Wanee paaʼachon

¿KASA naainjaka na wayuukana? ¡Naʼwaajüin wanee paaʼachon! ¿Jamüsü naainjaka tia?

Süka kamaʼain Moisés saaʼu tü uuchikat, namaka na israeliitakana: ‹Nnojotsü watüjaain saaʼu tü alatakat nümüin Moisés, wakumaja mata wanee wamaleiwase oʼunirüinjanaka waya yaajee›.

Nümaka Aarón chi nuwalakai Moisés: ‹Anakaja, jüntira tamüin süpüshuaʼa jücheʼese›. Süntinnapa nümüin nukumajaka wanee paaʼachon süka tü oorokat. Namaka na wayuukana: ‹¡Chii nia chi wamaleiwase oʼunirakai waya Egiptojee!› Nayonnajaka sümaa naʼwaajüin nia.

Jashichika maʼin Jeʼwaa niʼrapa tü naainjakat. Nümaka nümüin Moisés: ‹Pümayaa puʼunai eemüin na israeliitakana. Kaainjalashii, motusü naaʼin tü taluwataakat anain naya otta naʼwaajüin wanee paaʼachon aainjuushi süka ooro›.

Nüshakatapa Moisés, niʼraka na wayuukana sünain eeʼirajaa otta ayonnajaa nüʼütpünaa chi paaʼachonkai. Jashichika maʼin nia, nujutaka tü piamasükat ipa, yürüleeka shia. Naʼajaka chi paaʼachonkai.

Kaainjalashii na israeliitakana. Nümaka Moisés: ‹Na wayuu aʼwaajakana chi paaʼachonkai ouktajana›. Nuluwataaka wanee wayuuinnua kamaʼanashii chajaruuta süpüla noʼutuin naaʼin. ¡Ouktaka 3.000 wayuu! Tia shikirajüin waya niainjachin neʼe Jeʼwaa waʼwaajaka noulia na maleiwayaashiikana.