Maatsoʼu

«Tü anneetkalüirua» naashajaaka achiki Jesuu suluʼu Mateo 25:31-36, naya na wayuu anamia kepiainjanakana waneepia yaa saaʼu mmakat. Kepiashii naya soʼu sükalia sajaʼttajatka oʼu kasakat süpüshuaʼa. Waneepiashii naya namaa na nuwalayuukana Kürisüto, nakaalinjain naya sünain aküjaa pütchi jee ekirajaa wayuu sainküinpünaa mmakat (Mat. 24:14; 28:19, 20). Sünain tü Outkajawaakat eere Sotuin Waaʼin Outuin Jesuu, akaalinjünüshii juyawai na nuwalayuukana Kürisüto natuma na yaainjanakana mmapaʼa. Nakaalinjain naya sünain ounejawaa wayuu sainküin mmaka süpüshuaʼa süpüla nantajanain sünain tia outkajawaakat. Naaʼinrüin tia süpülapünaa süntüin sükalia tia outkajawaakat. Sainküin mmakat süpüshuaʼa, nachajaain maʼin sukuwaʼipa na wawalayuukana süpüla naainjain tü Outkajawaakat eere Sotuin Waaʼin Outuin Jesuu. Talatüshii maʼin na yaainjanakana mmapaʼa süka eein süpüla nakaalinjain na nuwalayuukana Kürisüto, natüjaa aaʼu müin nakaalinjakai naaʼin Jesuu (Mat. 25:37-40). w22.01 22 püt. 11, 12

Washatüin nukuwaʼipa Jeʼwaa müleka washatüle nukuwaʼipa Jesuu. Jamüshijaʼa Jesuu nümüliajüin na wayuukana. Nümüliajüin wanee wayuu ajaʼttaa atachi, amülialaasü naaʼin saalin wanee jiet kakaliairü ayuulin jee amülialaasü naaʼin naalin na wayuu anaajaakana apüshi (Mar. 1:40, 41; 5:25-34; Juan 11:33-35). Wachajaale maʼin sukuwaʼipa süpüla washatüin nukuwaʼipa Jeʼwaa arütkaajeena waya nünainmüin. Woushikajaale süchiirua nukuwaʼipa Jesuu, waaʼinmaajeerü tü waʼyataainkat nümüin Maleiwa suulia wanee kasa eekai naatain. Anuu nünüiki Jesuu wanee ai süpülapünaa nuʼutunüin aaʼin: «Anakaja jooluʼu talatüle jaaʼin süka tayamülüichipain chi aluwataashikai naaʼu na manoujainsaliikana» (Juan 16:33). Tü nüküjeekalü achiki Jesuu yaʼayaa shia nnojoluin nüshatüin nakuwaʼipa na manoujainsaliikana, maʼaka saaʼin tü keeʼireekat naaʼin, tü jülüjakat naaʼin otta tü kasa naaʼinrakat. Jülüjasü maʼin naaʼin Jesuu kasapülajachin nüntaka yaamüin saaʼu tü mmakat, antüshi nia süpüla kojutuinjatüin nünülia Jeʼwaa atumawaa. Watta saalii tü kasa eekat süpüla nnojoluin jülüjain atuma waaʼin tü waʼyataainkat nümüin Maleiwa. Jülüjale waaʼin tü kasa nüchekakat Jeʼwaa wapüleerua maʼaka naaʼinrüin shia Jesuu, wayamüleerü tü kasa mojusü keejiakat sümüin tü manoujainsatkalüirua (1 Juan 5:5). w21.04 3 püt. 7, 8

Nütüjaa aaʼu chi aluwataaushikai Pablo tü nümakat Jesuu sünain kateerüin soʼu wayuu süpüshuaʼa, na eʼitaakana naaʼin nünain (Juan 3:16; Roma 6:23). Wayaawata aaʼu sünainjee tia kojutuin nümüin Pablo outuin Jesuu naaʼu. Otta nütüjaa aaʼu Pablo motuin naaʼin Jeʼwaa saainjala wayuu müleka shiyaawajaale suulia saainjala, jaʼitairü mojuin maʼin tü naaʼinrakat (Sal. 86:5). Niyaawata aaʼu Pablo alin nia nüpüla Maleiwa saaʼujee nuluwataain Jesuu süpüla outuin naaʼu. Jülüjataa waaʼin tü pütchi anasü nümakat Pablo sajaʼlajaayamüin tü sümakat Galacia 2:20, TNM. Anuu nünüiki: «Shiimain sünain katüin toʼu süka tanoujain nünain chi Nüchonkai Maleiwa, süka alin taya nüpüla otta naapajiraain nikii taaʼu». Mayaainjeʼe nnojoluin lotuin maʼin nukuwaʼipa Pablo, nnojotsü jülüjain naaʼin maalin nia nüpüla Maleiwa. «Aishii nüpüla Maleiwa na anoujashiikana, aluʼusaʼa tayakai, maalinsai taya nüpüla», nnojoishi müin Pablo. Anuu nünüiki Pablo namüin na anoujashii chejeʼewaliikana Roma: «Je mayaainje kaainjaraliin waya, ouktüshia neʼe nia [Kürisüto] waneepia waaʼujee» (Roma 5:8). Aishiyaʼaya waya wapüshuaʼa nüpüla Maleiwa. Nütüjaa aaʼu Pablo nnojoluin kasain asütajatüin waalii nüpüla Maleiwa. Nütüjaa aaʼu Pablo nnojoluin nukulajaain aaʼin Jeʼwaa namaa na israeliitakana sümaiwa. w21.04 22 püt. 8-10

