Peʼureeroʼu

Kachipünaashii naaʼin Jeʼwaa napüshuaʼa na aʼyataashiikana nümüin. Pejeshi nia wanain waneʼewai wakua jee nütüjaa aaʼu wanaa sümaa müin wamüiwaʼakai waaʼin (Sal. 145:18, 19). Jülüjataa waaʼin tü naaʼinrakat Jeʼwaa süpüla nükaalinjain Elías wanee nünüikimaajachi. Soʼu nükalia Elías wainma maʼin tü wayuu mojulaasükalüirua müliakana atuma naaʼin na aʼyataashiikana nümüin Maleiwa jee noʼutee aaʼinchi Elías (1 Rey. 19:1, 2). Niaʼaya naaʼinruʼu Elías apütaaka nümüiwaʼa suluʼu nünüikimaajachin Jeʼwaa, mojusü maʼin naaʼin sutuma tia (1 Rey. 19:10). Nükaalinjaamaatüin nia Jeʼwaa. Nüjütüinjeseʼe wanee aapiee nümaʼanamüin Elías süpüla nüküjain nümüin nnojolin nümüiwaʼain jee wainmain na aʼyataashiikana nümüin Maleiwa katayüliikana oʼu (1 Rey. 19:5, 18). Nütütüleʼerüin naaʼin Jesuu na nikirajüinkana wanaa sümaa nüküjain wainmeenain na makana aka saaʼin napüshi namüin (Mar. 10:29, 30). Nüküjain Jeʼwaa, chi Washi iipünaajachikai, nükaalinjeenain na aʼyataashiikana nümüin (Sal. 9:10). w21.06 8 püt. 3, 4

Wainma wayuu jashichikana wamüin süka wekirajüin nnojoluin pansaain tü shikirajakalü anain tü iküleesiakalüirua sümaa tü sümakat tü Bibliakat. Nekirajüin na shikiipüʼükana tü iküleesiakalüirua sünain müliain na kaainjaraliikana nutuma Maleiwa saʼaka siki, neimmolojuin wayuu sükajee tia. Eekajasaʼa wayakana aʼyataakana nümüin Jeʼwaa watüjaa aaʼu alawaain tia süka alin wayuu nüpüla Maleiwa. Wainma iküleesia ekirajaka sünain ayatüin katüin soʼu wayuu süchikijee outaa, shiimainreje tia nnojotsüjaʼa mata choʼujaain süsoʼireʼennüin saaʼin wayuu. Eekajasaʼa wayakana wekiraja anainrü nnojoluin shikirajüin Bibliaka tia. Wainma iküleesia ekirajaka sünain alejatüin wakuwaʼipa nutuma Maleiwa. Eekajasaʼa tü wekirajakalü anain shia eein süpüla waneeküin tü waaʼinrajatkat, eesü süpüla waneeküin waʼyataain nümüin Maleiwa. Sutuma tü wekirajakalü anain jashichishii wamüin na shikiipüʼükana tü iküleesiakalüirua. Kapürale waaʼin tü shiimainkat nüchiki Maleiwa, woonoojeerü amaa tü Nünüikikat (Juan 8:45, 46). Nnojo waaʼinrüin tü naaʼinrakat Satanaa, shia anaka kojutule wamüin tü shiimainkat nüchiki Maleiwa jee nnojo waaʼinrüin kasa eekai mojuin noʼuluʼu (Juan 8:44). Keeʼireesü naaʼin Maleiwa nashatüin nukuwaʼipa Jesuu na aʼyataakana nümüin, müshijeseʼe nümüin wamüin: «Jiyoukta tü mojusükat süpüleerua jaaʼinrüinjatüin tü kasa anasükat» (Roma 12:9; Heb. 1:9). w21.05 10 püt. 10, 11

Wayaawatüle saaʼu yaletüin waaʼin jee kachiiruain waaʼin wainma kasa, wooʼulaainjatü suulia tia. Naashin chi aluwataaushikai Pablo eeshii süpüla taashin nuulia Satanaa na emeejünakana nutuma (2 Tim. 2:26, TNM). Soto waaʼin pülashaatain maʼin Jeʼwaa nuulia chi Yolujaakai. Wacheküle nükaalinjain waya Jeʼwaa, eeshii süpüla taashin waya nuulia chi Yolujaakai. Wekirajaaitpa anain eein süpüla taashin waya nuulia chi Yolujaakai. Anapejeʼe maʼin wayoutule tü nimeejakalü aka waya. Wounteerü tia süka nükaalinjain waya Maleiwa. Achuntajana waya waneepia nümüin Jeʼwaa süpüla wayaawatüin saaʼu yaletüle waaʼin jee kachiiruale waaʼin wainma kasa (Sal. 139:23, 24). Jalia waya suulia nimeejüin waya Satanaa. Kakaliaichi Satanaa sünain nimeejüin saaʼin wayuu. Alüʼütsü nükalia süpüla nütaʼünüin jee mapa oʼutuneechi aaʼin nia (Alat. Map. 20:1-3, 10). Kasataalejeseʼe süntüin tia kaʼikat. Eeja maʼin waaʼin sümaʼinruʼu süntüin tia kaʼikat. Ayata eejüin waaʼin suulia nimeejüin waya Satanaa. Eeja waaʼin suulia yaletüin waaʼin jee kachiiruain waaʼin wainma kasa. Shia anaka aluʼu woonoole sümaa pütchikat tüü: «Müleka jüleejüle chi Yolujaakai, oʼunamaateechi juulia». w21.06 19 püt. 15-17

