Settienpüroʼu

Eesü wanee pütchi naataka nutuma Pedro wanaa sümaa naashajaain süchiki tü nüshajalakat Joel (Aluw. 2:16, 17, TNM). «Süchikijee tia», nnojoishi müin Pedro. «Soʼuweena tü kaʼi sajaʼlajaainjatkalü oʼu kasa süpüshuaʼa», müshi nia nutuma Jeʼwaa. Tü naashajaakalü achiki Pedro shia tü kaʼi sajaʼttinnajatkalü oʼu Jerusalén jee müsia tü aʼwaajüleekat. Soʼunnaa tia, naapüinjachi Maleiwa chi naaʼinkai sümüin «wayuu maʼleekalia». Wayaawatüin sünainjee tia, sülatüin kojuya juya süpülapünaa shikeraajüin tü nüshajalakat Joel. Aküjünüsü maʼin pütchi sümüin wayuu süchikijee naapüin Jeʼwaa chi naaʼinkai namüin waneinnua wayuu soʼu tü juyakat 33. Naashin Pablo aküjünüsü pütchi «sümüin wayuu sainküin mmakat süpüshua», nüküjain tia suluʼu tü karaloʼuta namüinjatkat na anoujashii chajanakana Colosas soʼunnaa tü juyakat 61 (Col. 1:23). Maaʼulu yaa, nükaalinjain waya Jeʼwaa nükajee chi naaʼinkai, müsüjeseʼe süküjünüin maʼin pütchi sainküin mmakat süpüshuaʼa «chamüinreʼeya sajaʼttapshimüin» (Aluw. 13:47). w20.04 6 püt. 15, 16

Aishii maʼin waya nüpüla Jeʼwaa waneʼewai wakua, akaʼaya na akatalaakana nuulia, aishii maʼin naya nüpüla (Mat. 18:12-14). Nüküjain Jeʼwaa nüchajaainjatüin nachiki na wawalayuu akatalaakana nuulia jee nükaalinjainjanain naya süpüla anainjatüin nakuwaʼipa nümaa nachikuaʼa. Müshii naya maʼaka saaʼin anneerü eekai machikin. Nüküjain Maleiwa tü naaʼinrajatkat süpüla nuusütüin nanain na machikikana, tia naaʼinrajatkat müsü aka saaʼin tü naaʼinrakat wanee arüleejüi machikire nürüleejüin (Ezeq. 34:12-16). Palajana, nüchajaainjatü süchiki tü naʼanneetsekat, eeshijaʼa kakaliale nia sünain tia. Nuusütapa sünain, nuuyantüin shia süchikuaʼa saʼakamüin tü süpüshikat. Eere wanee eekai seewaain saʼakajee nijittaain sülioʼu otta nüpataain shia nutuʼupünaa jee nikajirüin shia outule shia jamü. Müinjatia neʼe sukuwaʼipa tü naaʼinrakat na laülaashiikana nakaalinjapa na wawalayuu akatalaakana (1 Ped. 5:2, 3). Nachajaainjatü nachiki naya wawalayuukana otta nakaalinjainjana naya süpüla naleʼejüin nachikuaʼa nünainmüin Jeʼwaa. w20.06 20 püt. 10

Naashin Jesuu, na wayuukana müshii aka naya saaʼin wane aʼttiee eekai yapain süpüla asüʼüjünaa. ¿Shiache nüküjeeka achiki wainmainjanain maʼin na wayuu anoujakana nünain? Nnojotsü shiain tia. Süküjatüjülia tü Wiwüliakat palirüinjanain na wayuu anoujakana nünain (Juan 12:37, 38). Nütüjaa aaʼu Jesuu tü suluʼukat saaʼin wayuu (Mat. 9:4). Mayaainjeʼe nütüjaain saaʼu tia, aküjashi maʼin Jesuu pütchi sümüin wayuu maʼleekalia, nayapejeʼe naaʼinmaain maʼin na palitchoin anoujakana nünain. Süka isain wachiki watüjaain saaʼu tü suluʼukat naaʼin na wayuukana, nnojo mojuin tü jülüjakat waaʼin nachiki jee süchiki eere waküjain pütchi. Jülüja waaʼin wawalayuujeenain na wayuu waküjakana amüin pütchi. Soteepejeʼe waaʼin tü nümakat Jesuu namüin na nikirajüinkana. Naashin niakai, yapasü tü aʼttieekat süpüla asüʼüjünaa. Eesü süpüla neeʼiratüin nakuwaʼipa na wayuukana jee noushikajaain süchiirua nukuwaʼipa Jesuu. Kojutushii naya noʼuluʼu Jeʼwaa (Ageo 2:7). Jülüjale waaʼin kojutuin na wayuukana nümüin Jeʼwaa jee nümüin Jesuu, kapüleerü waaʼin tü nakuwaʼipakat otta jülüjeerü waaʼin tü kamalainkat namüin. Nnojoleerü jülüjain waaʼin naatajanain naya woulia, jülüjeerü waaʼin wawalayuujeenain naya. w20.04 13 püt. 18, 19

Saashin tü Wiwüliakat alinjachi wapüla Jesuu süpüla talatüin naaʼin Jeʼwaa wamaa. Wanee kasa waaʼinrajatka süpüla aleewain waya nümaa Jesuu shia weʼraajüinjatü nukuwaʼipa. Süpüla waaʼinrüin tia, waashajeʼerüinjatü tü karaloʼutakat Mateo, Marcos, Lucas otta Juan. Jülüjale waaʼin tü sümakat tü Wiwüliakat süchiki tü nukuwaʼipapuʼukat Jesuu namüin na wayuukana, aijeechi nia wapüla jee kojuteechi nia wamüin. Mayaainjeʼe Laülaain nia naaʼu na nikirajüinkana, nnojoishii müin aka saaʼin achepchiee nutuma, «tatünajutü», müshi nia namüin. Nüküjain Jesuu namüin tü jülüjakat naaʼin jee tü kasa suluʼukat naaʼin. Aisü nümüin namüliala jee aʼyalajüshi nia saalinjee tü kasa alatakat namüin (Juan 11:32-36). Jaʼitakajeʼe na wayuu nnojoliikana acheküin süchiki tü nikirajakalü anain, neʼrüin aleewain Jesuu namaa na achekakana tü nümakat (Mat. 11:19). Kojutule wamüin na waneinnua maʼaka kojutuin nümüin Jesuu na nikirajüinkana, aneerü wakuwaʼipa namaa, talateerü waaʼin, aijeechi maʼin Jesuu wapüla otta kojuteechi nia wamüin. w20.04 22 püt. 9, 10

