EKIRAJAAYA 24

Nnojotsü nekeraajüin nanüiki

Müshi Jehová nümüin Moisés: «Jalaichi saaʼumüin tü uuchikat. Tashajeerü sünain ipa tü pütchi taluwataainjatkalü anain jee taapeerü shia pümüin». Nüntapa Moisés süraloʼumüin tü uuchikat, makatüshi nia chaʼayaa 40 kaʼi. Nüshajaka Jehová tü Poloosükat Pütchi sünain piamasü ipa jee naapaka shia nümüin Moisés.

Moisés nujutuin mmoluʼumüin tü piamasükat ipa

Sülatapa maʼaka jeʼra kaʼi, nnojolinjachiaa aleʼejüin nüchikuaʼa Moisés naaʼinruʼu na israelitakana. «Choʼujaashi wanee wekiipüʼü, pukumaja wamüin wanee wamaleiwase», namaka nümüin Aarón. Nusoutaka Aarón namüin: «Jüntira tamüin tü ooro jümaʼanakat». Nukumajaka Aarón wanee paaʼachon süka ooro. «Paaʼachonkai chii, nia chi wamaleiwase ojuʼitirakai waya Egiptojee», namaka na israelitakana. Naʼwaajaka chi paaʼachonkai jee aainjashii naya miʼiraa. ¿Anasüche tia naaʼinrakat? Nnojo. Nnojotsü nekeraajüin tü namakat nümüin Jehová, nnojoishi naʼwaajüin neʼe nümüiwaʼa.

Niʼrüin Jehová mojuin maʼin tü naaʼinrakat na israelitakana. «Puʼuna eemüin tü wayuukalüirua. Macheʼeinapa naya sümüin tanüiki, naʼwaajüin wanee maleiwayaashi», nümaka nümüin Moisés. Nüshakataka joo Moisés saaʼujee tü uuchikat jee nülüʼüjaka tü piamasükat ipa.

Nülüʼülaapa Moisés eejanale jutkatüin na israelitakana, naapüin neeʼirain, niʼraka naya sünain ayonnajaa jee sünain aʼwaajaa chi paaʼachonkai. Jashichika maʼin Moisés saalinjee tia. Nujutaka tü piamasükat ipa mmoluʼumüin, saichuwaleeka shiairua. Naʼajaka Moisés chi paaʼachon aainjuushikai süka ooro. «¿Jamüshi poonookaʼa namaa süpüla paaʼinrüin tü kasa mojusükat?», nümaka nümüin Aarón. Nusoutaka Aarón: «Nnojo jashichin pia tamüin. Pütüjaa aaʼuchii eʼrüliin wayumüin naya. Nachuntuin tamüin süpüla takumajüin wanee namaleiwase, jee tojutaka tü oorokot saʼaka tü sikikat, nukumajaaka nümüiwaʼa paaʼachonkai chii». Mojusü maʼin tü naaʼinrakat Aarón. Nuʼunaka Moisés nüchikuaʼa süraloʼumüin tü uuchikat jee nuchuntaka nümüin Jehová süpüla motuinjatüin naaʼin naainjala na israelitakana.

Motusü naaʼin Jehová naainjala na oonoweekana nümaa süka süpüshuaʼa naaʼin. Oonooinjana na israelitakana sümaa tü nümakat Moisés ¿aashimüin?

«Püpansaajüle pünüiki nümüin Maleiwa, pikeraajamaatüinjatü shia, nnojoishi talatüin nia nümaa chi eekai malain. Paapüle pünüiki nümüin Maleiwa, pikeraaja shia» (Eclesiastés 5:4).