Tisienpüroʼu

Naashin Jesuu müshi aka naaʼin wanee anneetpüʼü namüin na nikirajüinkana (Juan 10:14). Pansaasü maʼin tia nümakat Jesuu süka shiain neʼe soonooin amaa tü anneetkat nünüiki chi anneetpüʼükai. Anuu nünüiki wanee wayuu alataka süʼütpaʼa waneirua anneerü: «Keeʼireesü waaʼin wayuʼlüin wayaakua sümaa tü anneetkalüirua. Warütkaaka süʼütpaʼamüin sümaa wounejüin shiairua, nnojotka jaa müin sümüin wanüiki. Shiasaʼa nüntapa chi jintüi arüleejüikai nuunejaka shiairua suʼunamaataka nümaa». Sünainjee tü nümakat chia wayuukai sotusü waaʼin tü nümakat Jesuu namüin na nikirajüinkana wanaa sümaa nümüin namüin: «Tantireena nayaʼaya tanainmüin süpüla noonooinjanain sümaa tanüiki». ¿Jamüsü süpüla woonooin sümaa nünüiki Jesuu sümaa chain nia iipünaa? Wanee sukuwaʼipa shia waaʼinrüle tü nikirajakalü anain (Mat. 7:24, 25). w21.12 16 püt. 1, 2

Nnojoluiwaʼaya nunoujain chi aluwataaushikai Pablo, müliapuʼushii nutuma na anoujashiikana. Shiasaʼa mapa, niyaawajaaka suulia tü naainjalakat, nunouteʼerüin tü jülüjakat naaʼin otta tü nukuwaʼipakat (1 Tim. 1:12-16). Süka nükaalinjain nia Jehová aipüraishi nia wayuu, amüliajüishi otta nnojotsü pülayaain naaʼin. Niʼitaain naaʼin nünain Jehová sünain motuin naaʼin tü naainjalakat jee nnojotsü jülüjakuʼu müin naaʼin tü kasa mojusü naaʼinrapuʼukat (Roma 7:21-25). Süka nnojoluin yaletüin naaʼin nütüjaa aaʼu nnojoluin lotuin maʼin nukuwaʼipa, aʼyataashi maʼin nia süchiirua süpüla nunouteʼerüin nukuwaʼipa otta nuuʼulaain nükaalinjain nia Jehová süpüla nikeraajüin tü aküjaakat pütchi (1 Cor. 9:27; Filip. 4:13, TNM). Nnojoishii aneekünüin na wawalayuukana süpüla laülaashin naya saaʼujee lotuin maʼin nakuwaʼipa. Keeʼireepejeʼe naaʼin Jehová nayaawatüinjatüin saaʼu tü mojukat natuma otta neeʼiratüinjatüin nakuwaʼipa (Éf. 4:22-24). Anasü nasakireʼerüle naaʼin sünain tü nanouteʼerüinjatkat sünain nakuwaʼipa sükajee tü sümakat tü Bibliakat jee neeʼiratüinjatü shia. Müshiijeseʼe nükaalinjain naya Jehová süpüla talatüin naaʼin otta anain maʼin tü naʼyataainkat (Sant. 1:25). w22.03 29 püt. 13-15

¿Kasa waaʼinrüinjatka wayaawatüle saaʼu wayoujain wanee wawala? Sotuinjatü waaʼin alinjanain wapüla na wawalayuukana (Sant. 2:8). Oʼuraajüinjana waya nümüin Jeʼwaa otta wachuntüinjatü nümüin nükaalinjaiwa waya suulia mojuin wanüiki süchiki wayuu. Aashajaainjana waya nümaa chia wawalakai wanaapünaa sümaa tü wachuntakat nümüin Jeʼwaa. Wounejaa nia sünain aküjaa pütchi jee shiale sünain ekaa. Weʼraajapa maʼin nukuwaʼipa chia wawalakai, ayata jülüjain waaʼin tü kasa anasü naaʼinrakat maʼaka naaʼinrüin shia Jeʼwaa otta Jesuu. Waaʼinrüle tia, jaʼyeerü waaʼu woonooin sümaa nünüiki Jesuu sünain nnojoliinjanain wayoujain na waneinnua. Oonooshii waya sümaa nünüiki Jesuu maʼaka soonooin tü anneetkat sümaa nünüiki chi arüleejüikai. Jaʼitainna yaainjanale waya yaa mmapaʼa jee chainjanale waya chaa iipünaa, ayata woonooin sümaa nünüiki Jesuu (Luc. 12:32; Juan 10:11, 14, 16). w21.12 19 püt. 11; 21 püt. 17, 18

Nüikalaapa Rehoboam sünain aluwatawaa saaʼu Israel nachuntuin na wayuu nuluwataakana aaʼu süpüla naawaleʼerüinjatüin nakuwaʼipa suulia naaʼinrajüin tü naaʼinrakat Salomón chi nüshikai. Anasü maʼin tü naaʼinrakat Rehoboham süka nüsakirüin süchiirua tia na laülaashiikana napüleerua na israelitakana. Naküjain nümüin aijeechin nia napüla naaʼinrüle tü nachuntakat nümüin (1 Rey. 12:3-7). Nnojotkaʼa anain tia nümüin Rehoboham, nuʼunaka namaʼanamüin na wayuu joʼuujiraakana wanaa nümaa süpüla nüsakirüin naya süchiirua tia. Naküjain nükooʼomüinrüinjatüin naʼyataain na wayuu nuluwataakana aaʼu (1 Rey. 12:9-11). Eeshijaʼa süpüla nüsakirüin Jehová süchiirua tü anakat süpüla nüneeküin saʼakajee tü piamasükat pütchi, nnojotpejeʼe naaʼinrüin tia. Shiakalaka nücheküin maʼin nuʼunuin süchiirua tü namakat na wayuu joʼuujiraakana wanaa nümaa. Sutuma tia mojusü nukuwaʼipa otta nakuwaʼipa na wayuu nuluwataakana aaʼu. Tü watüjakat sünainjee tia shia eein süpüla süküjünüin wamüin wanee kasa nnojotka anain maʼin saaʼin wamüin, shiaka anain waapaale sümaa wanee pütchi aküjünaka wamüin wanaapünaa sümaa tü sümakat tü Bibliakat. w22.02 9 püt. 6