Soʼujee tü juyakat 1870, laülaasü Gran Bretaña saaʼu wainma mma otta wainma maʼin surulaat eejatka suluʼu. Nüküjain Daniel eein wanee suʼuwachon mürüt ojuttitka apünüinsü suʼuwa mürüt, tia shia Gran Bretaña wanaa sümaa shiyamülüin Francia, España otta Países Bajos (Dan. 7:7, 8). Soʼunnaa maʼin tü kanüliakat Primera Guerra Mundial, shia Gran Bretaña «chi aluwataai uuchijeʼewaikai». Wanaa maʼin sümaa tia, washirüüisü maʼin tü mmakat Estados Unidos de América otta wanaawajiraasü naaʼin na sülaülashiikana tia mmakat namaa na sülaülashiikana Gran Bretaña. Soʼunnaa tü kanüliakat Primera Guerra Mundial asakaajiraashii na sülaülashiikana tü mmakat Estados Unidos namaa na sülaülashiikana Gran Bretaña nekiira na neʼipolokana. Suluʼujee tia, wattainnapa naalii na surulaat eekana Gran Bretaña sümaa Estados Unidos otta laülaaitpa shia piamaleʼeya saaʼu wainma mma. Ekeraajüsü tü nümakat Daniel soʼu nümüin: «Akotchojüshii naya wainma maʼin surulaat yalayalajakana aaʼin». Maaʼutpünaa yaa, ayatayülia shiain Estados Unidos sümaa Gran Bretaña chi aluwataai uuchijeʼewaikai. w20.05 4 püt. 7, 8

Süka nnojoluin wattaleein jee pejereein nutuma Maleiwa tü Mmakat nünain chi Kaʼikai, eesü wüin suluʼu. Pejere tü Mmakat nünain chi Kaʼikai, poolotusüjeʼe tü wüin eekat suluʼu. Jaʼisüje maʼin shia otta nnojotsüje kasain katüin oʼu yaa saaʼu. Eekajasaʼa wattaleere tü Mmakat nuulia chi Kaʼikai, saamatüsüje maʼin otta yeelosüje süpüshuaʼa. Süka nnojoluin pejereein jee wattaleein tü Mmakat nutuma Jeʼwaa nuulia chi Kaʼikai, katüsü soʼu kasa süpüshuaʼa süka eein wüin suluʼu. Sutuma naaʼayula chi Kaʼikai, jaʼisü tü wüinkat, shiasaʼa saaʼayula tü wüinkat, akaʼitsü iipünaamüin süpüla sirumainjatüin shia. Alatüsü tia sainküin mmakat süpüshuaʼa. Tia wüinkat chasü chaa iipünaa soʼu poloo kaʼi süpülapünaa juyain shia jee shiale shiʼitüin suluʼu nievein shia. Tü wüinkat aleʼeja müsia süchikuaʼa shirokumüin tü palaakat jee shirokumüin tü süchikalüirua. Jee mapa, sirumasü shia süchikuaʼaya. Maʼwaisü sukuwaʼipa tia waneepia süpüla eeinjatüin wüin yaa saaʼu tü Mmakat. Sünainjee tia, atüjaana aaʼu sünain kekiin maʼin Jeʼwaa jee sünain pülashin maʼin nia (Job 36:27, 28). w20.05 22 püt. 6

Nüküjain wamüin Jesuu wachuntajachin chi naaʼinkai Maleiwa (Luc. 11:9, 10, 13). Nükaalinjain waya Jeʼwaa nükajee chi naaʼinkai «süpüla niiʼiyatüin sünain nükajeejatüin niakai nümüiwa tü yalayalaakat» (2 Cor. 4:7). Nükaalinjain waya Jeʼwaa nükajee chi naaʼinkai süpüla wachecherüin waaʼin soʼunnaa tü müliaa weʼrakat. Nükaalinjainya waya Jeʼwaa süpüla wekeraajüin tü waʼyataainkat nümüin. Tü wountakat sünain aʼyatawaa nümüin Jeʼwaa, nnojotsü sükajeejatüin watchin wamüiwaʼa, nükajeejatü chi naaʼinkai Jeʼwaa. Kojutule wamüin naapüin Jeʼwaa chi naaʼinkai wamüin, wachunteerü nümüin wayaawatüin saaʼu jülüjale waaʼin kasa eekai mojuin jee suchuntaale waaʼin wanee kasa nnojotka anain (Sal. 139:23, 24). Eesü süpüla wayaawatüin saaʼu nutuma Jeʼwaa nükajee chi naaʼinkai eere wanee kasa wanoutajatka sünain wakuwaʼipa. Müle tia, wachunta chi naaʼinkai süpüla wachecherüin waaʼin suulia tü kasa mojusü suchuntaakat waaʼin. Waaʼinrüle tia, niʼreerü Jeʼwaa nnojoluin waaʼinreein wanee kasa nnojotka anain nümüin otta ayateenaʼaya waya nükaalinjain nükajee chi naaʼinkai (Éf. 4:30). w20.05 29 püt. 10-12

Wasoutule naaʼu Jeʼwaa nia washataka akuwaʼipa Jesuu. Nnojotsü nüküjain neʼe Jesuu kasaichin nünülia chi Nüshikai, nikirajüin wayuu sünain tü shiimainkat nüchiki. Jamüsüjaʼa soʼu naküjain na fariseokana wainmain tü kasa nuluwataakalü anain Jeʼwaa, ichein nia süchiirua tü nümakat, mojulaain nia otta müliain wayuu nutuma, nüküjain Jesuu namüin na wayuukana nütüjaain saaʼu chi Nüshikai tü isakat wachiki jee tü wountakat, nnojoluin kashapajaaralin nia, alin wayuu nüpüla sümaa sümülialaain naaʼin saalin wayuu. Akaʼaya Jesuu, ayatüsü nukuwaʼipa chi Nüshikai nutuma, müshijeseʼe niʼraajünüin maʼin Jeʼwaa sünainjee nukuwaʼipa Jesuu (Juan 14:9). Washateerü nukuwaʼipa Jesuu waküjale sümüin wayuu tü watüjaakalü aaʼu nüchiki Jeʼwaa maʼaka saaʼin aipüralin maʼin nia wayuu sümaa anamiain maʼin nia. Waaʼinrüle tia, atüjaaneerü aaʼu alawaain neʼe tü namakat na nüʼünüükana Jeʼwaa. Sünainjee tia, natüjaajeerü aaʼu na wayuukana anain maʼin tü kasa sünainpünaakat nünülia Maleiwa. Shiʼrapa wayuu wakuwaʼipa otta saapapa wanüiki, shiʼraajeerü nukuwaʼipa Jeʼwaa otta kojuteechi nia sümüin. Asouteena waya naaʼu Jeʼwaa wekirajüle wayuu sünain tü shiimainkat nüchiki. w20.06 6 püt. 17, 18