Wekirajapa wanee wayuu sünain tü Bibliakat wakaalinjainjachi süpüla alin Jeʼwaa nüpüla. Waashajaa nümaa süchiki nukuwaʼipa Jeʼwaa. Waküja nümüin niain Jeʼwaa wanee Maleiwa talatakai aaʼin jee waneepiain nia namaa na aikana apüla nia (1 Tim. 1:11, TNM; Heb. 11:6). Waküja nümüin tü kasa anasü niʼreetkat sünainjee naaʼinrüin tü nikirajaakalü anain jee waküja nümüin nuchuntuin Jeʼwaa tia süka alin nia nüpüla (Is. 48:17, 18). Kooʼomüinre naalin Jeʼwaa nüpüla keeʼireejeerü naaʼin nunouteʼerüin nukuwaʼipa. Süpüla woutiisain wanee wekirajüin eesü waneirua kasa nuuʼulaainjatka naaʼinrüin. Eeshii waneinnua wayuu ekirajaashii ooʼulaainjanakana suulia kachiiruain naaʼin washirüü. Eeshii na ooʼulaakana suulia aleewaa namaa na wayuu nnojoliikana alin apüla Jeʼwaa otta eeshii na jashichikana apüshi namüin saalinjee namaain na aküjaliikana pütchi nüchiki Jeʼwaa. Nüküjain Jesuu eʼreenain kasa anasü na aʼyataashiikana nümüin Jeʼwaa jee wainmeenain na meenakana aka saaʼin napüshi namüin (Mar. 10:29, 30). w21.06 4 püt. 8, 9

Tü aküjaakat pütchi jee tü ekirajaakat wayuu müsü aka saaʼin apünajaa waüyee naashin Pablo. Choʼujaasü waaʼinmajüinjatüin shia. Anuu nünüiki Pablo namüin na corintojeʼewaliikana: «Tayakai, süka taküjüin paala nüchiki chi Oʼtteʼerüikai jümüin, müshi aka naaʼin chi apünajakai. Otta Apolos, süka nikirajüin jia tachikiruʼu, müshi aka naaʼin chi oʼyonüikai wüin». Chi Maleiwakai nia chi miyoʼukai atuma tü apünajuushikat (1 Cor. 3:6-9). Aʼyataajiraashii waya nümaa Maleiwa. Müsü wapünajakai saaʼin tü waüyekat wanaa sümaa waküjain pütchi otta müsü woʼyonokoi saaʼin wüin saaʼu wanaa sümaa wekirajüin wayuu. Watüjaapejeʼe saaʼu niain Jeʼwaa chi anakai atuma nanoula. Kojutushaatasü maʼin wamüin waküjain pütchi jee wekirajüin wayuu. Talatüsü waaʼin sutuma tia aʼyatawaakat. Wainma wayuu nükaalinjaka Pablo jee nikirajüin naya süpüla nanoujainjanain. Talatüsü naaʼin Pablo naapapa süchiki anain nanoula na anoujashii chejeʼewaliikana Tesalónica (1 Tes. 2:19, 20; Aluw. 17:1-4). w21.07 3 püt. 5; 7 püt. 17

Nürütkeʼerüin waya Jeʼwaa nünainmüin (Juan 6:44). Saʼakajee tü wayuukalüirua sainküin mmakat, niʼrüin suluʼu waaʼin eein süpüla alin nia wapüla (1 Crón. 28:9). Niʼraajüin Jeʼwaa wakuwaʼipa otta aishii waya nüpüla. ¿Aashin talatüin waaʼin sutuma tia? Aishi maʼin pia nüpüla Jeʼwaa otta aishii nüpüla na wawalayuukana. Süpüla wayaawatüin saaʼu alin waya nüpüla Jeʼwaa, jülüja waaʼin tü nümakat Jesuu nüchiki wanee wayuu arüleejüi, müshi nia: «Wane wayuu jaʼaka, müleka kamüʼünüinre nia poloo shikii anneerü je machikitaarüle waneesia sünainjee, nüpüteerü tü süpüshikat, tü mekietsatkat shikii mekietsalümüin, chaa saaʼu tü namünakat süpüla oʼunaa sünain achajawaa süchiki tü machikisatkat. Shiimüin tü tamakat jümüin: Nüntapa chi wayuukai sünain, talataleejeeria maʼi naaʼin sümaa». Tü watüjakat sünainjee tü nümakat Jesuu shia alin nüpüla Jeʼwaa waneʼewai nakua na wawalayuukana. Anuu nünüiki Jesuu nüchiki chi Nüshikai: «Nnojotsü nücheküin süpüleerua maaʼawain nuulia waneesükaijeʼe tü anoujasükalüirua tanain, na makana saaʼin tepichi» (Mat. 18:12-14). w21.06 20 püt. 1, 2

Jülüjale maʼin waaʼin alin waya nüpüla Jeʼwaa, kooʼomüinrajeerü tü naalinkat wapüla otta aleeweena maʼin waya nümaa (Roma 8:38, 39). Sütütüleʼerüin waaʼin süpüla washatüin nukuwaʼipa Jesuu (1 Ped. 2:21). Süpülapünaa süntüin sükalia tü Outkajawaakat eere Sotuin Waaʼin Outuin Jesuu, anasü waashajeʼerüle suluʼujee tü Bibliakat tü alatakat wanee semaana süpülapünaa nuʼutunüin aaʼin Jesuu jee nüsoʼireʼennüin naaʼin. Soʼunnaa tia outkajawaakat, waapajüin tü pütchi wayaawatakalü atuma alin maʼin waya nüpüla Jesuu (Éf. 5:2; 1 Juan 3:16). Waashajeʼerüle süchiki tü naaʼinrakat Jesuu sümaa wasakireʼerüin waaʼin sünain, keeʼireejeerü waaʼin washatüin nukuwaʼipa (1 Juan 2:6). Waaʼinreerü kasa nüpüleerua Maleiwa süpüla ayatüinjanain waya alin nüpüla (Jud. 20, 21). Wachajaale maʼin sukuwaʼipa süpüla woonooin nümaa, kojutuin watuma nünülia jee talatüin nia watuma, ayateena waya alin nüpüla (Prov. 27:11; Mat. 6:9; 1 Juan 5:3). Wanaa sümaa woʼunuin sünain tü Outkajawaakat eere Sotuin Waaʼin Outuin Jesuu müshi wamakai aaʼin nümüin Jeʼwaa: «Aleeweeshi maʼin taya pümaa waneepia». w22.01 23 püt. 17-19