Chi wayuu nnojoikai yaletüin aaʼin otta ayaawatakai saaʼu tü kasa isakat nüchiki, nnojoleerü jülüjain naaʼin tü isakat nachiki naaʼinrüin na jimaʼaliikana, jülüjeerü naaʼin tü kasa nountakat. Akaalinjiraajeena naya otta nnojoleerü nayoujireʼerüin nakuwaʼipa namaa. Na jimaʼaliikana jee na majayünnüükana müshii aka saaʼin asülajuushi nutuma Jeʼwaa namüin na wawalayuu laülaayuukana. Süka isaitpain nachiki naaʼinrüin kasa sutuma matchin müin naya, kojutushii namüin na jimaʼalii jee majayünnüü aʼyataweekana napüleerua na wawalayuukana. Aküjünüsü suluʼu tü Bibliakat süchiki sukuwaʼipa wanee wayuu laülaa, Noemí sünülia. Anasü sukuwaʼipa süka sütüjain aapaa analuʼut otta anain sümüin sükaalinjünüin sutuma wanee wayuu joʼuu suulia. Nünaajaapa chi süchonkai Noemí, süküjain sümüin Rut, tü saʼütkat, süleʼejaainjatüin süchikuaʼa eemüin süpüshi. Süküjapejeʼe Rut sümüin oʼunajatüin shia sümaa Belénmüin. Anakaʼa sümüin Noemí tia (Rut 1:7, 8, 18). Anasü maʼin nakuwaʼipa süka nakaalinjiraain (Rut 4:13-16). Na wawalayuu laülaayuu nnojoliikana yaletüin aaʼin, nashatüin sukuwaʼipa Noemí. w21.09 10 püt. 9-11

Chi Washi iipünaajachikai, nütüjaa aaʼu tü eekat süpüla wountuin waneʼewai wakua. Eesü süpüla wainmain kasa puuntaka noulia na paʼaleewainkana jee shiale palirüin tü kasa puuntakat noulia na waneinnua saaʼujee laülaain pia, ayuulin pia jee shiale saaʼujee paaʼinmajüin püpüshi. Nnojotpejeʼe mojuinjatüin paaʼin saalinjee tia (Gal. 6:4). Nnojoleerü motuin naaʼin Jehová tü kasa paaʼinrakat nüpüleerua. Paapüle nümüin wanee kasa süka süpüshuaʼa paaʼin, talateechi nia pümaa. Nütüjaa aaʼu Jehová tü suluʼukat paaʼin otta keeʼireesü naaʼin talatüin paaʼin sümaa tü paaʼinrakat süpüla puʼwaajüin nia. Maaʼulu yaa eeitpa süpüla jimatüin waaʼin süka watüjaain saaʼu nükaalinjain waya Jehová soʼunnaa tü alatakat wamüin (Is. 41:9, 10). Wainma tü kasa talatakalü atuma waaʼin sünainjee waʼwaajüin chi Wamaleiwasekai Jehová. Nia neʼe waʼwaajüinjachikai nümüiwaʼa süka niain kakumalain kasakat süpüshuaʼa (Alat. Map. 4:11). w22.03 24 püt. 16; 25 püt. 18

Washateere nukuwaʼipa Jesús nnojoleerü amalajaain waaʼin isale maʼin wachiki wountuin waaʼinrüin tia (Sant. 3:2). Jamüshijaʼa nikirajünüle wanee wayuu, nnojoleerü wanaawashaatain maʼin tü nütüjakat sümaa tü nütüjakat chi ekirajakai nia, atüjeechipajaʼa nia nünainjee chi ekirajakai nuuʼulaküle nüchiirua tü nütüjakat jee nunoutule tü isakat nüchiki. Meeria wakuwaʼipa, waaʼinrüle tü wekirajaakalü anain suluʼujee tü Bibliakat otta wanoutule tü kasa mojukat sünain wakuwaʼipa, wounteerü washatüin nukuwaʼipa Jesús (Sal. 119:59). Wainma maʼin wayuu kapülaka saaʼin sukuwaʼipa neʼe sümüiwaʼa. Eekajasaʼa na aʼyataashiikana nümüin Jehová naata nakuwaʼipa. Sütanalüin waaʼin tü naaʼinrakat Jesús sünain akaalinjaa wayuu otta meesü wakuwaʼipa maʼaka naaʼin (1 Ped. 2:21). Waʼyataale maʼin süchiirua wakaalinjain wayuu maʼaka naaʼinrüin shia Jesús, talateerü maʼin waaʼin, jama talateechin Jehová wamaa. w22.02 24 püt. 16; 25 püt. 18

Wanee kasa nuʼuniraka akajee Jehová sukuwaʼipa nupueulose maaʼulu shia sükajee tü Bibliakat. Wasakirawaire waaʼin sünain tü nikirajakalü anain waya Jehová, oonoweena waya sümaa tü nümakat wamüin otta wekeraajeerü tü waʼyataainkat nümüin (1 Tim. 4:15, 16). Wane kasaya nuʼuniraka akajee Jehová nupueulose shia nükajee chi achepchiee oonookai otta kekiikai maʼin (Mat. 24:45, TNM). Eeshii nuluwataale waya sünain aaʼinraa wanee kasa nnojotka maʼin wayaawatüin aaʼu, maʼaka saaʼin naküjale wamüin tü waaʼinrajatkat süpüla katüin woʼu sülatüle wawai, sukutkujaale mma jee shiale sünain wanee kasa nnojoleetka alatüin saaʼin wamüin eere kepiain waya. ¿Kasa waaʼinrajatka jülüjale waaʼin nnojoluin choʼujaain maʼin wamüin waaʼinrüin tü aluwataanakalü anain waya? Anasü jülüjale waaʼin wanee aküjalaa süchiki tia suluʼujee tü Bibliakat. Wainmatuainna na aʼyataashiikana nümüin Maleiwa katakana oʼu sutuma naaʼinrüin tü aluwataanakalü anain naya mayaasüjeʼe nnojoluin müin choʼujaakai saaʼin namüin naaʼinrüin tia (Juec. 7:7; 8:10). w22.03 18 püt. 15, 16