Wainma tü kasa anakalü apüla redes sociales maʼaka saaʼin yootuin waya namaa na wapüshikana jee na waʼaleewainyuukana. Eepejeʼe na ashajakana, na eʼitaakana nayaakua jee video suluʼupünaa redes sociales süpüla naʼwaataainjanain suluʼu nakuwaʼipa. «Piirakaa tamüin», müshii namakai aaʼin sükajee tia naaʼinrakat. Eeshii na ashajakana kasa yarüttüsü sünain tü ayaakuaa neʼitaakat otta sünain tü ayaakuaa neʼitaakat na waneinnua. Nnojotsü yaletüinjatüin waaʼin waya anoujashiikana, amülialaainjatü waaʼin naalin na waneinnua. Nnojoliinjana waya aʼwaataain sükajee tü kasa weʼitaakat suluʼupünaa redes sociales (1 Ped. 3:8). Püshajapa jee piʼitaapa kasa suluʼupünaa redes sociales, püsakira paaʼin sünain tüü: «‹Aʼwaataakaiche maʼin suluʼu nukuwaʼipa›, ¿meetche wayuu süchiki tü tashajakat, tü ayaakuaa jee tü video teʼitaakat? ¿Achunjeetche naaʼin na waneinnua sutuma tia taaʼinrakat?». Nnojoishii waya aʼwaataainjanain suluʼu wakuwaʼipa, shia waaʼinrüinjatka tü sümakat tü Wiwüliakat maʼaka sümüin tü pütchi süpülajatkat soʼukai. Nnojorüle yaletüin waaʼin, nnojoleena waya aʼwaataain suluʼu wakuwaʼipa maʼaka naaʼin na manoujainsaliikana (1 Juan 2:16). w20.07 6 püt. 14, 15

Süpülapünaa nunoujain Pablo nünain Jesuu, Saulopuʼu nünülia, wayuu eʼrüipuʼu wayumüin nia otta müliashii maʼin na anoujashiikana nutuma (Aluw. 7:58). Achiaanüshi nia nutuma Jesuu sünainjee müliain maʼin na anoujashiikana nutuma. Aashajaashi Jesuu nümaa iipünaajee otta moʼusai Pablo nutuma. Süpüla koʼuinjachin nüchikuaʼa Pablo, achuntuinjachi nia kaalinwaa namüin na wayuu müliapuʼukana nutuma. Nuuʼulaapejeʼe Pablo nükaalinjünüin nutuma wanee anoujashi, Ananías nünülia, koʼushi Pablo nutuma (Aluw. 9:3-9, 17, 18). Mapa, kojutushi Pablo namüin na anoujashiikana, nnojotpejeʼe motuin naaʼin tü alatakat wanaa sümaa naashajaain Jesuu nümüin suluʼu tü wopu chaʼwatkat Damasco. Nnojotsüjeseʼe yaletayaain naaʼin Pablo otta nuuʼulaain nükaalinjünüin natuma na nuwalayuukana. «Namüliajüin taya na tawalayuukana», müsü nünüiki (Col. 4:10, 11). w20.07 18 püt. 16, 17

Mayaainjeʼe pülashaatain maʼin Jeʼwaa, naapüin laülawaa namüin waneinnua wayuu. Aneekünüshi Jesuu nutuma süpüla niainjachin aluwataain suluʼu tü Nuluwataayakat otta naapeerü laülawaa namüin na 144.000 wayuu aluwataajeenakana nümaa Jesuu chaa iipünaa. Ekirajünüshi Jesuu nutuma Jeʼwaa süpüla niainjachin aluwataain suluʼu tü Nuluwataayakat otta süpüla niainjachin chi Sacerdoote Müloʼushikai (Heb. 5:8, 9). Otta nikirajüinya na aluwataainjanakana nümaa Jesuu süpüla nekeraajüin tü naʼyataainkat nümüin, nnojotpejeʼe nünajioʼujeerüin Jeʼwaa tia, süka jamüin, niʼitaain naaʼin sünain naaʼinreerüin tü nüchekakat (Alat. Map. 5:10). Mayaainjeʼe nnojoluin choʼujaain nümüin chi Washi iipünaajachikai nükaalinjünüin sutuma wayuu, niʼitaain aʼyatawaa najapuluʼu na waneinnua. Wayeematataaka nnojoluin aaʼinreein tia. Maʼaka laülaale pia napüleerua na püpüshikana jee laülaashire pia suluʼu tü outkajaaleekat, anasü püshatüle tü naaʼinrakat Jeʼwaa sünain piʼitaain aʼyatawaa najapuluʼu na waneinnua otta nnojoluinjatü pünajioʼiun tü naʼyataainkat. Püshatüle nukuwaʼipa Jeʼwaa, nnojoleerü nekeraajüin neʼe na waneinnua tü naʼyataainkat nümüin Jeʼwaa, atüjeena naya otta aneerü naaʼin (Is. 41:10). w20.08 9 püt. 5, 6