Talatüshi maʼin Jeʼwaa naaʼinrüle wanee wayuu tü sümakat tü Bibliakat jee nüküjale pütchi sümüin wayuu (Prov. 23:15, 16). Talatakajasaʼa maʼin naaʼin Jeʼwaa sünainjee tü waʼyataainkat nümüin maaʼulu. Jamüsüjaʼa tü waʼyataainkat soʼu 2020 eeshii 7.705.765 wayuu ekirajaakana sünain tü Bibliakat jee woutiisashii 241.994. Naya jekenakana woutiisain, nekirajeerü wayuu jee nakaalinjeena naya süpüla woutiisain (Luc. 6:40). Talatakajasaʼa naaʼin Jeʼwaa sutuma tü kasa waaʼinrakat. Wainma kasa waaʼinraka süpüla wakaalinjain wayuu süpüla noushikajaainjanain süchiirua nukuwaʼipa Jesuu. Nükaalinjeenapejeʼe waya Jeʼwaa süpüla wekirajüin naya süpüla alinjachin nia napüla. ¿Eeshiche süpüla piʼyataain süchiirua pikirajüin wanee wayuu? Paashajaa namaa na wayuu piʼraajakana nekirajaaiwa pümaa sünain tü Bibliakat. Poneerü paaʼin «aa», namüle pümüin. w21.07 6 püt. 14-16

Wainma maʼin tü kasa naapakat chi aluwataaikai David süpüla sukumajünüin tü piichi aʼwaajüleekat Maleiwa (1 Crón. 22:11-16). Laülaale pia jee isale püchiki pükaalinjain sünain akumajaa piichi aʼwaajülee Maleiwa, eesü süpüla püsülajüin nneerü wanaapünaa sümaa tü eekat süpüla paapüin. Otta püküja namüin na jimaʼaliikana jee na majayünnüükana süchiki tü pülatüitpakalü achikumüin. Wane wayuu kamaneekai nia chi aluwataaushikai Pablo. Nuunejaain Timoteo chi jimaʼaikai süpüla nuʼunajachin nümaa sünain aküjaa pütchi wattapünaa jee nikirajüin nia süpüla nütüjain aküjaa pütchi jee ekirajaa wayuu (Aluw. 16:1-3). Atüjashi maʼin Timoteo süka nikirajünüin nutuma Pablo (1 Cor. 4:17). Jee nikirajüinya Timoteo waneinnua anoujashii süpüla natüjainjanain wanaa nümaa. w21.09 12 püt. 14, 15

¿Kasa watüjaka sünainjee nukuwaʼipa Apolos otta nukuwaʼipa chi aluwataaushikai Pablo? Wayuu atüjashii maʼin naya süpüleerua tü karaloʼuta Nüchikimaajatkat Maleiwa. Wayuu kojutushii naya amüinyüü, atüjashii maʼin naya ekirajaa otta wainma na wayuu nakaalinjakana süpüla noushikajaain süchiirua nukuwaʼipa Kürisüto. Mayaainjeʼe müin nakuwaʼipa nnojoishii achumujiraain naya saaʼujee tü kasa natüjakat (Aluw. 18:24). Kakalia mapa nuchuntuin maʼin Pablo nümüin Apolos shiiʼiree nüleʼejüin nüchikuaʼa Corintomüin (1 Cor. 16:12). Sükajee nütüjain maʼin Apolos ekirajaa aküjashi maʼin pütchi otta nükaalinjain na anoujashiikana. Wayaawata aaʼulu nnojoluin yaletüin naaʼin Apolos sutuma nnojolin jashichin nia nümüin Áquila otta sümüin Priscila wanaa sümaa «naküjain süchikü nümüin tü kasa nnojoliyütkalia nütüjaain aaʼu sooʼopünaa tü wopu niʼitaakat Maleiwa» (Aluw. 18:24-28). Nütüjaa aaʼu chi aluwataaushikai Pablo anapuʼuin maʼin tü kasa naaʼinrakat Apolos, nnojotsü mojuin nümüin kapülain aaʼin Apolos nuulia. Nnojotsü yaletüin naaʼin Pablo, nütüjaa aaʼu eein tü kasa isakat nüchiki jee nnojoishi macheʼein nia süchiirua tü nümakat. Watüjaa aaʼu tia sünainjee tü nümakat namüin na anoujashii chajanakana Corinto (1 Cor. 3:4-6). w21.07 18 püt. 15-17

Süka nüneeküin süka naaʼin nümüiwaʼa Adán sümaa Eva nnojoliin noonooin nümaa Maleiwa, nnojoliinnapa anain naya süpüla naʼakain na nüpüshikana. ¿Jamakaʼa nakuwaʼipa na nüchonniikana? Nukumajüin Jeʼwaa wanee sukuwaʼipa süpüla nüneeküin noʼutku nüchonnii Adán sümaa Eva süpüla nüchoinjanain naya. Naaʼinrüin tia Jeʼwaa sükajee outuin chi Waneeshikaʼiya Nüchon (Juan 3:16, TNM). Saaʼujee outuin Jesuu, eeshii 144.000 wayuu waneepiakana nümaa Maleiwa nüneekaka süpüla nüchoinjanain (Roma 8:15-17; Alat. Map. 14:1). Eeshii watta naalii wayuu aaʼinrakana tü nuchuntakat Maleiwa otta naʼatapajüin naʼakainjanain na nüpüshikana süchikijee tü miitkat juya (Sal. 25:14; Roma 8:20, 21). Sükajee naʼatapajüin tia «Taata», müshii naya nümüin Jeʼwaa chi Kakumalakai naya (Mat. 6:9). Jee müshiʼiya na asoʼiraainjanakana aaʼin, ekirajüneena naya sünain tü nuluwataakalü anain Jeʼwaa. Nayasaʼa na oonookana nümaa, naʼakeena na nüpüshikana. w21.08 5 püt. 10, 11