Niʼitaashaatain naaʼin Jesuu nünain Jeʼwaa, müshijeseʼe nümüin tü pütchi süpülajatkat soʼukai. Nütüjaa aaʼu Jesuu nüsoʼiraajeerüin naaʼin nüchikuaʼa nutuma chi Nüshikai. ¿Kasa watüjaka sünainjee tü nümakat Jesuu? Woonoo waneepia nümaa Jeʼwaa jaʼitainna jamajüin waya atumawaa. Süpüla wountuin tia, weʼitaainjatü maʼin waaʼin nünain Jeʼwaa (Prov. 3:5). Jülüjataa waaʼin nukuwaʼipa chi wawalakai Joshua, 15 nuuyase. Ayuuishi nia sutuma wanee ayuulii outasiroʼu. Nnojotsü nuuʼulaain shiʼitaanüin nünain wanee tratamiento nnojotka pansaain sümaa tü nümakat Jeʼwaa suluʼu tü Wiwüliakat. Müshi nia sümüin tü niikat süpülapünaa outuin nia: «Naaʼinmajeechi taya Jeʼwaa. Teʼitaain maʼin taaʼin nünain Jeʼwaa sünain kateerüin toʼu tachikuaʼa nutuma. Nütüjaa aaʼu tü suluʼukat taaʼin otta nütüjaa aaʼu alin nia tapüla». Anasü wasakirüle waaʼin sünain tüü: «Woʼutuneere aaʼin saaʼujee waaʼinreein waneepia tü nümakat Maleiwa wamüin, ¿ayateenache waya oonooin waneepia nümaa?, ¿ayateetche weʼitaain waaʼin sünain nüsoʼireʼereerüin Jeʼwaa waaʼin wachikuaʼa?» w21.04 12 püt. 15, 16.

Nükatchinrüin waaʼin Jeʼwaa waküjale pütchi. Mayaainjeʼe eein süpüla shiyoutuin wayuu tü pütchi waküjakat, atütülaasia waaʼin jee anasü waaʼin waküjale pütchi. Eeshii nnojoliire maʼin waküjain pütchi sutuma tü alatawaikat wamüin. Müleka waküjale maʼin pütchi süka süpüshuaʼa waaʼin, talateechi Jeʼwaa wamaa. Nütüjaa aaʼu Jeʼwaa keeʼireein waaʼin waküjain maʼin pütchi, eepejeʼe süpüla nnojoluin wojuʼitüin wepialuʼujee sutuma ayuulin waya. Eeshii süpüla waküjain pütchi namüin na wayuu aaʼinmajakana waya jee nayale na tottoot eʼrajaakana waya. Müleka jülüjale waaʼin waküjapuʼuin maʼin pütchi paala, amalajaweerü waaʼin. Shiale jülüjain waaʼin tü naaʼinrakat Jeʼwaa süpüla nükaalinjain waya, katchinjeerü waaʼin soʼunnaa weʼrüin müliaa jee talateerü waaʼin. Nnojotsü watüjaain aaʼu jaraleerüin anoujain naʼakajee na wayuu waküjakana amüin pütchi (Ecl. 11:6). w21.05 24 püt. 14-17

Jülüjataa waaʼin tü alatakat nümüin David. Wainma tü kasa naapakat Jeʼwaa nümüin. Naapüin washirüü nümüin, kojutushi nia sutuma wayuu otta wainma atkawaa nükanajaka. Kojutusü nümüin David süpüshuaʼa tü naapakat Maleiwa nümüin (Sal. 40:5). Shiasaʼa soʼu wanee kaʼi motusü naaʼin tia. Mayaainjeʼe kojuyain nuʼwayuuse, suchuntaain naaʼin nüinkaweein sümaa wanee jiet kaʼwayuusekat. Mojushaatasü tia nümüin Jeʼwaa. Bat-Seba sünülia tia jietkat otta Urías nünülia chi suʼwayuusekai. Süka jülüjain naaʼin David nukuwaʼipa neʼe nümüiwaʼa, amaʼüjiraashi nukuwaʼipa sümaa Bat-Seba jee ipuoutkalaka shia nutuma jee nuʼutira aaʼinchi Urías (2 Sam. 11:2-15). ¿Jamüsüche naaʼinraka tia David? ¿Nnojoleetche nütüjaain aaʼu Jeʼwaa naaʼinruʼu tü naainjalakat? Mayaainjeʼe kakaliain David sünain aʼyatawaa nümüin Jeʼwaa, yaletajaasü naaʼin jee jülüjasü naaʼin nukuwaʼipa nümüiwaʼa. Wainma tü müliaa niʼrakat suluʼujee tia. Mapa, nüküjaka David süchiki naainjala jee niyaawajaaka suulia. Talatakajasaʼa maʼin David motopa naaʼin Jeʼwaa naainjala (2 Sam. 12:7-13). w21.06 17 püt. 10

Matüjainre waya waaʼinruʼu wekirajüin wayuu sünain tü Bibliakat. Eesüjaʼa jülüjale paaʼin nnojoluin pütüjain maʼin süpüleerua tü sümakat tü Bibliakat jee matüjainre pia ekirajaa wayuu. Sülatüle pümüin tia, eesü apünüinsü kasa akaalinjeechika pia. Palajana, nütüjaa aaʼu Jeʼwaa puunteerüin tia. Piama, nuluwataain pia Jesuu süpüla pikirajüin wayuu, nia Jesuu chi laülaakai nutuma Maleiwa saaʼu kasa süpüshuaʼa (Mat. 28:18). Apünüin, akaalinjüneechi pia. Maʼaka nükaalinjünüin Jesuu nutuma chi Nüshikai süpüla nütüjaain saaʼu tü nünüikinjatkat, nükaalinjeechia pia Jeʼwaa (Juan 8:28; 12:49). Eesü süpüla puchuntuin kaalinwaa nümüin chi wawala laülaakai napüleerua na wawalayuu püküjakana amaa pütchi süpüla nükaalinjain pia sünain ekirajaa wayuu. Eesü süpüla puchuntuin kaalinwaa nümüin wanee pürekutsoot jee niale wanee wawala atüjakai ekirajaa wayuu. Süpüla pütüjainjachin ekirajaa wayuu puʼuna namaa naya wawalayuukana nekirajapa wayuu. w21.07 6 püt. 12