Nücheka achikit Jeʼwaa kojutuinjanain wamüin na naʼanneetse machikikana. Naaʼinrüin tia Jesuu wapüleerua. Nütüjaa aaʼu kojutuin maʼin nümüin Jeʼwaa na naʼanneetse machikikana. Makalaka naaʼinrüin Jesuu wainma kasa süpüla nükaalinjain «tü wayuu israelkalüirua sümüiwa, tü makat aka saaʼin anneerü eekai amüloulin» süpüla naleʼejüinjanain nünainmüin Jeʼwaa (Mat. 15:24). Müshi Jesuu maʼaka naaʼin wanee arüleejüi, nüchajaain maʼin sukuwaʼipa süpüla nnojoliinjanain machikin naʼanneetse chi Nüshikai (Juan 6:39). Naashin chi aluwataaushikai Pablo, nashatüinjatü nukuwaʼipa Jesuu na laülaashii chajanakana Éfeso. Anuu nünüiki namüin: «Tekirajüin jia waneepia, sükajee takuaippa sünain aʼyatawaa, sünain müinjanaʼinya waya aʼyataain süpüla wakaalinjüinjatüin tü wayuu jaʼijaakat amüin kasa [na wayuu matchinkana anoula]. Soto jaaʼin tü nümakat chi Senyotkai Jesús wanaa sümaa nümüin: ‹Anakuaippaʼireʼeya chi wayuu aapakai nuulia chi aapünakai amüin›» (Aluw. 20:17, 35). Sünainjee tü sümakat tü Wiwüliakat, nakaalinjainjatü na laülaashiikana tü nupueulosekat Jeʼwaa. Anuu nünüiki chi wawalakai Salvador, wanee laülaashi chejeʼewai España: «Wanaa sümaa jülüjain maʼin taaʼin kojutuin nümüin Jeʼwaa na naʼanneetsekana, tachajaain maʼin sukuwaʼipa süpüla takaalinjain naya. Tayaawata aaʼu keeʼireein naaʼin Jeʼwaa taaʼinmajüin naya». w20.06 23 püt. 15, 16

Nnojoishi akulajaain wamaa Jeʼwaa, naʼatapajüin anaʼleeinjanain waya sajaʼttiamüin tü miitkat juya. Sümaʼinruʼu tia, nülatirüin sooʼopünaa naaʼin tü waainjalakat. Müsüjeseʼe jülüjainjatüin waaʼin tü kasa anasü naaʼinrakat na waneinnua, nnojoishii akulajaainjanain waya namaa. Talatüsü maʼin naaʼin Jesuu otta na aapieekana wanaa sümaa neʼrüin sukumajünüin tü Mmakat. Talateetkajasaʼa maʼin naaʼin neʼrapa anain nakuwaʼipa na wayuu aikana apüla Jeʼwaa jee na aʼyataakana nümüin yaa saaʼu tü mmakat. Talateetkajasaʼa maʼin naaʼin na aluwataainjanakana nümaa Jesuu chaa iipünaa, süka jamüin, aneerüin nakuwaʼipa na wayuukana sünainjee tü kasa naaʼinreetkat (Alat. Map. 4:4, 9-11; 5:9, 10). Talateetkajasaʼa maʼin waaʼin nnojotpa aʼyalajaa, mojuu aaʼin, ayuulii jee nnojotpa outaa. Sümaʼinruʼu nikeraajüin Jeʼwaa tia, washatüinjatü nukuwaʼipa, aipüraliinjana waya, kekiinjana maʼin waya otta nnojotsü akulajaainjatüin waaʼin namaa na waneinnua. Waaʼinrüle tia, talateerü waaʼin jaʼitairü kasain alatüin wamüin (Sant. 1:2-4). Talatüsü maʼin waaʼin süka «süsoʼiraajeerüin aaʼin tü wayuu ouktüsükalüirua» (Aluw. 24:15). w20.08 18 püt. 18, 19

Tü Wiwüliakat shia wanee kasa naapaka Maleiwa wamüin süka alin maʼin waya nüpüla. Nükajee chi naaʼinkai nüküjain namüin waneinnua wayuu tü nashajüinjatkat. Suluʼu tü Wiwüliakat, nüküjain Jeʼwaa wamüin tü watüjaweekalü aaʼu, maʼaka saaʼin: Jamakuwaʼipaliin süpüla eeinjanain waya, kasapülajanain yaaka waya yaa mmapaʼa otta jameerüin wakuwaʼipa mapeena. Keeʼireeshaatasü naaʼin Jeʼwaa watüjaainjatüin saaʼu tia süka alin waya nüpüla. Müsüjeseʼe nüshajirüin tü Wiwüliakat suluʼu wainma anüikii. Maaʼulu yaa, alatüsü suulia 3.000 anüikii süshajünaka aluʼu tü Wiwüliakat süpüshuaʼa jee shiale süpüshi neʼe. Nnojotsü eeirüin wanee karaloʼuta eekai sümaʼanaya sümüin wayuu süpüshuaʼa sümaa süshajünüin suluʼu wainma anüikii. Atüjaaneerü aaʼu kojutuin wamüin tü Wiwüliakat waashajeʼerawaire shia waneepia, wasakireʼerüle waaʼin sünain tü wekirajaakalü anain otta waaʼinrüle tü sümakat. Wanee kasa waaʼinrajatka süka kojutuin wamüin tü Wiwüliakat, shia waküjainjatüin sümüin wayuu tü pütchi suluʼukat (Sal. 1:1-3; Mat. 28:19, 20). w20.05 25 püt. 15, 16

Aküjashi Jeremías pütchi eere nnojoluin jaralüin aapaain sümaa tü pütchikat. Mojusü naaʼin sutuma tia jee ooʼulaainjachia nia suulia aküjaa pütchi, nnojotpejeʼe naaʼinrüin tia. ¿Jamüshi nnojoikai nuuʼulaain? Naashin niakai, müsü aka saaʼin suchuwala siki suluʼu naaʼin tü nünüikikat Jeʼwaa, nnojoishi süpüla koʼutuin nia naashin (Jer. 20:9). Meeria tü waaʼinrakat weʼitaale suluʼu wekii jee suluʼu waaʼin tü nünüikikat Maleiwa. Müshiijeseʼe wekirajaainjanain sünain soʼukaiwai jee jülüjainjatüin waaʼin tü sümakat. Waaʼinrüle tia, talateerü waaʼin sünain aküjaa pütchi jee eejeena na wayuu aapaakana sümaa tü pütchikat (Jer. 15:16). Jaʼitairü kasain mojuin atuma waaʼin, waküja nümüin Jeʼwaa jamüin waaʼin jee wachunta kaalinwaa nümüin. Nükaalinjeena waya süpüla nnojoluin mojuin waaʼin sutuma tü kasa mojukat watuma, sutuma tü kasa keejiakat wamüin, sutuma ayuulin waya otta sutuma nnojoluin saapünüin wamüin wanee aʼyatawaa waʼyataweeka anain. Nükaalinjeena waya süpüla anain tü jülüjakat waaʼin süchiki tü aküjaakat pütchi. Shiimainya tia, nükaalinjeena waya Jeʼwaa süpüla nnojoluin mojuin waaʼin. w20.12 27 püt. 20, 21