Aapünüsü nümüin chi aluwataaushikai Pablo tü aʼyatawaakat sünain aküjaa pütchi otta kojutusü nümüin waneepia tia aʼyatawaakat, aküjashi pütchi eepünaale nia jee sainküin miichi (Aluw. 20:20). Aküjashi nia pütchi eepünaale nia. Soʼu wanee kaʼi, sümaʼinruʼu chajachin naʼatapajüin na naʼaleewainyuukana chaa Atenas, aküjashi pütchi Pablo namüin waneinnua wayuu eʼnnaajünakana maʼin. Eeshii noʼutku naya wayuukana aapajakana tia pütchikat (Aluw. 17:16, 17, 34). Akaʼaya soʼu püreesain nia suluʼu wanee piichi, aküjashi pütchi namüin na wayuu antakana nünainmüin jee na yalajakana nümaa (Aluw. 28:16-24; Filip. 1:13, 14). Najayatapuʼuin Pablo tü kaʼikat. Nuunejaapuʼuin waneinnua anoujashii nümaa süpüla naküjain pütchi. Soʼu tü palajatkat nukua sünain aküjaa pütchi wattapünaa, nuunejaain Juan Marcos otta soʼu tü piantuakat nukua nümaashi Timoteo (Aluw. 12:25; 16:1-4). Nikirajüin maʼin naya Pablo süpüla natüjainjatüin süpüleerua sukuwaʼipa tü aainjünüinjatkat suluʼu tü outkajaaleekat, süpüla naaʼinmajüinjanain na anoujashiikana otta süpüla natüjainjanain ekirajaa (1 Cor. 4:17). w22.03 27 püt. 5, 6

Eeshii na nnojoliikana anoujain sünain wanee kasa nnojotka neʼrüin. Müsüjeseʼe nnojoluin nanoujain sünain eein chi Kakumalakai kasa süpüshuaʼa süka nnojolin neʼrüin nia. Eepejeʼe waneirua kasa nanoujaka anain mayaainjeʼe nnojoluin neʼrüin shia, maʼaka saaʼin tü joutaikat. Saashin tü Bibliakat, tü kanoulaakat shia «shiimainre wamüin wanee kasa mayaainjeʼe nnojoluin weʼrüin shia» (Heb. 11:1, TNM). Ekirajaainjana waya süchiirua wanee kasa süpüla watüjaain saaʼu jamüin wanoujaka aaʼujee shia süpüla pansaainjatüin shia wamüin. Wainmapejeʼe na wayuu akulajaakana aaʼin sünain ekirajawaa süchiirua tü nanoujakalü anain. Nnojoire nikirajaain wanee wayuu süchiirua jamüin nunoujaka sünain wanee kasa, eeshijaʼa süpüla nnojolin nunoujain sünain eein chi Maleiwakai. Nayaawata aaʼu waneinnua cientiifico niain Maleiwa Kakumalain tü kasa chakat iipünaa süka nekirajaain süchiirua tia. Nnojoishii naya anoujain sünain eein chi Kakumalakai tü kasakalüirua süka nnojoliin nekirajünüin sünain tia suluʼu tü eʼiküleekat miyoʼu. Anoujapejeʼe naya nünain Jeʼwaa sümaa alin nia napüla. Wakooʼomüinrüinjatü wanoula nünain Jeʼwaa jaʼitainna nnojoliin koleejiain waya. w21.08 14 püt. 1; 16 püt. 6, 7

Süpüla sütüjaanüin aaʼu nümüliajeein Jeʼwaa wayuu süpüshuaʼa, nikirajüin Jesuu nüchiki wanee emüliee maaʼinsai. Oʼunushi chia emülieekai nipialuʼujee suluʼumüin wanee mma wattamüin sümaa «najaʼttirüin tü nünneetsekat süpüshua sünain tü kasa eekai nücheküin naaʼinreein» (Luc. 15:13). Mapa, ayaawajaashi nia suulia naainjala, mojusü maʼin naaʼin saaliijee tü naaʼinralakat jee aleʼejaashi nia nüchikuaʼa nünainmüin chi nüshikai. ¿Jamüsü naaʼin chi nüshikai niʼrapa nüleʼejüin? Anuu nünüiki Jesuu süchiki tia: «Niʼrakalaka joo chi nüshikai nia nüpanapa seeiwaʼaya kaʼyatajee. Nuwataakalaka nüpanapa. Nukoʼojooin nünain je nüpesujüin nia süka nümüliajüin nia». Nümüliajüin chi nüchonkai, anasü naaʼin süka kottüichipain nia nüchikuaʼa namaa na nüpüshikana. Nnojotsü nüchekajüin tü niʼralakat wayumüin paala. Mayaainjeʼe wainmain naainjala chi nüchonkai, nnojoishi nia jashichin nümüin otta motusü naaʼin naainjala. Müshi Jeʼwaa maʼaka naaʼin chia wayuu amüliajakai nüchon. ¿Kasa nikirajeeka achiki Jesuu nüchiki chi emülieekai nümaa chi nüshikai? Shia keeʼireein naaʼin Jeʼwaa shiyaawajaainjatüin wayuu suulia saainjala süpüla motuin shia naaʼin (Luc. 15:17-24). w21.10 8 püt. 4; 9 püt. 6

