Pükaaliinja na puwalayuukana

1, 2. ¿Kasa naaʼinraka na 230 aküjülii pütchi püreesakana süpüla nnojoluinjatüin sajaʼttüin naaʼin wopuluʼu?

JÜLÜJATAA paaʼin tü alatakat sülüʼütpa maʼin süpüla sajaʼttüin tü kasachiki kanüliakat Segunda Guerra Mundial. Akanaluweeshii na nusurulaatsekana Hitler, shiasaʼa sutuma nakanaluweein, noʼutee aaʼinchii na wayuu püreesakana natuma. Noʼunirüinjana naya eemüin süshaʼwajüle wanee anuairua. Chapa naya palaanain, nojuchijaainjatü tü anuakat namaa.

² Nayasaʼa na 33.000 wayuu chajanakana püreesain suluʼu tü mmakat Sachsenhausen, oʼuninnüshii süka nooʼui suluʼumüin tü pueulokot Lübeck (Alemania). Watta oʼunüshi suluʼu tia mmakat, eetaasü maʼaka 250 kiloometüro. Shiasaʼa naʼaka na wayuu oʼuninnakana süka nooʼui, eejana maʼaka 230 aküjülii pütchi nüchiki Jeʼwaa. Maʼlainsat naaʼin sutuma jamü otta ayuulii. ¿Ajaʼttüsüche naaʼin wopuluʼu? Nnojo. ¿Kasa naainjaka süpüla nnojoluinjatüin sajaʼttüin naaʼin? Akaaliinjiraashii naya wopuluʼu süpüla nachecherüinjatüin naaʼin. Nnojotsü ajaʼttüin naaʼin wopuluʼu na wawalayuukana sükajee nakaaliinjiraain, aijiraain naya otta katchin naaʼin nutuma Jeʼwaa (2 Cor. 4:7).

3. ¿Jamüsü choʼujaaka wamüin wakaaliinjiraain süpüla wachecherüin waaʼin?

³ Mayaapejeʼe nnojoluin sülatüin wamüin tia maaʼulu, naata tü alatakat wamüin. Süchikijee süikkalaain Nuluwataaya Maleiwa soʼu juyaka 1914, ojutünüshi Satanaa chejee iipünaajee yaa saaʼumüin tü mmakat. «Jashichishaatashi maʼi nia, süka nütüjaain saaʼu sünain sülüʼülüin nükalia süpüla ataʼünnaa» (Alat. Map. 12:7-9, 12). Süka sülüʼülüin maʼin Armagedón, nümalajeʼereein wanoula chi Yolujaakai. Wainma tü kasa alatakat wamüin nutuma. Anuutaa joo tü kasa shapaakalü atuma waaʼin waneepiayaʼasan (Job 14:1; Ecl. 2:23). Sutuma wainmain maʼin tü kasa alatakat wamüin, eeshii mapüsale waya otta matchinre wanoula. Alatüsü tia nümüin wanee wawala. Nükaaliinjapüʼüin na wayuukana süpüla anain nanoula anaiwaʼaya nia. Shiasaʼa laülaapa nia, ayuuishi nia sümaa tü nuʼwayuusekat. Mojuka maʼin naaʼin. Sutuma tü alatakat nümüin, choʼujaasü nümüin nükaaliinjünüin. Akaʼaya wayakana choʼujaasü wamüin wakaaliinjünüin otta katchinjatüin waaʼin nutuma Jeʼwaa.

4. ¿Kasa waaʼinrajatka naashin Pablo süpüla wachecherüin naaʼin na wawalayuukana?

⁴ Süpüla wachecherüinjatüin naaʼin na wawalayuukana, waaʼinrajatü tü nümakat Pablo namüin na hebreokana: «Anakaja müleka wakaaliijiraale wapüshua sünain kamaneejiraain je sünain waaʼinrüin tü anasükat. Je anakaja müleka nnojoliire müin aka waya naaʼin na wayuu akulajaakana aaʼin sünain jutkatirawaa. Shia anaka aluʼu müleka jutkatiraale waya süpüla ekirajirawaa süpüla wachecherüin waaʼin sünain anoujaa. Anakaja wachiaajiraale waneepia, süka sülüʼülüin nükalia chi Senyotkai süpüla nüleʼejüinjachin nüchikua» (Heb. 10:24, 25). ¿Kasa waaʼinrajatka süpüla kacheʼein waya sümüin tia pütchikat?

