¿Jalejeekuwat napüla tü nneerü nawalaajakalü aka tü naʼyataainkat?

Watta saalii Wiwülia otta karalouktairua weʼinprimiijaka juyawai otta weitajüin shia sümüin wayuu. Eesü wamaʼana maakina eʼinprimiijia karalouktairua chaa Weteet. Wakumajüin tü piichi eere woutkajaain sünain aʼwaajaa Maleiwa. ¿Jara awalaajaka süpüshuaʼa tia?

Awalaajünüsü süpüshuaʼa tia süka tü nneerü nasülajakat na wayuukana süka naaʼin namüiwaʼa (2 Corinto 9:7). Saashin tü rewiisütakat Zionʼs Watch Tower ojuʼitaka 1879, nia Jeʼwaa akaaliinjaka waya, nnojoleena waya ojulijakuʼu müin nneerü sümüin wayuu. Ayatayülia müin sukuwaʼipa watuma tia maaʼulu yaa.

Tü nneerü asülajünakat ejitünüsü suluʼu tü kojon eekat suluʼu tü Piichi Outkajaaleekat, suluwataanaka suluʼumüin Weteet. Nnojoishii waya achuntüin diezmo, nnojoishii waya achekajüin saaʼu tü waʼyataainkat nümüin Maleiwa jee nnojotsü woikkaain tü karalouktairua weitajakat. Nnojoishii waya awalaajünüin saaʼu waküjüin pütchi, saaʼu wekirajüin na wawalayuukana jee saaʼu wakumajüin piichi outkajaalee. «Anakaja müleka nnojorule jüchuntüin awalaajünaa saaʼu tü kasa anasü jaaʼinrakat sümüin wayuu», müshi Jesuu (Mateo 10:8). Na wawalayuu aʼyataakana suluʼu tü shikiisükat Weteet jee suluʼu waneeirua Weteet, nnojoishii naya achekajüin saaʼu tü naʼyataainkat. Jaʼitakajeʼe na Laülaashii Jülüjakana Aaʼin na Aküjüliikana Pütchi sainküin Mma, nnojotsü naainjain tiaya.

Neʼrüle müliaa na wawalayuukana, wakaaliinjain naya sükajee tü nneerü asülajünakat. Mapuʼusü natuma na nikirajüinkana Jesuu (Roma 15:26). Wakaaliinjain na wawalayuu ojuichijaakana epia, waluwataain eküülü namüin, kuluulu, tottoot jee wunuʼu neiyajaainjatka aka. Sumojujaale tü Piichi Outkajaaleekat, wakumajüin shia.