Aküjaa pütchi süka tü karalouktakat kasa shikirajaka
Suluʼu karalouktakat tüü, wainma süküjia pütchi süka tü karalouktakat Kasa shikirajaka. Süpüla anainjatüin pikirajia süka, püküja shia süka pünüiki, jülüja paain na wayuu püküjakana amüin pütchi otta pikirajaa sünain tü pütchi suluʼukat tü karalouktakat Kasa shikirajaka anaka süpüla oʼttaa sünain ekirajaa. (Eesü süpüla püküjüin pütchi süka tü süküjakat Waʼyataain Nümüin Maleiwa ojuʼitaka eneeroʼu soʼu 2005 süp. 8).
Aashajawaa nümaa Maleiwa
◼ «¿Püsakirüirü paaʼin nüsouktüle Maleiwa shiʼipajee wanüiki? [Puuʼulaa nasouktai. Süchikijee paashajeʼera 1 Juan 5:14, 15 otta pütchi 16-18, süpana 170-172.] Ekirajaayakat tüü, süküjüin jamüshii waashajaainjanaka nümaa Maleiwa otta kasa waaʼinrajatka süpüla nüsouktüin shiʼipajee wanüiki».
Armagedón
◼ «Wanaa sümaa naapüin noʼutku na wayuukana tü pütchikat Armagedón antüsü suluʼumüin nekii sajaʼlajaainjatüin kasa süpüshuaʼa. ¿Poneerü paaʼin pütüjaapa saaʼu eein süpüla waʼatapajüin Armagedón sümaa talatüin waaʼin? [Puuʼulaa nasouktai. Süchikijee paashajeʼera Alateetkat Mapeena 16:14, 16.] Jülüja paaʼin jameerüin wakuwaʼipa süchikijee Armagedón.» Piiʼiyata süpana 82-84 otta paashajeʼera pütchi 21.
Atkawaa/jimataa aaʼin
◼ «Suluʼupünaa tü mmakat süpüshuaʼa keeʼireesü naaʼin na wayuukana jimatüin naaʼin. Saaʼin pümüin ¿shiimainchejee eejeerüin jimataa aaʼin? [Puuʼulaa nasouktai. Süchikijee paashajeʼera Salmo 46:8, 9.] Karalouktakat tüü, süküjeerü pümüin jameerüin shikeraajia tü keeʼireekat naaʼin Maleiwa otta eejeerüin jimataa aaʼin nutuma.» Piiʼiyata tü ayaakuaa suluʼukat süpana 35 otta pikirajaa sünain pütchi 17-21, süpana 33, 34.
Iküleesia
◼ «Saashin wainma wayuu mojusü nakuwaʼipa na wayuukana sutuma tü iküleesiakalüirua, nnojotsü sünoʼuteʼerüin. Saaʼin pümüin ¿suʼunirüin na wayuukana tü iküleesiakalüirua suluʼu tü wopu anasükat?. [Puuʼulaa nasouktai. Süchikijee paashajeʼera Mateo 7:13, 14 otta pütchi 5, süpana 146.] Ekirajaayakat tüü, aashajaasü süchiki 6 kasa ayaawatünaka aka tü iküleesia nüchekakat Maleiwa.» Piiʼiyata tü pütchi suluʼukat süpana 147.
Jeowa chi Maleiwakai
◼ «Wainma na wayuu anoujakana nünain Maleiwa otta keeʼireesü naaʼin narütkaain nünainmüin. ¿Pütüjaa aaʼu suunejaain waya tü Wiwüliakat süpüla warütkaain nünainmüin Maleiwa? [Puuʼulaa nasouktai. Süchikijee paashajeʼera Santiago 4:8a otta pütchi 20, süpana 16.] Karalouktakat tüü, süpülajatü akaaliinjaa na wayuukana sünain eʼrajaa maʼin Maleiwa sükajee tü Wiwülia namaʼanakat.» Piiʼiyata tü asakiraa suʼttakat aka ekirajaaya 1.
◼ «Watta saalii wayuu achuntaka kojutuinjatüin nünülia Maleiwa. ¿Püsakirüirü paaʼin jaralüin nünülia Maleiwa? [Puuʼulaa nasouktai. Süchikijee paashajeʼera Salmo 83:18 otta pütchi 2, 3, süpana 195.] Karalouktakat tüü, shiiʼiyatüin tü shikirajakat maʼin tü Wiwüliakat nüchiki Jeowa otta tü keeʼireekat naaʼin napüleerua na wayuukana.»
Jesucristo
◼ «Wainma na wayuu aashajaakana nüchiki Jesucristo sainküin tü mmakat. Eeshii eeka namüin: ‹Wayuu anamia müleʼe›, ‹nia chi Maleiwakai otta waʼwaajüinjachi nia›. Saaʼin pümüin ¿choʼujaasüche maʼin watüjaain saaʼu tü wanoujakat nüchiki Jesús?» Puuʼulaa nasouktai. Süchikijee paashajeʼera Juan 17:2, 3 otta pütchi 3, süpana 37. Piiʼiyata tü asakiraa suʼttakat aka ekirajaaya 4.