«ANAKAJA MÜLEKA WAKAALIIJIRAALE WAPÜSHUA»

5. ¿Kasa sünainpünaaka tü pütchikat: «Anakaja müleka wakaaliijiraale wapüshuaa»? ¿Kasa waaʼinrajatka wakaaliinjeere na wawalayuukana?

⁵ Tü pütchikat «anakaja müleka wakaaliijiraale wapüshuaa», sünainpünaasü jülüjüinjatüin waaʼin tü kasa choʼujaakat namüin na wawalayuukana. ¿Jülüjüsüche waaʼin tü choʼujaakat namüin na wawalayuukana wasaküle neʼe naya sünain tü outkajawaakat? ¿Waashajaale neʼe süchiki tü kasa nnojotkat kasain saamüin namüin? Nnojo. Nnojoliipejeʼe yootuinjanain waya süchiki perulaa jee süchiki tü kasa nnojotkalü anain süpüla waashajaain (1 Tes. 4:11; 1 Tim. 5:13). Wakaaliinjeere na wawalayuukana süpüla wakatchinrüin nanoula, watüjaainjatü aaʼu kasain alatüin namüin, anale nakuwaʼipa, aire napüla Jeʼwaa, kasale anain namüin jee mojuin namüin. Waküjüinjatü namüin alin wapüla naya otta watünajutüin naya. Kapülainjana waaʼin naya waneepia, nnojotsü shiainjatüin neʼe wanaa sümaa neʼrüin müliaa jee seemiajaain nanoula (Roma 12:13).

6. ¿Kasa naaʼinrajatka na laülaashiikana süpüla nakaaliinjüin na nawalayuukana?

⁶ Müsü tü Wiwüliakat namüin na laülaashiikana: «Maa aka wane anneetpüʼü sünain naaʼinmajüin tü naʼanneetsekat, meeria jukuaippa sünain jaaʼinmajüin na anoujashii eʼitaaushikana jajapuluʼu nütüma Maleiwa. [...] Talatüinjatü jaaʼin sümaa süka jüchekalain shia, nnojotsü sükajeejatüin walaain jia sünain» (1 Ped. 5:1-3). Süpüla naaʼinrüin tia na laülaashiikana, natüjaainjatü aaʼu kasain choʼujaain namüin na nawalayuukana (paashajeʼera Proverbios 27:23a). Neʼrüle na wawalayuukana jülüjüin naya naaʼin na laülaashiikana otta talatüin naaʼin namaa, achuntamaateena kaaliinwaa namüin otta naküjeerü süpüshuaʼa tü suluʼukat naaʼin. Müle shia, mapüleejeerü namüin na laülaashiikana nakaaliinjüin na nawalayuukana waneʼewai nakua.

7. ¿Kasa jülüjüinjatka waaʼin airuʼurule nünüiki wanee wayuu eekai mojuin naaʼin?

⁷ Müshi Pablo namüin na nuwalayuu chajanakana Tesalónica: «Chi eekai matsüin naaʼin sünain anoujaa, anakaja müleka jüchecherüle naaʼin» (paashajeʼera 1 Tesalónica 5:14). Pütchikat tia, nanainpünaasü shia na mojukana aaʼin. Müsü Proverbios: «Mojule paaʼin wanaa sümaa müliain pia, matsüinjeerü paaʼin» (Prov. 24:10, TNM). Wakaaliinjüle wanee wayuu eekai mojuin naaʼin, soteesü waaʼin eein süpüla airuʼuluin nünüiki wamüin (Job 6:2, 3). Eesü nnojorüle niyaawatüin saaʼu nünüiki. Tia alatüsü sümüin wanee wayuu kanüliakat Rachelle. Müsü shia: «Wanaa sümaa mojuin maʼin saaʼin maama airuʼutsü sünüiki tamüin. Tasoʼirapuʼuin saaʼin sünain wayuuin kamaneesü shia, aipüralüin sümaa asülajalüin shia. Tatüjaaitpa aaʼu nnojoluin shiyaawatüin saaʼu sünüiki wanee wayuu eekai mojuin maʼin saaʼin. Nnojotsü anain peʼipaale wayuu namaa». Müsü tü Wiwüliakat: «Kekiire maʼin wanee wayuu, nüchecherüin naaʼin suulia naashichijaain otta nülatirüin tü kasa mojusü aainjünakat nümüin» (Prov. 19:11, TNM).

