Nowienpüroʼu

Nükaalinjain waya Jeʼwaa süpüla waküjainjanain pütchi sümüin wayuu eekai jashichin wamüin. Akaʼaya nia, nükaalinjain waya süpüla sotojooin waaʼin waneirua pütchi suluʼuka tü Bibliakat süpüla waküjain shia nümüin wanee wayuu eekai naapajeein tü pütchikat. Jee müshia nia, nükaalinjain waya süpüla ayatüin waküjain pütchi eere kepiain wayuu mamalainka amüin tü pütchikat (Jer. 20:7-9). Anamia Jeʼwaa wamüin süka nikirajüin waya süpüla watüjainjanain aküjaa pütchi. Eeʼiyatünüsü wamüin waneirua akuwaʼipaa süpüla watüjainjanain aküjaa pütchi sünain tü outkajawaakat Wakuwaʼipa otta Waʼyataain nümüin Maleiwa. Eeshiijaʼa mmorüle waya süpüla wooʼulaküin wanee jeketü sukuwaʼipa waküjia pütchi. Shiasaʼa wooʼulakapa tia, anasü waaʼin weʼrapa naapajeein na wayuukana tü pütchikat. Aküjünawaisü wamüin sünain tü outkajawaakat jee sünain tü outkajawaakat miyoʼu süpüla wooʼulaküin waneirua sukuwaʼipa süküjia pütchi nnojotpuʼuka waaʼinrüin. w21.08 27 püt. 5, 6

Chi aluwataaushikai Pablo nüshajüin wanee karaloʼuta namüin na corintojeʼewaliikana süpüla nüchiaain naya. Shiasaʼa mapa, nüjütüin Tito namaʼanamüin süpüla nütüjaain saaʼu müleka naapaale sümaa tü nüchiaakalü oulia naya. Talatakajasaʼa naaʼin Pablo nütüjaapa saaʼu naapaain sümaa tia (2 Cor. 7:6, 7). Eesü süpüla nashatüin nukuwaʼipa Pablo na laülaashiikana namaale naya na wawalayuukana. Wanee sukuwaʼipa süpüla naaʼinrüin tia shia nantüle maalü sünain tü outkajawaakat süpüla natütüleʼerüin naaʼin na wawalayuukana. Jaʼitashii yootule motsomüin nümaa wanee wawala, eeshii süpüla natütüleʼerüin naaʼin (Roma 1:12). Na laülaashii ashatakana nukuwaʼipa Pablo, natütüleʼerüin naaʼin na wawalayuukana otta naküjain alin naya nüpüla Jehová sükajee tü sümakat tü Bibliakat. Anasü jülüjale naaʼin tü kasa anasü naaʼinrakat na wawalayuukana süpüla naküjain shia namüin. Müleka nüchiaainjachire wanee laülaashi wanee wawala, naaʼinrüinjatü tia wanaapünaa sümaa tü sümakat tü Bibliakat. Süka keeʼireein naaʼin naapaainjatüin chi wawalakai sümaa tü nachiaakalü oulia nia, lotuinjatü nanüiki otta nnojoluinjatü airuʼuluin nanüiki nümüin (Gal. 6:1). w22.03 29 püt. 11, 12

Maaʼulu yaa nükatchinrüinya waaʼin Jeʼwaa süpüla ayatüinjanain waʼyataain nümüin waneepia. Nükatchinrüin waaʼin Jeʼwaa wanaa sümaa waashajaain nümaa. Anuu nünüiki chi aluwataaushikai Pablo: «Anakaja müleka jüchecherüle jaaʼin sünain achuntaa nümüin chi Maleiwakai» (Éf. 6:18). Waaʼinrüle tia nükatchinreerü waaʼin Maleiwa. Sutuma kapüleein tü alatakat wamüin, eesü kapüleere waküjain tü suluʼukat waaʼin nümüin Jeʼwaa. Anapejeʼe nümüin Jeʼwaa waküjale jamüin waaʼin, jaʼitairü isain wachiki tü wanüikinjatkat nümüin (Roma 8:26, 27). Nükatchinrüin waaʼinya Jeʼwaa sükajee tü Bibliakat. Maʼaka naaʼin Pablo eesü süpüla waashajeʼerüin wanee pütchi suluʼujee tü Nünüikikat Maleiwa süpüla sükatchinrüin waaʼin jee sümülialüin waaʼin (Roma 15:4). Wanaa sümaa waashajeʼerüin wanee wetsiikulo sümaa wasakireʼerüin waaʼin sünain, nükaalinjeena waya Jeʼwaa süpüla watüjain süpüleerua tü wakuwaʼipainjatkat sünain tü kasa alatakat wamüin (Heb. 4:12). w21.05 22 püt. 8-10

Watüjaa aaʼu choʼujaain maʼin wekirajüin wayuu sünain tü Bibliakat, eepejeʼe waneirua kasa kapüleʼewaika aaʼujee wamüin wekirajüin naya. Eesü isale wachiki waaʼinrüin tü keeʼireekat waaʼin saaʼujee wakuwaʼipa. Eeshii na wawalayuu laülaayuuinnakana jee ayuuikana. ¿Müsüche wakuwaʼipa mayaa? Soto waaʼin eein süpüla wekirajüin wayuu suluʼupünaa teleepono jee Internet. Sutuma tia pütüjaa aaʼu eein süpüla pikirajüin wayuu pipialuʼujee. Eesüjaʼa eere wayuu ekirajaweeka sünain tü Bibliakat wattaʼa maalü jee shiale aipaʼa. Isapejeʼe nachiki na wawalayuukana nekirajüin naya süka nnojoluin shiain tü oora naküjakalü oʼu pütchi. ¿Eeshiiche süpüla wekirajüin naya? Ekirajünüshi Nicodemo nutuma Jesuu aipaʼa süka shiain tü oora anakalü oʼu nümüin Nicodemo (Juan 3:1, 2). w21.07 5 püt. 10, 11

