Sukuwaʼipa shikirajia wayuu süka tü poyeetokot Pütchi anasü nutuma Maleiwa
Akumajuushi süpüla wouyatüinjanain wachikuaʼa eemüin na wayuukana jee süpüla woʼttüin sünain ekirajaa
1. ¿Kasaichi sünülia tü poyeeto aapünakat wamüin sünain tü outkajawaa miyoʼu apünüinkat kaʼi «Paaʼinmaja tü paaʼinkat» makalü anülia?
1 Sünain tü outkajawaa miyoʼu apünüinkat kaʼi, «Paaʼinmaja tü paaʼinkat» makalü anülia, aapünüsü wamüin wanee karaloukta jeketü. Tia karalouktakat, süpülajatü woʼttüin sünain ekirajaa wayuu süka jee müsia süpülajatü wekirajüin wayuu wouyantapa wachikuaʼa saaʼu. ¡Talatashaatasü maʼin waaʼin sutuma saapünüin wamüin tia karalouktakat! Pütchi anasü nutuma Maleiwa, tia shia sünülia tü poyeeto shiiʼirakainjatkat tü wanee poyeetokot Kasa nuchuntaka makalü anülia. Mapüleesat tü pütchi suluʼukat sümaa paliʼirüin shia, anasü süpüla ekirajaa wayuu süka shipialuʼu. Tü poyeetokot Kasa nuchuntaka makalü anülia, shia saashajaaka maʼin achiki tü nuluwataakat anain Maleiwa namüin na anoujüshiikana. Na wayuu jekenakana ekirajaain sünain, kapüleesü namüin naaʼinrüin soʼutku tü pütchi ashajünakat suluʼu tia karalouktakat. Mapüleejeerüinjaʼa joo namüin tü poyeeto jeketkat süka shiain saashajaain maʼin achiki tü pütchi anasü suluʼukat tü Wiwüliakat (Aluw. 15:35, NM).
2. ¿Kasapülajatü sukumajünaka tü poyeetokot Pütchi anasü makalü anülia?
2 ¿Kasapülajatü sukumajünaka wanee poyeeto jeketü? Kakaliairü nachuntüin wanee karaloukta jeketü na wawalayuukana sainküinpünaa tü mmakat süpüshuaʼa, mapüleeinjatü tia karalouktakat naashin, kamalainjatü shia namüin na wayuukana süpüla nekirajünüin mapa sünain tü karalouktakat Kasa shikirajaka. Shia wekirajaka aka wayuu tia karalouktakat. Nnojotsü kamalain sümüin wayuu süpüshuaʼa ekirajawaa sünain wanee karaloukta, shia kamalainka namüin ekirajawaa sünain wanee poyeeto paliʼitka pütchi suluʼu. Mapüleesat joo shia süpüla süshajünüinjatüin suluʼu naata anüiki.
3. ¿Jamüsü naataka tü poyeetokot Pütchi anasü suulia tü wanee karaloukta ekirajünakat aka tü wayuukalüirua?
3 Sukumajia tü poyeetokot. Nayaawata aaʼu na wayuukana tü pütchi suluʼukat tü Wiwüliakat naashajeʼerapa wanee karaloukta wakumajaka, jaʼitainna nnojoluin nekirajünüin nutuma wanee wawala. Aluʼujasaʼa tü poyeeto Pütchi anasü makat, choʼujaashi wanee wawala ekirajüinjachika tü wayuukalüirua süka. Müleka wapütüinjatüle tü karalouktakat sümüin wanee wayuu, shia anaka aluʼu müleka shikirajünüle süka waneesia jee piamale pütchi. Paliʼirü tü pütchi suluʼukat, mapüleesüjeseʼe shikirajünüin wayuu shipialuʼu süka jee shiale shiʼyataaleruʼu. Anasü ekirajaa wayuu süka süpüshuaʼa tü pütchikalüirua, shiapajaʼa analeein müleka pikirajüle shia süka tü palajatkat ekirajaaya.
4. Süpüla nusouktüin wanee wayuu shiʼipajee tü asakinnakat anain suluʼu tü poyeetokot, ¿jamüsü naashajeʼerüinjatka tü Wiwüliakat?