Alüʼütsü sükalia sajaʼttajatka oʼu kasa süpüshuaʼa, weʼitaainjatsüjeseʼe waaʼin maaʼulu sünain lotuin süpüshuaʼa tü kasa naaʼinrakat Jehová. Choʼujaweerü tia soʼunnaa tü müliaa miyoʼusükat süka eein süpüla waluwataanüin sünain aaʼinraa wanee kasa nnojoleetka müin pansaakai saaʼin wamüin. Nnojoleerü nüküjain wamüin Jehová sirumatuʼujee tü waaʼinrajatkat. Eesüjaʼa süpüla nüküjain wamüin tü waaʼinrajatkat nakajee na wayuu nüneekakana süpüla nuʼunirüin wakuwaʼipa. Nnojotsüjeseʼe anain maʼin wainmajüle waaʼin soʼu tia jee wasakirüle shiimainre nuluwataain tia Jehová otta shiale jülüjain waaʼin naneekajalain tia süka naaʼin namüiwaʼa na oʼunirakana wakuwaʼipa. ¿Weʼitaajeetche waaʼin nünain Jehová jee sünain tü sümakat nupueulose soʼu kaʼikat tia? Jüüjüüle waya maaʼulu sümüin tü suluwataakalü anain waya nupueulose Maleiwa, jüüjüweena waya sümüin tü aluwataaneenakalü anain waya soʼunnaa tü müliaa miyoʼusükat. w22.02 6 püt. 15

Nükanajüin Gedeón wanee atkawaa namaa na 300 wayuu nümaajanakana süka nükaalinjain naya Jeʼwaa. Eesüjaʼa süpüla yaletajaain naaʼin sutuma tia. Nantiraaka na nusurulaatsekana Efraín nümaa Gedeón süpüla natkaain nümaa, jashichishii naya süka nnojoliin nounejaanüin nutuma Gedeón süpüla natkaainjanain namaa na nüʼünüükana Maleiwa (Juec. 8:1). Nüküjain Gedeón namüin tü naaʼinrakat Jeʼwaa napüleerua, nnojoliinnakaʼa jashichin naya nümüin (Juec. 8:3). Nnojotsü jülüjain naaʼin Gedeón alanaʼaleein suluʼu anain nukuwaʼipa noulia na waneinnua, shia jülüjaka naaʼin anajiraainjatüin tü nupueulosekat Maleiwa. Tü watüjakat nanainjee na nuuʼuliwoʼukana Efraín shia kojutuinjachin watuma Jeʼwaa suulia jülüjain waaʼin kojutuin wakuwaʼipa neʼe wamüiwaʼa. Anuu tü natüjakat nünainjee Gedeón na laülaashiikana otta na laülaakana saaʼu napüshi: müleka eere wanee wayuu jashichikai saaʼu wanee kasa, anasü nayaawatüle saaʼu jamüin makaʼa naaʼin otta anasü naküjale pütchi analuʼut nümüin saaʼu tü kasa anasü naaʼinrakat. Choʼujaapejeʼe nnojoluinjatüin yaletüin naaʼin. Analeesia maʼin anajiraale waya suulialeʼeya macheʼein waya süchiirua tü wamakat, jaʼitairü shiimain shia. w21.07 17 püt. 10-12

Kojutushii waya nutuma Jeʼwaa süka nukumajüin waya maʼaka naaʼin. Süka müin wakuwaʼipa nutuma Jeʼwaa, eesü süpüla washatüin nukuwaʼipa. Eeshii süpüla aipüraliin waya wayuu, wamüliajüliin jee lotuin sukuwaʼipa tü kasa waaʼinrakat (Sal. 86:15; 145:17). Washatüle nukuwaʼipa Jeʼwaa, kojuteechi nia watuma jee kojuteerü wamüin tü naaʼinrakat wapüleerua (1 Ped. 1:14-16). Anale wakuwaʼipa nuʼupala chi Washi iipünaajachikai, talateena waya. Süka nukumajüin waya Jeʼwaa maʼaka naaʼin, eesü süpüla anain wakuwaʼipa maʼaka nücheküin shia napüleerua na nüpüshikana. Nukumajüin Jeʼwaa wapüla tü Mmakat sümaa anain maʼin shia. Kettaatüjülia nutuma Jeʼwaa tü Mmakat süpülapünaa nukumajüin chi palajachikai wayuu (Job 38:4-6; Jer. 10:12). Süka kapülain naaʼin wakuwaʼipa jee kamaneein nia, watta saalii kasa anasü naaʼinraka süpüla talatüinjanain waya saaʼu tü Mmakat (Sal. 104:14, 15, 24). Süchikijee kettaain nutuma Maleiwa süpüshuaʼa tü kasa nukumalakat, niʼrüin sünain anashaatain maʼin shia (Gén. 1:10, 12, 31). w21.08 3 püt. 5, 6