Eeshii na wawalayuu jieyuu kapüleekana amüin namaain naya na wawalayuukana, müshiijeseʼe najayatüin tü outkajawaakat süpüla kottuin naya namaa. Kamaneeinjana waya namüin otta yootuinjana waya namaa nantapa sünain tü outkajawaakat. Nayaawatüinjatü saaʼu na wawalayuu jieyuukana kapülain naya waaʼin. Yootowalinjana waya namaa na wawalayuu jieyuukana maʼaka naaʼinrüin shia Jesuu (Luc. 10:38-42). Eeshii süpüla wounejaain naya sünain ekawaa otta sünain aaʼinraa waneirua kasa. Wanaa sümaa tia, waashajaa namaa süchiki kasa anasü (Roma 1:11, 12). Nashatüinjatü na laülaashiikana tü nukuwaʼipakat Jesuu. Jamüshijaʼa Jesuu, nütüjaa aaʼu eein süpüla kapüleein nümüin wanee wayuu maʼwayuusere nia. Nüküjapejeʼe nnojoluin shiain talatüin atuma naaʼin wanee wayuu kaʼwayuusere jee kachooinre nia (Luc. 11:27, 28). Shia talataleeka atuma naaʼin wanee wayuu naaʼinmaale tü niʼyataainkat nümüin Jeʼwaa (Mat. 19:12). Na wawalayuu laülaainnakana, müinjana aka saaʼin nei namüin na laülaashiikana otta na majayünnüükana müinjana aka saaʼin nashunuumuyuu namüin. Nachajaainjatü sukuwaʼipa na laülaashiikana süpüla yootuin naya namaa na wawalayuu jieyuukana süpülapünaa jee süchikijee tü outkajawaakat. w20.09 21 püt. 7-9

Chaa Israel, apünajüsü wayuu suʼttaiwaʼaya iiwa jee atpajünüsü tü süchonkot sajaʼttapa iiwa (Mar. 4:28). Kekiire maʼin waya, washateerü nukuwaʼipa chi apünajüikai, nnojoleena waya ashapajaain. Eepejeʼe kapüleere tia wamüin. Süka waleʼeruʼuin tü kaainjalaakat, weʼramaateein maalü tü waʼyataakalü achiirua. Jamüshijaʼa wanee wayuu eekai niʼreein kachooin nüpünajüin, nupotuinjatü süpülajana, nüpünajüinjatü shia, najaralüinjatü saaʼu jee niʼyotuinjatü wüin saaʼu. Müsia neʼe tü waaʼinrüinjatkat wekirajapa wayuu. Wekirajüinjana na wayuukana süpüla nnojoliinjanain kachekalaʼatain naya jee süpüla aipüraliinjanain naya. Nnojoliire washapajaain nnojoleena waya ooʼulaain suulia aküjaa pütchi nayoutule na wayuukana tü pütchi waküjakat namüin. Akaataajaʼa wekirajüle wanee wayuu achekakai tü pütchikat, nnojotsü wapüleeruainjatüin naaʼin süpüla nunoujain sünain tü sümakat tü Wiwüliakat. Alatüsü tia namüin na nikirajüinkana Jesuu, kakalia naya süpüla nayaawatüinjatüin saaʼu tü nikirajakalü anain naya (Juan 14:9). Mayaainjeʼe wayain apünajüin jee woʼyonuin wüin saaʼu, soteesü waaʼin niain Maleiwa miyoʼuka atuma shia (1 Cor. 3:6). w20.09 11 püt. 10, 11

Keeʼireesü waaʼin woutiisainjanain na wekirajüinkana. Wanee kasa waaʼinrajatka shia waküjain namüin noʼunuinjanain sünain tü outkajawaakat. Woutiisamaatüshi wanee wayuu nuʼunawaire sünain tü outkajawaakat. Eeshii na makana namüin na nekirajüinkana nnojoleerüin natüjain nepialuʼu tü natüjeetkat suluʼu tü outkajaaleekat. Waashajeʼera namüin Hebreokana 10:24, 25, waküja namüin tü kasa anasü neʼreetkat sünainjee noʼunuin sünain tü outkajawaakat. Yooto waya namaa süchiki wanee kasa watüjakat sünainjee tü outkajawaakat. Neʼrüle talatüin maʼin waaʼin, oʼuneejeerü naaʼin sünain tü outkajawaakat. Tü kasa naapeetkat jee neʼreetka na wekirajüinkana sünain tü outkajawaakat aneerü maʼin shia namüin suulialeʼeya tü kasa naapakat suluʼu wanee iküleesia naatajatü (1 Cor. 14:24, 25). Eʼraajiraajeena naya namaa wayuu anakana süpüla nashatüin akuwaʼipa otta nakaalinjeena naya süpüla woutiisain naya. w20.10 10 püt. 14, 15

Nükaalinjeena waya Jeʼwaa nükajee chi naaʼinkai süpüla waaʼinrüin tü wekirajaakalü anain sünain tü Wiwüliakat. Wachunta nümüin Jeʼwaa maʼaka naaʼinrüin shia chi salmistakai sünain maa: «Jeʼwaa, pikiraja taya sünain tü kasa puluwataakalü anain taya, oʼuneechi taya süchiirua tü shiimainkat. Pansaa taaʼin putuma süpüla taʼwaajüin pünülia» (Sal. 86:11). Ayataʼaya wekirajaain sünain tü Wiwüliakat otta sünain tü karaloʼuta eekat sutuma nupueulose Jeʼwaa. Nnojo kachiiruain waaʼin watüjainjanain maʼin, tü kachiiruainjatkat waaʼin shia wayaawatüin saaʼu tü shiimainkat nüchiki Jeʼwaa otta waaʼinrüin tü nümakat. Wounteerü tia süka nükaalinjeenain waya Jeʼwaa nükajee chi naaʼinkai. Watütüleʼera naaʼin na wawalayuukana jama wapüshin naya (Heb. 10:24, 25). Wachunta nümüin Jeʼwaa chi naaʼinkai süpüla anainjatüin wanüiki wasoutapa shiʼipajee tü asakinnakalü anain otta wekirajapa suluʼu tü outkajaaleekat. Waaʼinrüle tia, niʼreerü Jeʼwaa otta Jesuu alin wapüla na wawalayuukana (Juan 21:15-17). Sutuma niain Jeʼwaa chi Atüjakai maʼin Ekirajaa, anasü wachajaale sukuwaʼipa süpüla wekirajaain sünain tü pütchi naapaka wamüin suluʼu tü Wiwüliakat. w20.10 25 püt. 15-17

