Yapaja maala pia
1. ¿Kasa eeka süpüla waaʼinrüin sükalioʼu Sotuin Waaʼin ouktüin Jesuu? ¿Jameerü sukuwaʼipa watuma?
1 Sükalioʼuwai sotuin waaʼin ouktüin Jesuu, eeshi süpüla waʼwaajüin chi Wamaleiwase anashikai maʼin (Sal. 109:30). Sükajee kojutüin wamüin waakajinnüin, wachajaajeerü sukuwaʼipa süpüla kooʼomüin waʼyataain nümüin Maleiwa maatsoʼu. Sutuma tia, yapaja maala pia (Pro. 21:5).
2. Süka süshakajinnüin awüriiroʼu 2011 tü oora nalatirüinjatkat na pürekutsootkana aaʼusiliaat, ¿jamüsü nanüiki waneeinnua wawalayuu süchiki tia? ¿Jamüsüjaʼa pünüiki piakai?
2 Pürekutsoot aaʼusiliaat pia. Talatüsü maʼin waaʼin juyakat tiainka süka süshakajinnüin awüriiroʼu tü oora nalatirüinjatkat na pürekutsootkana aaʼusiliaat. Müsü nünüiki wanee jimaʼai süchiki tia: «Nnojoiyüiya pürekutsoolüin rekulaat taya saaʼujee koleejiayülinya taya. Akatsaʼa pürekutsooleechi aaʼusiliaat taya awüriiroʼu sümaa talatirüin 30 oora, akatsaʼa talatiree amüinrü 50 oora». Müsü sünüiki wanee wawala aʼyataaka soʼu kaʼika süpüshuaʼa: «¿30 oora? ¡Ane tainkeerü!». Soʼu süküjünüin süshakajinnüinjatüin tü oorakat, müsü sünüiki wanee wawala pürekutsootpuʼusü rekulaat, 80 süsapoʼumüin suuyase: «¡Kakaliairü maʼin pürekutsooleein taya tachikuaʼa! Nütüjaa aaʼu Jeowa talatüin maʼin taya suʼunnaa tia». Soʼu kashikat tia, eeshii wawalayuu nnojoliikana pürekutsoolüin aaʼusiliaat, akatsaʼa kooʼomüinsü naʼyataain nümüin Maleiwa.
3. ¿Jamüsü anaka maʼin pürekutsoorüle aaʼusiliaat waya maatsoʼu, awüriiroʼu otta maayoʼu?
3 Anasü maʼin pürekutsoorüle aaʼusiliaat waya maatsoʼu süka eein süpüla walatirüin 30 oora jee shiale 50. Soʼujee maatsoʼu 17 aapireena waya wayuu sünain tü outkajawaakat eere Sotuin Waaʼin ouktüin Jesuu, eejeerü tia awüriiroʼu 5. Sutuma talatüin maʼin naaʼin na pürekutsootkana aaʼusiliaat maatsoʼu, waʼatapajüin eejeenainya na pürekutsooleenakana awüriiroʼu otta maayoʼu mayaainjeʼe nalatirüinjatüin 50 oora.
4. ¿Kasa waaʼinrüinjatka süpüla kooʼomüin waʼyataain nümüin Maleiwa? ¿Kaseerü weʼraka sutuma tia?
4 Soʼu tü ai juʼwaajakat oʼu Maleiwa, eesü süpüla jikirajaain sünain tü sukuwaʼipainjatkat sükooʼomüinjia jiʼyataain nümüin Maleiwa sükalioʼu Sotuin Waaʼin ouktüin Jesuu (Pro. 15:22). Puʼuraaja nümüin Jeowa süpüla anainjatüin tia jutuma (1 Juan 3:22). Soto paaʼin: kooʼomüinre tü piʼyataainkat puʼwaajeechi maʼin Jeowa jee talateerü maʼin paaʼin (2 Cor. 9:6).