«Pukumaja pipia»
1 Amojujaasü maʼin nakuwaʼipa na wayuukana sümaa napüshi maaʼutpünaa. Yarüttüsü maʼin nakuwaʼipa na manoujüinsaliikana (1 Juan 5:19). Makalaka waʼyataainjanain süchiirua talatüin waaʼin sümaa wapüshi. Otta wekirajüinjana na wayuukana süpüla talatüin naaʼin sümaa napüshi (Prov. 24:3, 27).
2 Anasü wakuwaʼipa sutuma tü sümakat tü Wiwüliakat. Oonooinjana na wayuukana sümaa tü sümakat tü Wiwüliakat süpüla talatüin naaʼin sümaa napüshi. Tü pütchi suluʼujeejatkat tü Wiwüliakat süpülajatü anain nukuwaʼipa wanee wayuu sümaa nuʼwayuuse, sümaa nüchonnii otta tü naaʼinrajatkat na tepichikana. Na wayuu eʼitaakana suluʼu nakuwaʼipa tü sümakat tü Wiwüliakat, aneerü naaʼin namaa napüshi otta eejeechi chi Maleiwakai namaa (puʼwanaajireʼera sümaa Isaías 32:17, 18).
3 Tü waaʼinrajatkat süpüla anain wakuwaʼipa sümaa wapüshi, suluʼusü tü karaloukta jeketkat ojuʼitüin wayuunaikiruʼu, tü kanüliakat Talatüinjatka atuma waaʼin sümaa wapüshi. Sajaʼttiamüin wanee ekirajaaya, eesü wanee pütchi maka: «¿Kasa sükaaliinjaka anain waya pütchikat tüü süpüla [...]?». Tia pütchikat, süpülajatü watüjaain saaʼu jamüin nünüiki Maleiwa süchiki wanee kasa: anale jee mojule shia (Is. 48:17).
4 Pikirajaa maʼin sünain tia karalouktakat. Piyaawata saaʼu jaralüin tü pütchi anoukteʼerüinjatkat pukuwaʼipa sümaa püpüshi. Kojuya pütchi saashajaaka achiki tia karalouktakat. Maʼaka saaʼin tü naaʼinrajatkat wanee wayuu süpüla nüneeküin tü jierü nümaainjatkat (ekir. 2), tü naaʼinrajatkat wanee wayuu süpüla anain nukuwaʼipa sümaa nuʼwayuuse (ekir. 3), tü naaʼinrajatkat na kachonshiikana süpüla nepijüin nachonnii süka anakalü akuwaʼipa otta süpüla naʼwaajüinjachin Maleiwa (ekir. 6), tü naaʼinrajatkat wanee wayuu süpüla jülüjüin naaʼin sukuwaʼipa nuʼwayuuse sümaa nüchonnii suulia kasa mojusü (ekir. 8), tü naaʼinrajatkat na wayuu epijakana nachonnii namüiwaʼa (ekir. 9), tü naaʼinrajatkat na anoujüshii kottiraakana nümaa wanee wayuu napüshi eekai nüsülin otta katkaaralin (ekir. 12), tü naaʼinrajatkat wanee wayuu süpüla nunoukteʼerüin nukuwaʼipa sümaa nuʼwayuuse (ekir. 13), tü naaʼinrajatkat na wayuukana süpüla kojutüin namüin nashi jee nei laülaainnakana (ekir. 15) otta tü naaʼinrajatkat wanee wayuu süpüla anain nukuwaʼipa sümaa nüpüshi (ekir. 16).
5 Aneerü pukuwaʼipa sümaa püpüshi sutuma tü karalouktakat. Pikirajaa sünain tia karalouktakat sümaa püpüshi. Piʼrüle nnojoluin müin anakai saaʼin pukuwaʼipa sümaa püpüshi jee sülatüle kasa mojusü jümüin, püchajaa suluʼu tü karalouktakat jaralüin tü pütchi anoukteʼereetkat pukuwaʼipa sümaa püpüshi, puʼuraaja nümüin Maleiwa otta paaʼinra tü aküjünakat suluʼu. Pükatala kaʼi süpüla piitajüin tia karalouktakat.
6 Na wayuu aʼwaajakana Maleiwa sümaa napüshi, katchinjeerü maʼin naaʼin, paaʼinwaajeena naya otta icheerü maʼin nanoula süpüla eejiraain naya sümaa tü kasa nuuʼulakakalü aka naaʼin Satanaa (1 Tim. 4:7, 8; 1 Ped. 5:8, 9). ¡Talatüsü maʼin waaʼin süka nikirajüin waya Maleiwa süpüla anainjatüin wakuwaʼipa sümaa wapüshi!