Jalia mmolujayaa pia
1. ¿Kasa choʼujaaka süpüla püküjüin pütchi suluʼu pukoleejiase? ¿Jamüsü choʼujaaka shia?
1 Eeichia maküjüin pia pütchi suluʼu pukoleejiase sutuma mmoluin pia seema meeʼerapalaa, ¿aashimüin? Shiimain choʼujaain yalayalain paaʼin süpüla paainjüin tia, yaaʼaleekaijeʼe japüleʼere pia. Wekirajaa sünain tü akaaliinjeechikat pia.
2. ¿Kasa piiʼiyateetka aka piyaawatüin pukuwaʼipa sünain aküjaa pütchi suluʼu pukoleejiase?
2 Piyaawata pukuwaʼipa. Mayaainjeʼe eein süpüla püküjüin maʼin pütchi suluʼu pukoleejiase, soto paaʼin nnojolinjachin paashajaain sümaa wayuu süpüshuaʼa süchiki tü Wiwüliakat maʼaka sünain aküjaa pütchi sainküin piichi. Piyaawata joujain anashiin aküjaa pütchi (Ecl. 3:1, 7). Eesü eere wanee külaase jee shiale wanee tareea anashiika atuma paashajaain süchiki punoula. Eeshi nüsakirüle pia wanee koleejiajiraashi pümaa jamüin nnojoika sünainpünaain pia waneeirua kasa. Eeshii na oʼttaleekanaʼaya sünain aküjaa namüin na eʼiküliikana naküjüliin pütchi nüchiki Jeowa otta naapa amüinchii karaloukta süchikimaajatka wanoula. Eeshii na apütakana saaʼu neinase wanee karaloukta shiiʼiree nasakinnüin natuma na koleejiakana namaa.
3. ¿Kasa paainjüinjatka süpüla yapain pia süpüla aküjaa pütchi suluʼu pukoleejiase?
3 Yapa pia. Yapale pia, meimmoluinjeechi pia (1 Ped. 3:15). Jülüja paaʼin kaseerüin asakinnüin anain pia otta jameerüin püsouktia (Pro. 15:28). Eesü süpüla pülüʼüjüin tü Wiwüliakat, Los jóvenes preguntan jee shiale Razonamiento, otta müsia waneeirua karaloukta aashajaaka süchiki tü kasa akumajuushikat kamaʼa choʼujaale shia pümüin. Soʼu tü ai puʼwaajakat oʼu Maleiwa, püchunta namüin na kachonniikana pia nooʼulakai tü paainjüinjatkat suluʼu pukoleejiase.
4. ¿Jamüsü anaka maʼin ayatüle püküjüin pütchi suluʼu pukoleejiase?
4 Jülüja paaʼin kasa anasü. Nnojo paaʼinmaain nemeeʼerainpaleenain pia na koleejiakana pümaa püküjapa pütchi namüin. Eeshi na poneenakana aaʼin yalayalain pia otta eesü süpüla naapajeerüin pünüiki. Nnojo mojuin paaʼin maapajuule pünüiki. Talatüshi Jeowa sutuma puuʼulaküin shia (Heb. 13:15, 16, NM). Ayata püchuntüin nümüin süpüla ‹meimolüin pia sünain aküjaa› pütchi (Aluw. 4:29; 2 Tim. 1:7, 8). Jülüjataa paaʼin talateechin maʼin pia eere wayuu aapajaka pünüiki. Matüjaaju aaʼu nunoujeechire soʼu wanee kaʼi nünain Jeowa.