Nuuʼulaain waya Jeʼwaa waneeküin tü waaʼinreekalü amüin. Eesü süpüla waneeküin wamüiwaʼa tü wakuwaʼipainjatkat. Talatüsü naaʼin Maleiwa waneeküle süka waaʼin wamüiwaʼa waʼyataain nümüin (Sal. 84:11; Prov. 27:11). Eesü waneirua kasa anaka süpüla waneeküin süka waaʼin wamüiwaʼa. Eesü süpüla waneeküin kapülain waaʼin nakuwaʼipa na waneinnua maʼaka naaʼinrüin shia Jesuu. Soʼu wanee kaʼi, mapüsashi maʼin Jesuu otta na nikirajüinkana. Noʼunaka eemüin yüütüülin tü mmakat süpüla neemeraainjanain, nnojoliipejeʼe naya eemeraain süka wainmain wayuu eejanakana napüla ekirajüneeka. Mayaainjeʼe mapüsain maʼin Jesuu, nnojoishi nia jashichin namüin, nümüliajüin naya. Müshijeseʼe nikirajüin naya «sünain kasa wainma» (Mar. 6:30-34). Wanaa sümaa waaʼinrüin tü naaʼinrakat Jesuu süpüla wakaalinjain na waneinnua, kojuteechi watuma chi Washi iipünaajachikai (Mat. 5:14-16). w21.08 3 püt. 7, 8

Naatawaisü sukuwaʼipa tü kasa nukumalakat Jeʼwaa jee naatawaisü sukuwaʼipa wayuu nutuma. Müsüjeseʼe wayaawatüin saaʼu kamalain nümüin naatawalin sukuwaʼipa kasa. Nnojotsüjeseʼe niyoujireʼerüin wakuwaʼipa Jeʼwaa namaa na waneinnua, shia jülüjaka naaʼin tü suluʼukat waaʼin (1 Sam. 16:7). Nütüjaa aaʼu Jeʼwaa tü mapüleekat wamüin, tü kapüleekat wamüin otta tü sukuwaʼipakat wepijia. Nnojotsü nuchuntuin wamüin wanee kasa eekai isain wachiki. Anasü washatüle nukuwaʼipa otta talatüle waya sümaa tü kasa waaʼinrakat. Waaʼinrüle tia pansaajeerü tü jülüjakat waaʼin wachikijiraa, nnojoleerü jülüjain waaʼin analeein wakuwaʼipa noulia na waneinnua jee nnojoleerü mojuin waaʼin sünainjee tü kasa anasü eekat nanain na waneinnua (Roma 12:3). Nnojotsü mojuin jülüjale waaʼin nukuwaʼipa wanee wawala eekai nütüjain süpüleerua aküjaa pütchi jee ekirajaa wayuu (Heb. 13:7). Eesia tü kasa watüjeetkat nünainjee (Filip. 3:17). Nnojotpejeʼe anain wayoujireʼerüle wakuwaʼipa süpüla watüjaain saaʼu nütüjale woulia jee watüjale nuulia. w21.07 20 püt. 1, 2

Eesü süpüla pükooʼomüinrüin punoula nünain Maleiwa pikirajaale süchiki sukuwaʼipa mürüt, tü wunuʼukalüirua jee tü jolotsükalüirua (Sal. 19:1). Pikirajaale maʼin süchiirua tia, kooʼomüinjeerü punoula nünain Jeʼwaa sünain niain chi Kakumalakai kasa süpüshuaʼa. Jülüja paaʼin tü akuwaʼipaa jaʼyakat naaʼu Maleiwa sünainjee tü kasa nukumalakat (Roma 1:20). Jülüjataa waaʼin nukuwaʼipa chi Kaʼikai, choʼujaasü naaʼayula wamüin. Ayuuijeenapejeʼe waya sutuma sülanaʼaleere tü naaʼayulakat. Süpüla nnojoliin ayuulin waya eesü wanee kasa müsü aka saaʼin wanee kuluulu arülasü wayaataka iipünaa suulia sülanaain süpüshuaʼa naaʼayula chi Kaʼikai, ozono münüsü tia. Sünainjee tia, wayaawata aaʼu kekiin maʼin chi Kakumalakai shia sümaa aipüralin maʼin nia wayuu. w21.08 17 püt. 9, 10

Süchikijee woutiisain naya, ayatüinjana alin naya wapüla jee kojutuinjana naya wamüin (1 Juan 4:20). Jamüshiijaʼa waya, nnojoliinjana walirajamaatüin naya naainjale wanee kasa nnojotka anain saaʼin wamüin. Shia anaka aluʼu kojutule naya wamüin jee nnojorüle yaletüin wakuwaʼipa noʼupala (Roma 12:10; Filip. 2:3). Jaʼyainjatü waaʼu wamülialaain aaʼin jee kamaneein waya sümüin wayuu süpüshuaʼa. Müleka naʼakeere waya na nüpüshikana Jeʼwaa, waaʼinrüinjatü tü sümakat tü Bibliakat. Jamüshijaʼa Jesuu, nüküjain wamüliajüliinjanain jee kamaneeinjanain waya sümüin wayuu süpüshuaʼa, jaʼitakajeʼe namüin na waʼünüükana (Luc. 6:32-36). Eepejeʼe süpüla kapüleein wamüin waaʼinrüin tia. Müsüjeseʼe choʼujaain washatüinjatüin nukuwaʼipa Jesuu. Wanaa sümaa wachajaain sukuwaʼipa süpüla woonooin sümaa nünüiki Jeʼwaa jee washatüin nukuwaʼipa Jesuu, jaʼyasü waaʼu naʼakeein waya na nüpüshikana Jeʼwaa. w21.08 6 püt. 14, 15

Weʼitaa waaʼin nünain Jeʼwaa. Wainmeerü tü kasa anasü naapeetkat wamüin weʼitaale waaʼin nünain jee waʼyataale nümüin süka süpüshuaʼa waaʼin. Aküjünüsü suluʼu tü Bibliakat nachiki waneinnua wayuu aʼyataakana maʼin nümüin Jeʼwaa. Naʼakajee naya wayuukana, eeshii na aaʼinrakana waneirua kasa palajana süpüla naapüin Jeʼwaa naʼanasia namüin. Jamüshijaʼa Abraham, eʼrüshi nia kasa anasü nutuma Jeʼwaa süchikijee nujuʼituin nipialuʼujee suluʼumüin wanee mma «mayaasüje nnojolüin nütüjaain saaʼu [...] jalainjachin noʼotüin» (Heb. 11:8). Akaʼaya Jacob, naapüin Jeʼwaa naʼanasia nümüin süchikijee naapiraain nümaa chi aapiee nümaʼanajeejachikai Jeʼwaa (Gén. 32:24-30). Jee müshiʼiya na israeliitakana, ekerotushii suluʼumüin tü Mma Aapünajatkat namüin nutuma Maleiwa süchikijee nacholetüin na sacerdootekana shiroku tü süchikat Jordán wanaa sümaa süsetüin (Jos. 3:14-16). Eesü tü kasa watüjakat nanainjee na wawalayuu eʼitaakana naaʼin nünain Jeʼwaa maaʼulu sümaa nakooʼomüinrüin naʼyataain nümüin. w21.08 28 püt. 12-14

