PÜTCHI SÜNAINKA SÜTA TÜ REWIISÜTAKAT | ¿JÜLÜJÜSHICHE PIA NAAʼIN MALEIWA?
Nütüjaa aaʼu Maleiwa jamüin makaʼa paaʼin
«Pünaʼlüin maʼin süpüshuaʼa tü takuwaʼipakat otta pütüjaa aaʼu jetsüin shia.» (SALMO 139:1, NM)
«Piʼratüjüiya taya takumajaaiwaʼaya süleʼeruʼu tei.» (SALMO 139:16, NM)
TÜ MANOULAKALÜ ATUMA WAYUU: Wainma wayuu anoujaka sünain kaainjaraliin na wayuukana noʼuluʼu Maleiwa. Mojuwaisü saaʼin wanee wayuu kanüliasü Kendra, süka isain süchiki soonooin sümaa nünüiki Maleiwa. Anuu sünüiki: «Nnojotsü oʼuraajüin taya saalii mojuin taaʼin».
TÜ SHIKIRAJAKALÜ ANAIN TÜ WIWÜLIAKAT: Nütüjaa aaʼu Jeʼwaa tü kasa alatakat wamüin, sümaa nnojoluin jülüjüin naaʼin tü waainjalakat. Saashin tü Wiwüliakat «niʼraajüin maʼin tü wakumajiakat ooʼulaka sotusü naaʼin sümamülain waya mma». Sutuma tia, nnojotsü nüchekajüin wamüin tü waainjalakat; amülialaasü naaʼin waalin sümaa motuin naaʼin waainjala wooʼulaale suulia (Salmo 103:10, 14, NM).
Jülüjataa waaʼin nukuwaʼipa David, chi aküjünakai achiki paala. Müsü nünüiki nümüin Maleiwa: «Piʼratüjüiya taya takumajaaiwaʼaya süleʼeruʼu tei, jaʼitakajaʼa nnojoliiwaʼaya takumajaain, püshajatüjülia suluʼu pükaraloukse süpüshuaʼa tü kasa choʼujaakat süpüla takumajaainjachin. Maleiwakalee, pünaʼla tü takuwaʼipakat otta piʼrajaa kasain suluʼuin taaʼin» (Salmo 139:16, 23, NM). Mayaainjeʼe kaainjalain David, nütüjaa aaʼu niʼreerüin Jeʼwaa mojuin maʼin naaʼin saalii tü naainjalakat.
Jamüshijaʼa pia, niʼrüin Jeʼwaa tü suluʼukat paaʼin. Müsü tü Wiwüliakat: «Shia jülüjaka naaʼin wanee wayuu tü kasa niʼrakat. Shia jülüjaka naaʼin Jeʼwaa tü suluʼukat saaʼin wayuu» (1 Samuel 16:7, NM). Nütüjaa aaʼu jamüin makaʼa wakuwaʼipa, nütüjaa aaʼu müin waya sutuma alejanain waya süleʼeruʼujee wei, sutuma wepijia wamaiwa otta natuma na wayuu kamaajanakana waya. Akaʼaya tü paainjakat shiiʼiree anamieein pia, kojutüsü maʼin nümüin Jeʼwaa.
Süka nütüjaain saaʼu tü pukuwaʼipakat, ¿kasa naainjaka püpüleerua süpüla nükaaliinjüin pia?