Aainjünajatü tü keeʼireekat naaʼin Maleiwa
1. ¿Kasaichi sünülia tü outkajawaa miyoʼu waneekat kaʼi oʼtteetka settienpüroʼu 2011? ¿Jamüsü choʼujaaka wekirajaain sünain?
1 Nukumajala waya Jeowa süka keeʼireein naaʼin shia (Alat. Map. 4:11). Makalaka watüjaainjatüin saaʼu tü keeʼireekat naaʼin sümaa waaʼinrüin shia süpüla anainjatüin wakuwaʼipa. Mayaapejeʼe eein süpüla mapüleein tia saaʼin wamüin, kapüleesü shia süka eejiraainjanain waya sümaa tü keeʼireekat neʼe waaʼin otta tü jülüjakat waaʼin jee shiale «tü keeʼireekat naaʼin na manoujüinsaliikana» (Éfe. 2:3, NM; 1 Ped. 4:3, NM; 2 Ped. 2:10). Makaaliinjuuleje waya nutuma Maleiwa eeshiije süpüla nütaʼülüin waya chi Yolujaakai «katüshiiruʼu woʼu süpüla waaʼinrüin tü keeʼireekat naaʼin» (2 Tim. 2:26, NM). Tü outkajawaa miyoʼu waneekat kaʼi oʼtteetka settienpüroʼu, 2011, sükaaliinjeena waya süpüla pansaain wakuwaʼipa sümaa tü apünüinkat kasa nüchuntakat Jesuu sünain tü oʼuraajaa niʼitaakat (Mat. 6:9, 10, NM). Müsü sünülia: «Aainjünajatü tü keeʼireekat naaʼin Maleiwa».
2. ¿Jarat tü pütchiirua asouktünüinjatkat sünain tü outkajawaakat?
2 Tü ekirajaaneetkat anain. Jülüja paaʼin suʼunnaa tü ekirajaanajatkat anain süsouktia tü pütchikalüirua: Sümaʼaleʼeya waapajüin nünüiki Maleiwa, ¿kasa maa choʼujaaka waainjüin? ¿Kasa waainjüinjatka süpüla ayatüinya wayaawatüin saaʼu tü keeʼireekat naaʼin Maleiwa wapüleerua? ¿Jamüsü keeʼireeinjatka waaʼin wakaaliinjüin wayuu eekai eein? ¿Kasa waaʼinrajatka süpüla talatüin waya otta anain wakuwaʼipa? ¡Tepichiirua!, ¿kasa jiiʼiyatüinjatka nümüin Jeowa? ¿Kasa eeka sutuma aainjaa tü keeʼireekat naaʼin Maleiwa? ¿Jamüsü choʼujaaka maʼin wachecherüin otta watütüleʼerüin naaʼin na wawalayuukana?
3. ¿Kasa waaʼinrajatka süpüla anain maʼin wakuwaʼipa sutuma tü outkajawaakat?
3 Püchajaa maʼin sukuwaʼipa süpüla chain pia sünain tü outkajawaakat otta jülüjüin paaʼin tü ekirajaanajatkat anain. Chi ekirajüi waraittakai waaʼu, eeshi süpüla niain wanee aʼyataakai suluʼu Weteet jee niale wanee wawala waraittakai waaʼu. Paashajaa nümaa jee sümaa nuʼwayuuse, müleka kaʼwayuusere nia, süpülapünaa jee shiale sujutaapa tü outkajawaakat. Süpüla ‹nnojoluin motuin paaʼin› tü paapajakat, pikirajaa püchikuaʼa sünain sümaa püpüshi püntapa pipialuʼumüin (Sant. 1:25). Jikirajaa sünain tü jaaʼinrajatkat süpüla jaainjüin maʼin tü keeʼireekat naaʼin Maleiwa.
4. ¿Jamüsü choʼujaaka palajanainjatüin watuma tü keeʼireekat naaʼin Maleiwa?
4 Alüʼütsü süpüla najaʼttirüin Jeowa na aainjakana tü keeʼireekat naaʼin sümaa nayouktüin tü keeʼireekat naaʼin Maleiwa (1 Juan 2:17). Makalaka waapüin maʼin tü analuʼutkat nümüin Jeowa saaʼu tü ekirajaanajatkat anain. Watüjaa aaʼu sükaaliinjeenain waya süpüla palajanain watuma tü keeʼireekat naaʼin Maleiwa.