Sutuma kakaliainnain jia wawalayuu laülaainnakana sünain aʼyatawaa nümüin Maleiwa, jütüjaa aaʼu jamapuʼuin sukuwaʼipa saainjia wanee kasa paala, jüüjüüpejeʼe jia sümüin tü aʼwanajaaitpakat. Jekenale jia woutiisain, eesü süpüla jüküjain namüin na waneinnua jamüin talataka jaaʼin sutuma jiʼraajüin nukuwaʼipa Jeʼwaa. Kamalainjeerü namüin na wawalayuu joʼuuyuukana juulia naapajüin süchiki tü kasa jülatüitpakalü achikumüin jee tü jütüjakalü apüleerua. Jikirajawaire na waneinnua, anakuwaʼipaleena jia nutuma Jeʼwaa (Luc. 6:38). Aleewajiraale na wawalayuu laülaayuukana namaa na jimaʼaliikana jee na majayünnüükana, akaalinjiraajeena naya (Roma 1:12). Kekiishii maʼin na wawalayuu laülaayuukana jee wainma kasa natüjaka apüleerua süka nalatüinnapain süchikumüin wainma kasa. Eekajasaʼa na jimaʼaliikana jee na majayünnüükana, katchinshii naya. Wanaa sümaa naʼaleewajiraain jee naʼyataajiraain na jimaʼaliikana jee na majayünnüükana namaa na wawalayuu laülaayuukana, kojutushi chi Washi iipünaajachikai natuma jee talatüsü naaʼin napüshuaʼa na wawalayuukana namaa. w21.09 8 püt. 3; 13 püt. 17, 18

«Müleka niale Jesuu chi Mesíaskai, ¿jamakaʼa nükatchennaka sünain wanee wunuʼu maʼaka naaʼin wanee kaʼruwarai?», müshii naya suluʼu naaʼin. Mojushiikalaka tia namüin (Deut. 21:22, 23). Na judío ayoutajaakana nümaa Jesuu, nnojotsü kasain naaʼinrüin süpüla natüjaain saaʼu müleka shiimainre maainjalain Jesuu otta alawaale tü aküjünakat nüchiki. Wanaa sümaa noutkajaain na sülaülakana Sanedrín, alatüshii sooʼopünaa tü kasa aainjünajatkat süpüla kasalajanain naainjala wanee wayuu (Luc. 22:54; Juan 18:24). Na laülaashiikana nnojotsü kachipünaain naaʼin anain nukuwaʼipa Jesuu, jama noʼuteein maʼin naaʼin. Nachajaa achikit wayuu süpüla süküjainjatüin alawaa nüchiki Jesuu (Mat. 26:59; Mar. 14:55-64). Shiasaʼa süchikijee nüsoʼiraain aaʼin Jesuu, awalaajünüshii süka wainma nneerü na surulaatkana natuma na laülaayuu judíokana shiiʼiree naküjain nuʼluwajünüin müliashii natuma na nikirajüinkana Jesuu (Mat. 28:11-15). w21.05 11 püt. 12, 13

Nücheküle Jeʼwaa eesü süpüla najaʼlajeʼerüin tü kasa mojusükat uatuwoʼushi, nnojotpejeʼe naaʼinrüin tia. Wainma kasa anasü weʼraka sünainjee tia. Süka nuuʼuliwoʼuin waya Adán sümaa Eva joʼuushii waya sümaa nnojoluin lotuin wakuwaʼipa. Aipejeʼe waya nüpüla Jeʼwaa jee naaʼinmajüin waya otta naapüin nünüiki wamüin sünain najaʼttirajatüin tü kasa mojusükat (1 Juan 4:19). Nüneeküitpa Jeʼwaa tü kaʼi najaʼttirüinjatkalü oʼu tü müliaa neʼrakat na nüchonniikana. ¿Aashin wachecherüin waaʼin soʼunnaa müliaa süka aipüralin Jeʼwaa? Nia Jeʼwaa chi atüjakai maʼin achecheraa naaʼin. Akaʼaya Jesuu, nüshatüin tia nüchiirua. Wanaa sümaa yaajachin Jesuu mmapaʼa nüchecherüin naaʼin soʼunnaa airuʼuluin pütchi nümüin, meeʼerapalain nia jee nükachennüin sünain wanee wunuʼu süpüla nuʼutunajachin aaʼin (Heb. 12:2, 3, TNM). Nüchecherüin naaʼin Jesuu soʼunnaa tü müliaa niʼrakat süka niʼrüin nukuwaʼipa chi Nüshikai. Akaʼaya wayakana, achecheraajeerü waaʼin sutuma weʼrüin nukuwaʼipa Jeʼwaa. w21.07 12 püt. 15-17

Motowaisü naaʼin chi Washi iipünaajachikai waainjala (Sal. 103:10-14). Shiaʼaya naaʼinrakat tia Jesuu, motusü naaʼin tü kasa mojusü naaʼinrakat na nikirajüinkana jee nümüliajüin naya. Naapüin nikii waaʼu süpüla motuin naaʼin Jeʼwaa waainjala (1 Juan 2:1, 2). Motule waaʼin naainjala na wawalayuukana, aijiraajeena maʼin waya (Éf. 4:32). Eesü kapüleere wamüin motuin waaʼin naainjala na waneinnua, wachajaainjatpejeʼe sukuwaʼipa süpüla waaʼinrüin tia. Saashajeʼerapa wanee wawala wanee pütchi suluʼujee Aapiria Wayuu shiyaawata aaʼu tü saaʼinrajatkat süpüla motuin saaʼin saainjala wayuu, shia tü pütchi makat «Perdónense liberalmente unos a otros». Anuu sünüiki: «Saashin tia pütchikat, motule waaʼin tü aainjünakat wamüin nnojotsü maluʼuluin nnojoluin mojuin tia wamüin jee nnojoluin alin shia wamüin. Tü waaʼinrajatkat shia nnojoluinjatüin üttakuʼu müin waaʼin nünain chi wayuu aainjakai kasa mojusü wamüin, aneetkalaka waaʼin waaʼinrüle tia». Motopa waaʼin naainjala na wawalayuukana, aijiraashii maʼin waya otta washatüin nukuwaʼipa chi Washikai Jeʼwaa. w21.09 23 püt. 15, 16

