‹Eküülü eeka wanaa sümaa choʼujaain maʼin shia›
1. ¿Jamüsü pükaaliinjia sutuma tü outkajawaa miyoʼu waneekat kaʼi, eeka jekenainka? ¿Jamüsü nakaaliinjia na waneeinnua sutuma?
1 Wouyantapa süchikijee tü outkajawaa miyoʼu waneekat kaʼi, müshii waya: «¡Antüsü maʼin taaʼu!». Naashin wanee wawala waraittakai waaʼu, keeʼireesü maʼin naaʼin na wawalayuukana kooʼomüinjatüin naʼyataain sünain aküjaa pütchi naapajapa tü pütchi sajaʼttiakat tü outkajawaa miyoʼu waneekat kaʼi. Otta müsü nünüiki wanee: «Sükaaliinjüin waya süpüla wayaawatüin saaʼu tü kaʼi kepiakat oʼu waya otta wasakireʼerüin waaʼin sünain tü kasa waneeküitpakat». Otta müshi waneʼeya: «Wainma na aküjülii pütchi ayaawatakana sutuma tü outkajawaakat shiainjatüin jülüjüin maʼin naaʼin tü aʼyatawaakat nümüin Maleiwa.» ¿Jama piakai? ¿Jamüsü pükaaliinjia sutuma tü outkajawaa miyoʼu waneekat kaʼi, eeka jekenainka?
2. ¿Kaseerü ekirajünaka anain soʼujee settienpüroʼu sünain tü outkajawaa miyoʼu waneekat kaʼi?
2 Tü ekirajaanajatkat anain soʼujee settienpüroʼu meerü aka saaʼin wanee eküülü eeka wanaa sümaa choʼujaain maʼin shia. Suluʼujeejatü Salmo 118:8, 9 tü sünüliakat otta eejeerü pütchi aashajaaka nüchiki Jeowa müin aka saaʼin wanee ounjulaaya wanaa sümaa eein müliaa, jamüinjatüin nakaaliinjia na waneeinnua watuma süpüla naaʼinmajünüin nutuma Jeowa, tü waaʼinrajatkat süpüla washatüin nukuwaʼipa Jeowa süpüla wakaaliinjüin na waneeinnua, tü neeʼiyatakat aka na jimaʼaliikana otta na majayünnüükana neʼitaain naaʼin nünain Jeowa otta jamüin shiaka wanee ounjulaaya tü paʼaraiisü kaluʼukat waya.
3. ¿Kasa waaʼinrajatka süpüla anain wakuwaʼipa sutuma tü outkajawaa miyoʼu waneekat kaʼi?
3 Süpüla anain pukuwaʼipa sutuma. Süküjünapa joujainjatüin shia, yapaja pia süpüla puʼunüin sünain jee puunejaa na pikirajüinkana. Soto paaʼin nayain ‹aaʼinrüin kasa anasü sümaa nachecherüin naaʼin› na wayuu oonookana sümüin tü naapajakat (Luc. 8:15). Makalaka jülüjüinjatüin paaʼin tü ekirajünajatkat anain, püshaja süpüshi tü pütchi anakat saaʼin pümüin süpüla piʼitaain sünain pukuwaʼipa otta sünain aküjaa pütchi. Süchikijee tü outkajawaakat, paashajaa namaa na püpüshikana süchiki tü ekirajünakat anain otta jüküja jamüin süpüla jiʼitaain sünain jukuwaʼipa waneʼewai jukua tü pütchi aküjünakat.
4. ¿Jamüsü waʼatapajaka maʼin tü outkajawaa miyoʼu waneekat kaʼi?
4 Tü ekirajaanajatkat anain sünain tü outkajawaa miyoʼu waneekat kaʼi soʼu juyakat tüü, yapasü natuma na wawalayuukana süka süpüshuaʼa naaʼin sümaa natüjaain saaʼu aneerüin wakuwaʼipa sutuma maʼaka yapain atumaa wanee eküülü jemetüsü. Kasataalejeseʼe anain sukuwaʼipa nutuma Jeowa tü jaaʼinrakat süpüla juʼunüin sünain otta anain jukuwaʼipa sutuma tü ‹eküülü eekat wanaa sümaa choʼujaain maʼin shia› namüinjatka na aküjüliikana pütchi (Mat. 24:45, NM).