Aluwataanüshii waya wapüshuaʼa sünain aküjaa pütchi jee ekirajaa wayuu (Mat. 28:19, 20; Roma 10:14, TNM). ¿Kasa waaʼinrajatka süpüla wountuin tia? Sümaʼinruʼu wekirajaain sünain tü poyeetokot Ekirajaa, wooʼulaka waneirua sukuwaʼipa suluʼujee tü wekirajaakat sünain. Wanee kasa anaka maʼin süpüla waʼyataain achiirua shia anainjatüin wakuwaʼipa nuʼupala Maleiwa (Col. 3:12; 2 Ped. 1:5-8). Keeʼireesü maʼin waaʼin waaʼinrüin wainma kasa nüpüleerua Jeʼwaa, eepejeʼe isale wachiki waaʼinrüin shia maaʼulu. Nnojoleerü kapüleein wamüin waaʼinrüin tia paʼaraiisüpa tü mmakat. Sümaʼinruʼu waʼatapajüin tia kaʼikat, waaʼinmaa tü aʼyatawaa eekat wamaʼana suluʼu nupueulose Jeʼwaa. Waaʼinrüle tia, talateena maʼin waya otta nnojoleena ayüülajaain waya nnojorüle waʼyataain sünain tü waʼyataweekalü amüin. Jee talateechi maʼin Jeʼwaa wamaa (1 Tim. 1:11, TNM). Talataʼaya waya sümaa tü waʼyataainkat nümüin Jeʼwaa maaʼulu. w21.08 25 püt. 18-20

Nanoujatüjüliire na wayuu kachooinkana pia, eeshijaʼa nekirajüle pia nüchiki Jeʼwaa joʼuuiwaʼaya pia. Ekirajünüshi pia sünain niain chi Kakumalakai kasa süpüshuaʼa, sünain anain maʼin nukuwaʼipa otta süchiki tü kasa anasü naapeetkat namüin na wayuukana (Gén. 1:1; Aluw. 17:24-27). Wainma wayuu nnojoliika anoujain sünain eein chi Maleiwakai jee nnojoluin nukumajüin tü kasakalüirua. Shia nanoujaka anain eejaʼalaa sümüin tü kasakalüirua sümüiwaʼa. Noʼutku na wayuu anoujakana sünain tia, ekirajaashii suluʼu eʼikülee miyoʼu. Eesüjaʼa naküjale nnojoluin pansaain tü sümakat tü Bibliakat jee malain na wayuu anoujakana sünain eein chi Kakumalakai tü kasakalüirua. Jaʼitainna kakaliainnain waya sünain anoujaa, ayatüinjatü wakooʼomüinrüin wanoula nünain Jeʼwaa. Waaʼinrüle tia, nnojoleerü wanoujain naʼalain na ekirajakana sünain alawaain tü sümakat tü Bibliakat (Col. 2:8). w21.08 14 püt. 1-3

Eepuʼushii wayuu waneepiakana nümaa Jehová, maʼaka naaʼin Abel, Noé, Abrahán otta Job. Kojutupuʼushi maʼin nia namüin otta aipuʼushi maʼin nia napüla. Watüjaa aaʼu tia süka noonooin nümaa Jehová, kanoulain naya nünain otta naapüin namüin kasa anaka noʼuluʼu. Watüjaa aaʼu kojutuin nia natuma sükajee tü naaʼinrakat otta nücheküin Maleiwa naʼwaajüin nia. Mapa, naapüin Maleiwa namüin na nuuʼuliwoʼukana Abrahán tü Pütchi Aapünakat nümüin Moisés eere nüküjain namüin jamüinjatüin sukuwaʼipa nuʼwaajia natuma. Süchikijee outuin jee süsoʼiraain naaʼin Jesús nnojoluitpa nuchuntuin Jehová sümüin nupueulose naaʼinrüinjatüin tü Pütchi Aapünakat nümüin Moisés (Roma 10:4). Shia naaʼinrajatka jooluʼu na anoujashiikana tü nüchekakat Cristo napüleerua (Gal. 6:2). Nnojotsü choʼujaain jülüjainjatüin naaʼin watta saalii pütchi, shia nashatüinjatka neʼe nukuwaʼipa Jesús sümaa naaʼinrajatüin tü nikirajakalü anain. Maaʼulu yaa, na anoujashiikana nachajaain maʼin sukuwaʼipa süpüla nashatüin nukuwaʼipa Cristo süpüla talatüinjatüin naaʼin Jehová namaa otta anainjatüin naaʼin (Mat. 11:29, 30). w22.03 20 püt. 4, 5

Naapajüin Jeʼwaa nanüiki na nüchonniikana. Naapajüin nünüiki Jesuu nuʼuraajapa nümüin yaaiwaʼaya nia yaa mmapaʼa. Naapajüin Jeʼwaa nünüiki Jesuu wanaa sümaa nuchuntuin kaalinwaa nümüin süpülapünaa nüneeküin na polookana piamamüin aluwataaushii (Luc. 6:12, 13). Süpülapünaachon naapünüin ekii Jesuu nutuma Judas, achuntushi maʼin nia nümüin chi Nüshikai süpüla nüchecherüin naaʼin soʼunnaa tü alatajatkat nümüin. Nnojotsü neʼe naapajüin Jeʼwaa nünüiki, nuluwataainya wanee aapiee süpüla nütütüleʼerüin naaʼin (Luc. 22:41-44). Naapajüin Jeʼwaa wanüiki wanaa sümaa woʼuraajüin nümüin jee asoutushi wamüin soʼu tü kaʼi choʼujaajeetkalü oʼu shia wamüin sümaa anain sukuwaʼipa nutuma (Sal. 116:1, 2). Jülüjataa waaʼin tü alatakat sümüin wanee wawala chejeʼewatka India. Shapaʼawaisü maʼin saaʼin waneepia jee achuntusü maʼin kaalinwaa nümüin Maleiwa. Anuu sünüiki: «Tü programa JW Broadcasting ojuʼitakat maayoʼu soʼu 2019, aashajaasü süchiki tü waaʼinrajatkat shapaale maʼin waaʼin, shiaʼaya choʼujaaka tamüin tia. Tayaawata aaʼu nusoutuin tamüin Jeʼwaa sümüin tü tachuntakat nümüin». w21.09 21 püt. 6, 7