Kojutusü nümüin Jesuu tü shiimain nüchikikat Maleiwa otta tü keeʼireekat naaʼin Maleiwa süpüleerua wayuu. Pansaasü nukuwaʼipa sümaa jee nikirajüin wayuu süchiki (Juan 18:37). Müshiʼiya na oushikajaakana süchiirua nukuwaʼipa, kojutusü maʼin namüin tü shiimain nüchikikat Maleiwa (Juan 4:23). «Tü wopu nümaʼanajeejatkat Maleiwa», nümüsü amüin Pedro tü nanoujakalü anain na anoujashii namaiwajanakana (2 Ped. 2:2, TNM). Sutuma kojutuin namüin naya anoujashiikana tü shiimain nüchikikat Maleiwa, nayoutuin tü nekirajakalü anain na anoujayaashiikana. Nayoutuin sukuwaʼipapala wayuu nnojotka pansaain sümaa tü nümakat Maleiwa otta tü shikirajakat wayuu süleʼeruʼujeejatü neʼe (Col. 2:8). Müshiʼiya na anoujashii shiimainshiikana maaʼulu, nachajaain maʼin sukuwaʼipa süpüla pansaain nakuwaʼipa sümaa tü nuchuntakat Maleiwa (3 Juan 3, 4). Naaʼinrüin tia wanaa sümaa nachajaain maʼin sukuwaʼipa süpüla pansaain tü nanoujakalü anain otta tü nakuwaʼipakat wanaapünaa sümaa tü nümakat Maleiwa suluʼu tü Nünüikikat. Nayaawata aaʼu na aküjaliikana pütchi nüchiki Jeʼwaa eein süpüla noʼtchejaain sümaa wanee pütchi shikirajaka anain tü Bibliakat jee shiale tü aaʼinnajatkat süpüla suʼuninnüin nakuwaʼipa na wawalayuukana. Nayaawatapa saaʼu nnojoluin pansaain wanee kasa nanouteʼerüin shia. w21.10 21 püt. 11, 12

Sümaiwa paala kasepüsü atumawaa tü pueulokot suulia sushutünüin aaʼu sutuma süʼünüü. Tü naaʼinrakat Jeʼwaa süka miyoʼuin waalin nüpüla, müsü aka saaʼin tü süsepükat tia pueulokot süka naaʼinmajüin waya suulia sümalajaain wanoula. Süka miyoʼuin waalin nüpüla Jeʼwaa, nürütkeʼerüin waya nünainmüin (Jer. 31:3). Eesü wane kasaya nuʼwanaajireʼeraka aka David tü naaʼinrakat Jeʼwaa süpüla naaʼinmajüin nupueulose. Anuu nünüiki: «Müshi aka saaʼin pia tamüin wanee piichi miyoʼu, pia chi Maleiwa miyoʼukai aalin apüla taya». Anuu wane nünüikiya: «Nia chi Miyoʼukai aalin apüla taya otta chi akaalinjakai taya, müshi aka saaʼin nia tamüin wanee piichi miyoʼu jee taashikai atuma taya suulia kasa eekai eein, müshi aka saaʼin nia tamüin wanee taapüla tajapuluʼuka suulia jamajüin taya jee chi amüliajakai taya» (Sal. 59:17; 144:2). ¿Jamüsü nüküjaka David tia? Ayatüle waʼyataain nümüin Maleiwa, ayateena waya naaʼinmajüin süpüla anainjatüin wakuwaʼipa nümaa jaʼitashii jalain waya. w21.11 6 püt. 14, 15

Soʼu wanee kaʼi, anuwaluʼushi Jesuu namaa na nikirajüinkana. Süntakalaka wanee wawai nanainmüin. Sutuma tü alatakat namüin soʼu tia nükaalinjain naya Jesuu süpüla nayaawatüin saaʼu nakatsüinrüinjatüin nanoula (Mat. 8:23-26). Keemashaatasü tia wawaikat, ekerotusü wüin suluʼumüin tü anuwakat. Atunkashaatashi Jesuu sümaʼinruʼu tia, mmotshaatashii na nikirajüinkana. Nachijiraka Jesuu süpüla nükaalinjain naya. Nnojoishi mmoluin Jesuu jee nümaka namüin: «¿Jamüshii mmotkaʼa jia? ¿Jamüshii nnojoliikaʼa jünoujüin paala sünain toʼtteʼerüinjanain jia suulia tü wawaikat?». ¿Eeiria alatüin pümüin wanee kasa kapüleesü? Eesüjaʼa müliale paaʼin sukutkujaale mma jee süsetüle wüin, eeshijaʼa ayuuire pia sümaa nnojoluin pütüjaain saaʼu tü paaʼinrajatkat. Mayaainjeʼe eein süpüla shapaʼawalin paaʼin, ayataʼaya piʼitaain paaʼin nünain Jeʼwaa. Püküja nümüin jamüin paaʼin. Katchinjeerü punoula jülüjale paaʼin süpüshuaʼa tü kasa anasü naaʼinrakat Jeʼwaa püpüleerua (Sal. 77:11). Nnojoleechi nüpütüin pia Jeʼwaa pümüiwaʼa maaʼulu otta mapeena. w21.11 22 püt. 7, 10