¿Kasa naaʼinraka Jesuu napüleerua na nikirajüinkana wanaa sümaa sümatchinjaapünaain nanoula? Anuu tü nüküjakat Jesuu namüin waneinnua nikirajüin süchikijee süsoʼiraain naaʼin: «Nnojo mmolüin jia. Shia anaka aluʼu müleka juʼunüle nanainmüin na tawalayuukana jaapiraiwa naya süchiki [tasoʼireʼennüin aaʼin]» (Mat. 28:101). Nnojoishii niyüülajüin Jesuu na nikirajüinkana mayaainjeʼe napütüin nia. «Tawalayuu», müshi nia namüin. Nüshatüin Jesuu nukuwaʼipa Jeʼwaa, amülialaasü naaʼin naalin na nikirajüinkana otta motusü naaʼin tü kasa mojusü naainjakat (2 Rey. 13:23). Müinjatia sukuwaʼipa watuma, kapülainjatü waaʼin nakuwaʼipa na wawalayuu kakaliainnakana ooʼulaain suulia aküjaa pütchi. Ayatayüliʼiya wawalayuuin naya, aishii maʼin naya wapüla, sotoyülia waaʼin süpüshuaʼa tü naaʼinrakat sünain aʼyatawaa nümüin Jeʼwaa. Noʼutku naya wawalayuukana aʼyataapuʼushii maʼin naya nümüin Jeʼwaa soʼunnaa wainma juya (Heb. 6:10). Wasukajüin maʼin naya (Luc. 15:4-7). Watütüleʼera naaʼin na wawalayuu ooʼulaakana suulia aküjaa pütchi süpüla nuʼunuin sünain tü outkajawaakat. Nüntüle weʼrüin sünain tü outkajawaakat wanee wawala kakaliaichika ooʼulaain suulia aküjaa pütchi kamaneeinjana waya nümüin. w20.11 6 püt. 14-17

Jülüjataa waaʼin tü nümakat Jesuu wanaa sümaa suchuntuin tü niikat Santiago otta Juan wanee kasa nnojotka laülaain aaʼu Jesuu. Asoutushi Jesuu shiʼipajee tia sümakat otta nüküjain niain chi Nüshikai eʼitaain jaralinjachin aikalaain nikialuʼujee ooʼulaka nipeʼeruʼujee sünain aluwatawaa (Mat. 20:20-23). Niyaawata aaʼu Jesuu tü eekat süpüla naaʼinrüin, niyaawata aaʼu nukuwaʼipa. Nnojotsü naaʼinrüin wanee kasa nnojotka nuluwataain anain nia Jeʼwaa (Juan 12:49). ¿Kasa waaʼinrajatka süpüla washatüin nukuwaʼipa Jesuu? Washateerü nukuwaʼipa Jesuu waaʼinrüle tü sümakat tü pütchi süpülajatkat soʼukai. Jamüsüjaʼa nuchuntule kaalinwaa wamüin wanee wawala, nnojotsü wapüleeruainjatüin naaʼin süpüla naapaainjatüin sümaa tü wamakat jee shiainjatüin waküjain nümüin tü kasa antajaakat suluʼu wekii. Tü waaʼinrajatkat shia waashajeʼerüin nümüin tü sümakat tü Wiwüliakat jee shiale tü sümakat tü karaloʼuta eekat wamaʼana. Waaʼinrüle tia, nnojotsüjaʼa yaletüin waaʼin otta wayaawateerü saaʼu niain neʼe Jeʼwaa anain süpüla aküjaa wanee kasa (Alat. Map. 15:3, 4). w20.08 11 püt. 14, 15

¿Kasa eeka süpüla jülüjain waaʼin süpülapünaa wachiaain wanee wayuu? «Nnojo jülüjain paaʼin lotuin maʼin pukuwaʼipa». Chi wayuu makai akuwaʼipa, niyoujain na waneinnua, nnojotsü jülüjain naaʼin tü nümakat Jeʼwaa. Shia neʼe jülüjakat naaʼin tü nikiiruʼujeejatkat. Müle nukuwaʼipa, eeshijaʼa nnojoleechire nümülialaain naalin na waneinnua. Wachiaainjachire wanee wayuu, waküja nümüin tü nunouteʼerajatkat sünain nukuwaʼipa jee wasakira nia süpüla niyaawatüin saaʼu kasain mojuin nutuma. Waküja nümüin tü sümakat tü Wiwüliakat, soteepejeʼe waaʼin niainjachin asoutuin nümüin Jeʼwaa saaʼu tü naaʼinrakat (Roma 14:10). Wachiaa sükajee tü sümakat tü Wiwüliakat jee washata nukuwaʼipa Jesuu wachiaapa (Prov. 3:5; Mat. 12:20). ¿Jamüsü waaʼinrajatka tia? Wachiaale wanee wayuu süka anaka akuwaʼipa, meeria wakuwaʼipa nutuma Jeʼwaa (Sant. 2:13). w20.11 21 püt. 13

Nnojotsü anashiin wamüin mojule pütchi wachiki sünainjee neʼe mütsiiain wata, wulein wata, sünainjee wayolojo jee shiale sünainjee kaüsüin waya. Anapejeʼe waaʼin süka watüjaain saaʼu nnojoluin jülüjain naaʼin Jeʼwaa tia. Jamüshijaʼa nia wanaa sümaa nüneeküinjachin wanee nüchon Jesé süpüla aluwatawaa, naata tü jülüjakat naaʼin suulia tü jülüjakat naaʼin Samuel. Eliab nünülia chi miyoʼushikai nüchon Jesé. «Niainjaʼaya nüneeküin Jeʼwaa chii süpüla aluwatawaa», müshi Samuel niʼraiwaʼaya Eliab. Niʼrüin Samuel wayuuin anashi aaʼinchi Eliab süpüla aluwatawaa. Anuupejeʼe nünüiki Jeʼwaa nümüin Samuel: «Nnojo jülüjain paaʼin wayuuin anashi aaʼinchi nia jee miyoʼusenuuin nia, nnojoishi niain taneeküin». ¿Kasa watüjaka sünainjee tia? Anuu sooʼomüin nünüiki Jeʼwaa: «Shia jülüjaka saaʼin wayuu tü shiʼrakat, akaajasaʼa Jeʼwaa shia jülüjaka naaʼin tü suluʼukat saaʼin wayuu» (1 Sam. 16:1, 6, 7). Anasü washatüle nukuwaʼipa Jeʼwaa sünain kamaneein maʼin waya namüin na wawalayuukana. w20.04 14 püt. 1; 15 püt. 3