4 Suluʼu soʼutku tü karaloukta wakumajakat, asakinna anainrü wanee kasa, tü susouktiakat tia pütchi asakinnakat anain, yalasia neʼe sünain tü pütchi aashajeʼennüitpakat. Akaajasaʼa sünain poyeetokot tüü, asouktüna eʼipajee tü pütchi asakinnakat anain süka tü pütchi suluʼujeejatkat tü Wiwüliakat, süka jamüin, süka eein wayuu anoujaka sünain tü sümakat tü Wiwüliakat suulia tü karaloukta wamaʼanakat. Shia anaka aluʼu saashajeʼennüle tü pütchi suluʼukat tü Wiwüliakat, nnojotsüjeseʼe ashajünüin sünain tü poyeetokot tü pütchi suluʼujeejatkat tü Wiwüliakat. Nayaawateetsejeseʼe saaʼu na wayuukana shiain nekirajaain anain tü nünüikikat Maleiwa (Is. 54:13).
5. ¿Jamüsü choʼujaaka yapainjanain na ekirajüliikana süpülapünaa nekirajüin wanee wayuu?
5 Suluʼu poyeetokot tüü, nnojotsü ashajünüin jamaluʼuluin süpüshuaʼa tü pütchi suluʼukat tü Wiwüliakat. Matüjülia sukuwaʼipa tia süpüla nasakinnüinjanain atumawaa na ekirajüliikana jee neeʼiyatüin tü natüjüitpakat apüleerua. Müsüjeseʼe nekirajaainjanain maʼin na ekirajüliikana sünain tü pütchi nekirajüinjatkat. Nnojotsü nüküjüinjatüin chi ekirajüikai süpüshuaʼa tü pütchi suluʼukat tü Wiwüliakat. Mayaapejeʼe kamalain wamüin ekirajaa jamaluʼuluin wanee pütchi suluʼu tü Wiwüliakat, shia anaka aluʼu niale aküjüin shia wamüin chi wayuu wekirajakai kamaʼa niyaawatüle saaʼu. Wasakirüle naya shiʼipaʼaya sünain tü pütchi wekirajakat anain naya, nayaawateerü aaʼu namüiwaʼa tü pütchi pansaakat (Aluw. 17:2).
6. ¿Jamüinjatü sukuwaʼipa watuma tü poyeetokot (1) eere nnojoluin sunoujüin wayuu nünain Maleiwa jee sünain tü Wiwüliakat? (2) waküjapa pütchi sainküin piichi? (3) wekirajüinjanapa wayuu uatuwoʼushi? (4) wouyantapa wachikuaʼa eemüin na wayuukana?
6 Eesü süpüla waapüin namüin na wayuukana poyeetokot tüü soʼu tü kaʼi anakat saaʼin wamüin, jaʼitairü nnojoluin shiʼitaanüin tü kaʼi eitajünüinjatkat oʼu shia. Kamalainjeerü namüin na wawalayuukana nekirajüin uatuwoʼushi na wayuukana nepialuʼu süka tü poyeetokot. «Anashaatasü maʼin ouyantaa wachikuaʼa eemüin na wayuukana süpüla wekirajüin naya süka tü poyeetokot», müsü pütchi aküjünaka wamüin sünain tü outkajawaa miyoʼu alatüitpakat (paashajeʼera tü pütchi süttakat suluʼu süpana 5-7).
7. ¿Jamüinjatü shikirajia wayuu süka tü poyeetokot?
7 Wekirajüinjanapa wayuu süka. Waashajeʼerüinjatü palajana tü pütchi kanainkat nuumero jee yuuika ashajia, mapa shiainjatü waashajeʼeraka tü pütchi wünaapünaakat sünain. Shiasaʼa süchikijee, waashajeʼerüinjatü tü pütchi «püleeja» makat. Wasakirüinjana na wayuukana sünain tia pütchi aashajeʼennakat süpüla nayaawatüin saaʼu jamaluʼuluin shia. Süpülapünaa wekirajüin naya sünain tü wanee pütchi yuuikat ashajia, wasakirüinjana naya nachikuaʼa kamaʼa nayaawatüle saaʼu tü pütchikat. Anasü wekirajüle tü wayuukalüirua sünain waneesia jee piamasü pütchi soʼu tü palajatkalü wakua. Kooʼomüin müinjatü shiʼipaʼaya watuma tü pütchi wekirajakat anain chi wayuu wekirajakai, tia süpülajatü wajuteʼerüin wanee ekirajaaya.
8. ¿Kasa jülüjeeka waaʼin waashajeʼerüinjanapa wanee pütchi suluʼujee tü Wiwüliakat? ¿Jamüsü jülüjüinjatka waaʼin tia?