Maaʼulu yaa, wainma kasa naaʼinraka na shikiipüʼükana tü iküleesiakalüirua süpüla nnojoluin sütüjaanüin aaʼu nünülia Maleiwa. Naaʼinrüin tia wanaa sümaa nasünneʼerüin tü nünüliakat suluʼujee tü Biblia nashajakat otta napülajüin shia suulia suchuntunüin naʼwaajapa Maleiwa. Nayapejeʼe neʼe na aküjaliikana pütchi nüchiki Jeʼwaa kojutuka atuma nünülia Maleiwa. Waya aküjaka nünülia Maleiwa sümüin wayuu suulia tü wane iküleesiakalüirua. Wachajaain maʼin sukuwaʼipa süpüla pansaain wakuwaʼipa süka nünüliamaajanain waya Jeʼwaa (Is. 43:10-12). Alatüsü suulia 240 miyoone Biblia Traducción del Nuevo Mundo weʼinprimiijaka, ashajünüsü nünülia Jeʼwaa suluʼu eere nasünneʼerüin na shikiipüʼükana tü iküleesiakalüirua suluʼujee tü wane Bibliakalüirua. Otta alatüsü suulia 1.000 anüikii tü karaloʼutairua ashajünaka aluʼu nünülia Jeʼwaa. w21.10 20 püt. 9, 10

Waʼwaajüin Jehová wakaalinjale na wawalayuu eʼrakana choʼujawaa. Naapüin naʼanasia Maleiwa namüin na israelita akaalinjakana na manneetsekana (Deut. 15:10). Wakaalinjale wanee wawala eʼrakai choʼujawaa müshii wasülajakai aaʼin nümüin Jehová (Pro. 19:17). Jamüshiijaʼa na anoujashii chajanakana Filipos, asülajüshii nümüin Pablo wanaa sümaa püreesain nia. Naashin Pablo, tü nasülajakat nümüin müsü aka saaʼin wanee asülajuushi talataka atuma naaʼin Maleiwa (Filip. 4:18). Jülüja waaʼin nakuwaʼipa na wawalayuu outkajaakana wamaa otta wasakireʼera waaʼin sünain tüü: «¿Eeshiche wanee wawala eekai süpüla takaalinjain?». Anasü nümüin Jehová wakatarüle kaʼi otta waapüle süpüshi tü kasa wamaʼanakat süpüla wakaalinjain na eʼrakana choʼujawaa. Waʼwaajüin nia waaʼinrüle tia (Sant. 1:27). Mayaainjeʼe nnojoluin mapüleein aʼwaajaa Jehová maʼaka nücheküin shia, waaʼinrüin tia süka alin nia wapüla otta alin wapüla na wawalayuukana (1 Juan 5:3). w22.03 24 püt. 14, 15

Jülüjale waaʼin tü kasa alatakat namüin na wawalayuukana, amülialaajeerü waaʼin naalin. Jamüsüjaʼa ayuuire maʼin wanee wawala, eesü süpüla nnojoluin saashajaain maʼin süchiki tia, aneetpejeʼe saaʼin sükaalinjünüle. Anasü wasakirüle waaʼin sünain tüü: ¿Jameerü saaʼin wakaalinjale shia sünain aʼlakajawaa otta epitajaa shipia? Jamüshijaʼa eere wanee wawala eekai maʼyataain, eeshii süpüla wasülajüin nneerü nümüin. Nnojotsü choʼujaain maʼin nütüjaainjatüin saaʼu wayain asülajüin tia nneetkat nümüin. Wakaalinjeere na wawalayuukana nnojotsü choʼujaain nachuntuin kaalinwaa wamüin. Washata nukuwaʼipa Jeʼwaa, nnojotsü choʼujaain wachuntuin nümüin nüntirüin wanainmüin naaʼayula chi Kaʼikai, nüntirüin naaʼayula chi kaʼikai saaʼu wayuu süpüshuaʼa. Naaʼinrüin tia Maleiwa mayaainjeʼe eein wayuu matüjainka aapa analuʼut saaʼu tia. ¿Aashin watüjaain saaʼu alin maʼin waya nüpüla Jeʼwaa süka naapüin tü kasa choʼujaakat wamüin? Anamia maʼin Jeʼwaa jee asülajüi maʼin nia, aishi maʼin nia wapüla sutuma tia. w21.09 22 püt. 12, 13

Süka miyoʼuin waalin nüpüla Maleiwa motusü naaʼin waainjala. Niyaawatapa saaʼu Jeʼwaa niyaawajaain wanee wayuu suulia naainjala sümaa nunouteʼerüin nukuwaʼipa, motusü naaʼin naainjala süka miyoʼuin naalin nüpüla. Anuu nünüiki David nümüin Jeʼwaa: «Nnojotsü nüchekajüin wamüin tü weʼralakat wayumüin wanaapünaa sümaa tü waainjalakat» (Sal. 103:8-11). Nütüjaa aaʼu David mojushaatain naaʼin wanee wayuu saaliijee naainjala, nütüjaapejeʼe saaʼu eein süpüla motuin naaʼin Jeʼwaa naainjala. Soʼu wanee kaʼi nuʼuraajaka oʼu David, nüküjain jamüin motoko naaʼin Jeʼwaa naainjala wanee wayuu maʼaka süküjain tü pütchi süpülajatkat soʼukai. Wayaawatüinjeseʼe saaʼu motuin naaʼin Jeʼwaa waainjala süka miyoʼuin maʼin waalin nüpüla. Anasü mojule waaʼin saaliijee waainjala süka eein süpüla wayaawajaain suulia jee wanouteʼerüin wakuwaʼipa. w21.11 5 püt. 11, 12