8. ¿Jaralii na weeʼiyatüinjanakana amüin alin naya wapüla? ¿Jamüsü waaʼinrajatkat tia?

⁸ ¿Kasa waaʼinrajatka süpüla wakaaliinjüin wanee wawala eekai kaainjalain? Mayaapejeʼe nuuʼulaain suulia naainjala, ayatshia mojuin aaʼin jee japülin nia. Müshi Pablo nüchiki wanee wayuu ooʼulaakai suulia naainjala: «Anakaja motüle jaaʼin naainjala nuulia sümaa kamaneeinjanain jia nümüin, suulia nuuʼulaajüin suulia anoujaa sütümajee mojuin naaʼin. Temeʼeja aaʼinchii jia jooluʼu süpüla jiiʼiyatüinjatüin süchikua nümüin sünain alin maʼi nia jüpüla» (2 Cor. 2:7, 8). Nnojotsü anainjatüin neʼe waaʼin süka nütüjaaitpain saaʼu alin nia wapüla, weeʼiyatüinjatü nümüin süka tü wakuwaʼipakat otta süka tü kasa waaʼinrakat.

«SÜNAIN KAMANEEJIRAAIN JE SÜNAIN WAAʼINRÜIN TÜ ANASÜKAT»

9. ¿Kasa waaʼinrajatka süpüla kamaneejiraainjanain na wawalayuukana otta naaʼinrüin tü anasükat?

⁹ Naashin Pablo akaaliinjiraainjana waya «sünain kamaneejiraain je sünain waaʼinrüin tü anasükat». ¿Kasa nüküjeeka achiki Pablo? Watütüleʼerüinjatü naaʼin na wawalayuukana süpüla aijiraainjanain naya otta naaʼinrüinjatüin tü kasa anasükat. Jamüsüjaʼa wanee siki eekai shiyokojoweein, epeʼipajaanüsü sümaa sujuujunüin süpüla chuwatüinjatüin shia (2 Tim. 1:6, TNM). Müinjatia wakuwaʼipa namaa na wawalayuukana, wakaaliinjüinjana naya süpüla ayatüinjachin alin napüla Jeʼwaa otta ayatüinjanain alin napüla na waneeinnua. Watalateʼerüinjatü naaʼin süpüla ayatüin naaʼinrüin tü kasa anasükat.

10, 11. (1) ¿Jaralii na achechennüinjanakana aaʼin? (2) Püküja süchiki tü alatakat sümüin wanee wayuu anoukteʼeraka sukuwaʼipa sutuma sükatchinnüin aaʼin.

¹⁰ Choʼujaasü wamüin wapüshuaʼa wachechennüin aaʼin sünain anoujaa, jaʼitairü anain jee mojuin waaʼin. Müshi wanee wawala laülaashi suluʼu tü outkajaaleekat: «Nnojoishi teʼrüichin chi tashikai sünain nüchecherüin taaʼin. Sutuma müin takuwaʼipa, müshi mojutkai taya saaʼin tamüin. Mayaapejeʼe jaʼralin shikii juya touyase maaʼulu, talatüsü maʼin taaʼin sümaa tü namakat tamüin na tawalayuukana, maʼwaishii naya tamüin: ‹Anasü maʼin tü piʼyataainkat suluʼu tü outkajaaleekat›. Tatüjaa aaʼu talatüin naaʼin wanee wayuu nüchechennüle aaʼin sünain anoujaa. Sutuma tia, jülüjüsü taaʼin tachecherüinjatüin naaʼin na waneeinnua». Anasü maʼin wachecherüle naaʼin napüshuaʼa na wawalayuukana maʼaka naaʼin na pürekutsootkana, na wawalayuu laülaakana, na matchinkana aaʼin otta wapüshuaʼa wayakana (Roma 12:10).