Kapüleekajasaʼa namüin na anoujashii kepiakana Judea napütüinjatüin süpüshuaʼa nakorolo jee nekiʼralaainjatüin naaʼin sünain kepiaa suluʼu wanee mma naata. Neʼitaainjatü maʼin naaʼin sünain naapeerüin Jeʼwaa tü kasa choʼujaakat namüin. Jaʼrai juya süpülapünaa suukajaanüin Jerusalén natuma na surulaat romaanokana nüküjain chi aluwataaushikai Pablo namüin na hebreokana wanee pütchi atütüleʼeraka naaʼin. Müshi nia: «Anakaja müleka nnojoliire keeʼireein jaaʼin washirüü. Shia anaka aluʼu müleka talatüle neʼe jaaʼin waneʼewai jukua sümaa tü eekai eein jümaʼana, sükajee nümüin wamüin chi Maleiwakai: “Nnojoleechi taya oʼunüin jümaʼanajee. Nnojoleena tapütüin jia jümüiwa”». Anakalaka müle wanüiki mayaa: «Nia teenakaka chi Maleiwakai süpüla nükaalinjain taya. Nnojoleechi taya mmolüin seema tü saaʼinreetkat tü taʼünüükolüirua» (Heb. 13:5, 6). Süka noonooin naya anoujashiikana sümaa tü nümakat Pablo nnojoluiwaʼaya sushutünüin aaʼu Jerusalén, mapüleesat namüin nekiʼralaain sünain kepiaa suluʼu wanee mma naata sümaa palitchon nakorolo. Natüjaa aaʼu naapeerüin Jeʼwaa tü kasa choʼujaakat namüin. w22.01 4 püt. 7, 9

Wanee wayuu eekai nümüliajülin, wayuu anamia, amülialaasü naaʼin saalin wayuu jee kamaneeshi nia. Eesüjaʼa sotojoole waaʼin tü naaʼinrakat chi wayuu samariajeʼewaikai, chi nikirajakai achiki Jesuu. Amülialaasü naaʼin naalin wanee judío outapünaakai sutuma kaʼruwarannuu jee nükaalinjain nia sünain tü kasa choʼujaakat nümüin (Luc. 10:29-37). Wayaawata aaʼu sünainjee nukuwaʼipa chia wayuukai nümüliajüin waya Jeʼwaa, jama wainmain tü kasa naaʼinrakat wapüleerua. Wanee wayuu amüliajüi eesüjaʼa nnojorüle süsalain wayuu saainjala nutuma niʼrüle nnojoluin choʼujaain maʼin süchekajünüin sümüin. Müsia tü naaʼinrakat Jeʼwaa wapüleerua, «nnojotsü nüchekajüin wamüin tü weʼralakat wayumüin wanaapünaa sümaa tü waainjalakat» (Sal. 103:10). Eepejeʼe süpüla nüchiaain Jeʼwaa wanee wayuu wanaapünaa sümaa tü naaʼinrakat. w21.10 8 püt. 1, 2

Naya neʼe miyoʼuka aalii nüpüla Jeʼwaa na aleewakana nümaa. Watüjaa aaʼu müin tia saaʼujee tü nümakat chi aluwataaikai David otta Daniel chi nünüikimaajachikai Maleiwa. Anuu nünüiki David: «Ayataʼaya miyoʼuin naalin püpüla na eʼraajakana pukuwaʼipa» otta «eekajasaʼa na kojutkana amüin Jeʼwaa, aijeena naya nüpüla süpüla kaʼikat süpüshuaʼa». Otta anuu nünüiki Daniel: «Jeʼwaakalee, chi Maleiwa pülashikai maʼin, [...] sümaa miyoʼuin naalin nüpüla na aikana apüla nia jee na aaʼinrakana tü pütchi nuluwataakalü anain» (Sal. 36:10; 103:17; Dan. 9:4). Wayaawatüitpa saaʼu nayain miyoʼuin aalin nüpüla Jeʼwaa na aʼyataakana nümüin süka neʼraajüin nukuwaʼipa, kojutuin naya nümüin, alin nia napüla jee naaʼinrüin tü nuluwataakalü anain. Miyoʼu naalin nüpüla Jeʼwaa süka naʼwaajüin nia maʼaka nücheküin shia. Aitüjüliʼiya waya nüpüla Jeʼwaa süpülapünaa waneeküin waʼyataain nümüin (Sal. 104:14). Shiasaʼa woʼttapa sünain aʼwaajaa nia, miyoʼuleesia waalin nüpüla. w21.11 4 püt. 8, 9

Jaʼitairü kasain alatüin wamüin, ayatüshii waya jüüjüüin sümüin tü nümakat Jesuu suluʼu tü pütchi süpülajatkat soʼukai. Eʼnnaajünüshii maʼin maaʼulu na shikiipüʼükana tü iküleesiakalüirua jee wainma wayuu namaakana sümaa müin naʼwaajünakai aaʼin natuma. Wotusü natuma tü iküleesia kaluʼukat naya, noiküin tü karaloʼuta nashajakat, watta saalii nneerü aapünaka namüin otta oonooshii na wayuukana sümaa nanüiki. Eetaayaai meerüin nakuwaʼipa niale Jesuu yalain namaa. Eekajasaʼa wayakana na anoujashii shiimainshiikana, nnojoishii waya oushikajaain süchiirua sukuwaʼipa wayuu. Mayaainjeʼe kojutuin wamüin na laülaakana wapüleerua sünain anoujaa shia woʼunaka achiirua tü nümakat Jesuu, tü makat: «Pawalaawashii jia jüpüshua» (Mat. 23:8-10). Nnojoishii waya aʼwaajüin wayuu jaʼitashi niale wanee shikiipüʼü iküleesia jee niale wanee sülaülashi mma. Nnojoishii sünainpünaain waya tü nanoujakalü anain, nnojoishii sünainpünaain waya poliitika otta nnojoishii waya sünainpünaain nakuwaʼipa na manoujainsaliikana. Naata maʼin wakuwaʼipa noulia (Juan 18:36). w21.10 20 püt. 6, 7