«Nnojoishi taya aʼluwajüin, nnojotsü taapaain sukorolo wayuu», eeshijaʼa nümüle wanee wayuu. Jülüjainjatpejeʼe waaʼin wainmain sukuwaʼipa tü aʼluwajaakat. Jamüsüjaʼa choʼujaale saawain wanee kasa nutuma wanee oikaai, aʼluwajüshijaʼamata nia. Saashin Levítico 19:13 nnojorüle lotuin nukuwaʼipa wanee wayuu sünain oikawaa müshi nuʼluwajakai aaʼin. Anuu sünüiki tia wetsiikulokot: «Nnojo pimeejüin wanee wayuu». Makalaka wayaawatüin saaʼu müin nuʼluwajakai aaʼin wanee wayuu nnojorüle lotuin nukuwaʼipa sünain oikawaa. «Nnojo juʼluwajüin», müsü tü mekiisatkat pütchi saʼakajee tü Poloosü Pütchi Aapünakat nümüin Moisés. Sünainjee tü sümakat Levítico wayaawatüin saaʼu lotuinjatüin wakuwaʼipa suulia waʼluwajüin. Anasü jülüjale waaʼin tü nümakat Jeʼwaa süchiki tü aʼluwajaakat otta tü lotookalü akuwaʼipaa. Wasakireʼera waaʼin sünain tüü: «Sünainjee tü sümakat Levítico 19:11-13, ¿tanouteʼerüinjatche wanee kasa taaʼinraka sünain oikawaa jee sünain aʼyatawaa?». w21.12 9 püt. 6-8

Woʼuraajawaipa nümüin Jeʼwaa, jülüja waaʼin tü kasa mojusü waaʼinrakat jee wachunta nümüin motoiwa shia naaʼin. Müleka waainjale kasa eekai mojuin maʼin, anasiaʼaya wachuntüle kaalinwaa namüin na laülaashiikana. Naapajeerü wanüiki, naküjeerü wamüin tü anakat süpüla waaʼinrüin saashin tü Wiwüliakat jee achunteena naya nümüin Jeʼwaa süpüla motuin naaʼin waainjala sünainjee outuin Jesuu waaʼu (Sant. 5:14-16). Jülüja waaʼin taashin waya sünainjee outuin Jesuu saaʼu waainjala. Eesüjaʼa süpararüle waʼwüira wanaa sümaa jülüjain waaʼin tü alatakat nümüin chi Nüchonkai Maleiwa. Jülüjale maʼin waaʼin tü naaʼinrakat Jesuu wapüleerua, aijeechi maʼin nia wapüla otta aijeechi maʼin wapüla chi Nüshikai. Akooʼomüinraasü sujutu wamüin tü naaʼinrakat Jesuu wapüleerua woʼunule sünain tü Outkajawaakat eere Sotuin Waaʼin Outuin Jesuu jee wounejaale wainma wayuu. Kojutushaatasü wamüin tü aʼyatawaa naapakat Jeʼwaa sünain wekirajüinjatüin wayuu nüchiki chi Nüchonkai. w21.04 18 püt. 13-16

Jülüjataa waaʼin jamüin naaʼin Jesús wanaa sümaa niʼrüin na wattakana naalii wayuu antakana nünainmüin saaʼu wanee uuchi. Siraasü aikat naaʼu Jesús sünain oʼuraajaa soʼu tia, eeshijaʼa mapüsale nia sutuma tia. Mayaainjeʼe müin nukuwaʼipa, amülialaasü naaʼin niʼrapa na wattakana aalii wayuu maʼletsekana otta ayuuikana. Nnojoishii neʼe niiyajüin naya soʼu tia, nüküjainya namüin wanee pütchi anashaatasü maʼin atütüleʼeraka naaʼin (Luc. 6:12-20). Mayaainjeʼe nümüiwaʼaweein aaʼin Jesús soʼu wanee kaʼi ayatüsia nükaalinjain wayuu. Jülüjataa waaʼin tüü: mojushaatasü maʼin naaʼin Jesús sutuma naapüin süchiki nuʼutunüin aaʼin Juan chi Awoutisaajüikai. Anuu sünüiki tü Bibliakat süchiki tü naaʼinrakat: «Oʼotooshi nia namaa na nikirajüinkana suluʼu wane anua sünain noʼunüin sujuuna tü wayuukolüirua chamüin eemüinre yüütüülin mmakat» (Mat. 14:9-13). Nnojoitpajaʼa eein süpüla nümüiwaʼain Jesús süka eejatüin watta saalii wayuu aʼatapajaka nia (Mar. 6:31-33). Niyaawatüinjeseʼe saaʼu Jesús choʼujaain sükaalinjünüin tia wayuukalüirua sümaa sümüliajünüinjatüin saaʼin (Luc. 9:10, 11). w22.02 21 püt. 4, 6

¿Kasa waaʼinrajatka mojule wanüiki nümüin wanee wawala? Oʼuraajüinjana waya nümüin Jeʼwaa süpüla nükaalinjain waya sünain anajirawaa nümaa chi wawalakai. Anasü wasakireʼerüle waaʼin sünain tüü: «¿Kasa taaʼinrajatka süpüla nnojoluin yaletüin taaʼin wanaa sümaa takumajüin sukuwaʼipa wanee mojujirawaa nümaa wanee wawala? ¿Jameerü naaʼin Jeʼwaa otta Jesuu tayale aashajaain palajana süpüla takumajüin sukuwaʼipa wanee mojujirawaa?». Sutuma tü wayaawatakat sünainjee tia pütchikat, eeshii süpüla woonooin sümaa nünüiki Jesuu otta wachajaain sukuwaʼipa süpüla wakumajüin wanee mojujirawaa sümaa nnojoluin yaletüin waaʼin. Nnojoluinjatü yaletüin waaʼin wakumajapa sukuwaʼipa wanee mojujirawaa nümaa wanee wawala (Éf. 4:2, 3). Aashajaainjana waya nümaa süka anakalü akuwaʼipa süpüla anajiraain waya wachikuaʼa nümaa. Soto waaʼin shiain analeein maʼin anajiraale waya nümaa wanee wawala suulia watüjaain saaʼu jaralin kasirüin tü alatakat (1 Cor. 6:7, 8). w21.12 26 püt. 13-16

