin sukuwaʼipa tü kasa alatakat sümüin Ana. Ayatüsia shia kottiraain sümaa Peniná. Otta nnojotsü süküjain tü Wiwüliakat shiiʼiratüin sukuwaʼipa Peniná, müsüjeseʼe eein süpüla ayatüinya müliain saaʼin Ana sutuma. Mayaainjeʼe müin tia, nnojoluitpa mojuin maʼin saaʼin Ana otta jutatüitpa saaʼin. Süka shiʼitaain saaʼin sünain nunouteʼereerüin Jeʼwaa sukuwaʼipa tü alatakat sümüin nnojoluitpa mojuin saaʼin. Mapa, asoutushi Jeʼwaa shiʼipajee tü suchuntakat nümüin jee kachonkalaka shia (1 Sam. 1:2, 6, 7, 17-20). Jutateerü waaʼin mayaainjeʼe nnojoleerüin sunoutaamaatüin tü alatakat wamüin. Eesüjaʼa ayatüle tü alatakat wamüin mayaainjeʼe wachuntuin kaalinwaa nümüin Jeʼwaa otta waneepiain waya sünain tü outkajawaakat. Eepejeʼe tü kasa watüjakat sünainjee tü alatakat sümüin Ana. Nnojoleerü eein wanee kasa ataʼüleetka nukuwaʼipa Jeʼwaa suulia aawaleʼeraa waaʼin. Nnojoleena waya motuin naaʼin Jeʼwaa, aapeechi nia kasa anasü wamüin maaʼulu otta mapeena saaʼu woonooin waneepia sümaa nünüiki (Heb. 11:6, TNM). w20.02 22 püt. 9, 10

Nnojoishii jeʼiyein na laülaashiikana saaʼu tü pütchi suluʼujeejatkat tü Wiwüliakat anainjatka atuma süneekia wanee kasa natuma na nawalayuukana. ¿Jamüshii nnojoluinjanaka yüütüin na laülaashiikana choʼujaale nüchiaanüin wanee wawala? Wekirajaa süchiki nukuwaʼipa Elí: Aishii maʼin nüpüla Elí na nüchonniikana, piamashii naya nümüin. Elí nia chi laülaashikai napüleerua na sacerdootekana. Nnojoipejeʼe kojutuin Jeʼwaa namüin na nüchonniikana. Sacerdooteshii naya suluʼu tü aʼwaajüleekat, nnojotpejeʼe anain tü naaʼinrakat otta mojutusat namüin tü nasülajakat na israeliitakana nümüin Jeʼwaa. Eetaayaai neʼe japülin naaʼin saaʼu namaʼüjiraain nakuwaʼipa namaa na jieyuu aʼyataakana soʼuluʼu tü aʼwaajüleekat Maleiwa (1 Sam. 2:12-17, 22). Saashin tü Pütchi Aapünakat nümüin Moisés, oʼutunajachi aaʼin chi wayuu eekai müin aainjala, nuuʼulaapejeʼe neʼe Elí naaʼinrüin tia na nüchonniikana. Nnojoishii naya nuuʼuleʼerüin suulia aʼyatawaa suluʼu tü aʼwaajüleekat (Deut. 21:18-21). ¿Jamüsüche naaʼin Jeʼwaa sutuma tü naaʼinrakalü Elí? Anuu nünüiki: «¿Jamüshii nayakaʼa kojutuleein pümüin na püchooinkana toulialeʼeya tayakai?». Shiasaʼa mapa, outushii piamaleʼeya naya mojulaashiikana (1 Sam. 2:29, 34). w20.03 19 püt. 4, 5