8 Tü pütchi «püleeja» makat, shia susouktia tü pütchi yuuikat ashajia. «Müsü nünüiki Pablo», «müsü nünüiki Jeremías chi nünüikimaajachikai Maleiwa », nnojoishii müinjanain waya waashajeʼerapa wanee pütchi suluʼujeejatka tü Wiwüliakat. Tia süpülajatü nnojoluin sümüin wayuu: «süleʼeruʼujeejatü neʼe wayuu tü pütchi püküjakat tamüin». Shia anaka aluʼu wamüle: «müsü nünüiki Maleiwa», «anuʼusü tü aküjünatüjütkalia suluʼu tü Wiwüliakat».
9. ¿Aashajeʼennüinjatü süpüshuaʼa tü pütchi suluʼujeejatkat tü Wiwüliakat?
9 ¿Aashajeʼennüinjatü süpüshuaʼa tü pütchi suluʼujeejatkat tü Wiwüliakat, shiataapa neʼe aashajeʼennüinjatka tü pütchi «püleeja» makat? Choʼujaale maʼin saashajeʼennüinjatüin, eesü süpüla saashajeʼennüin. Tü pütchi suluʼujeejatkat tü Wiwüliakat wainma tü kasa anasü sünainpünaakat müsüjeseʼe shiʼitaanüin sünain wanee ekirajaaya. Müleka kupaale maʼin chi pikirajüinkai, müleka nnojorüle jamajatiaain nümüin tü pikirajakat anain nia jee shiale saaʼujee matüjüin nia aleejaa, anasü shiale neʼe paashajeʼerüin tü pütchi «püleeja» makat.
10. ¿Joujainjachi wekirajaka wanee wayuu süka tü karalouktakat Kasa shikirajaka?
10 Wekirajüinjachipa nia süka tü karalouktakat Kasa shikirajaka. Wekirajüle wanee wayuu waneepia, shia anaka aluʼu wekirajüle nia süka tü karalouktakat Kasa shikirajaka jee wekirajüle nia sünain süpüshuaʼa tü poyeetokot. Nnaweerü sukuwaʼipa nutuma chi ekirajüikai müleka nikirajüinjachire nia süka tia karalouktakat. Wekirajapa chi wayuukai sünain tü karalouktakat Kasa shikirajaka, ¿choʼujaasü maʼin wekirajüin nia sünainjee tü palajatkat ekirajaaya? Niyaawatüinjatü aaʼu chi ekirajüikai süka nnojoluin wanaawain sukuwaʼipa tü wayuukalüirua. Nnojotsü ashajünüin jaralüinjatüin sukuwaʼipainjatka. Anasü müleka nikirajünüle sooʼomüin chi ekirajünakai süka tü karalouktakat Kasa shikirajaka.
11. ¿Jamüsü anaka maʼin aküjaa pütchi süka tü poyeeto Pütchi anasü makat anülia?
11 Talatashaatasü waaʼin süka waküjüin süchiki kasa anasü namüin na wayuukana mayaapejeʼe mojuin maʼin tü kasa naapakat achiki sainküin tü mmakat, tü pütchi anasükat shia tüü: Aikkalaaipa Nuluwataaya Maleiwa chayaa iipünaa, aneerü nakuwaʼipa na wayuukana soʼu palit kaʼi (Mat. 24:14; 2 Ped. 3:13). Süka naapüitpain na wayuukana tia pütchi anasükat, meerü nanüiki maʼaka saaʼin tü nümakat Maleiwa sümaa nümüin: «¡Anakaiche maʼin chi wayuu sümaajachikai pütchi anasü sooʼopünaa tü uuchikat, chi wayuu aküjakai pütchi jimateetka atuma saaʼin wayuu, chi wayuu aküjakai pütchi anasü talatüinjatka atuma saaʼin wayuu, chi wayuu aküjakai aneerüin sukuwaʼipa wayuu, chi wayuu makai sümüin Sión: ‹¡aluwataalüichipa chi Pümaleiwasekai!›» (Is. 52:7.) Waküja mata pütchi anasü namüin na wayuu ekirajaweekana nünain Maleiwa süka tü poyeetokot, tia pütchikat nümaʼanajeejatü Maleiwa.