Ponusü maʼin naaʼin na nümaajanakana Juan chi Awoutisaajüikai süka nnojoluin naamajüin na nikirajüinkana Jesuu. Nüküjain Jesuu namüin nnojoluin choʼujaain naamajüin na nikirajüinkana süka nnojoluin mojuin naaʼin, eeyüiya nia namaa (Mat. 9:14-17). Mayaainjeʼe müin nünüiki Jesuu, eeshii na fariseokana jee waneinnua wayuu mojushiikana amüin tia süka nnojoluin nuʼunuin Jesuu süchiirua tü nakuwaʼipakat jee tü nekirajakalü anain. Aashichijaashii naya neʼrapa Jesuu sünain niiyajüin wayuu eekai ayuulin «sükalioʼu eemerawaa» (Mar. 3:1-6; Juan 9:16). Naya wayuukana aʼwaataashii suluʼu naaʼinrüin naajüin tü Pütchi Aapünakat nümüin Moisés jee nnojotsü mojushiin namüin noiküin jee nayaʼlajüin kasa suluʼu tü aʼwaajüleekat Maleiwa. Müsüjeseʼe alin namüin nüküjapa Jesuu mojuin tü naaʼinrakat (Mat. 21:12, 13, 15). Wanaa sümaa nikirajüin Jesuu suluʼu tü ekirajülee Judío chajatkat Nazaret, aashichijaashii naya nümüin Jesuu süka nüküjain tü kasa anasü naaʼinrapuʼukat na nünüikimaajanakana Maleiwa jee süka nüküjain namüin kapülain naaʼin nakuwaʼipa neʼe namüiwaʼa jee manoulain naya (Luc. 4:16, 24-30). Wainma na nnojoliikana anoujain nünain Jesuu saaliijee nnojoluin nüshatüin nakuwaʼipa na judíokana (Mat. 11:16-19). w21.05 5 püt. 13, 14

Nüshajirüin Jeʼwaa suluʼu tü Bibliakat nachiki waneinnua wayuu yaletakana aaʼin jee kachiiruakana aaʼin wanee kasa. Naainjain tia süpüla nnojoluinjatüin washatüin nakuwaʼipa. Waapapa nüchiki wanee wayuu eekai kachiiruain naaʼin wainma kasa, eeshi niale jülüjain waaʼin Satanaa. Niaiwa wanee aapiee anamia wainmapuʼu maʼin tü aʼyatawaa anasü naapakat Jeʼwaa nümüin. Nnojotpejeʼe talatüin naaʼin sümaa tia. Keeʼireesü naaʼin niainjachin aʼwaajünüin nuulia Jeʼwaa. Nücheküin Satanaa meein wakuwaʼipa maʼaka naaʼin niakai, nnojotsüjeseʼe keeʼireein naaʼin talatüin waaʼin sümaa tü kasa eekat wamaʼana. Tü palajatkat wayuu nimeejüin shia Eva. Nüküjain Jeʼwaa sümüin Eva otta nümüin Adán eein süpüla neküin süpüshuaʼa süchon tü wunuʼu eejatkat suluʼu tü apainkat, waneesia neʼe tü nüpülajakat noulia (Gén. 2:16). Emeejünüsü Eva nutuma Satanaa süpüla shiküinjatüin tü wunuʼu nüpülajakat Maleiwa. Nnojotsü talatüin saaʼin Eva sümaa tü kasa eejatkat sümaʼana, keeʼireesü saaʼin sooʼomüin. Mojusü maʼin tü alatakat sümüin Eva, kaainjalasü jee outusü shia (Gén. 3:6, 19). w21.06 14 püt. 2, 3; 17 püt. 9

Müleka naaʼinrüle Adán sümaa Eva tü nuchuntakat Jeʼwaa napüleerua, ayatüshiije naya nüpüshin. Nüchoinpuʼushii Jeʼwaa Adán sümaa Eva otta kojutupuʼushii naya nutuma. Anuu nünüiki David suluʼu Salmo 8:5 nachiki na wayuu nukumajakana Maleiwa: «Pukumajüin na wayuukana sünain meematüin nakuwaʼipa maʼaka naaʼin nakuwaʼipa na aapieekana otta kojutuleeshiʼiya naya putuma noulia sümaa anain maʼin naya poʼuluʼu». Nnojotsü wanaawain wakuwaʼipa namaa na aapieekana suluʼu pülain waya jee wainmain tü kasa watüjakalü apüleerua (Sal. 103:20). Mayaainjeʼe nnojoluin wanaawain wakuwaʼipa namaa na aapieekana, anashaatasü maʼin nukuwaʼipa Adán sümaa Eva nutuma Jeʼwaa. Saaʼujee nnojoluin noonooin Adán sümaa Eva sümüin nünüiki Jeʼwaa nnojoliinnapa naya nüpüshin. Mojukalaka nakuwaʼipa na nooʼuliwoʼukana sünainjee tia naaʼinrakat. Ayateeria naaʼinrüin Jeʼwaa tü keeʼireetüjütkalia naaʼin napüleerua na wayuukana. Keeʼireesü naaʼin nüchoinjanain waneepia na oonookana sümaa nünüiki. w21.08 2 püt. 2-4

