¿Jalejeekuwat tü nneerü choʼujaakat süpüla aʼyatawaa nümüin Maleiwa?

Na aküjüliikana pütchi nakumajüin sümaa neitajüin masaloui wainmashaata Wiwülia jee karalouktairua. Nakumajüin Piichi Outkajaalee sümaa nanouktüin shia sumojujaale, naapüin tü choʼujaakat namüin na weteliita eekana sainküin mmaka otta na misioneerokana jee nakaaliinjüin na wawalayuu alatakana amüin kasa mojusü. ¿Jalejeekuwat tü nneerü naainjakalü aka tia?

Nnojoishii waya achuntüin nneerü jee aapüin diezmo. Mayaapejeʼe wainmain tü nneerü choʼujaakat süpüla aʼyatawaa nümüin Maleiwa, nnojoishii waya achuntüin nneerü sümüin wayuu. Alatüirü suulia poloo shikii juya süchikijee sümüin tü rewiisütakat Aapiria Wayuu: «Nnojoleena waya ojulijüin nneerü jee achuntüin kaaliinwaa sümüin wayuu». ¡Shiimain tia pütchikat! (Mateo 10:8.)

Asülajüshii waya nneerü süka waaʼin. Eeshii na wayuu kojutkana amüin wekirajüin wayuu, makalaka nasülajüin nneerü süpüla waainjüin shia. Akatatshii waya kaʼi, aʼyataashii maʼin waya jee asülajüshii waya nneerü süpüla saainjünüin tü nüchekakat Maleiwa sainküin Mma (1 Crónicas 29:9). Eesü kojonchon suluʼu tü Piichi Outkajaaleekat otta eere saainjünüin tü outkajawaakat miyoʼu süpüla nejitüin nneerü na wayuu asülajeekana. Nnojoishii washirüin na wayuu ejitakana nanneetse, shia naainjaka tü saainjakat tü wayuu müliasü oukta aʼwayuuset naashajaakalü achiki Jesuu. Ejitüsü shia suluʼu tü kojonchonkot piamashii nneerü kachueerachen neʼe (Lucas 21:1-4). Eesü süpüla nakatalawalin na wayuukana tü nneerü ‹naapüinjatkat süka naaʼin waneʼewai nakua› (1 Corinto 16:2; 2 Corinto 9:7).

Watüjaa aaʼu niʼitaajeerüin Jeʼwaa suluʼu naaʼin na wayuukana kojuteein nia natuma süka tü kasa kojutsü namaʼanakat. Tia, süpülajatü ayatüinya saainjünüin tü aʼyatawaakat nümüin Maleiwa otta süpüla shikeraajüin tü nüchekakat (Proverbios 3:9).

• ¿Kasa naataka atuma na aküjüliikana pütchi noulia na suluʼukana tü wanee iküleesiakalüirua?

• ¿Kasapülajatü tü nneerü asülajünakat?