Kasa mojusü/müliaa
◼ «Wanaa sümaa sülatüin wanee kasa mojusü, eeshii na asakirakana: ¿Jülüjüsüche naaʼin Maleiwa tü müliaa neʼrakat na wayuukana otta tü kasa mojusü alatakat namüin? ¿Püsakirüirü anain tia? [Puuʼulaa nasouktai. Süchikijee paashajeʼera 1 Pedro 5:7 otta pütchi 11, süpana 11.] Karalouktakat tüü, süküjüin tü naaʼinrajatkat Maleiwa süpüla najaʼttirüin tü müliaa weʼrakat.» Piiʼiyata tü asakiraa suʼttakat aka ekirajaaya 11.
Kataa oʼu waneepia
◼ «Wayakana wapüshuaʼa keeʼireesü waaʼin katüin woʼu soʼu kojuya juya sümaa nnojoluin ayuulin waya. Akatsaʼa maka eere süpüla ¿kateesü poʼu waneepia? [Puuʼulaa nasouktai. Süchikijee paashajeʼera Alateetkat Mapeena 21:3, 4 otta pütchi 17, süpana 53.] Karalouktakat tüü, süküjüin wamüin tü waaʼinrajatkat süpüla katüin woʼu waneepia otta jameerüin wakuwaʼipa shikeraajapa pütchikat tia.»
Ouktaa/asoʼirawaa aaʼin
◼ «Wanaa sümaa ouktuin wanee wapüshi keeʼireesü waaʼin weʼrüin nüchikuaʼa, ¿aashimüin? [Puuʼulaa nasouktai.] Wainma na talatakana aaʼin sutuma tü sümakat tü Wiwüliakat yaaya [paashajeʼera Juan 5:28, 29 otta pütchi 16, 17 süpana 71, 72]. Ekirajaayakat tüü, süsouktüin asakiraa maʼaka saaʼin.» Piiʼiyata tü asakiraa suʼttaka aka ekirajaaya 7.
Piichi
◼ «Maaʼulu yaa kapüleesü namüin na wayuukana sainküinpünaa tü mmakat kamaʼana otta awalaajaa wanee piichi anasü. Saaʼin pümüin ¿meerü wepia soʼu wanee kaʼi? [Puuʼulaa nasouktai. Süchikijee paashajeʼera Isaías 65:21, 22 otta pütchi 20, süpana 34.] Karalouktakat tüü, süküjüin wamüin jameerüin shikeraajia nutuma Maleiwa pütchikat tia.»
Tü apüshiikat
◼ «Wayakana keeʼireesü waaʼin talatüin sümaa wapüshi, ¿aashimüin? [Puuʼulaa nasouktai.] Tü Wiwüliakat süküjüin tü waaʼinrajatkat süpüla talatüin waya sümaa wapüshi, shia ashataa nukuwaʼipa Maleiwa sünain aijirawaa.» Süchikijee paashajeʼera Éfeso 5:1, 2 otta pütchi 4, süpana 135.
Wiwülia
◼ «Nashin na wayuukana nünüiki Maleiwa tü Wiwüliakat. ¿Püsakirüirü paaʼin jamüsü nünüikika Maleiwa wanee karaloukta süshajala wayuu? [Puuʼulaa nasouktai. Süchikijee paashajeʼera 2 Pedro 1:21 otta pütchi 5, süpana 19.] Karalouktakat tüü, süküjüin tü sümakat tü Wiwüliakat süchiki asakiraakalüirua tüü.» Piiʼiyata tü asakiraa suluʼukat süpana 6.
◼ «Maaʼulu watta saalii pütchi wantaka anain süpüla waashajeʼerüin. Akatsaʼa ¿jalasü wousütüin pütchi anasü talatüinjanaka atuma waya? [Puuʼulaa nasouktai. Süchikijee paashajeʼera 2 Timoteo 3:16, 17 otta pütchi 12, süpana 22.] Karalouktakat tüü, süküjüin tü waaʼinrajatkat süpüla anain wakuwaʼipa noʼuluʼu Maleiwa.» Piiʼiyata tü pütchi otta ayaakuaa suluʼukat süpana 122, 123.
[Pütchi süttaka suluʼu süpana 5]
Müinjatü wanüiki wachuntapa tü asülajünajatkat
«Maka pücheküle pükaaliinjüin tü aʼyatawaa waainjakat sainküin tü mmakat eesü süpüla paainjüin shia süka tü nneerü püsülajeekat.»
«Mayaapejee nnojoluin woikküin tü karalouktakat, wacheküin tü nneerü nasülajakat na wayuukana süpüla süküjünüin pütchi sainküin tü mmakat.»
«Eesü püsakirüle jalejeein wayuʼluin nneerü süpüla aainjaa aʼyatawaakat tüü. Tü waaʼinrakat wainküin shia sükajee tü nneerü wasülajakat. Pücheküle püsülajüin süpüshi pünneetse taapaajeerü.»