Maaʼulu yaa, wainma aʼyataakana nümüin Maleiwa apüleeruaanakana aaʼin saaʼujee nanoula. Eeshii na kepiakana suluʼu waneirua mma eere süpülajünüin waʼyataain nümüin Maleiwa. Amaanüshii naya laülaapialuʼumüin otta apüreesajinnüshii naya. Sükajee tia alatakat namüin, eeshii süpüla naküjain pütchi nüchiki Jehová namüin na aluwataaliikana saaʼu mma (Mat. 10:17, 18). Eeshii wawalayuu kepiakana suluʼu wanee mma eere nnojoluin süpülajünüin tü waʼyataainkat nümüin Maleiwa, eepejeʼe süpüla napüleeruaanüin aaʼin natuma napüshi saaʼujee nanoujain (Mat. 10:32-36). Eepejeʼe süpüla nooʼulaain suulia jashichin namüin na napüshikana saaʼujee ichein nanoula otta eeshii noʼutku napüshi anoujakana mapa nünain Jehová. Nnojotkalaka anain sümalajaale punoula müle pia atumawaa. Yalayala paaʼin süka eein Jehová pümaa otta naapüin pümüin tü nüpülainkat. Anasüjeseʼe nnojorüle piimolojooin. w22.03 16 püt. 8

Saashin tü Bibliakat nülerajüin Jehová chi eekai yaletüin naaʼin, nüküjain alawaa otta nuʼutuin saaʼin wayuu (Prov. 6:16, 17). Otta nülerajüin chi eekai mojulaain jee emeejülin (Sal. 5:6). Müsüjeseʼe najaʼttirüin Jehová tü wayuu mojulaasükalüirua eejatka nükalioʼu Noé, jama jouluin maʼin mojulawaa (Gén. 6:13). Otta wane kasaya nülerajaka Jehová shia nimeejüle wanee wayuu nuʼwayuuse shiiʼiree nuuʼulaain shia. Nüküjain Jehová nükajee Malaquías, wanee nünüikimaajachi, niyoutuin nuʼwaajünüin natuma wayuu makana akuwaʼipa otta asouteenain naya saaʼu naainjala (Mal. 2:13-16; Heb. 13:4). «Jüleraja tü kasa mojusükat», müshi Jehová (Roma 12:9, TNM). Tü pütchi «alerajaa» makat shia wayoutashaatüle wanee kasa. Müinjatia watuma walerajüinjatü tü kasa nülerajakat Jehová. w22.03 4 püt. 11, 12

Wainmeerü maʼin tü kasa anasü weʼreetkat nuluwataapeena Jeʼwaa yaa saaʼu tü mmakat. Na wayuu ayatakana eʼitaain naaʼin nünain Jeʼwaa, wainmeerü kasa anasü neʼreetka maaʼulu jee mapeena. Suluʼupa waya tü paʼaraiisükat müiria nnojoluin shapaain waaʼin otta nnojoleerü weʼrüin tü alatakat wamüin maaʼutpünaa. Müiria nnojoluin aainjünüin kasa mojusü otta müiria nnojoluin eein müliaa (Alat. Map. 21:4). Nnojoleerü shapaain waaʼin saaʼujee wanee kasa, jama eejeerüin wamaʼana tü choʼujaakat wamüin (Sal. 72:16; Is. 54:13). Kasataalejeseʼe süntamaatüin tia kaʼikat. Sümaʼinruʼu wanouteʼerüin wakuwaʼipa jee jaʼyain waaʼu tü akuwaʼipaa anasükat, yapashii waya nutuma Jeʼwaa süpüla kepiainjanain waya saaʼu tü mmakat nuluwataapeena saaʼu. Nnojo pümalajaain aaʼin, anashaateerü maʼin wakuwaʼipa soʼu palit kaʼi. Müsüjeseʼe anain maʼin ayatüle weʼitaain waaʼin nünain Jeʼwaa sümaa talatüin waaʼin sümaʼinruʼu nikeraajüin tü nümakat. w21.08 13 püt. 17-19

Anataʼaleesüjaʼa maʼin tü nümakat chi aluwataaushikai Pablo namüin. Maʼaka jeʼra kaʼi süchikijee naapüin tia pütchikat na anoujashii kepiakana Judea, napütüin nepia, naʼyataain otta napüshi manoujainkana süpüla naʼluwataainjanain saʼakamüin uuchi (Mat. 24:16). Soʼunnaa kaʼikat tia, choʼujaashii nakaalinjiraainjanain napüshuaʼa. Naaʼinrapuʼule tü nümakat Pablo namüin, mapüleejeerü namüin nakaalinjiraain soʼu tia. Eesüjaʼa nnojorüle naküjawalin wamüin na wawalayuukana kasain choʼujaain nakaalinjünüin anain. Müsüjeseʼe kamaneeinjana waya namüin. Eeshii waneinnua wawalayuu tooloyuu jee jieyuu outkajaakana wamaa akaalinjeekana na waneinnua süka naaʼin namüiwaʼa, nnojoishii nakaalinjain waya mojusheeka. Watüjaa aaʼuchii jüüjüüin naya wachuntule kasa namüin, washateein nakuwaʼipa. w22.02 23 püt. 13-15

