Shikirajia wayuu süka tü poyeetokot ¿Jaralii na aaʼinrakana maaʼulu tü nüchekakat Jeowa?
Akumajuushi süpüla shiʼraajünüinjatüin tü nupueulosekat Maleiwa natuma na ekirajaakana sünain tü Wiwüliakat
1. ¿Kasapülajatü sukumajünaka tü poyeetokot Tü nüchekakat Jeowa?
1 Aapünüsü wamüin jekenainka tü poyeetokot ¿Jaralii na aaʼinrakana maaʼulu tü nüchekakat Jeowa? ¿Pikirajüitpa wayuu süka? Karalouktakat tüü, akumajuushi süpüla wakaaliinjüin na wayuu ekirajaakana sünain tü Wiwüliakat süpüla: 1) natüjaain saaʼu tü sukuwaʼipakat nupueulose Maleiwa, 2) tü waaʼinrakat otta 3) sukuwaʼipa waʼyataain. Eesü neʼe waneesia ekirajaaya suluʼu süpana tü poyeeto kanüliakat Tü nüchekakat Jeowa, makalaka eein süpüla wekirajüin wayuu sünain soʼu jarai jee poloo minuuto.
2. Püküja jamüin sukumajia tü poyeetokot jee tü eekat suluʼu.
2 Sukumajia tü poyeetokot. Apünüinsü kasa suluʼuka tü poyeetokot, sünainpünaasü shia sukuwaʼipa tü nupueulosekat Jeʼwaa, shia tü waashajaaitpakat achiki paalapa. Sünain tü piamakat shikii mekiisatmüin ekirajaaya, eʼitaanüsü tü sünüliakat sünain asakiraain shia. Tü pütchichein yuuikat ashajia, shia susouktia tü asakinnakat sünain sünülia tü ekirajaayakat. Alatsü suulia jarai shikii shiyaakua mma eeka sünain tü poyeetokot, aküjünüsü sünülia tü mma ayuʼnnakat ayaakua, aainjünüsü tia süpüla natüjaainjatüin aaʼu na wayuukana süküjünüin maʼin pütchi nüchiki Jeʼwaa süpaʼapünaa tü mmakat süpüshuaʼa. Sünain süpüshi tü ekirajaayakat, eesü wanee pütchi kanüliaka «Pütüjeere sooʼomüin», tüü, süküjüin tü naaʼinrüinjatkat na ekirajaakana sünain tü Wiwüliakat.
3. ¿Jamüinjatü sukuwaʼipa watuma nekirajia na wekirajüinkana süka tü poyeetokot?
3 Shikirajia wayuu süka. Puʼtta sünain paashajeʼerüin tü sünüliakat tü ekirajaayakat. Wanaa sümaa paashajeʼerüin tü pütchikalüirua, paashajeʼera tü sünüliachenkat. Sajaʼttiamüin tü ekirajaayakat, püsakira sünain tü pütchi eekat wünaapünaa sünain tü süpanakat tü karalouktakat. Eesü süpüla paashajeʼerüin süpüshuaʼa tü pütchikat uatuwoʼushi jee shiale paashajeʼerüin shia paliʼirüwai süpüla püküjüin tü süküjeekat maʼin. Ana sukuwaʼipa putuma süneekia tü pütchi paashajeʼerüinjatkat suluʼujee tü Wiwüliakat, piiʼiyata tü ayaakua eekat suluʼu otta paashajeʼera tü pütchi makalü anülia: «Pütüjeere sooʼomüin». Anasü wekirajüle tü wayuukalüirua suʼttiajeereʼeya tü karalouktakat. Eere wanee kasa eekai choʼujaain maʼin natüjaain aaʼu na ekirajünakana, pikirajeein naya sünain. Jamüsüjaʼa eere wanee outkajawaa miyoʼu pikirajüinjana naya sünain tü ekirajaayakat 11.
4. ¿Jamüsü talataka waaʼin sutuma eein wamaʼana tü poyeetokot?
4 Wekirajapa wayuu sünain tü Wiwüliakat, wakaaliinjüin naya süpüla neʼraajüin Jeʼwaa. Wakaaliinjüinjana nayaʼaya sünain eʼraajaa tü nupueulosekat Maleiwa (Prov. 6:20). ¡Talatashaatasü maʼin waaʼin sutuma eein wamaʼana tü poyeetokot süpüla wekirajüin wayuu nüchiki Maleiwa otta tü nupueulosekat!