Poloosü pütchi

ANTÜSHII na israeliitakana eemüin tü uuchikat Sinaí jee Horeb piama kashi süchikijee noʼunuin Egiptojee. Tia uuchikat shia eejachire naashajaain Maleiwa nümaa Moisés wanaa sümaa chuwatüin wanee wunuʼu. Kakaliashii naya chaaʼaya.

Oʼotooshi Moisés saaʼumüin tü uuchikat, naʼatapajünaka natuma na israeliitakana. Keeʼireesü naaʼin Jeʼwaa noonooin na israeliitakana nümüin otta naʼwaajüin nia. Nüshakatapa Moisés nüküjüin namüin na israeliitakana tü nünüikikat Jeʼwaa. Waainjeerü tia namaka.

Kamüsainka otta katürülaka tü uuchikat nutuma Jeʼwaa. Nümaka namüin na israeliitakana: ‹Taya chi Jümaleiwase ayuʼlakai jia Egiptojee. Nnojoishii jia aʼwaajüinjanain waneeirua maleiwayaasü›.

Nüküjaka Maleiwa namüin na israeliitakana 9 pütchi. Mmotka na israeliitakana, namaka nümüin Moisés: ‹Paashajaa wamaa süka mmoluin waya seema oukta naashajaale Maleiwa wanaa›.

Mapa nümaka Maleiwa nümüin Moisés: ‹Poʼotoo saaʼumüin tü uuchikat süpüla taapüin pümüin piamasü ipa eere tashajüin tü naainjüinjatkat na israeliitakana. Noʼotooka Moisés nüchikuaʼa saaʼumüin tü uuchikat, chaka nia 40 kaʼi otta ai.

Nüshajüin Moisés süpüshuaʼa tü nuluwataakat anain Maleiwa na israeliitakana otta müsia naapüin Jeʼwaa tü piamasükat ipa eere süshajünüin tü poloosükat pütchi.

Tü poloosükat pütchi kojutushaatasü maʼin otta müsia tü waneeirua kasa aluwataanaka anain na israeliitakana. Wanee shia: ‹Maleiwa, chi Pümaleiwasekai, anashi aire püpüla süka süpüshuaʼa paaʼin. Anashi jülüjüle paaʼin Maleiwa waneepia. Jee eesü waneʼeya, müsü mayaa: Anasü aire püpüla wayuu süpüshuaʼa maa aka alin pia püpülajiraa›. Naashin Jesús tü piamasükat shia tü alanaʼleekat sünainjee süpüshuaʼa tü nüshajakat Maleiwa nümüin Moisés. Mapa ekirajaweena waya nüchiki Jesús otta tü nikirajakat anain.