Mojusü naaʼin Jesuu süka nütüjaain saaʼu nayoutuin na judíokana tü pütchi süchikikat nukuwaʼipa Maleiwa sünain aluwatawaa. Sünainjee tia ajaʼttinnajatü Jerusalén otta püreesainjana waneinnua judío (Luc. 21:20-24). Wainma wayuu ayoutaka Jesuu maʼaka nüküjain shia paala. ¿Sücheküinche wayuu tü pütchi anasükat eere püküjain pütchi? ¿Shiyoutataapa shia? ¿Kasa pütüjaka sünainjee niʼyalajüin Jesuu süchiirua wayuu? Aisü wayuu nüpüla Jeʼwaa. Watüjaa aaʼu jülüjain naaʼin Jeʼwaa na wayuukana sünainjee niʼyalajüin Jesuu. «Nücheküin Maleiwa süpüleerua shiyaawajaainjatüin wayuu süpüshua suulia saainjala. Aʼatapajüshi nia süka nnojolüin nücheküin süpüleerua eeinjatüin wayuu eekai amüloulin» (2 Ped. 3:9). Jaʼyasü waaʼu alin wapüla wayuu wanaa sümaa wachajaain maʼin sukuwaʼipa süpüla sütanalüin saaʼin tü pütchi anasükat (Mat. 22:39). w22.01 16 püt. 10-12

Jülüjale waaʼin tü naaʼinrakat Jeʼwaa süpüleerua nupueulose otta wapüleerua wayakana waneʼewai wakua, katchinjeerü maʼin wanoula. Otta akooʼomüinraajeerü naalin Jeʼwaa wapüla. Tia shia tü kasa alanaʼaleekat sünain anain. Aire maʼin wapüla Jeʼwaa, oonoojeena waya sümaa tü nümakat, ooʼulaajeena waya kasa süpüleerua waʼyataainjanain nümüin otta wachechereerü waaʼin soʼunnaa suuʼulakünüin waaʼin (Mat. 22:37-39; 1 Cor. 13:4, 7; 1 Juan 5:3). Nnojotsü eein wanee kasa analeeka maʼin suulia aleewain waya nümaa Jeʼwaa (Sal. 63:1-8). Nnojo motuin waaʼin waʼwaajüin Jeʼwaa woʼuraajüle otta wekirajaale sümaa wasakireʼerüin waaʼin sünain. Wachajaa eere anashiin süpüla waashajaain nümaa Jeʼwaa maʼaka naaʼinrüin shia Jesuu. Nnojo waaʼinrüin kasa nnojoleetka jülüjain atuma waaʼin tü wekirajaakalü anain, wachunta kaalinwaa nümüin Jeʼwaa süpüla waaʼinmaainjatüin shia. Wajayatüle maʼin tü kaʼikat naapeerü Jeʼwaa wamüin kataa oʼuu waneepia suluʼu tü mma jeketkat (Mar. 4:24). w22.01 30 püt. 18-20

Tü waaʼinrakat sünainpünaasü tü jülüjakat waaʼin. Müsüjeseʼe nüküjain Jesús wayoutajatüin jülüjain waaʼin wanee kasa kaainjaleenaka atuma waya (Mat. 5:21, 22, 28; Mat. 5:29, TNM). Talateere watuma chi Washi iipünajachikai, anasü wasünneʼeramaatüle wanee kasa mojusü eekai jülüjain waaʼin. «Tü pütchi ojuittakat suluʼupünaa jaanükü, jüleʼeruʼujeejatü», müshi Jesús (Mat. 15:18). Atüjaana aaʼulu tü suluʼukat waaʼin sükajee wanüiki. Püsakireʼera paaʼin sünain pütchikat tüü: «¿Taküjainche tü shiimainkat waneepia jaʼitashi teʼrüin müliaa? Kaʼwayuusere taya, ¿aʼalaajaashiche taya suʼupala jieyuu nnojotka taʼwayuusein? ¿Tayoutuinche taashajaain süchiki kasa yarüttüsü? ¿Tachecherüinche taaʼin suulia jashiee jamüle sünüiki wayuu tamüin?». Anasü maʼin jülüjale paaʼin tia pütchikat. Wanaa sümaa waashajaain, müshii wayapüjakai saaʼin wanee kuluulu. Müleka wachajaale sukuwaʼipa süpüla nnojoliinjanain sünainpünaain waya aʼülüjaajirawaa, aküjaa alawaa otta aashajawaa süchiki kasa yarüttüsü, nnojoleerü müin warewentajakai saaʼin tü wakuwaʼipapuʼukat sümaa tü wakuwaʼipakat jooluʼu. w22.03 5 püt. 12-14

Shiimain maʼin tia pütchikat, laülaasü naaʼin na wayuu asakirakana süchiirua wanee kasa noulia na wayuu nnojoliikana aaʼinrüin tia. Anasü wasakirüle süka waaʼin wamüiwaʼa süchiirua tü anakat süpüla waaʼinrüin. Anuu waneirua kasa eeka süpüla wasakirüin anain na wawalayuukana: (1) Suunejaain wanee wawala wane wawala atüjaka ekirajaa süpüla suʼunuin sümaa sünain ekirajaa wayuu, mapa süsakirüin shia süpüla sütüjaain saaʼu tü saaʼinrajatkat süpüla sütüjain maʼin ekirajaa. (2) Wanee wawala majayülü ayaʼlajeeka pantalón, süsakirüin wane wawala laülaaka aaʼin sünain anoujaa anale sümüin tü shiyaʼlajüinjatkat. (3) Wanee wawala palajaikai nukua sünain ekirajaa tü pütchi süpülajatkat wayuu süpüshuaʼa, nuchuntuin nümüin wanee wawala atüjakai ekirajaa süpüla nüküjain nümüin tü nunouteʼerüinjatkat sünain tia pütchikat. Jaʼitainna na wawalayuu kakaliainnakana sünain ekirajaa pütchi, anasü nachuntule kaalinwaa namüin waneinnua wawalayuu süpüla natüjaain saaʼu tü nanouteʼerüinjatkat sünain otta naaʼinrüinjatü tü namakat namüin (Prov. 19:20). w22.02 13 püt. 15-17

