PÜTCHI SÜNAINKA SÜTA TÜ REWIISÜTAKAT
Sainküinsü mma tü alerajaakat wayuu
JEMEISHI Jonathan chaa Estados Unidos otta coreajeʼewalii na kachoinkana nia. Alerajünatüjüiya nia sutuma naatain nuumain. Miyoʼupa nia, akolojooshi suluʼumüin wanee pueulo eere nnojolinjachin nülerajünüin sutuma naatain nuumain. Tottoot nia otta nukolojooka chamüin Alaska (Estados Unidos), na wayuu kepiakana chayaa meematshii aka naaʼin. Naashin niakai, nnojolinjachi alerajünüin chayaa.
Mojushaatasü naaʼin sutuma tü sümakat wanee wayuu nümüin. Mayeinsü maʼin shia süntaiwaʼaya nümaʼanamüin; shiasaʼa müin saawalaapa saaʼin, shiʼraka Jonathan otta süʼülüjaka nümüin sümaa airuʼuluin sünüiki. Saainjüin tia süka süʼülürain na wayuu coreajeʼewaliikana. Naashin Jonathan, amüla neʼe nuʼunüin wattamüin suulia nülerajünüin.
Tü alatakat nümüin Jonathan, shiiʼiyatüin wamüin wattakualüin tü alerajaakat wayuu. Eesü tia eepünaale eein wayuu.
Mayaainjeʼe wattakualüin tü alerajaakat wayuu, wainma na wayuu mojukana amüin tia. ¿Jamüsü sülataka tia? Shia sutuma wanee kasa: na wayuu mojukana aashin alerajaa wayuu, eesü naainjüle shia sümaa nnojoluin natüjaain saaʼu mojuin shia. ¿Müsüche pukuwaʼipa?
NNOJOISHI EEIN WANEE WAYUU MALERAJÜINKAI WAYUU
¿Jamüsü makaʼa nakuwaʼipa na wayuukana? Müsü tü Wiwüliakat: «Emeejülü maʼin tü waaʼinkat suulialeʼeya wanee kasa» (Jeremías 17:9, NM). Eeshii süpüla wemeejiraain wakuwaʼipa. Saaʼin wamüin, wanaawasü wamüin wayuu süpüshuaʼa otta walerajüin waneeinnua wayuu süka nachajaalain shia.
¿Kaseerü jülüjaka paaʼin sutuma piʼrüin wayuukana naainnua?
Süpüla pütüjaain saaʼu pülerajüle wayuu sümaa nnojoluin pütüjaain saaʼu mojuin tia, jülüjataa paaʼin waraittataale pia kaayeruʼu miyoʼupa aika. Shiasaʼa piʼraka püpanapa piamashii wayuu. Katünashüʼüshii naya otta müsü piʼrakai saaʼin wanee kasa najapuluʼu chi wanee wayuukai.
¿Ayoʼujaajeerü paaʼin? Eesüjaʼa süpüla müin pukuwaʼipa süka sülatüirüin pümüin kasa mojusü. ¿Shiimainchejeʼeya mojulaain na wayuu sekana püpanapa? ¿Wayuuche naya? ¿Nayataapa na mutsiayuukana ata? Sünainjee tü pusouktakat shiʼipajee tia pütchikat, pütüjaajeerü aaʼu sukumajaale suluʼu paaʼin pülerajüin na wayuukana.
Nnojo wemeejiraain wakuwaʼipa, eesia eere suluʼu waaʼin walerajüin wayuu. Müsü tü Wiwüliakat süchiki tü wakuwaʼipakat nanainmüin na wayuukana: «Shia jülüjaka naaʼin wanee wayuu tü kasa niʼrakat» (1 Samuel 16:7, NM). Eesüleʼe mojule wanüiki süchiki wanee wayuu sümaa nnojoluin watüjaain saaʼu tü sukuwaʼipakat. ¿Ooʼulaajeenache waya mapeena suulia walerajüin wayuu?