Wekirajaainjatka sünain tü outkajawaa miyoʼu waneekat kaʼi

Sünain tü outkajawaa miyoʼu waneekat kaʼi, soʼu tü juyakat 2009 wekirajaweerü anain tü pütchikat: ‹Ayata Jülüjüin paaʼin tü aʼyatawaa aluwataanakat anain pia süpüla pikeraajüin shia›, suluʼujeejatü Colosas 4:17. Kojutusü wamüin pütchikat tüü süka wanoujuin. Tü keeʼireekat waaʼin shia wekeraajüin tü aküjaakat pütchi maʼaka naainjüin shia Jesús (Juan 17:4). Chi aluwataaushikai Pablo nia wanee anaka maʼin süpüla washatüin nukuwaʼipa süka nikeraajüinjatüin naashin tü aküjaakat pütchi (Aluwataaushikana 20:24).

Chi wawala waraittakai waaʼu nüküjeerü tü alatakat namüin na wawalayuukana sünain aküjaa pütchi. Süchikijee waapajeerü tü pütchi kanüliakat: «Waaʼinmaja tü waüyee wapünajakat» shiiʼiyateerü jamüinjatüin nakaaliinjia watuma na «eekai süpülajanatüjüliʼinya eiranajawaa aaʼin nütüma chi Maleiwakai süpüla eeinjanain naya nümaa waneepia» (Aluwataaushikana 13:48). Chi wawala ayaatakai waaʼu aashajaweechi süchiki 2 Corinto 6:1-10, nüküjeerü wamüin tü pütchi kanüliakat: «Weeʼiyata waʼyataaliin nümüin Maleiwa». Aliika nüküjeerü wamüin tü pütchi kanüliakat: «Kojutu wamüin tü waʼyataainkat nümüin Maleiwa». Otta taasia aneerü maʼin aapajaa tü pütchikat: «Jimaʼalii, majayünnüü otta na miyoʼuyuu talatakana maʼin sünain aʼyatawaa nümüin Maleiwa» otta «Jimaʼalii jee majayünnüü ekeraajaka naʼyataain nümüin Maleiwa». Puwoutisaajüneere sünain tü outkajawaa waneekat jee piamaka kaʼi, püküjamaata shia nümüin chi aaʼinmajakai tü aainjünakat suluʼu tü outkajaaleekat. Sünain tü outkajawaa miyoʼukat ekirajaana anainrü La Atalaya. Pülüʼüja tü rewiisüta ekirajaanajatkat anain soʼu semaanakat tia.

Jülüjaa aaʼin tü aʼyatawaakat nümüin Maleiwa shia wanaa sümaa nnojoluin wooʼulaain sülanaain waneeirua kasa suulia tü nuluwataakat anain waya Jeowa. Sünain outkajawaakat tia sütütüleʼereerü wanoula süpüla watüjaain saaʼu tü waaʼinrüinjatkat süpüla oʼunaa suluʼu tü wopu lotusükat otta jülüjüin waaʼin tü aʼyatawaakat nümüin Maleiwa süpüla waaʼinrüinjatüin maʼin shia.