Nücheküin Jeʼwaa kojutuinjachin nia sümüin wayuu süpüshuaʼa (Is. 42:8). Mojupejeʼe maʼin tü pütchi aküjünakat nüchiki soʼunnaa tü 6.000 juya alatüitpakat (Sal. 74:10, 18, 23). Tü palajatkat alawaa aküjünaka nüchiki Maleiwa shia tü nüküjakat chi Yolujaakai. Eere nüküjain naʼalijirüin Maleiwa nuulia Adán jee suulia Eva wanee kasa anainjatka atuma nakuwaʼipa. «Yolujaa», münüshijeseʼe nia süka nüküjain alawaa nüchiki Maleiwa (Gén. 3:1-5). Oʼttüsü yalejeechiki süküjünüin alawaa nüchiki Jeʼwaa sünain naʼalijirüin suulia wayuu tü kasa anainjatkalü atuma nakuwaʼipa. Shapaasü naaʼin Jesuu sutuma süküjünüin pütchi mojusü nüchiki chi Nüshikai. Nia neʼe Jeʼwaa aluwataainjachikai sirumatuʼu jee saaʼu tü Mmakat (Alat. Map. 4:11). Emeejünüshii na aapieekana jee na wayuukana nutuma chi Yolujaakai süpüla nanoujain sünain nnojolin anain Maleiwa süpüla aluwatawaa. Soʼu palit kaʼi atüjaaneerü aaʼu anain Sukuwaʼipa Aluwatawaa nutuma Maleiwa jee sükajee tia eejeerü jimataa aaʼin jee wanee anaa akuwaʼipa saaʼu tü Mmakat. w21.07 9 püt. 5, 6

Naapüinjatü wanee wayuu tü choʼujaakat sümüin nuʼwayuuse otta namüin nachonnii maʼaka saaʼin neküin, nasheʼin otta nepia. Manneetsere pia, watüjaa aaʼu kapüleein maʼin tia pümüin, eepejeʼe süpüla pükatchinrüin punoula. Puʼuraaja nümüin Jeʼwaa jee paashajeʼera tü pütchi nümakat Jesuu suluʼu Mateo 6:25-34 sümaa püsakirüin paaʼin sünain. Jülüja paaʼin tü naaʼinrakat Jeʼwaa napüleerua na aaʼinmaakana tü naʼyataainkat nümüin maaʼulu (1 Cor. 15:58). Paaʼinrüle tia, piʼitaajeerü maʼin paaʼin nünain Jeʼwaa sünain nükaalinjeechin pia maʼaka nükaalinjain naya. Nütüjaa aaʼu Jeʼwaa tü kasa choʼujaakat pümüin otta tü sukuwaʼipakat süpüla naapüinjatüin shia pümüin. Piʼrapa nükaalinjain pia Jeʼwaa, akatchinraajeerü punoula jee püchechereerü paaʼin soʼunnaa tü müliaa piʼreetkat. w21.11 20 püt. 3; 21 püt. 6

Wainma na wawalayuu katchinkana anoula sutuma taashin waya sünainjee outuin Jesuu saaʼu waainjala. Mayaainjeʼe neʼrüin müliaa, ayatüshiʼiya naya sünain aküjaa pütchi. Jülüjataa waaʼin tü alatakat nümüin chi aluwataaushikai Juan. Aküjashi nia pütchi süchiki tü shiimainkat nüchiki Kürisüto jee süchiki taashin wayuu sünainjee outuin nia naaʼu. Alatüsü suulia 60 juya nüküjain pütchi süchiki tia. Eesüjaʼa maʼaka saaʼin 100 nuuyase wanaa sümaa nüpüreesajinnüin suluʼu tü mma kanüliakat Patmos. ¿Jamüshi püreesaka nia? Shia süka nüküjain pütchi nüchiki Maleiwa jee pütchi nüchiki Jesuu (Alat. Map. 1:9). Anakatche maʼin nukuwaʼipa Juan wapüleerua süka kanoulain jee nüchecherüin naaʼin. Suluʼu tü karaloʼuta nüshajalakat Juan nüküjain alin maʼin Jesuu nüpüla otta kojutuin nümüin taashin wayuu nutuma Jesuu. Wainmatua nüküjain Juan süchiki tia jee süchiki tü kasa anasü eekat sünainjee tia (1 Juan 2:2). Kojutusü nümüin Juan taashin waya sünainjee outuin Jesuu saaʼu waainjala. w21.04 17 püt. 9, 10