Jekenainka, süpüla nnojoluin sukumajünüin waneirua Piichi Outkajaalee, süneeküin tü nupueulosekat Jehová nalatinnajanain waneinnua wawalayuu naʼakamüin waneinnua. Sülatüle wamüin tia, kapüleejeerü wamüin wapütüin wapüshi jee waʼaleewainyuu. ¿Nüküjainche Jehová namüin na laülaashiikana jalainjanain noutkajaain na wawalayuukana waneʼewai nakua? Nnojo, nnojotsü nüküjain tia. Sünainjee tia kapüleejeerü wamüin jüüjüüin waya sümüin tü naluwataakalü anain na laülaashiikana. Niʼitaapejeʼe naaʼin Jehová sünain anain tü kasa naneekakat na laülaashiikana, müinjanaʼaya wayakana. ¿Jamüshii jüüjüüinjanaka waya sümüin tü naluwataakalü anain waya na laülaashiikana mayaainjeʼe kapüleein shia wamüin? Shia süka paaʼinwajiraajeenain waya namaa na wawalayuukana. Otta müsia aneerü nakuwaʼipa na wawalayuukana nnojorüle yaletüin waaʼin jee jüüjüüle waya sümüin tü naneekakat na laülaashiikana (Heb. 13:17). Tü alanaʼaleekat maʼin sünain anain shia jaʼyeerüin waaʼu weʼitaain waaʼin nünain Jehová, jama nüneeküin na laülaashiikana süpüla naaʼinmajüin waya (Aluw. 20:28). w22.02 4 püt. 9, 10

Woutiisaichire pia, püchajaa sukuwaʼipa süpüla pütüjain aashajawaa jee ekirajaa. ¿Jamüsü anaka paaʼinrüle tia? Shia süka mapüleejeerüin pümüin pükaalinjain na wayuu aapajakana pünüiki (1 Tim. 4:15). Eesü süpüla pikirajaain sünain waneʼewai sukua tü aküjünakat suluʼu tü poyeetokot Ayata pia sünain aashajeʼeraa otta ekirajaa. Eesü süpüla puuʼulaküin palajana chaa pipialuʼu jee puuʼulakeetka shia pikirajapa na wawalayuukana. Puchunta kaalinwaa nümüin chi wawala niʼipajachikai chi sülaülakai tü outkajawaakat jee nayale na laülaashii atüjakana ekirajaa wayuu (1 Tim. 5:17). Nnojotsü neʼe pütüjaainjatüin süpüleerua tü ekirajaaya suluʼukat tia poyeetokot, shia anaka aluʼu pükaalinjale na aapajakana pünüiki süpüla naaʼinrüin tü naapajakat. Paaʼinrüle tia, talateechi maʼin pia jee talateena na aapajakana pünüiki. w21.08 24 püt. 17

Kojutule wamüin na wawalayuukana nnojoleerü wayoujireʼerüin tü kasa waaʼinrakat sümaa tü naaʼinrakat otta tü natüjakat woulia. Anakajaʼa talatüle waya namaa saaʼu naʼyataain nümüin Jeʼwaa süka tü natüjakalü apüleerua. Sutuma tia, eʼreena waya anaa otta paaʼinwajiraajeena waya namaa na wawalayuukana. Süpüla nnojoliinjanain wachumujüin wayaawatüinjatü saaʼu eein tü kasa isakat wachiki. Nnojoleerü waaʼinrüin kasa eekai süpüla jülüjain atuma naaʼin na waneinnua wayain alanaʼaleein noulia. Shia anaka aluʼu watüjale nanainjee na wawalayuukana. Jamüshijaʼa eere wanee wawala atüjakai eʼikaa na wawalayuukana, eeshii süpüla wachuntuin kaalinwaa nümüin matüjainre waya eʼikaa. Jamüshiijaʼa matüjainre waya aʼlakajawaa, eesü süpüla wachuntuin kaalinwaa sümüin wanee wawala eekai sütüjain süpüla shikirajüin waya. w21.07 16 püt. 8, 9

Waashajeʼerüle suluʼu tü karaloʼutakat Números, watüjaweerü aaʼu nuʼutirüin naaʼin Jehová wanee israelita saalinjee nusukuin siki soʼu tü kaʼi neemeraainjatkalü oʼu na israelitakana. Otta waashajeʼerüle süchiki tü alatakat kojuya juya mapa suluʼu tü karaloʼuta chiiruaajatkat Samuel, watüjaweerü aaʼu motuin naaʼin Jehová naainjala David mayaainjeʼe nümaʼüjiraain nukuwaʼipa jee uwomuyuuin nia (Núm. 15:32, 35; 2 Sam. 12:9, 13). Eesüjaʼa süpüla wasakirüin waaʼin sünain tüü: «¿Jamüsü motoko naaʼin Jehová naainjala David eerejeʼe kashüülain tü naaʼinrakat suulia tü naaʼinrakat chi wayuu asukakai siki?». Nnojotsü süküjain tü Bibliakat süpüshuaʼa tü alatakat. Watüjaa aaʼu shiimain niyaawajaain David suulia naainjala (Sal. 51:2-4). Nnojotpejeʼe süküjain tü Bibliakat süchiki nukuwaʼipa chi wayuu asukakai siki soʼu tü kaʼi neemeraainjatkalü oʼu na israelitakana. ¿Mojusüche maʼin naaʼin saalinjee naainjala? ¿Eʼrüijaashiche wayumüin nümüin Jehová paala? ¿Macheʼeisache nia sümüin tü achiaanakalü oulia nia? Nnojotsü süküjain tia tü Bibliakat. Watüjaapejeʼe saaʼu lotuin nukuwaʼipa Jehová «sünain süpüshuaʼa kasa» (Sal. 145:17). w22.02 2 püt. 3, 4