Soʼu chainjachin Jesuu Galileamüin, alatapünaashi nia süʼütpünaa wanee aʼttiee ajaʼapülaaitka (Juan 4:3-6). Choʼujaʼalaa neʼe pienchi kashi süpüla yapain shia süpüla asüʼüjünaa. Nüküjaka Jesuu wanee kasa ponoko maʼin naaʼin na nikirajüinkana: yapasü tü aʼttieekat süpüla asüʼüjünaa (Juan 4:35, 36). ¿Kasache nüküjeeka achiki Jesuu? Eeshijaʼa naashajaale Jesuu süchiki nakotchojünüinjanain na wayuukana süpüla anoujaa nünain. Soʼu kaʼikat tia, aküjashi pütchi Jesuu sümüin wanee wayuu samariajeʼewat. Naaʼinrüin tia mayaainjeʼe nnojoluin anajiraain na judíokana namaa na samariajeʼewaliikana. Sümaʼinruʼu nüküjain Jesuu namüin na nikirajüinkana süchiki yapain tü aʼttieekat, wainma na samariajeʼewalii antakana nünainmüin sünainjee tü süküjakat tü wayuu naashajaakalü amaa Jesuu. Antüshii naya wayuukana süpüla naapajüin nünüiki (Juan 4:9, 39-42). Anuu tü nümakat wanee wayuu ekirajaakai süchiirua sukuwaʼipa tü Wiwüliakat süchiki tia: «Sünainjee nantamaatüin naya wayuukana sünain aapajaa nünüiki Jesuu [...], müshii naya aka saaʼin wanee aʼttiee eekai yapain süpüla asüʼüjünaa». w20.04 8 püt. 1, 2

Sükajee tü outkajawaakat ekirajünüshii waya süpüla watüjainjanain aküjaa pütchi jee ekirajaa wayuu sükajee tü karaloʼutakalüirua otta tü video wekirajakalü aka wayuu. Makalaka yapainjatüin watuma tü wekirajaainjatkalü anain süpülapünaa woʼunuin sünain tü outkajawaakat, jülüjainjatü maʼin waaʼin tü ekirajünakalü anain jee waaʼinrajatü shia. Waaʼinrüle süpüshuaʼaleʼeya tia, yapeena waya maʼaka naaʼin wanee nusurulaatse Kürisüto (2 Tim. 2:3). Nakaalinjain waya na aapiee nümaʼanajeejanakana Maleiwa. Watüjaa aaʼu tü eekat süpüla naaʼinrüin waneeshia neʼe aapiee, nayaleekajaʼa wainmale maʼin naya (Is. 37:36). Nnojoishi eein wanee wayuu jee niale wanee yolujaa eekai süpüla nükanajüin na nusurulaatsekana Jeʼwaa. Jamüshijaʼa Jeʼwaa pülashaatashi maʼin nia. Shiasaʼa eepa nia wamaa, katchinsü waaʼin noulialeʼeya na waʼünüükana, jaʼitaina wainmain maʼin naya (Juec. 6:16). Jülüjale waaʼin tia, akatchinraajeerü waaʼin müleka mojule waaʼin sünainjee tü nümakat jee tü naaʼinrakat wamüin wanee wayuu aʼyataajiraakai wamaa, koleejiajiraakai wamaa jee niale wanee wapüshi nnojoikai anoujain wanaajiraa wamaa. Soto waaʼin nnojoliin wamüiwaʼain waya, eeshi Jeʼwaa wamaa sükajee waaʼinrüin tü nuluwataakalü anain waya. w21.03 29 püt. 13, 14

Eesüjaʼa nüshajarale chi aluwataaushikai Pablo tia pütchikat suluʼujee Isaías 22:13. Nüküjain Pablo shiain neʼe jülüjain naaʼin na israeliitakana emiʼijawaa suulialeʼeya narütkaain nünainmüin Maleiwa. Müsia sünüiki wayuu maaʼulu yaa maʼaka saaʼin nanüiki na israeliitakana. Anuu nanüiki: «Anashii wemiʼijaale süka watüjaain saaʼu outajanain waya». Wanoujale sünain süsoʼiraainjatüin naaʼin na outushiikana, waneeküinjana jaraliin na waʼaleewajaainjanakana amaa. Na anoujashii corintojeʼewaliikana, nnojoluinjana naya aʼaleewajaain namaa na wayuu nnojoliikana anoujain sünain süsoʼiraainjatüin naaʼin na outushiikana. ¿Kasa watüjaka sünainjee tia? Waʼaleewajaale namaa na wayuu jülüjakana neʼe aaʼin emiʼijawaa, nnojoleena waya eʼrüin kasa anasü sünainjee waaʼinrüin tia. Eesü süpüla sumojujaain wakuwaʼipa natuma jee müsia eeshii süpüla waaʼinrüin wanee kasa nüʼürülaka Jeʼwaa. Müshiijeseʼe nüchiaain Pablo na anoujashiikana sükajee pütchikat tüü: «Anakaja müleka japüire jia saaʼu tü kasa mojusü jaaʼinrakat [...]. Juuʼulaa jumaala suulia kaainjalaa» (1 Cor. 15:33, 34). w20.12 9 püt. 3, 5, 6