Anasü nümüin Jeʼwaa kamaneeinjanain na israeliitakana nümüin chi eekai macheʼein, masaʼain jee moʼuin. Nüküjain namüin nnojoluinjachin nuʼulejüin wanee wayuu eekai macheʼein, mojutaʼaleesüjaʼa naaʼinrüle tia wanee israeliita, kacheʼere joo chi wayuu nuʼulejakai. «Nnojo piʼitaain kasa nüpüleerua chi wayuu eekai moʼuin», müshi Jeʼwaa namüin na israeliitakana suluʼu Levítico 19:14. Anuu sünüiki wanee karaloʼuta süchiki tü aainjünakat nüka chi eekai macheʼein, masaʼain jee moʼuin: «Sümaiwa paala chaa Oriente Medio, mojulaapuʼushii maʼin na wayuukana nümüin chi eekai macheʼein, masaʼain jee moʼuin jee müliapuʼushii naya natuma». Eeshijaʼa eere chi wayuu eʼitaakai kasa nüpüleerua chi wayuu moʼukai süpüla neewain jee nüsirajüin nüka. Eʼraa maʼin wayumüin tia. Sünainjee tü sümakat Levítico 19:14 nikirajüin Jeʼwaa na israeliitakana süpüla kamaneeinjanain naya nümüin chi eekai macheʼein, masaʼain jee moʼuin. w21.12 8 püt. 3, 4

Eesüjaʼa shapaale naaʼin Jacob süka nnojoluin nütüjaain saaʼin müleka üttayülüjere naaʼin chi nuwalakai nünain. Makalaka nuʼuraajüin nümüin Jeʼwaa. Jee asülajüshi nia kasa nümüin Esaú (Gén. 32:9-15). Apünüin, niʼrapa nia eesü waneirua kasa naaʼinraka süpüla kojutuinjachin nia nutuma otta akaratshitua nüsapainkain nümülatuʼu. Sutuma nnojoluin yaletüin naaʼin Jacob jee kojutuin nümüin chi nuwalakai, anajiraashi nia nümaa nüchikuaʼa (Gén. 33:1-4). Eesü wanee kasa watüjaka sünainjee tü naaʼinrakat Jacob süpülapünaa nüpanapajüin chi nuwalakai otta sukuwaʼipa tü nünüikikat nümüin. Palajana, achuntushi kaalinwaa nümüin Jeʼwaa sümaa naaʼinrüin kasa wanaapünaa sümaa tü nuchuntakat nümüin süpüla anajiraainjachin nüchikuaʼa nümaa Esaú. Naashajaapa nümaa Esaú, nnojoishi aʼülüjaajiraain nümaa süchiki jaralin kasirüin tü alatakat. Shia jülüjaka naaʼin anajiraainjachin nia nümaa chi nuwalakai. ¿Eesüche süpüla washatüin nukuwaʼipa Jacob? (Mat. 5:23, 24). w21.12 25 püt. 11, 12

Eesü süntajaale suluʼu waaʼin nnojoluin kasain anain apüla waya jee maalin waya apüla (1 Juan 3:19). Eesü jülüjale waaʼin mepin tü waainjalakat, jaʼitasü watüjaain saaʼu outuin Jesuu saaʼu waainjala. Müleka mojule tü waaʼinkat saalinjee waainjala, jülüja waaʼin nümüliajeenain waya Maleiwa süka niʼraajüin wakuwaʼipa. Aishiiyaʼaya waya nüpüla Maleiwa jee motusia naaʼin waainjala. Müleka ayatüle mojuin waaʼin saalinjee tü waaʼinrapuʼukat paala, anashii wekirajaale sünain tü Nünüikikat Maleiwa waneepia, waashajaa waneepia nümaa Jeʼwaa otta namaa waya na wawalayuukana. Waaʼinrüle tia, weʼraajeerü maʼin nukuwaʼipa Jeʼwaa jee wayaawateerü aaʼu alin waya nüpüla. Wasakireʼerüle waaʼin waneepia sünain tü sümakat tü Wiwüliakat, aneerü tü jülüjakat waaʼin otta wasünneʼereerü süntajaale suluʼu waaʼin maalin waya nüpüla Maleiwa (2 Tim. 3:16). w21.04 23 püt. 12, 13

Süpüla wakooʼomüinrüin wanoula nnojotsü shiainjatüin neʼe wekirajaain anain tü Bibliakat. Wasakireʼera waaʼin sünain tü wekirajaakalü anain. Jülüja waaʼin tü nümakat chi ashajakai Salmo 77. Mojusü maʼin naaʼin süka nnojoluin anain nakuwaʼipa na israeliitakana noʼuluʼu Jeʼwaa otta müshia niakai naaʼinruʼu. Nnojoishi atunkeein nia sutuma shapaain naaʼin (wetsiikulo 2-8). ¿Kasa naaʼinraka? Müshi nia nümüin Jeʼwaa: «Jülüjeerü taaʼin süpüshuaʼa tü kasa paainjakat otta jülüjeerü taaʼin tü pukuwaʼipakat» (wetsiikulo 12). Nütüjaapejeʼe saaʼu tü kasa naaʼinrapuʼukat Jeʼwaa sümaiwa süpüleerua nupueulose, mayaainjeʼe müin tia asakitshi nia: «¿Motusüche naaʼin Maleiwa nükaalinjain waya? ¿Nnojoishiiche nümüliajüin waya sutuma jashichin nia?» (wetsiikulo 9). Chi ashajakai salmokot tüü nüsakireʼerüin naaʼin sünain tü kasa naaʼinrapuʼukat Maleiwa otta nümüliajapuʼuin saaʼin nupueulose sümaiwa (wetsiikulo 11). Sutuma tia niyaawatüin maʼin aaʼu nnojoluin nuuʼulaain Jeʼwaa nupueulose sümüiwaʼa (wetsiikulo 15). w22.01 30 püt. 17, 18