Tü sukuwaʼipakat naalin Jeʼwaa nüpüla chi Nüchonkai yaaiwaʼaya nia yaa mmapaʼa shiaʼaya sukuwaʼipa tü waalinkat nüpüla (Juan 5:20). Naapüin tü kasa choʼujaakat nümüin jee tü choʼujaakat sümüin nunoula otta naaʼinrüin kasa nüpüleerua süpüla anain naaʼin. Nüküjain nümüin alin nia nüpüla otta talatüin nia nümaa (Mat. 3:16, 17). Nnojoishi nümüiwaʼain aaʼin Jesuu süka nütüjaain saaʼu eein nümaa chi Nüshi aikai apüla nia. Niyaawata aaʼu Jesuu alin nia nüpüla Jeʼwaa, müshiʼiya wayakana eesü süpüla wayaawatüin saaʼu alin waya nüpülaya. Süka alin waya nüpüla Jeʼwaa nürütkeʼerüin waya nünainmüin, naapüin wamüin wainma wawalayuu anoujakana wanaa wamaa aikana apüla waya jee atütüleʼeraka waaʼin shapaale waaʼin (Juan 6:44). Wane kasa naaʼinraka Jeʼwaa wapüleerua shia naapüin tü choʼujaakat wamüin otta tü choʼujaakat sümüin wanoula (Mat. 6:31, 32). Wanaa sümaa jülüjain waaʼin tü sukuwaʼipakat waalin nüpüla Jeʼwaa, akooʼomüinraasü tü naalinkat wapüla. w21.09 22 püt. 8, 9

¿Jamapuʼusü pukuwaʼipa nnojoluiwaʼaya pikirajaain sünain tü Bibliakat namaa na aküjaliikana pütchi nüchiki Jehová? Wainma na nnojoliikana jülüjeein aaʼin tia. Eesüjaʼa mapuʼule wakuwaʼipa maʼaka naaʼin na manoujainsaliikana suluʼu wanaawain waaʼin namaa süchiki tü kasa anakat namüin jee tü mojukat. Soʼunnaa tia, nnojotpuʼusü kasain anain waʼatapajüin otta nnojoipuʼushi eein Maleiwa wamaa (Éf. 2:12). Sümaʼinruʼu pikirajaain sünain tü Bibliakat pütüjaa aaʼu aishaatain pia nüpüla chi Washi iipünajachikai, piyaawata aaʼu punouteʼerüinjatüin pukuwaʼipa otta tü jülüjakat paaʼin sümaa kojutuinjatüin pümüin tü nuluwataakalü anain Jehová süpüla talatüinjachin nia pümaa otta süpüla naʼakainjachin pia na aʼyataashiikana nümüin (Éf. 5:3-5). Süka niain Jehová Kakumalain waya otta niain chi Washi iipünaajachikai, nia neʼe anakai süpüla nüküjain tü nakuwaʼipainjatkat na aʼyataashiikana nümüin. Nüküjain namüin na woutiiseekana nooʼulaainjanain suulia tü kasa mojusü keejiapuʼukat namüin. w22.03 2 püt. 1-3

Talatüsü naaʼin na anoujashii yaainjanakana mmapaʼa sünain tü Outkajawaakat eere Sotuin Waaʼin Outuin Jesuu. Jülüjasü naaʼin tü kasa naʼatapajakat nutuma Maleiwa maʼaka naaʼinrüin shia na chainjanakana iipünaamüin. Naapajeein tü pütchi aküjünakat soʼunnaa tü Outkajawaakat eere Sotuin Waaʼin Outuin Jesuu süka süküjünüin tü naaʼinrajatkat Kürisüto namaa na 144.000 aluwataainjanakana naaʼu na wayuukana soʼunnaa tü miitkat juya. Nakaalinjeena Jesuu na aluwataainjanakana wanaa nümaa süpüla Paʼaraiisüinjatüin tü Mmakat natuma jee süpüla nakaalinjain na wayuukana süpüla lotuin maʼin nakuwaʼipa. Talatakajasaʼa naaʼin na wayuu wattakana naalii eʼrajakana sukua tia outkajawaakat jülüjapa naaʼin tü kaʼi shikeraajüinjatkalü oʼu tü sümakat Isaías 35:5, 6; 65:21-23; otta Alateetkat Mapeena 21:3, 4. Süka müin chakai naaʼin suluʼu tü mma jeketkat namaa napüshi, akatchinraasü nanoula sutuma natüjaain saaʼu shikeraajeerüin tü nümatüjütkalia Jeʼwaa otta süpüla ayatüinjanain naʼyataain nümüin (Mat. 24:13; Gal. 6:9). w22.01 21 püt. 5-7

¿Kasa aainjünajatka süpüla taashinjatüin wayuu suulia saainjala? Nuwalaajüinjatü Jesuu tü naainjalakat Adán (1 Cor. 15:21, 22). ¿Jamüsü choʼujaaka wamüin taashinjanain waya? Jülüjataa waaʼin tü nümakat Jeʼwaa suluʼu tü Pütchi naapakat nümüin Moisés. Jamüshijaʼa pasiruule wanee wayuu pasalaainjachi nia, outajachi niiʼiraka chi wayuu uwomuyuukai (Éx. 21:23, 24). Sutumajee kaainjalain Adán, nnojotsü lotuin nukuwaʼipa, ayuuishi nia, laülaashi jee outushi nia. Süpüla nikeraajüin Jeʼwaa tü nümakat, outajachi wanee wayuu maainjalakai maʼaka maainjalain Adán paala. Makalaka niain Jesuu anaka süpüla naapajiraain nikii saaʼu naainjala Adán (Roma 5:17, TNM). Sünainjee tia, meechi Jesuu maʼaka naaʼin wanee Nashi namüin na eʼitaakana naaʼin sünain naapajiraain nikii saaʼu wayuu (Is. 9:6; Roma 3:23, 24). Aapajiraashi nikii Jesuu süka alin maʼin nüpüla chi Nüshikai jee alin maʼin waya nüpüla (Juan 14:31; 15:13). Naaʼinrüin waneepia tü nüchekakat chi Nüshikai sükajee alin maʼin nia nüpüla. Sünainjee tia, nikeraajeerü Jeʼwaa tü nüküjatüjütkalia achiki paala, tü naaʼinrajatkat napüleerua na wayuukana otta süpüleerua tü Mmakat. w21.04 14 püt. 2, 3