Anasü nukuwaʼipa chi wayuu ayaawatakai saaʼu eein tü kasa isakat nüchiki naaʼinrüin. Sutuma müin nukuwaʼipa, talatüshi nia jee naaʼinrüin süka süpüshuaʼa naaʼin tü aʼyatawaa aapünakat nümüin. Tü nukuwaʼipakat wanee wayuu ayaawatakai saaʼu tü kasa isakat nüchiki naaʼinrüin, müsü aka saaʼin nukuwaʼipa wanee wayuu oʼuniraka kemion saaʼupünaa wanee uuchi. Nütüjaa aaʼu nnojoluin nuʼwateʼerüinjatüin tü kemionkat sümaʼinruʼu noʼoteʼerüin saaʼupünaa tü uuchikat. Müinjatü joo nukuwaʼipa chi wayuu ayaawatakai saaʼu tü isakat nüchiki süpüla ayatüin nia sünain aʼyatawaa nümüin Maleiwa jee sünain ekirajaa na waneinnua (Filip. 4:5). Waashajaa süchiki nukuwaʼipa Barzilái, 80 nuuyase wanaa sümaa nuunejaanüin nutuma David süpüla niʼipajanainjachin nia sünain aluwatawaa. Nüküjaka nümüin David niain kettaain Kimham süpüla nümaainjachin niiʼirakaluʼu, jama jimaʼalin nia nuulia (2 Sam. 19:35-37). Talatüsü naaʼin na wawalayuu laülaayuukana süka nayain na joʼuukana noulia neeʼirakaluʼuin sünain wanee aʼyatawaa maʼaka naaʼinrüin shia Barzilái. w21.09 10 püt. 6, 7

Eesü kapüleere wamüin müin Jeʼwaa maʼaka naaʼin wanee Washi wamüin aikai apüla waya. Eesüjaʼa müle wakuwaʼipa sutuma sukuwaʼipa wepijia. Anasü waaʼin süka niyaawatüin saaʼu Jeʼwaa jamüin waaʼin otta keeʼireein naaʼin aleewain nia wamaa. Anuu tü sümakat tü Bibliakat: «Müleka jürütkaale nünainmüin Maleiwa, arütkaajeechi nia jünainmüin» (Sant. 4:8). Aishii waya nüpüla Jeʼwaa otta nüküjain wamüin niain anain süpüla Washin. Nükaalinjain waya Jesuu süpüla aleewain maʼin waya nümaa Jeʼwaa. Niʼraajüin maʼin Jesuu nukuwaʼipa Jeʼwaa jee nüshatüin shia. Anuu nünüiki: «Chi eekai niʼrüin taya, niʼrüin chi Tashikaʼiya» (Juan 14:9). Sutuma müin Jesuu maʼaka naaʼin wanee wepaya wamüin, nikirajüin waya süpüla kojutuinjachin wamüin chi Washikai Jeʼwaa, woonooinjanain sümaa tü nümakat jee nüküjain wamüin tü waaʼinrajatkat süpüla talatüin nia wamaa otta anain wakuwaʼipa noʼuluʼu. Atüjaana aaʼu anamiain Jeʼwaa jee aipüralin nia sünainjee tü naaʼinrakat Jesuu wanaa sümaa yaajachin nia mmapaʼa. w21.09 21 püt. 4, 5

Paaʼinwashii waya sünain aʼyatawaa nümüin Jehová. Niʼitaain Jehová na laülaashiikana süpüla nakaalinjain na wawalayuukana süpüla wulein nakuwaʼipa. Müleka eere wanee wawala eekai kaainjalain, keeʼireesü naaʼin Jehová naneeküin na laülaashiikana ayatüinjachire chia kaainjalashikai naʼaka na wawalayuukana. Nachajaainjatü sukuwaʼipa shiimainrejeʼeya niyaawajaain suulia naainjala. Jülüjeesü naaʼin pütchikalüirua tüü: mayaainjeʼe nüküjain chia anoujashikai niyaawajaain suulia naainjala, ¿shiimainchejeʼe nülerajüin tü kasa naaʼinrakat? ¿Ayaawatüna aaʼuche nnojoleerüin naaʼinrüin tia piantua? Kaainjarale nia sutuma naʼaleewajaain sümaa wayuu mojulaasü, ¿nnojoleeiche aʼaleewajaain nüchikuaʼa namaa? Oʼuraajüshii na laülaashiikana, jülüjasü naaʼin tü alatakat süpüla nekirajaain sünain tü sümakat tü Bibliakat süchiki tia otta jülüjasü naaʼin jamüin naaʼin chi anoujashikai saalinjee naainjala. Nayaawateetkalaka saaʼu eere süpüla nojuʼitirüin jee nnojoluinjachire nojuʼitirüin nia naʼakajee na wawalayuukana (1 Cor. 5:11-13). w22.02 5 püt. 11, 12

Jaʼitainna jekenain jee kakaliainnale waya woutiisain, aneesü wakuwaʼipa wapüshuaʼa noʼuluʼu Jehová. Süpüla wountuin tia, eejeesü waaʼin suulia tü jülüjakat waaʼin. Waaʼinrüinjatü tia süka sünainpünaain wakuwaʼipa tü jülüjakat waaʼin. Jülüjale waaʼin tü kasa mojusü suchuntaakat waaʼin, mojeerü wanüiki otta waaʼinreerü kasa mojusü (Éf. 4:17-19). Eekajasaʼa jülüjale waaʼin süchiki kasa anasü, aneerü tü waashajaakalü achiki otta tü kasa waaʼinrakat nüpüleerua chi Washikai Jehová (Gal. 5:16). Eejeerü kaʼi jülüjeetka oʼu waaʼin kasa mojusü. Eepejeʼe süpüla nnojoluin waaʼinrüin shia. Süpüla woutiisain waya, ooʼulaashii waya suulia aashajawaa jee aaʼinraa kasa mojusü nülerajaka Jehová. Tia shia tü palajatkat kasa waaʼinrüinjatka süpüla wooʼulaain suulia tü kasa mojusü keejiapuʼukat wamüin. Anuu sooʼomüin tü kasa waaʼinrüinjatkat süpüla talatüinjachin maʼin Jehová wamaa: weeʼiratüinjatü wakuwaʼipa. w22.03 8 püt. 1, 2