Niʼreein maʼin Jeʼwaa katüin noʼu na naʼaleewainyuu outuinnapakana (Job 14:15). Eeshijaʼa nusukajüle maʼin Abraham chi naʼaleewainkai (Sant. 2:23). Akaʼaya Moisés, chi yootopuʼukai amaa nia (Éx. 33:11). Naapajeekajasaʼa maʼin niiʼirain David otta neeʼirain waneinnua salmista (Sal. 104:33). Mayaainjeʼe outuin naya naʼaleewainyuukana nnojoishii motuin naya naaʼin Jeʼwaa (Is. 49:15). Nnojotsü motuin naaʼin Jeʼwaa tü nakuwaʼipakat. Soʼu wanee kaʼi nüsoʼireʼereerü naaʼin, naapajeerü nanüiki naashajaapa nümaa jee talateechi nia namaa naʼwaajapa nia. ¿Aashin talatüin waaʼin süka weʼreenain na wapüshi outuinnapakana? Wanaa sümaa neʼrüijaain wayumüin Satanaa, Adán otta Eva, nütüjaa aaʼu Jeʼwaa mojeerüin maʼin sukuwaʼipa mmapaʼakat süpülapünaa najaʼttirüin tü kasa mojusükat. Nülerajüin Jeʼwaa tü mojulawaakat, tü kasa mojusü aainjünakat sümüin wayuu jee tü eʼraakat wayumüin. w21.07 10 püt. 11,12

Waaʼinrüle tia, kojutusü wamüin taashin waya sünainjee outuin Jesuu saaʼu waainjala, süka jamüin, nnojoluin naapajiraain neʼe nikii Jesuu waaʼu wayakana, aapajiraashiaʼaya nia nikii naaʼu na wawalayuukana. Outushi Jesuu naaʼu na wawalayuukana süka alin maʼin naya nüpüla (1 Juan 3:16-18). Aire wapüla na wawalayuukana aaʼinrüinjana waya kasa anasü napüleerua (Éf. 4:29, 31–5:2). Wakaalinjainjana naya wanaa sümaa ayuulin naya jee wanaa sümaa neʼrüin müliaa maʼaka saaʼin sukutkujaale mma jee sülatüle wawai. ¿Kasache waaʼinrajatka airuʼurule nünüiki wamüin wanee wawala? ¿Eesüche üttakuʼu sümüle waaʼin nünain wanee wawala aikai anüiki wamüin? (Lev. 19:18). Sülatüle wamüin tia, anasü waaʼinrüle tüü: «Jaaʼinra tü anasükat shiʼipajee eekai shiʼrülüin wayumüin jümüin, sümaa motüin jaaʼin saainjala maa aka naaʼin chi Senyotkai motüin naaʼin jaainjala» (Col. 3:13). Motule waaʼin naainjala wanee wawala, weeʼiyatüin sukuwaʼipa nümüin chi Washikai Jeʼwaa kojutuin wamüin taashin waya nutuma Jesuu. w21.04 18 püt. 12, 13

Eesü süpüla waʼyataain maʼin nümüin Jeʼwaa otta wakaalinjain na wayuukana süpüla woutiisain naya. Wountuin tia sutuma nükaalinjain waya Jeʼwaa. Otta wanee kasa watüjaka sünainjee nukuwaʼipa Apolos otta Pablo shia wachajaainjatüin sukuwaʼipa süpüla anajiraainjanain waya namaa na wawalayuukana, shialeekajaʼa weʼraajünüle maʼin sutuma wainmain waʼyataain suluʼu nupueulose Jeʼwaa. Naaʼinrüin tia na laülaashiikana otta na aʼyataakana neʼipajee wanaa sümaa nekirajüin waya wanaapünaa sümaa tü sümakat tü Bibliakat otta wanaa sümaa kapülain naaʼin nukuwaʼipa Kürisüto suulia nakuwaʼipa. ¿Aashin talatüin maʼin waya namaa süka nakaalinjain waya? (1 Cor. 4:6, 7, TNM). Eesü tü kasa watüjakat nutuma Maleiwa waneʼewai wakua. «Nnojotsü kasain taaʼinrüin süpüla paaʼinwajiraain na wawalayuukana», nnojotsü anain müle wanüiki. Tü waaʼinrakat süpüla paaʼinwajiraain waya müsü aka saaʼin soʼuchein wanee eʼinuushi süpüla eeinjatüin wanee kattoʼui. Waʼyataa maʼin süchiirua süpüla nnojoluinjatüin eein suluʼu waaʼin wanee akuwaʼipaa eeka süpüla wayoujireʼerüin atuma wakuwaʼipa. Waaʼinrüle tü wekirajaaitpakalü anain anajiraajeena waya jee paaʼinwajiraajeena waya namaa na wawalayuukana (Éf. 4:3). w21.07 19 püt. 18, 19

Eesü süpüla paʼatapajüin nasoʼireʼennüin aaʼin na püpüshi outuinnapakana. ¿Kasa watüjaka sünainjee niʼyalajüin Jesuu soʼu sümülialaain naaʼin naalin na naʼaleewainyuukana? Shia keeʼireein naaʼin nüsoʼireʼerüin naaʼin na outushiikana (Juan 11:35). Eeshi süpüla pümüliajüin na anaajaakana apüshi. Nnojoishi neʼe aʼyalajüin Jesuu sümaa Marta ooʼulaka María, naapajüinya nanüiki otta natütüleʼerüin naaʼin (Juan 11:25-27). Eesü süpüla waaʼinrüin tia napüleerua na anaajaakana apüshi. Anuu nünüiki Dan wanee laülaashi kepiakai chaa Australia: «Sünaajaapa taʼwayuuse choʼujaashi takaalinjünüin. Eeshii waneinnua wawalayuu sümaa naʼwayuuse aapajakana tanüiki jaʼitasü kaʼlein aikat naaʼu. Nnojoishii asoutuin pejeewa otta nnojotsü mojushiin namüin taʼyalajüin. Shiasaʼa nnojotpa taaʼin sünain aaʼinraa kasa, nakaalinjain taya sünain waneirua kasa, maʼaka saaʼin noʼlojuin teʼejena, ayaʼlajüshii kasa tamüin suluʼu oikaalee otta aʼlakajaashii naya tayaalu. Oʼuraajawaishii naya tamaa waneepia, shiimainjaʼa taʼaleewainyuuin naya jee tawalayuuin süka nakaalinjain taya soʼunnaa müliaa» (Prov. 17:17). w22.01 16 püt. 8, 9

