Kamanee waya namüin na antapaatakana
1. ¿Jarat tü kaʼi anakat süpüla weeʼiyatüin süka wakuwaʼipa waʼwaajüliin Jeʼwaa? ¿Jamüsü anaka maʼin shia?
1 Suʼunnaa tü outkajawaakat eere sotuin waaʼin ouktüin Jesuu, weeʼiyatüin süka wakuwaʼipa waʼwaajüin Jeʼwaa. Sünain juyakat tüü, waʼatapüin wattainjatüin maʼin saalin wayuu sünain tü outkajawaakat süpüla naapajüin süchiki tü naaʼinrakat Jeʼwaa nümaa Jesuu süpüla neeʼiyatüin alin waya napüla, maʼaka woʼtteʼennüin natuma (Juan 3:16; 15:13). Jee müsia, natüjaajeerü saaʼu tü kasa anasü eekat sünainjee woʼtteʼennüin (Is. 65:21-23). Napüshuaʼa na aküjüliikana pütchi eesü süpüla neeʼiyatüin naʼwaajüliin Jeʼwaa sünain kamaneein naya namüin na wayuu antapaatakana, nnojoishi neʼe niainjachin eeʼiyataka nümüiwaʼa tia chi wawala ekirajüinjachikai tü pütchikat soʼu kaʼikat tia (Roma 15:7).
2. ¿Kasa waaʼinrüinjatka süpüla anain naaʼin na wayuu antapaatakana sünain tia outkajawaakat?
2 Suulia yalain neʼe waya joyotuin sünain waʼatapajüin suʼttüin tü outkajawaakat, anashii kamaneere waya namüin na wayuu joyotokana waʼütpaʼa. Wakulemeraale namüin na wayuu antapaatakana jee kamaneere waya namüin nnojoleena müin mmotkai naaʼin. Eeshii eekai antapaain sünain tia outkajawaakat süka naapiruushin. Eeshii süpüla wasakirüin naya müleka shiale tü palajatkat nakua sünain tü outkajawaakat jee müleka neʼraajüle waneeinnua wawalayuu. Waikkalaa namaa jee weeʼiyata namüin tü pütchi aküjünakat suluʼujee tü Wiwüliakat, weeʼiraja namaa suʼunnaa shiiʼirajünüin tü jayeechikat. Saainjünüle tia outkajawaakat eere tü miichi outkajaaleekat, weeʼiyata namüin tü kasa eekat suluʼu. Sujutaapa tü outkajawaakat, wasakira naya müleka nayaawatüle saaʼu tü pütchi aküjünakat. Wojuʼitamaatüinjanale suulia tü miichi outkajaaleekat süka noutkajaainjanain waneeinnua wawalayuu, eeshii süpüla wamüin namüin na wayuukana: «¿Jamüsü saaʼin pümüin tü outkajawaakat? ¿Jamüsüche paala sukuwaʼipa süpüla taashajaain pümaa sooʼomüin süchiki tü sümakat tü Wiwüliakat?» Pukumaja sukuwaʼipa süpüla yootuin pia püchikuaʼa namaa. Otta na wawalayuu eemiajaakana anoula, nayeena na laülaashiikana atütüleʼeraka naaʼin jee nakaaliinjeena naya.
3. ¿Jamüsü anaka maʼin kamaneere waya palajana namüin na wayuu antakana sünain tü outkajawaakat eere sotuin waaʼin ouktüin Jesuu?
3 Na wayuu palajatkana akua sünain tü outkajawaakat, neʼreerü talatüin waaʼin, jimatüin waaʼin otta paaʼinwajiraain waya (Sal. 29:11; Is. 11:6-9; 65:13, 14). ¿Jameetche nanüiki na wayuukana wachiki waya anoujüshiikana? Aneerü nanüiki na wayuukana müleka weeʼiyatüle kamaneein waya namüin.