Süka nnojoluin natüjaain saaʼu na laülaashiikana tü suluʼukat naaʼin wanee wayuu, kapüleesü namüin nayaawatüin saaʼu shiimainre niyaawajaain wanee anoujashi suulia naainjala. Nachajaainjatü maʼin sukuwaʼipa süpüla natüjaain saaʼu nuuʼulaale suulia naainjala chi kaainjalashikai otta nülerajüle shia. Süpüla nayaawatüin saaʼu na laülaashiikana shiimainre niyaawajaain suulia naainjala, neʼrüinjatü nunoutuin nukuwaʼipa. Eesüjaʼa kapüleere nümüin nunoutamaatüin nukuwaʼipa jee kakalieerüin süpüla sütüjaanüin aaʼu shiimainre niyaawajaain suulia naainjala. Nujuʼitinnüle wanee wawala naʼakajee na wawalayuukana, ¿kasa naaʼinrajatka shiimainre niyaawajaain suulia naainjala? Oʼunuinjachi nia waneepia sünain tü outkajawaakat, oʼuraajüinjachi nia otta ekirajaainjachi nia sünain tü Bibliakat maʼaka naküjain na laülaashiikana nümüin. Eejüinjatü naaʼin suulia naaʼinrüin süchikuaʼa tü kasa kaainjalakalü atuma nia. Nüchajaale sukuwaʼipa süpüla anajiraain nia nüchikuaʼa nümaa Jeʼwaa, moteerü naaʼin Jeʼwaa naainjala otta nakaalinjeechi nia na laülaashiikana süpüla naʼakain nia nüchikuaʼa na wawalayuukana. w21.10 5 püt. 16-18

Chaiwaʼaya Jesuu chaa iipünaa otta yaaiwaʼaya nia yaa mmapaʼa, nia neʼe nuʼwaajaka Jeʼwaa süka alin nia nüpüla (Luc. 4:8). Otta nikirajüin na nikirajüinkana süpüla naaʼinrüinya tia jee nnojoishi naʼwaajüin Jeʼwaa sükajee shiyaakua wanee kasa. Sutuma meʼrujuin Maleiwa nnojotsü süpüla nakumajüin na wayuukana wanee niyaakua (Is. 46:5). ¿Jama tü shiyaakua wayuu nakumajakat na wayuukana süpüla noʼuraajüin namüin? Suluʼu tü piamakat pütchi saʼakajee tü Poloosükat Pütchi aapünaka nümüin Moisés aküjünüsü tü pütchi süpülajatkat soʼukai. Na wayuu keeʼireekana aaʼin talatüin Maleiwa natuma, nayaawata aaʼu nnojoluin nücheküin Jeʼwaa nuʼwaajünüin sükajee ayaakuaa. Naashin na ekirajaakana süchiirua sukuwaʼipa wayuu sümaiwajatü, nia neʼe Maleiwa naʼwaajaka na anoujashii namaiwajanakana. Müshiʼiya waya aküjaliikana pütchi nüchiki Jeʼwaa, washatüin nakuwaʼipa na anoujashii namaiwajanakana. w21.10 19 püt. 5, 6

Naapirüin Jesuu na anoujashii kepiakana Judea sünain suukajüneerüin tü pueulokot Jerusalén soʼu wanee kaʼi (Luc. 21:20-24). Sülatapa tia, aʼluwataainjana naya saʼakamüin uuchi. Naaʼinrüle tia, oʼttaajeena naya, napütüinjatpejeʼe nakorolo. Müsüinka wanee rewiisüta Aapiria Wayuu: «Napütüin nepia, noumain otta nakorolo. Süka neʼitaain maʼin naaʼin sünain naapeerüin Jeʼwaa tü kasa choʼujaakat namüin sümaa naaʼinmajeenain naya, naaʼinmaasü maʼin naʼwaajüin Jeʼwaa». Anuu sooʼomüin sünüiki tü rewiisütakat: «Eesüjaʼa waneeküinjatüle soʼu wanee kaʼi wapütüin tü kasa wamaʼanakat sutuma wanee kasa alataka wamüin. ¿Shiache waaʼinmaaka maʼin tü kasa wamaʼanakat? ¿Shiataapa waaʼinmaain maʼin waneepiain waya nümaa Maleiwa süpüla nuʼtteʼerüin waya? Nnojotsü watüjaain maʼin saaʼu jameerüin wakuwaʼipa soʼunnaa tia. Yapeeshii waya süpüla waaʼinrüinjatüin tü achuntuneetkat wamüin soʼu kaʼikat tia». w22.01 4 püt. 7, 8

