SUSOUKTAKA EʼIPAJEE TÜ WIWÜLIAKAT
¿Jamüsü shiaka maʼin aainjünüin kasa mojusü?
¿Jara ooʼulakaka naaʼin jesuu shiiʼiree naainjüinjachin kasa mojusü? (Mateo 4:8-10)
Keeʼireesü saaʼin wayuu aaʼinraa kasa anasü waneepia sümaa süküjüin tü shiimainkat. ¿Jamakaʼa joutka maʼin kasa mojusü sümaa müliain wayuu atumawaa? Weʼrawalin weinshi suluʼupünaa noticiero tü kasa mojusü aainjünakat sainküin mmakat. ¿Jaraiche maʼin kasitka süpüla müinjatüin tü mmapaʼakat? (Paashajeʼera 1 Juan 5:19.)
Nukumajaiwaʼaya Maleiwa Adán sümaa Eva, niʼitaain kasa anasü suluʼu naaʼin. Nukumajüin naya Maleiwa sünain müin aka nukuwaʼipa. Shia niʼitaaka tü anasükat suluʼu naaʼin süpüla nashatüinjatüin nukuwaʼipa sünain aipüralin nia wayuu (Génesis 1:27; Job 34:10). Nuuʼulaain naya Maleiwa sünain aneeka müleka naaʼinrüinjatüle tü anasükat jee shiale tü mojusükat. Nnojotpejeʼe nashatüin nukuwaʼipa Maleiwa süka shiain neʼe naaʼinrüin tü kasa mojusükat. Müsüjeseʼe sumojujaain tü nakuwaʼipakat, nnojoliinnapa naya anain. Shiasaʼa kachonpa naya, eweeniraashii na nachonniikana sümaa suluʼuin naaʼin tü kasa mojusükat. (Paashajeʼera Deuteronomio 32:4, 5.)
¿Ayateetche eein waneepia kasa mojusü?
Keeʼireesüle naaʼin Maleiwa eejiraain waya sümaa tü kasa mojusü suchuntaakat waaʼin (Proverbios 27:11). Nikirajüin waya süpüla wayuuinjanain anamiaa waya. Woonoole nümaa Maleiwa jee washatüle tü nukuwaʼipakat, talateena maʼin waya. Kapüleepejeʼe wamüin waaʼinrüin tia süka waleʼeruʼuin tü kaainjalaakat. (Paashajeʼera Salmo 32:8.)
Nuuʼulaain Maleiwa eein tü kasa mojusükat, nnojotpejeʼe eeinjatüin shia süpüla kaʼikat süpüshuaʼa (2 Pedro 3:7-9). Alüʼütsiaaje sükalia süpüla nayainjanain neʼe apütaain yaa Mmapaʼa na wayuu oonookana nümaa Maleiwa otta talateena maʼin naya. (Paashajeʼera Salmo 37:9-11.)