Waküja pütchi motsouupa
1. ¿Jalapüshiwaishi aküjüin pütchi Pablo saashin wanee karaloukta?
1 Saashin wanee karaloukta, oʼttüshi Pablo sünain aküjaa pütchi sainküin piichi «aliika maʼaka saaʼin lakuaatüro, ojolooleeshia aipoʼuupa» (Daily Life in Bible Times). Mayaapejeʼe nnojoluin watüjaain aaʼu nüküjawaire pütchi soʼu oorakat tia, watüjaa aaʼu naaʼinrüin wainma kasa «süpüleerua aküjaa pütchi anasü» (1 Cor. 9:19-23, NM). Nukumajüin palajana sukuwaʼipa waneeirua kasa süpüla nüküjüinjachin pütchi sainküin piichi soʼu tü oora saapeetkat oʼu wayuu nünüiki.
2. ¿Jamüsü anaka aküjaa pütchi motsouupa?
2 Kiʼrainna na wawalayuukana sünain naküjüin pütchi sainküin piichi wattaʼawai maalü. ¿Shia neʼe oorakat tia jimatakat oʼu wayuu shipialuʼu? Müsü nünüiki wanee pürekutsoot: «Nnojoluwaisü jimatüin wayuu soʼukai shipialuʼu, shia jimataka oʼu aipaʼa». Shia anaka oʼu yootoo namaa suʼunnaa tia süka nnojoluin nashapajaain. Anasü joo shia süpüla aküjaa pütchi namüin na tooloyuukana. Nakumajüinjatü sukuwaʼipa na laülaashiikana süpüla eewalin outkajawaa süpüla aküjaa pütchi motsouupa.
3. ¿Kasa waaʼinrüinjatka müleka waküjüinjanale pütchi aipaʼa?
3 Kekii waya. Kekiinjana waya waküjüinjanapa pütchi aipaʼa. Jamüsüjaʼa wantüle maʼin suʼunnaa nekaain na nepiajanakana, «sepünaajeena joo waya» eeshi süpüla wamüin. Müleka piʼyuushire eere waya, washawalaa eeinjanale jaʼyashiin waya, waküjamaata wanülia otta waküja jamüin wantaka nepialuʼumüin na wayuukana. Waküjüinjanapa pütchi, koʼuyaajanainjana waya jee nnojoliinjana wattaluʼuin waya noulia na waneeinnua, nnojoliinjana waya oʼunüin suluʼupünaa wanee kaaye eekai piyuushin jee yüütüülin. Nnojotsü anain müleka wantüle shipialuʼu wayuu kaʼlepa aika, eesü shiisaajaainjatüle (2 Cor. 6:3). Anasü waküjüle pütchi süpülapünaa shipiyuushijaain waaʼu eere keemoulin tü mmapaʼakat aipaʼa (Prov. 22:3).
4. ¿Kasa eeka sutuma waküjüin pütchi motsouupa?
4 Tü eekat sutuma. Talataleesia waaʼin sünain aküjaa pütchi, yootule waya namaa na wayuukana. Waküjüle maʼin pütchi namüin na wayuukana, wainmeena na wayuu atüjaakana saaʼu tü shiimainkat süpüla noʼttaain (1 Tim. 2:3, 4). Wachajaa sukuwaʼipa süpüla waküjüin pütchi motsouupa.