Süchikijeechon nojuʼitüin na israeliitakana Egiptojee, aashajaashi Jeʼwaa nümaa Moisés süchiki nünülia otta nukuwaʼipa. Anuu nünüiki: «Jeʼwaa, Jeʼwaa, amüliajüi nia, anamia maʼin nia, nnojoishi aashichijaamaatüin, miyoʼu maʼin saalin wayuu nüpüla otta nüküjain tü shiimainkat waneepia. Ayatüsia alin wainma wayuu nüpüla, nülatirüin sooʼopünaa naaʼin tü kasa mojusü aainjünakat, tü eʼraakat wayumüin otta tü kaainjalaakat» (Éx. 34:6, 7). Anasü maʼin tia pütchikat, niyaawata aaʼu Moisés tü sukuwaʼipakat saalin wayuu nüpüla Jeʼwaa. Wekirajaa sünain tia. Nnojotsü nüküjain neʼe Jeʼwaa miyoʼushaatain saalin wayuu nüpüla, nüküjainya «matüjain ajaʼttaa saalin wayuu nüpüla». Ashajünüsü tia akaratshitua suluʼu tü Bibliakat (Núm. 14:18; Neh. 9:17; 13:22; Sal. 86:15; 103:8; Joel 2:13; Jon. 4:2). Wanaa sümaa süküjain tü Bibliakat pütchikat tia, nia neʼe Jeʼwaa saashajaaka achiki suluʼu müin nukuwaʼipa. Anataʼaleesüjaʼa maʼin nukuwaʼipa. w21.11 2 püt. 3, 4

Wanee wayuu anakai süpüla nashatüin akuwaʼipa na kasaatshiikana nia chi aluwataaushikai Pedro sümaa tü nuʼwayuusekat. Sülatapa aipirua kashi jee shiale wanee juya süchikijee niʼraajüin Jesuu chi aluwataaushikai Pedro, eesü wanee kasa nüneeküinjatka. Nuunejaain nia Jesuu süpüla nümaainjachin nia waneepia, jülüjainjatpejeʼe naaʼin Pedro palajana naaʼinmajüinjanain nüpüshi otta nulojuinjachin jime nayaaluʼu (Luc. 5:1-11). Mayaainjeʼe müin tia, oʼunushi nia nümaa Jesuu sünain aküjaa pütchi. Eesüjaʼa süpüla jülüjain waaʼin sükaalinjain nia tü nuʼwayuusekat, süka jamüin, oʼunapuʼuin shia nümaa Pedro süchikijee nüsoʼiraain aaʼin Jesuu saashin tü Bibliakat (1 Cor. 9:5). Kaawainsü nünüiki Pedro nüchiajaainjanapa na kaʼwayuuseshiikana sutuma anain sukuwaʼipa nuʼwayuuse (1 Ped. 3:1-7). Niʼitaain maʼin naaʼin Pedro sümaa nuʼwayuuse sünain naapeerüin Jeʼwaa tü kasa choʼujaakat namüin palajanale natuma naʼyataain nümüin Maleiwa (Mat. 6:31-34). w21.11 18 püt. 14

Chi aluwataaushikai Pablo aishii nüpüla na anoujashiikana, müshijeseʼe niʼyataain maʼin napüleerua (Aluw. 20:31). Aishijeseʼe nia napüla. Soʼu wanee kaʼi, natüjaapa saaʼu na laülaashii chajanakana Éfeso müichiain nnojolin neʼrüin nüchikuaʼa Pablo, aʼyalajüshii naya (Aluw. 20:37). Maaʼulu yaa, na laülaashiikana aishii napüla na wawalayuukana jee nakaalinjain naya maʼaka naaʼinrüin shia Pablo (Filip. 2:16, 17). Eepejeʼe waneirua kasa kapüleʼewaika aaʼujee tü naʼyataainkat. ¿Kasa eeka süpüla naaʼinrüin? Wainma maʼin naʼyataain na laülaashiikana, müsüjeseʼe anain maʼin nashatüle nukuwaʼipa Pablo. Nnojoishi wayuuin pülashin Pablo. Süka nnojoluin lotuin maʼin nukuwaʼipa eesia tü nüchecherüinjatkalü oulia naaʼin (Roma 7:17-20). Mayaainjeʼe wainmain tü kasa alatakat nümüin nnojotsü amalajaain naaʼin, ayatüshia aʼyataain nia sümaa talatüin naaʼin. Müleka nashatüle na laülaashiikana tü nukuwaʼipakat, eeshii süpüla ayatüin naʼyataain nümüin Jehová sümaa talatüin naaʼin. w22.03 26 püt. 1, 2

Aküjünüsü suluʼu Levítico 19:3 kojutuinjatüin namüin na israeliitakana tü kaʼi neemeraainjatkalü oʼu. Mayaainjeʼe nnojoluin nuchuntuin wamüin Maleiwa tia maaʼulu, wainma kasa watüjaka sünainjee tü naaʼinrakat na israeliitakana soʼu kaʼikat tia otta tü kasa anasü neʼrakat sutuma naaʼinrüin shia. Soʼu tü kaʼi neemeraakalü oʼu naʼwaajüinjachi Jeʼwaa otta nnojoliinjana aʼyataain naya. Müshijeseʼe nuʼunawalin Jesuu soʼu kaʼikat tia suluʼumüin tü ekirajüleekat judío süpüla naashajeʼerüin tü Nünüikikat Maleiwa (Éx. 31:12-15; Luc. 4:16-19). Tü watüjakat sünainjee tia shia wakatalüinjatüin kaʼi sünainjee tü waaʼinrawaikat süpüla waaʼinmaain maʼin tü sünainpünaakat wanoula. ¿Eesüche wanee kasa wanouteʼerüinjatka süpüla wountuin tia? Waaʼinmaale maʼin tü sünainpünaakat wanoula aleeweena maʼin waya nümaa Jeʼwaa. Waaʼinrüinjatü tia süpüla wuleinjatüin wakuwaʼipa. w21.12 5 püt. 13