[Pütchi süttaka suluʼu süpana 5]
Waküjüinjanapa pütchi eere nnojoluin sunoujüin wayuu nünain Maleiwa jee sünain tü Wiwüliakat
● Ayaawatüna aaʼu nnojoluin kamalain namüin noʼutku na wayuukana waashajaapa nüchiki Maleiwa namüin jee waashajaapa süchiki tü Wiwüliakat. Tü waashajaainjatkat namaa na wayuu makana akuwaʼipa, shia tü mojukat atuma nakuwaʼipa na wayuukana maʼaka saaʼin tüü: Chi wayuu anainjachikai atuma sukuwaʼipaa tü wayuukalüirua, tü aneetkat atuma nakuwaʼipa na wayuu kapüshikana jee müsia tü kasa alateetkat namüin na wayuukana watta kaʼi. Wainmatuapa wakua nümaʼanajee wanee wayuu sünain waküjüin nümüin nüchiki Maleiwa, aneerüin wakuwaʼipa müleka waaʼinrüle tü ashajünakat suluʼu tü Wiwüliakat, waapa tü poyeeto Pütchi anasü makat anülia nümüin chia wayuukai.
[Pütchi süttaka suluʼu süpana 6]
Waküjüinjanapa pütchi sainküin piichi
● «Wainma na wayuu atüjaweekana saaʼu jameerüin sukuwaʼipa tü wayuukalüirua nutuma Maleiwa, mapüleesat atüjawaa saaʼu tia nasakitkat anain, teeʼiyatüin paala sukuwaʼipa pümüin. ¿Najaʼlajeʼereeinche eera Maleiwa tü kasa müliakat atuma saaʼin tü wayuukalüirua? [Puuʼulaa nusouktai.] Pütüjaajeerü aaʼu tia pütchikat sükajee tü Piwiwüliasekat, anuu tü poyeeto piyaawateetkat akajee tia pütchikat. [Paapa tü poyeetokot nümüin chi wayuukai, süchikijee, paashajeʼera tü palajatkat pütchi nümüin suluʼuka ekirajaaya waneesia jee mapa paashajeʼera Jeremías 29:11.] Keeʼireesü naaʼin Maleiwa anainjatüin wakuwaʼipa watta kaʼi saashin tü pütchi waashajeʼerüitpakat ¿aashimüin? [Puuʼulaa nusouktai.] Tasülajüin pümüin türa poyeetokot, wekirajaajeerü anain türa wanee pütchikat wanee sukueena, najaʼttireerü Maleiwa tü müliakat atuma saaʼin tü wayuukalüirua, shiainjatü wekirajaaka anain tia.» (Müleka nnojorüle nüshapajaain chi wayuukai, pikiraja nia süka tü pütchikat piama jee jaashajeʼera tü apünüinsükat pütchi suluʼujeejatkat tü Wiwüliakat. «Aleʼejeechi taya wanee sukueena süpüla wekirajaain sünain tü wanee pütchikat» püma nümüin chi wayuukai.)
● «Oʼuraajawaishii waya nümüin Maleiwa, yaaʼaleekajaʼa sülatüle kasa mojusü wamüin ¿aashimüin? [Puuʼulaa nusouktai.] ¿Naapüinche Maleiwa nanüiki napüshuaʼa na wayuukana noʼuraajapa nümüin? ¿Eetaapa tü wayuu nnojotkat naapüin anüiki? [Puuʼulaa nusouktai.] Suluʼu poyeetokot tüü, aküjüsü süchiki tü pütchi asakinnayütkat anain, suluʼusü shia tü Wiwüliakat. [Paapa tü poyeetokot nümüin chi wayuukai, süchikijee, pikiraja nia sünain tü palajatkat pütchi suluʼuka ekirajaaya 12. Paashajeʼera mapa tü pütchi «püleeja» makat.] Talatsü maʼin waaʼin süka nuchuntüin wamüin Maleiwa woʼuraajüinjanain nümüin, süpüla anainjatüin waaʼin suʼunnaa tia, acheküshi weʼraajüinjachin palajana Maleiwa. [Püchajaa nümüin tü ekirajaayakat piama jee piiʼiyata nümüin tü sünüliachenkat.] Tasülajeerü pümüin tü poyeetokot müleka anale saaʼin pümüin shia süpüla wekirajaain sünain türa pütchikalüirua.»