¹¹ Anale sukuwaʼipa nanüiki na laülaashiikana wanaa sümaa nachiaain na wawalayuu kaainjalakana otta naküjüle namüin naainjapuʼuin kasa anasü, nachechereerü naaʼin süpüla ayatüinjanain naya sünain anoujaa (Gal. 6:1). Alatüsü tia sümüin wanee wawala kanüliakat Miriam. Müsü shia: «Mojusü maʼin taaʼin sutuma wanee kasa alatüsü tamüin. Ooʼulaashii suulia anoujaa na taʼaleewainkana otta ayuuijaashi chi tashikai sutuma süpalanajaain isha nikiiruʼu. Shiasaʼa sutuma mojuin maʼin taaʼin, eʼrajiraʼawaisü taya nümaa wanee wayuu manoujüinsai shiiʼiree anainjatüin taaʼin». Antüsü suluʼu saaʼin maaliin shia nüpüla Jeʼwaa otta sujuʼiteein suulia tü anoujaakat. Nükaaliinjaka shia wanee laülaashi süpüla katchinjatüin saaʼin. Nüküjüin sümüin anapuʼuin maʼin sukuwaʼipa nümaa Jeʼwaa. Ojutuusü suluʼu saaʼin Miriam tü nümakat chi wawalakai. Süchekaka sükaaliinjünüin natuma na laülaashiikana. Naküjüin sümüin ayatüin shia alin nüpüla Maleiwa. ¿Jamakaʼa sukuwaʼipa Miriam sutuma tia? Ooʼulaasü shia nuulia chi sümüraajüinkai otta shiʼyataaka süchikuaʼa nümüin Jeʼwaa.

12. ¿Kaseerü naainjaka na wawalayuukana wayoujireʼerüle nakuwaʼipa namaa na waneeinnua otta mojule wanüiki namüin süka isain nachiki naaʼinrüin wanee kasa?

¹² Nnojotsü anain müleka neʼrüle japülii watuma na wawalayuukana. Müleka wayoujireʼerüle nakuwaʼipa sümaa nakuwaʼipa na waneeinnua, mojule wanüiki namüin süka isain nachiki naaʼinrüin wanee kasa, aʼyataajeena naya motsomüin nümüin Jeʼwaa, shiasaʼa süchikijee ooʼulaajeena suulia aʼyatawaa. Akaajasaʼa wepelisitaajüle naya, arütkaajeena naya nünainmüin Jeʼwaa, aijeechi nia napüla otta aʼyataajeena naya waneepia nümüin (paashajeʼera Filipos 2:1-4).

«ANAKAJA WACHIAAJIRAALE WANEEPIA»

13. ¿Kasa sünainpünaaka achecheraa naaʼin na wawalayuukana? (Piirakaa sümüin tü ayaakuaa suluʼukat süpana 18.)

¹³ Müshi Pablo: «Anakaja wachiaajiraale waneepia, süka sülüʼülüin nükalia chi Senyotkai süpüla nüleʼejüinjachin nüchikua». Wachecherüinjatü naaʼin na wawalayuukana süpüla kooʼomüinjatüin nanoula. Tü pütchikat: «Sünain kamaneejiraain je sünain waaʼinrüin tü anasükat», maluʼulu wachecherüinjatüin naaʼin na wawalayuukana süpüla ayatüinjanain naya sünain aʼyatawaa nümüin Maleiwa. Tia, müsü aka saaʼin wanee siki eekai shiyokojoweein, epeʼipajaanüsü süpüla ayatüinjatüin shia chuwatüin. Wakatsüinrüinjatü naaʼin na mojukana aaʼin. Anainjatü sukuwaʼipa wanüiki namüin sümaa kemeʼeriainjatüin shia (Prov. 12:18). Eeinjatü waaʼin sünain tü naküjakat wamüin na wawalayuukana sümaa nnojoluin wasouktüin pejeewa shiʼipajee tü namakat (Sant. 1:19). Jülüjüle waaʼin tü namakat otta müle wayakai alatüin amüin tü alatakat namüin, wayaawateerü aaʼu mojuin naaʼin otta wakatsüinreerü naaʼin süka wanüiki.