Nüküjain Jeʼwaa suluʼu wetsiikulokot tüü jaraliin na laülaakana nutuma naaʼu na nüpüshi yaakana saaʼu tü mmakat otta naaʼu na chakana iipünaa. Nia Jeʼwaa laülaakai waaʼu, müsüjeseʼe naapüin laülawaa namüin na waneinnua. Asoutajanapejeʼe naya saaʼu tü naaʼinrakat müleka anale jee mojule shia (Roma 14:10; Éf. 3:14, 15). Nia laülaaka Jesuu nutuma Jeʼwaa naaʼu na wawalayuukana. Asoutuinjachipejeʼe Jesuu nümüin Jeʼwaa saaʼu tü naaʼinrakat müleka anale jee mojule shia (1 Cor. 15:27). Nia laülaaka nutuma Jeʼwaa chi wayuukai saaʼu nuʼwayuuse jee nüchonnii. ¿Kasakaʼa naaʼinrajatüin wanee wayuu süpüla kojutuinjatüin nuʼwayuuse nümüin jee nüchonnii? Nütüjaainjatü aaʼu tü nüchekakat Jeʼwaa nüpüleerua. Nütüjaainjatü aaʼu jamüin laülaaka nia nutuma Jeʼwaa saaʼu nuʼwayuuse jee nüchonnii. Nütüjaainjatü aaʼu tü naaʼinrajatkat süpüla nüshatüin nukuwaʼipa Jeʼwaa nümaa Jesuu. ¿Jamüsü nütüjaainjatka saaʼu tia? Shia süka laülaain nia nutuma Jeʼwaa saaʼu nüpüshi otta kojutuinjatü nümüin nuʼwayuuse jee nüchonnii (Luc. 12:47, 48). w21.02 2 püt. 1-3

Anasü maʼin waneeküle waneirua kasa motuinjatka waaʼin maʼaka naaʼinrüin shia Jeʼwaa. Mayaapejeʼe eein süpüla sotuin naaʼin kasa süpüshuaʼa, nüneeküin motuin naaʼin waainjala wayaawajaale suulia (Sal. 25:7; 130:3, 4). Shia keeʼireeka naaʼin Jeʼwaa motuinjatüin waaʼin naainjala na waneinnua (Mat. 6:14; Luc. 17:3, 4). Wanee kasa waaʼinrajatka süka kojutuin wamüin anain maʼin sukumajia tü wekiisholoinkat, shia weeʼiyatüle nujutu chi kakumainkai shia. Eeshii na nnojoliikana aaʼinrüin tia, jülüjasü naaʼin nakuwaʼipa neʼe namüiwaʼa otta naneeküin süka naaʼin namüiwaʼa tü mojukat jee tü anakat süpüla naaʼinrüin. Süka nukumajalain waya Jeʼwaa, shia anaʼleeka maʼin tü nuluwataakalü anain waya suulialeʼeya tü wachekakat neʼe wamüiwaʼa (Roma 12:1, 2). Waaʼinrüle tü nümakat Jeʼwaa, aneerü maʼin wakuwaʼipa (Is. 48:18). Sükajee tia, watüjaajeerü aaʼu tü wakuwaʼipainjatkat, kojuteechi wamüin chi Washi iipünaajachikai otta talateechi nia wamaa (Prov. 27:11). w20.05 24 püt. 13, 14

¿Kasa waaʼinrajatka süpüla alinjanain wapüla na wawalayuukana? Weʼraajüinjana maʼin naya. Waaʼinrüle tia, watüjaajeerü aaʼu jamüin maka nakuwaʼipa otta aijeena naya wapüla. Eeshii süpüla aleewain waya namaa na wawalayuukana jaʼitaina laülaayuuin jee tepichijain naya. Soto waaʼin aleewain maʼin Jonatán nümaa David mayaainjeʼe nülüʼüjain 30 juya nüpüleerua. Eeshi süpüla aleewain pia nümaa wanee wawala eekai laülaaichin jee jintülin puulia. Paaʼinrüle tia, aijeena püpüla na wawalayuukana (1 Ped. 2:17). Aishii wapüla napüshuaʼa na wawalayuukana, eepejeʼe na aleewakana maʼin amaa waya süka anain waaʼin namaa otta wanaawain tü keeʼireekat waaʼin. Müshiijeseʼe aleewain maʼin waya namaa, nnojotpejeʼe mojuin tia. Jamüshijaʼa Jesuu, aleewashi nia namaa napüshuaʼa na aluwataaushikana, aipejeʼe maʼin Juan nüpüla (Juan 13:23; 15:15; 20:2). Mayaainjeʼe müin tia, wanaawasü naalin na aluwataaushikana nüpüla Jesuu (Mar. 10:35-40). w21.01 23 püt. 12, 13

Nnojotsü wanaawain nutuma chi aluwataaushikai Pablo sukuwaʼipa tü nümakat namüin na wayuu chajanakana metkaaraluʼu sümaa tü nümakat namüin na suluʼujanakana tü ekirajüleekat judío. Eesüjaʼa nütüjaale Pablo saaʼu kasain nanoujain anain na wayuu chajanakana Atenas sünainjee nünanajüin tü kasa nakumajakat süpüla naʼwaajüin namaleiwase (Aluw. 17:23). Jülüjaa müsü naaʼin Pablo tü wanaawakalü atuma tü nanoujakalü anain naya wayuukana sümaa tü sümakat tü Ashajuushikat. Aküjashi pütchi Pablo wanaapünaa sümaa nakuwaʼipa naya wayuukana. Nüküjain namüin niain nüküjain achiki chi Maleiwa naʼwaajakai sümaa nnojolin neʼraajüin nia. Mayaainjeʼe nnojoluin natüjaain saaʼu tü sümakat tü Ashajuushikat, nnojotsü jülüjain naaʼin Pablo mepin nakuwaʼipa naya wayuukana. ¿Jülüjasüche naaʼin Pablo nuwalayuujeenain naya? Aa, jülüjasü naaʼin müin naya aka saaʼin wanee aʼttiee eekai yapain süpüla asüʼüjünaa. Müshijeseʼe nüküjain pütchi namüin wanaapünaa sümaa tü nanoujakalü anain. Maʼaka naaʼinrüin shia Pablo, jülüja waaʼin tü kasa wayaawateetkalü aaʼujee tü nanoujakalü anain na wayuu waküjakana amüin pütchi. Eesü süpüla jülüjain waaʼin tü kasa eekat sünain nepia, kasaichin nanülia, jamüin naʼanaaya otta jamüin nanüikipala. Müle shia watuma, wayaawateerü aaʼu kasain iküleesia kaluʼuin naya. w20.04 9 püt. 7, 8