● «Awaraijaashii waya naaʼu na wayuukana soʼukai süka watüjaain saaʼu shapaain naaʼin na wayuukana sutuma tü alateetkat namüin watta kaʼi. ¿Aneetche nakuwaʼipa na wayuukana watta kaʼi? [Puuʼulaa nusouktai.] Anasü waaʼin sutuma tü pütchi ashajünakat suluʼu tü Wiwüliakat, jaʼitairü shapaain paala waaʼin. Anuu waneeirua kasa ashajünaka achiki suluʼu tü Wiwüliakat.» Paapa tü poyeetokot nümüin chi wayuukai, süchikijee, püma nümüin: «püneeka wanee pütchi pütüjaweeka aaʼu yalejee suluʼu türa süpanakat 32». Püchajaa nümüin suluʼu tü karalouktakat tü pütchi nüneekakat chi wayuukai. Püküja nümüin jamüinjatüin sukuwaʼipa shikirajaanapa sünain tia pütchikat. «Aleʼejeechi taya wanee sukueena süpüla wekirajaain sünain tü wanee pütchikat» püma nümüin chi wayuukai.
[Pütchi süttaka suluʼu süpana 7]
Wekirajüinjanapa wayuu uatuwoʼushi
● «Awaraijaashii waya naaʼu na wayuukana soʼukai, süpüla waküjüin namüin jamüinjatüin sukuwaʼipa shikirajaanapa sünain tü Wiwüliakat süka wanee poyeeto jeketü. Anuu tü pütchi nasakirakat achiirua na wayuukana. Suluʼu poyeetokot tüü, eesü 15 ekirajaaya aashajaaka süchiki tü sümakat tü Wiwüliakat. [Piiʼiyata tü palajatkat süpana namüin na wayuukana jee müsia tü süsapoʼujeekat tü poyeetokot.] ¿Pikirajaairü anain tü Wiwüliakat süpüla piyaawatüin saaʼu tü ashajünakat suluʼu? [Puuʼulaa nusouktai.] Mapüleesat atüjawaa saaʼu tia, anuu sukuwaʼipa yaa. [Piiʼiyata nümüin tü ekirajaayakat 3 jee pikiraja nia sünain tü pütchikat 3. Paashajeʼera mapa Alateetkat Mapeena 21:4, 5. Paashajeʼera tü wanee pütchikat müleka anashiire shia saaʼin pümüin sümaʼaleʼeya tü pütchi suluʼujeejatkat tü Wiwüliakat.] Tasülajüin pümüin türa karalouktakat. Pikirajaa sünain waneesiaakaijeʼe ekirajaaya. Kamalainre pümüin tia pütchi waashajeʼerüitpakat, eesü süpüla pikirajaain sünain süpüshuaʼa tü suluʼukat süpana 6 otta 7. Nnojorülejeʼe kamalain shia pümüin, nnojo paashajeʼerüin. Wanee sukueena, ekirajaweena waya sünain tü palajatkat ekirajaaya, waneesia neʼe süpana tia.»
[Pütchi süttaka suluʼu süpana 7]
Wouyantapa wachikuaʼa eemüin na wayuukana
● «Aniichipaleʼe taya aleʼejüin tachikuaʼa süpüla yootojiraain waya. Anuuleʼe talüʼüjüin pümüin wanee karaloukta ashajünaka aluʼu süpüshuaʼa tü sütüjaweekat aaʼu tü wayuukalüirua. Tü pütchi yaakat sünain, suluʼujeejatü shia tü Wiwüliakat. [Paapa tü poyeetokot nümüin chi wayuukai.] Süchikijee, püma nümüin: «Sünainjee türa pütchi süsapoʼujeekat tü karalouktakat, ¿jara kamalainka pümüin? [Puuʼulaa nusouktai jee piiʼiyata nümüin tü ekirajaaya nüneekakat.] Teeʼiyatüin paala pümüin jamüinjatüin sukuwaʼipa putuma süchajaaya tü pütchi pütüjaweekalü aaʼu suluʼu tü Wiwüliakat.» Piiʼiyata nümüin jamüinjatüin sukuwaʼipa süpüla wekirajaain sünain tü poyeetokot. Eesü süpüla paainjüin shia sükajee pikirajüin nia sünain wanee pütchi jee piamale shia. Mapa, pikirajaa nümaa sünain tü pütchi «püleeja» makat. Mapüleejeerü pümüin puʼttüin sünain ekirajaa wanee wayuu müleka paainjüle tü münayütkat . Süchikijee paapüin tü poyeetokot nümüin chi wayuukai, «aleʼejeechi taya wanee sukueena» püma nümüin. Kettaapa nutuma tü ekirajaayakat, pikiraja nia sünain tü ekirajaaya nüneekakat jee eeshi süpüla pikirajüin nia sünain tü palajatkat ekirajaaya.