¿Nütüjaa aaʼuche Maleiwa tü alatakat pümüin?

¿KASA WATÜJAKA SÜNAINJEE TÜ KASA NUKUMALAKAT MALEIWA?

Jülüjataa paaʼin tü paaʼinwajiraakat maʼin anainjee na wayuu senkeyuukana. Wanaawasü maʼin naaʼin. Anuu sünüiki Nancy Segal, shikiipüʼüjana shia wanee ekirajaalee süchiki nakuwaʼipa na wayuu senkeyuukana: «Nnojotsü choʼujaain naashajaajiraain maʼin na senkeyuukana süpüla nayaawatüin saaʼu kasain nüküjeein chi wane». Anuu sünüiki wanee wayuu senkeyuujiraaka sümaa wanee suwala: «Eʼraajiraashii maʼin waya».

¿Kasa tü wanaawakat maʼin anainjee naaʼin? Naashin na ekirajaaliikana süchiirua nakuwaʼipa na wayuu senkeyuukana, wanaawasü naaʼin na senkeyuukana sutuma wanaaweematüin tü ADN nanainkat.

JÜLÜJA PAAʼIN TÜÜ: Chi Kakumalakai tü kanüliakat ADN nia Maleiwa, müshijeseʼe niain atüjaain maʼin saaʼu wakuwaʼipa suulialeʼeya wayuu süpüshuaʼa. Müshi chi aluwataaikai David: «Paaʼinmajüin taya süleʼeruʼu tei. Piʼratüjülia tü teipüsekat süleʼeruʼuiwaʼaya taya tei. [...] Piʼrüin taya takumajaaiwaʼaya otta püshajatüjülia suluʼu pükaraloʼutse tü waneirua kasa tanainkat» (Salmo 139:13, 15, 16). Nia neʼe Maleiwa chi eʼraajakai wakuwaʼipa, nütüjaa aaʼu tü alatakat wamüin joʼuuiwaʼaya waya otta jamüin maka wakuwaʼipa. Nnojoishi eein wanee wayuu atüjaakai saaʼu wakuwaʼipa nuulialeʼeya Maleiwa.

NÜTÜJAA AAʼU MALEIWA JAMÜIN WAAʼIN SAASHIN TÜ WIWÜLIAKAT

Anuu nünüiki chi aluwataaikai David sünain oʼuraajaa: «Jeʼwaakalee, pünaʼlüin süpüshuaʼa tü takuwaʼipakat otta piʼraajüin maʼin shia. Pütüjaa aaʼu müleka taikalaale jee müleka tatamaale. Pütüjaa aaʼu tü jülüjakat taaʼin, jaʼitaichi wattain pia. Jeʼwaakalee, pütüjaatüjülia aaʼu süpüshuaʼa tü pütchi taküjainjatkat» (Salmo 139:1, 2, 4). Nütüjaa aaʼu Jeʼwaa tü suluʼukat waaʼin otta tü keeʼireekat waaʼin (1 Crónicas 28:9; 1 Samuel 16:6, 7). ¿Kasa watüjaka nüchiki Jeʼwaa sutuma tia pütchikalüirua?

Eesüjaʼa kapüleere wamüin waküjain nümüin Jeʼwaa tü jülüjakat waaʼin otta tü suluʼukat waaʼin, nütüjaapejeʼe saaʼu tia. Nnojotsü jülüjain neʼe naaʼin Jeʼwaa tü kasa waaʼinrakat, nütüjaa aaʼulu jamüin waaʼinraka shia otta kasaje waaʼinraka müleka anayürüle wepijia jee nnojoliire ayuulin waya. Kamalainsü nümüin Maleiwa niyaawatüin saaʼu tü kasa anasü suluʼukat waaʼin, tü jülüjakat waaʼin jee wakaalinjale wayuu, süka jamüin, nukumalain waya süpüla alinjatüin wayuu wapüla (1 Juan 4:7-10, TNM).

Tü sümakat tü Wiwüliakat:

• «Naaʼinmajüin Maleiwa waneepia chi wayuu eekai aaʼinrüin tü anasü nüchekakat nüpüleerua, je naapüin nünüiki wanaa sümaa nüchuntüin nümüin. Akaajasa chi wayuu eekai masütaajuin sünain aaʼinraa tü mojusükot, aʼürülaajeechi Maleiwa nümüin saaliijee tia» (1 PEDRO 3:12).

• Müshi Maleiwa: «Kekiijeechi pia tatuma otta tekirajeechi pia sünain tü wopu puʼunüinjatkalü aluʼu. Tachiajaajeechi pia sümaa jülüjain pia taaʼin» (SALMO 32:8).

AMÜLIAJÜI CHI MALEIWAKAI

Eejiraajeena waya sümaa tü wamülialakat watüjaale saaʼu niʼrüin Maleiwa tü alatakat wamüin. Jülüja paaʼin tü alatakat sümüin wanee wayuu chejeʼewat Nigeria, Anna sünülia. Müsü sünüiki: «Süchikijee nünaajaain chi taʼwayuusekai, naküjain tamüin na tottootkana kanserüin tachira, soʼu tia, pitaaraluʼusü tü tachonkat süka ayuulin shia, hidrocefalia sünülia tia ayuuliikat (müsü aka saaʼin wüin saʼaka shikiisholoin). Kapüleesü tamüin pitaaraluʼuin taya wanaajiraa sümaa tü tachonkat. Awaʼnnüsü taya otta aainjünüsü tamüin quimioterapia otta radioterapia soʼu tia».

¿Kasa katsüinka atuma saaʼin Anna süpüla eejiraain shia sümaa tü alatakat sümüin? «Jülüjapuʼusü taaʼin tü sümakat waneirua pütchi suluʼujee tü Wiwüliakat, kamalainsü tamüin tü sümakat Filipos 4:6, 7, müsü sünüiki: ‹Tü anaa naapakat Maleiwa jümüin, tü isakat süchiki shiyaawatüin aaʼu wayuu, shieerü aaʼinmajaka tü jaaʼinkat›. Sotopa taaʼin tia pütchikat müsü pejekai taaʼin nünain Jeʼwaa. Nütüjaa aaʼu Jeʼwaa tü alatakat tamüin toulialeʼeya tayaka. Jee atütüleʼennüsü taaʼin natuma na anoujiraakana wanaa tamaa.

»Mayaapejeʼe ayatüin taya ayuulin, anoutaasü wakuwaʼipa maaʼulu. Wainmayaapejeʼe tü kasa alatakat wamüin, nnojotpejeʼe shapaain maʼin waaʼin süka watüjaain saaʼu nükaalinjeenain waya Jeʼwaa. Müsü tü Wiwüliakat suluʼu Santiago 5:11: ‹Watüjaa aaʼuchi chi Maleiwakai sünain naaʼinrüin wainma kasa anasü sümüin wayuu eekai süchecherüin saaʼin suʼunnaa sümüliala, maa aka nümüin chi watuushikai Job paala sümaiwa. Mayaashije müliain maʼi nia, nüchecherüin naaʼin. Je nümüliajüin nia Maleiwa wanaa sümaa tia›. Maʼaka nütüjaain saaʼu Jeʼwaa tü alatakat nümüin Job nütüjaa aaʼu tü alatakat wamüinya».