¿Kasa nükaaliinjaka anain waya chi wawala alapalaakai waaʼu?

Aashajaasü tü Wiwüliakat nüchiki Bernabé nümaa Pablo suluʼu tü Ashajuushikat süka Griego. Alapalaapuʼushii naya naaʼu na anoujüshiikana. ¿Jamüsü naainjapuʼuka tia? Süka keeʼireein naaʼin anain nanoula na nawalayuukana. Nüküjüin Pablo nülapalaweein nüchikuaʼa naaʼu na nuwalayuukana. Mayaapejeʼe wattain maʼin noumain, naainjüin tia süka nütütüleʼereein naaʼin na nuwalayuukana (Aluwataaushikana 15:36). Müsia nukuwaʼipa maaʼulu chi wawala alapalaakai waaʼu.

Natütüleʼerüin waaʼin. Awaraijaashi saaʼu piama shikii outkajaalee chi wawala alapalaakai waaʼu, nülatirüin wanee semaana sümaa wanee outkajaalee piantua süpüla juyaka. Wainma tü kasa watüjakat nünainjee otta sünainjee nuʼwayuuse, müleka kaʼwayuusere nia. Neʼraajee amüinchii na tepichikana namaa na miyoʼuyuukana. Aküjeeshi nia pütchi wamaa otta oʼuneeshi wamaa sünain ekirajaa wayuu sünain tü Wiwüliakat. Waraittüshi nia namaa na laülaashiikana eemüin na wawalayuukana süpüla natütüleʼerüin naaʼin, nikirajüin waya suluʼu tü outkajaaleekat jee sünain tü outkajawaakat miyoʼu (Aluwataaushikana 15:35).

Nükaaliinjüin waya. Chi wawala alapalaakai waaʼu, shia naaʼinmaaka anainjatüin tü wanoulakat. Outkajaashi namaa na laülaashiikana otta na aʼyataakana neʼipajee süpüla naashajaain süchiki naʼyataain na wawalayuukana otta süpüla nüchiaain naya. Nükaaliinjüin na pürekutsootkana süpüla anainjatüin maʼin sukuwaʼipa naʼyataain. Talatshi nia süka niʼrüin na wayuu outkajaakana wamaa otta süka niʼrüin kooʼomüin nanoula. Aʼyataashi nia süka süpüshuaʼa naaʼin süpüla nükaaliinjüin waya (2 Corinto 8:23). Müinjanaʼaya wayakana maʼaka naaʼin niakai (Hebreokana 13:7).

• ¿Kasapülajatü nülapalaain waaʼu chia wawalakai?

• ¿Kasa paaʼinrajatka süpüla anain pukuwaʼipa nülapalaapa eere puutkajaain?