¿Shiimainche tü iküleesia nnojotkat wulein akuwaʼipa?

Silvia, shia wanee wayuu aʼyataapuʼusü suluʼu pitaat. Müsü shia: «Ekirajaapuʼusü taya namaa wayuu anoujakana naashin. Shiasaʼa müin nakopiaajawalin otta nakaijüin. Nnojotsü anain nakuwaʼipa sutuma tü iküleesia kaluʼukat naya».

Müshi Lionel: «Na aʼyataakana tamaa, ayuuiyaashii naya suulia aʼyatawaa. Nnojotsü anain nakuwaʼipa sutuma tü iküleesiakat; maʼatsü aka saaʼin wanee luujo namüin».

Eetaayaai süntapünaain sünain nakuwaʼipa tü anoujaakat. «Piama akuaippachii naya sükajee nanoujayaain nünain Maleiwa sümaa nnojoliin noonooin sümaa nünüiki.» (2 Timoteo 3:5.) Nnojotsü lotuin nakuwaʼipa na nekiipüʼükana sünain anoujaa otta nnojoishii nekirajüin sünain tü Wiwüliakat. Makalaka nanoujüin sünain nnojoluin kasajatüin nümüin Maleiwa tü naainjakat.

¿KASA SHIKIRAJAKA ANAIN TÜ WIWÜLIAKAT?

Saashin tü Wiwüliakat aisü nümüin Maleiwa waainjüle wanee kasa mojusü. Mojuwaisü naaʼin Maleiwa saaliijee naainjüin kasa mojusü na israeliitakana (Salmo 78:40). Aluʼusaʼa müleka nuuʼulaale wanee wayuu suulia naainjala, talatüshii maʼin na aapieekana (Lucas 15:7). Watüjaapa saaʼu anain maʼin nukuwaʼipa Jeʼwaa, aijeechi maʼin nia wapüla. Wachekeerü tü kasa nüchekakat otta walerajeerü tü kasa nülerajakat (Amós 5:15).

¿KASA NAAINJAKA NA AKÜJÜLIIKANA PÜTCHI?

Müsü wanee periodico nachiki na aküjüliikana pütchi nüchiki Jeʼwaa: «Nakaaliinjüin na wayuukana süpüla aijiraainjanain naya sümaa napüshi, tütüinjanain naya otta lotuinjatüin nakuwaʼipa. Wulesü nakuwaʼipa na aküjüliikana pütchi nüchiki Jeʼwaa. Nayoukta achikirü tü akamüjaakat, tü eperuwawaakat, tü ashaittaakat saaʼu nneerü, tü amaʼüjirawaakalü akuwaʼipaa otta tü jaleeraakat. Naashin nayakana, mojusü nunoula wanee wayuu sutuma tia» (The Deseret News, de Salt Lake City Utah, Estados Unidos).

¿Kasa anasü neʼraka na aküjüliikana pütchi sutuma natüjaain saaʼu nukuwaʼipa Jeʼwaa? Müsü Silvia: «Nnojotsü lotuin nakuwaʼipa na aʼyataakana suluʼu pitaat. Mapüleesat oʼunaa süchiirua nakuwaʼipa na wayuukana. Nnojotsü wanaawain taya namaa na wayuukana süka tatüjaain saaʼu niyouktüin Jeʼwaa tü naainjakat.a Talatsü taaʼin sutuma tü taainakat». Saashin Silvia, anasü sukuwaʼipa sutuma tü iküleesia sunoujakalü aluʼu.