¿Suluʼusüche waaʼin tü nümakat Maleiwa süchiki sukuwaʼipa aluwatawaa nutuma?
Tü sümakat tü Bibliakat
Tü sukuwaʼipakalü aluwatawaa nutuma Maleiwa nnojotsü suluʼuin naaʼin wanee wayuu eekai anoujain.a Süküjain tü Bibliakat aluwataain Maleiwa chejee iipünaa (Mateo 4:17). Süküjainña tü Bibliakat nuluwataaichipain Maleiwa maaʼulu yaa chaa iipünaajee. Wekirajaa sünain tia.
Niʼitaain Maleiwa na aluwataainjanakana nutuma, eeshii na nuluwataakana aaʼu otta nüikaleʼerüin pütchi süpüla saainjünüinjatüin tü keeʼireekat naaʼin chaa iipünaa jee müsia yaa mmapaʼa (Mateo 6:10; Alateetkat Mapeena [Apocalipsis] 5:10).
Aluwataajeechi Maleiwa saaʼu süpüshuaʼa pueulo jee saaʼu süpüshuaʼa eʼirukuu eeka saaʼu tü mmakat (Daniel 7:13, 14). Nnojotsü shiain wanee aluwatawaa aneekünaka sutuma wayuu, nia eʼitaaka shia Maleiwa otta naapüin laülawaa nümüin chi nüneekakai süpüla nuluwataainjachin saaʼu wayuu (Salmo 2:4-6; Isaías 9:7).
Nüküjain Jesús namüin na aluwataaushikana eejeenain naya nümaa chaa iipünaa sünain aluwatawaa. Anuu tü nümakat süchiki tia: «Aikalaajeena jia saaʼu einasee», aluwataainjana naya nümaa Jesús maluʼulu tia pütchikat (Lucas 22:28, 30).
Nuluwataapeena Maleiwa najaʼttireena na nüʼünüükana (Salmo 2:1, 2, 8, 9; 110:1, 2; 1 Corinto 15:25, 26).
Süküjain tü Bibliakat nnojoluin suluʼuin saaʼin wayuu tü süchikikat nukuwaʼipa Maleiwa sünain aluwatawaa. Tü shikirajakalü anain tü Bibliakat shia eein süpüla suʼwanajaain waaʼin sutuma tü pütchi anakat maʼin süchiki nuluwataainjachin Maleiwa (Mateo 13:19; 24:14).
¿Nnojotsüjasaʼa müin nünüiki Jesús : «Tü süchikikat aluwatawaa nutuma Maleiwa suluʼusü jaaʼin jiakana»?
Suluʼu waneirua Biblia ashajünüsü tü sümakat Lucas 17:21 süka pütchikalüirua tüü: «Tü süchikikat aluwatawaa nutuma Maleiwa suluʼusü jaaʼin jiakana» (Biblia Americana San Jerónimo). Müsüjeseʼe wainmain wayuu jülüjakana aaʼin suluʼuin saaʼin wayuu tü süchikikat sukuwaʼipa aluwatawaa nutuma Maleiwa. Süpüla wayaawatüinjatüin saaʼu tia wetsiikulokot, wekirajaainjatü anain tü sünainpünaakat.
Nnojorüleejaʼa süpüla suluʼuin naaʼin na wayuu oʼuteekana aaʼin Jesús tü süchikikat sukuwaʼipa aluwatawaa nutuma Maleiwa.
Nümajalain Jesús tia pütchikat namüin na fariseokana, üttüsü maʼin naaʼin nayakana nooʼomüin jee nachajaain sukuwaʼipa süpüla noʼutuin naaʼin (Mateo 12:14; Lucas 17:20). ¿Shiache nüküjeeka achiki Jesús suluʼuin naaʼin naya wayuu mojulaakana tü sukuwaʼipakat aluwatawaa nutuma Maleiwa? Nnojotsü shiain nüküjeein achiki tia. Anuujeseʼe nünüiki: «Anayaasü jukuwaʼipa suʼupala wayuu, piamapejeʼe juʼupünaa otta mojulaashii jia» (Mateo 23:27, 28).
Eesü waneirua Biblia pansaaka atuma tü sümakat Lucas 17:21. Anuu tü sümakat El Nuevo Testamento original süchiki tia: «Tü süchikikat sukuwaʼipa aluwatawaa nutuma Maleiwa yaasü shia waʼatoʼu» otta Traducción del Nuevo mundo de las Santas Escrituras (con referencias) müsü shia: «Tü süchikikat sukuwaʼipa aluwatawaa nutuma Maleiwa eesü shia jaʼakapünaa jiakana» (piirakaa tü nootakat). ¿Jamaluʼutche yalain naʼatoʼu jee naʼakapünaain na fariseokana tü süchikikat sukuwaʼipa aluwatawaa nutuma Maleiwa? Shia süka eejachin Jesús naʼakapünaa nayakana, chi aneekünakai nutuma Maleiwa süpüla aluwatawaa (Lucas 1:32, 33).
a Wainma iküleesia ekirajaaka suluʼuin naaʼin na wayuukana tü süchikikat nukuwaʼipa Maleiwa sünain aluwatawaa. Jamüshiijaʼa na kanüliakana Convención de Bautistas del Sur, wanee iküleesia chakat Estados Unidos, süküjain suluʼuin naaʼin na wayuukana jee sünain nakuwaʼipa tü süchikikat nukuwaʼipa Maleiwa sünain aluwatawaa. Otta suluʼu tü karaloʼuta kanüliakat Jesús de Nazaret tü nüshajakat chi papa Benedicto XVI müsü nünüiki: «Tü süchikikat sukuwaʼipa aluwatawaa nutuma Maleiwa anteerü shia suluʼu naaʼin chi aapajakai tü pütchikat, shia sukuwaʼipakaʼaya tia».