Wulere nukuwaʼipa wanee anoujashi, shiainjatü naaʼinmaaka aleewain maʼin nia nümaa Maleiwa. Süka waküjaliin pütchi nüchiki Jeʼwaa nnojoluinjatüin waaʼinrüin wanee kasa mojuteechika atuma nia (Lev. 19:12; Is. 57:15). Atüjaana aaʼu naʼwaajüin Jeʼwaa na israeliitakana sutuma noonooin sümaa tü nuluwataakalü anain naya. Anuu sünüiki Levítico 18:4: «Jüüjüü jia sümüin tü taluwataakalü anain jia, jaaʼinra tü tamakat jümüin jee joonoo sümaa. Taya tayakai Jeʼwaa chi Jümaleiwasekai». Soʼutku tü nuluwataakalü anain Jeʼwaa na israeliitakana suluʼusü shia kapiitulo 19 wetsiikulo 5-8, 21 otta 22, aashajaasü yala süchiki tü mürüt nasülajüinjatkat. Naapapa tia na israeliitakana nnojoluinjatü naaʼinrüin wanee kasa mojutuinjachikai atuma Jeʼwaa. Sütütüleʼerüin waaʼin wetsiikulokalüirua tüü süpüla waaʼinrüin tü talatüinjatkalü atuma naaʼin Maleiwa otta süpüla waʼwaajüin nia maʼaka nücheküin shia. Tia shia tü sümakat Hebreokana 13:15, TNM. w21.12 5 püt. 14, 15

Jiakana jekenakana kasaalüin, eesü süpüla jüshatüin nakuwaʼipa na eʼitaakana naaʼin nünain Jeʼwaa. Eeshii waneinnua wawalayuu kasaatshii aʼyataakana waneepia nümüin Jeʼwaa soʼu wainma juya. Anashii juchuntule kaalinwaa namüin süpüla juuntuin tü jiʼyataweekalü amüin suluʼu nupueulose Maleiwa. Jaaʼinrüle tia, atüjaaneerü aaʼu jiʼitaain jaaʼin nünain Jeʼwaa (Prov. 22:17, 19). Niʼinaajala Jeʼwaa sukuwaʼipa tü kasaalüükat otta keeʼireesü naaʼin talatüin naaʼin na kasaatshiikana (Mat. 19:5, 6). Jiakana jekenakana kasaalüin, anasü jüsakireʼerüle jaaʼin sünain tü jaaʼinrakat. ¿Jüchajaainche sukuwaʼipa süpüla sütüjaanüin aaʼu kojutuin jümüin tü nüsülajakat Jeʼwaa? Jaashajaa nümaa Jeʼwaa, jikirajaa suluʼu tü Bibliakat tü anainjatkalü atuma jukuwaʼipa otta jaaʼinra tü nümakat Jeʼwaa jümüin. Nnojo motuin jaaʼin jiakana kasaatshiikana, talatajiraajeena maʼin jia jaaʼinmaale jiʼyataain nümüin Jeʼwaa. w21.11 18 püt. 16, 18

Anasü tü jülüjakat naaʼin Santiago nüchikijiraa. Nnojotsü jülüjain naaʼin Santiago kojutuinjachin nia amüiñuu noulia na waneinnua sükajee nuwalain nia Jesucristo otta saaʼujee tü niʼyataainkat. «Tawalayuwaa, jia aishiikana tapüla», müshi nia namüin (Sant. 1:16, 19; 2:5). Nnojotsü nüküjain namüin na waneinnua lotuin maʼin nukuwaʼipa. Watüjaka: Soto waaʼin waleʼeruʼuin wapüshuaʼa kaainjalaa. Nnojoliinjana waya alanaʼaleein noulia na wekirajüinkana. Waaʼinrüle wanee kasa niyaawateetka atuma wanee wekirajüin matüjain waya oʼtchejawaa sümaa kasa, eesü süpüla jülüjain naaʼin nnojoleerüin nuuntuin naaʼinrüin tü nüchekakat Maleiwa. Waküjale nümüin tü isapuʼukat wachiki otta tü naaʼinrakat Jeʼwaa wapüleerua süpüla nükaalinjain waya, niyaawateerü aaʼu eein süpüla naaʼinrüin tü sümakat tü Bibliakat. w22.01 11 püt. 13, 14

Müleka wayaawatüle maʼin saaʼu tü jülüjakat naaʼin Jesús washateerü maʼin tü kasa naaʼinrakat otta tü nukuwaʼipakat (Heb. 1:3). «Loto akuwaʼipachi Jesús, nnojoireejaʼa süpüla müinjachin taya maʼaka naaʼin», eesüjaʼa müle paaʼin. Müle pünüiki, jülüja paaʼin apünüinsü kasa. Palajana, akumajünüshi pia süpüla müin pukuwaʼipa maʼaka naaʼin Jehová otta Jesús. Müsüjeseʼe eein süpüla püshatüin nakuwaʼipa (Gén. 1:26). Tü piamakat shia eein süpüla nükaalinjain pia Maleiwa sükajee tü nüpülainkat. Nnojotsü eein wanee kasa pülaleeka maʼin suulia tü nüpülainkat Jehová. Apünüin, nütüjaa aaʼu Jehová nnojoleerüin pansaashaatain maʼin watuma washatüin tü akuwaʼipaa eekat sutuma tü nüpülainkat. Jülüja paaʼin niʼitaain Jehová 1.000 juya süpüla lotuinjatüin maʼin nakuwaʼipa na wayuu katüinjanakana oʼu yaa mmapaʼa (Alat. Map. 20:1-3). Tü keeʼireekat naaʼin Jehová wapüleerua maaʼulu yaa shia waaʼinmaainjatüin maʼin washatüin nukuwaʼipa Jesús otta weʼitaainjatü waaʼin sünain nükaalinjeenain waya. w22.03 9 püt. 5, 6