Niʼreein waya Jehová suluʼu anain wakuwaʼipa (Prov. 4:20-22). Wayaawata aaʼu alin waya nüpüla Maleiwa wanaa sümaa nüchiaain waya sükajee wanee pütchi waashajeʼeraka suluʼujee tü Bibliakat jee shiale tü karaloʼuta saapakat wamüin nupueulose. Eeshi nüchiaale waya nükajee wanee wawala laülaakai aaʼin sünain anoujaa (Heb. 12:9, 10). Jülüjainjatü waaʼin tü kasa anasü münakat wamüin suulialeʼeya sukuwaʼipa nanüiki wamüin. Eesüjaʼa mojushiire wamüin wachiaanapa nutuma wanee wayuu nnojorüle anain maʼin sukuwaʼipa nünüiki wamüin. Nüchajaainjatü sukuwaʼipa wanee wayuu süpüla nütüjainjachin süpüleerua nünüiki nüchiaapa wanee wayuu (Gal. 6:1). Wayalejeʼe achiaanüin jülüjainjatü waaʼin tü kasa anasü münakat wamüin, nnojotsü jülüjainjatüin waaʼin sukuwaʼipa nanüiki. Mayaainjeʼe nnojoluin anain maʼin sukuwaʼipa nünüiki wanee wayuu achiaakai waya, anasü jülüjale waaʼin pütchikat tüü: «¿Pansaasüche tü nümakat tamüin? ¿Jalouijeetche tamüin taapaale amaa tü nümakat tamüin sümaa nnojoluin jülüjain taaʼin tü mojukat nutuma?». Wachajaa maʼin sukuwaʼipa süpüla waapaain amaa tü achiaanakalü oulia waya. w22.02 12 püt. 13, 14

Nütüjaa aaʼu Jehová kapüleein wasünneʼeramaatüin tü kasa mojusü jülüjakat waaʼin otta tü akuwaʼipaa nnojotkalü anain (Sal. 103:13, 14). Naapapejeʼe wamüin kekiwaa, nükatchinrüin waaʼin jee nütütüleʼerüin waaʼin sükajee tü Nünüikikat, tü nüpülainkat otta tü nupueulosekat. Piyaawata saaʼu tü jülüjakat paaʼin sükajee tü sümakat tü Bibliakat. Tü Nünüikikat Maleiwa müsü aka saaʼin rouya, eesü süpüla müin piirakaakai saaʼin sümüin tü jülüjakat paaʼin, tü pünüikipalakat otta tü pukuwaʼipakat (Sant. 1:22-25). Eemaateechi Jehová süpüla nükaalinjain pia. Nnojoishi eein wanee anaʼleekai nuulia süpüla akaalinjaa pia, jama nütüjaain saaʼu tü suluʼukat paaʼin (Prov. 14:10; 15:11). Müsüjeseʼe anain maʼin puʼuraajawaire jee pikirajaʼawaire sünain tü Bibliakat. Piyaawata saaʼu anain maʼin tü nümakat Jehová. Süpüshuaʼa tü nümakat Jehová süpülajatü anain wakuwaʼipa. Na kojutukana amüin tü nümakat, anasü naaʼin otta talatüsü naaʼin (Sal. 19:8-11). w22.03 4 püt. 8-10

Waʼwaajüin Jehová sükajee wakumajüin piichi aʼwaajülee otta waaʼinmajüin shia. Wanaa sümaa sukumajünüin tü piichi aʼwaajülee eejatkat nükalioʼu Moisés otta tü kasairua eekat sümaa, shia wanee sukuwaʼipa nuʼwaajünapuʼuka aka Maleiwa saashin tü Bibliakat (Éx. 36:1, 4). Maaʼulu yaa, waʼwaajüin Maleiwa sükajee wakumajüin Piichi Outkajaalee otta müsia waneirua piichi akumajünaka eeinjachire nuʼwaajünüin. Eeshii wawalayuu aʼyataakana maʼin sünain tia. Anasü maʼin tü naaʼinrakat süpüleerua nupueulose Maleiwa. Otta müsia, aʼyataashii naya wawalayuukana sünain aküjaa pütchi. Eeshiijaʼa noʼutku nayakana pürekutsooleekana. Atüjaaneerü aaʼu kojutuin namüin na laülaashiikana tü naʼyataainkat naya wawalayuukana, nooʼulaale pürekutsooliin naya kettaale natuma tü achuntunakat nümüin chi eekai pürekutsooleein. Jaʼitainna atüjain waya jee matüjainre waya akumajaa piichi, eeshii süpüla wakaalinjain sünain epitajaa jee aaʼinmajaa tü Piichi Outkajaaleekat. w22.03 22 püt. 11, 12