Aleewapuʼushi maʼin Jesuu sümaa wayuu maʼleekalia. Ekapuʼushi nia namaa na washinnuukana jee na kojutukana amüinyüü, alatitpuʼushi kaʼi namaa na maʼletsekana otta na mojutkana amüin. Amülialaapuʼusü naaʼin naalin na kaainjaraliikana naashin na wayuukana. Mojushiisü namüin na wayuu yaletakana aaʼin tü naaʼinrakat Jesuu. Anuu tü nasakitkalü anain namüin na nikirajüinkana Jesuu: «¿Jamüshii cheje eera nekaakaʼa namaa na eekana kaainjaraliin, maa aka na okotchajüliikana neerü nümüin chi sülaülashikai mma?». Nusoutakalaka Jesuu namüin süka tü pütchi süpülajatkat soʼukai (Lucas 5:29-31). Nüküjatüjülia Isaías niyoutunajachin chi Mesíaskai sutuma wayuu, anuu tü nüshajakat: «Mojutusai nia atumawaa otta nnojoishi jamajachin sümüin wayuu [...]. Müsü nuunjulakai saaʼin nuʼupünaa woulia. Ayoutunüshi nia otta mojutsai nia wamüin» (Is. 53:3). Naashin Isaías nnojoluinjachi jamajachin sümüin wayuu chi Mesíaskai. Nnojotsüjeseʼe ponuinjatüin naaʼin na judíokana niyoutunüin Jesuu sutuma wayuu. w21.05 8 püt. 3, 4

Eeshii noʼutku anoujashii kamaʼakana süpüla aaʼinraa tü nümakat namüin (Sant. 1:22). Eeshii na kapülakana naaʼin washinnuu (Sant. 2:1-3). Otta eeshii na kapüleekana amüin nayaawatüin saaʼu nanüiki (Sant. 3:8-10). «Mepisalii naya», nnojoishi müin Santiago namüin na anoujashiikana mayaainjeʼe mojuin maʼin tü kasa naaʼinrakat. Nüchiaain naya süka anakalü akuwaʼipa otta nütütüleʼerüin naaʼin chi eekai matchin anoula süpüla nuchuntuin kaalinwaa namüin na laülaashiikana (Sant. 5:13, 14). Watüjaka: Wayaawata saaʼu nakuwaʼipa na waneinnua sümaa jülüjain waaʼin eein süpüla nanouteʼerüin nakuwaʼipa. Wainma na ekirajaakana sünain tü Bibliakat kapüleeka namüin naaʼinrüin tü sümakat (Sant. 4:1-4). Eeshii kakaliale naya süpüla nooʼulaain suulia tü nakuwaʼipa mojukat süpüla naaʼinrajatüin tü kasa anasü nekirajaakalü anain. Waküja namüin na wekirajüinkana süchiki tü nanouteʼerüinjatkat. Waaʼinrapa tia, jülüja waaʼin niain Jeʼwaa arütkeʼerüin nünainmüin na nnojoliikana yaletüin aaʼin otta nükaalinjeenain naya süpüla naʼwanajaain nakuwaʼipa (Sant. 4:10). w22.01 11 püt. 11, 12

Amüliajeeshii waya wayuu maʼaka naaʼinrüin shia Jeʼwaa. Nnojorüle waaʼinrüin tia, nnojoleerü naapajüin Jeʼwaa wanüiki. Nnojo weʼrüliin wayumüin süka wanüiki namüin na waneinnua suulia maapujuuin wanüiki nutuma Jeʼwaa woʼuraajapa. Anashi wamüliajüle chi anoujashi eʼrakai müliaa suulia müin macheʼeyaakai waaʼin nuulia. Jülüja waaʼin pütchikat tüü nüchiki Maleiwa: «Müleka mamüliajüinre jia saaʼin wayuu, nnojoleena amüliajünüin jia nütümaya» (Sant. 2:13). Nnojorüle yaletüin waaʼin jee jülüjale waaʼin choʼujaain wamüin wamüliajünüin, mapüleejeerü wamüin wamüliajüin na waneinnua. Waaʼinrüinjatü maʼin tia nüleʼejapa nüchikuaʼa waʼakamüin wanee anoujashi ayaawajaakai suulia naainjala. Aküjünüsü suluʼu tü Bibliakat süchiki nakuwaʼipa waneinnua wayuu amüliajüliika wayuu jee nnojoliika eʼrüliin wayumüin süka nanüiki. Anasü maʼin washatüle nakuwaʼipa. w21.10 12 püt. 16, 17

Wanee ai süpülapünaa outuin Jesuu, oʼunushi nia eemüin wanee unaʼapü kanüliaka Getsemaní, jama yüütüülin tü mmakat chayaa süpüla nuʼuraajüin jee nüsakireʼerüin naaʼin. Nüküjain yala wanee pütchi anaka maʼin namüin na nikirajüinkana süchiki tü oʼuraajaakat. Nantapa Getsemanímüin, süseʼeruʼu aikat, nüküjain Jesuu namüin na aluwataaushikana nnojoliinjanain natunküin. Süchikijee nümüin tia, nuʼunaka sünain oʼuraajaa (Mat. 26:37-39). Nüleʼejapa süchikijee nuʼuraajüin, nüntaka nanain natünkajaʼattaain. Nümaka Jesuu namüin nüchikuaʼa: «Anakaja müleka eere jaaʼin süpüla jüchuntüin nümüin Maleiwa» (Mat. 26:40, 41). Nütüjaa aaʼu Jesuu shapaain maʼin naaʼin otta mapüsajüin maʼin naya, müshijeseʼe nümüin namüin: «Mayaainjeʼe keeʼireein jaaʼin tü tachekakat jüpüleerua isasü jüchiki». Süchikijee tia, piantua nukua sünain oʼunaa süpüla nuʼuraajüin otta nüleʼejapa, nünta anainchii naya sünain nnojoluin noʼuraajüin jee natunkajaʼattaain neʼe (Mat. 26:42-45). w22.01 28 püt. 10, 11