Nnojotsü shiain neʼe aleeweenain atuma waya nümaa Jeʼwaa woʼuraajüle nümüin. Wane kasaʼaya aleeweenaka atuma waya nümaa shia wekirajaale sünain tü Bibliakat otta woʼunule sünain tü outkajawaakat. ¿Eesüche wanee kasa waaʼinrajatka süpüla jülüjain maʼin waaʼin tü wekirajaakalü anain wamüiwaʼa otta tü wekirajaakat sünain tü outkajawaakat? Wasakira waaʼin sünain tüü: «¿Kasache nnojoleetka waaʼinmaain atuma shia?». Eesüjaʼa shiale sutuma wayamaajünüin, suluwataanüle wamüin correo jee shiale mensaaje suluʼupünaa waserulaatse. Wanaa sümaa wekirajaain wamüiwaʼa sünain tü Bibliakat jee shiale sünain tü outkajawaakat otta wattale waaʼin suulia, wachunta kaalinwaa nümüin Jeʼwaa. Eere tü kasa shapaakalü atuma waaʼin, kapüleejeerü wamüin waaʼinmaain tü wekirajaakalü anain. Anasü wachajaale maʼin sukuwaʼipa süpüla waaʼinmaain tia. Woʼuraaja nümüin Jeʼwaa süpüla naapüin anaa wamüin, tü aneetkalü atuma waaʼin otta tü jülüjakat waaʼin (Filip. 4:6, 7). w22.01 29 püt. 12-14

Niyoutajaa amaa Uzías chi aluwataaikai tü achiaanakalü oulia nia. Soʼu wanee kaʼi ekerotushi nia suluʼumüin tü aʼwaajüleekat süpüla naʼajüin wanee wunuʼu jemeta eejuu, nayainjana neʼe na sacerdotekana aaʼinrüin tia. Namakalaka na sacerdotekana nümüin: «Uzías, nnojotsü aapünüin shikii pümüin piainjachin aʼajüin wunuʼu jemeta eejuu nümüin Jehová. Nayainjana neʼe namüiwaʼa na sacerdotekana aʼajüinjanaka tia wunuʼu jemetaka eejuu». Jashichikalaka maʼin nia saashin tü Bibliakat. ¿Jamüsü niyoutajaaka amaa tü achiaanakalü oulia nia? Eesüjaʼa jülüjale naaʼin eein süpüla naaʼinrüin tia süka niain chi aluwataaikai, mojushiipejeʼe tia nümüin Jehová. Nnojorüle yaletüin naaʼin Uzías, naapaainjee amaa tü achiaanakalü oulia nia jee oʼunamaatüshijee nia suluʼujee tü aʼwaajüleekat, motusüjee naaʼin Jehová naainjala. Süka niʼrülin wayumüin nümüin Jehová, nüntirüin wanee ajaʼtta ata nünainmüin jee outushi nia suluʼu müin nukuwaʼipa (2 Crón. 26:16-21). ¿Kasa watüjaka sünainjee tü alatakat nümüin Uzías? Shia nnojoleerüin anain wakuwaʼipa noʼuluʼu Jehová wayoutajaale sümaa tü sümakat tü Bibliakat jaʼitasü kasain aʼyatawaa wajapuluʼuin. w22.02 9 püt. 7

Chi wayuu ayatakai keejiain amüin tü kasa mojusükat shia jülüjaka naaʼin jee naaʼinrüin tü kasa mojusü suchuntaakat naaʼin (Col. 3:9). Eeshijaʼa nnojoire jameein nia, kapürale naaʼin nukuwaʼipa neʼe nümüiwaʼa, matüjainre aapaa analuʼut jee yaletüle naaʼin. Eesü kamalainre nümüin nünajüin shiyaakua wayuu maichesat jee amaʼüjiraasü sukuwaʼipa jee shiale peliikula süchikimaajatka atkawaa. Eesüjaʼa mojule naaʼin saalinjee tü naaʼinrakat jee eesüjaʼa naaʼinrüle waneirua kasa anasü. Choʼujaapejeʼe nümüin keeʼireein maʼin naaʼin nunouteʼerüinjatüin tü jülüjakat naaʼin jee tü naaʼinrakat (Gal. 5:19-21; 2 Tim. 3:2-5). Süka waleʼeruʼuin tü kaainjalaakat isasü wachiki wasünneʼerüin süpüshuaʼa tü kasa mojusü jülüjakat waaʼin jee tü suchuntaakat waaʼin. Eejeerü kaʼi waaʼinreetka jee wameetka wanee kasa nnojotka anain mojeetka atuma waaʼin (Jer. 17:9; Sant. 3:2). Süka wooʼulaainnapain suulia tü kasa mojusü keejiapuʼukat wamüin nnojoleena waya jooin süpüla mojuin wakuwaʼipa jee aaʼinraa kasa mojusü. Jee nnojoleena waya eʼnnaajünüin suluʼu wayuuin makana akuwaʼipa (Is. 55:7). w22.03 3 püt. 4, 5

Jia laülaashiikana, jülüja jaaʼin tü kasa anasü eekat sünain nakuwaʼipa na wawalayuukana. Mayaainjeʼe nnojoluin lotuin maʼin nakuwaʼipa, wainma tü kasa anasü naaʼinrakat. Eejeetpejeʼe wanee kaʼi jüchiaainjachika oʼu wanee wawala. Jaaʼinrüinjatüle tia jülüjainjatü maʼin jaaʼin tü kasa anasü naaʼinrakat na wawalayuukana suulia tü mojukat natuma, maʼaka saaʼin alin Jehová napüla, ayatüin naʼyataain nümüin Maleiwa soʼunnaa tü alatakat namüin otta eein süpüla nanouteʼerüin nakuwaʼipa. Na laülaashii aaʼinrakana tia, anasü nakuwaʼipa na wawalayuukana natuma, jama aijiraain naya. Soto jaaʼin nütüjaain saaʼu Jehová nnojoluin lotuin maʼin jukuwaʼipa, keeʼireepejeʼe maʼin naaʼin waneepiain jia nümaa (1 Cor. 4:2). Anasü jütüjaale saaʼu kojutuin nümüin tü jaaʼinrakat, süküjain Hebreokana 6:10 «nnojoleerüin motüin naaʼin tü kasa anasü jaaʼinrakat jiiʼiyatakat aka nümüin tü naaliikat jüpüla. Sotüshii jia naaʼin sünain jiʼyataain paala je sünain ayatüin jia aʼyataain sünain akaalinjaa tü nüchooinkalüirua». w22.03 31 püt. 19, 21