14. ¿Kasa naaʼinraka wanee laülaashi süpüla nükaaliinjüin wanee wawala eemiajaaka anoula?

¹⁴ Jülüjataa paaʼin tü naainjakat wanee laülaashi süpüla nükaaliinjüin wanee wawala eemiajaakai anoula. Naashajeʼerapuʼuin chi wawalakai tü rewiisütakat Aapiria Wayuu jee oʼunapuʼushi nia waneepia sünain tü outkajawaakat. Shiasaʼa sutuma niʼrüin mojuin nakuwaʼipa na waneeinnua, jashichishi nia. Wanaa sümaa yootuin chi wawalakai, jülüjüsü neʼe naaʼin chi laülaashikai tü nümakat nümüin, niyaawataka saaʼu eeyülüinya naalii Jeʼwaa nüpüla chi wawalakai. Süchikijee tia, nüküjaka chi laülaashikai alin maʼin chi wawalakai sümaa nüpüshi napüla na wawalayuukana. Niyaawataka saaʼu nnojoluin anain tü naaʼinrakat. Nuunejaanaka sünain aküjaa pütchi nutuma chi laülaashikai. Sutuma nükaaliinjünüin chi wawalakai, aküjüshi nia pütchi nüchikuaʼa jee laülaashi nia nüchikuaʼa suluʼu tü outkajaaleekat.

15. ¿Kasa waaʼinrajatka süpüla washatüin nukuwaʼipa Jeʼwaa?

¹⁵ Eesü nnojorüle katsüinmaatüin naaʼin wanee wayuu eekai nütütüleʼennüin aaʼin. Müle nukuwaʼipa wanee anoujüshi, ayatüinjachia wakaaliinjüin. Müshi Pablo: «Chi eekai matsüin naaʼin sünain anoujaa, anakaja müleka jüchecherüle naaʼin» (1 Tes. 5:14). Nnojoishi wayüülajüinjachin nia, wakaaliinjüinjachi waneepia. Sümaiwa paala nnojoishi aashichijaain Jeʼwaa namüin na aʼyataashiikana nümüin. Nnojoishi nia aashichijaain nümüin Elías, naapüin tü choʼujaakat nümüin süpüla nikeraajüinjatüin tü niʼyataainkat (1 Rey. 19:1-18). Süka nuuʼulaain David suulia tü naainjalakat, nülatirüin Jeʼwaa tü naainjalakat (Sal. 51:7, 17). Akaaliinjünüshi Asaf nutuma Jeʼwaa wanaa sümaa nuuʼulaainjachiaain suulia anoujaa (Sal. 73:13, 16, 17). Akaʼaya maaʼulu, wanaa sümaa matchin naaʼin na anoujüshiikana otta mojuin naaʼin, anamiashi Jeʼwaa namüin otta aishii naya nüpüla (Éx. 34:6). Matüjüinsai ooʼulawaa Jeʼwaa suulia amüliajaa (Lam. 3:22, 23). Washatüinjatü tü nukuwaʼipakat sünain ayatüin alin wapüla na mojukana aaʼin.

WAKAALIINJIRAA SÜPÜLA WASAʼWATÜIN TÜ KATAAKALÜ OʼUU

16, 17. ¿Kasa waaʼinrajatka süpülapünaa sajaʼttüin tü kasa mojusükat? ¿Jamüsü waaʼinrajatka tia?

¹⁶ Naʼakajee na 33.000 wayuu püreesakana suluʼu tü mmakat Sachsenhausen, wainma na ouktakana. Akanasaʼa na 230 aküjülii pütchi püreesakana, nnojoishii ouktüin naya. ¿Jamüshii nnojoliikana ouktüin naya? Süka nakaaliinjiraain.

¹⁷ Maaʼulu yaa, suluʼushii waya «tü wopu sünainmüinkat tü kataakalü oʼuu» (Mat. 7:14, TNM). Choʼujaasü palitchon kaʼi süpüla wasaʼwatüin tü woʼunakalü achiirua: tü mma jeketüinjatkat nutuma Maleiwa (2 Ped. 3:13). Sümaʼinruʼu tia, wakaaliinjiraa süpüla ayatüin waya suluʼu tü wopu sünainmüinkat tü kataakalü oʼuu.