Waapaja tü pütchikat süpüla watüjüin sünainjee
1. ¿Jamüsü kapüleeka maʼin jülüjüin waaʼin tü pütchi aküjünakat sünain tü outkajawaakat miyoʼu?
1 Alüʼütsü tü outkajawaa miyoʼu apünüinkat kaʼi aainjünajatka soʼu 2013. Aʼyataashii maʼin na wawalayuukana süpüla nekeraajüin tü ekirajünajatkat sünain tü outkajawaakat miyoʼu süpüla kooʼomüinjatüin nanoula napüshuaʼa na wayuu eekana sainküin tü mmakat. Püchajaa sukuwaʼipa süpüla chain pia soʼu tü apünüinkat kaʼi. Eesü kapüleere maʼin wamüin jülüjüin waaʼin tü pütchi aküjünakat sünain tü outkajawaakat sutuma wainmain tü kasa eekat süpüla shikeʼejüin waaʼin. Eesü kapüleere maʼin wamüin jülüjüin waaʼin süpüshuaʼa tü pütchi aküjünakat sünain tü outkajawaakat sutuma kamaʼain shia suulia tü outkajawaa aainjünakat suluʼu tü miichi outkajaaleekat. Eeshii mapüsale maʼin waya sutuma wattajeekualin waya jee shiale sutuma waneeirua kasa. ¿Kasa waaʼinrüinjatka süpüla jülüjüin waaʼin tü pütchi ekirajünüinjatkat sünain tü outkajawaakat miyoʼu? (Deut. 31:12.)
2. ¿Kasa paaʼinrajatka süpüla yapain putuma tü paaʼinkat süpüla tü outkajawaakat miyoʼu?
2 Süpülapünaa tü outkajawaakat miyoʼu. Piʼreerü suluʼu www.jw.org/guc sünülia tü pütchi ekirajaanajatkalü anain. Sünain waneʼewai sukua tü pütchi ekirajaanajatkat anain eejeerü waneeshia jee shiale piama pütchi suluʼujeejatka tü Wiwüliakat. Pikirajaa sünain tü pütchikat eere pümaʼana Internet, süpüla yapain putuma tü paaʼinkat süpüla tü outkajawaakat (Esd. 7:10). Soʼu tü ai juʼwaajakat oʼu Maleiwa sümaa jüpüshi, eesüjaʼa süpüla jikirajaain sünain tia pütchikalüirua süpüla keeʼireeinjatüin jaaʼin oʼunaa sünain tü outkajawaakat.
3. ¿Kasa akaaliinjeechika pia süpüla jülüjüin paaʼin tü pütchi aküjünajatkat?
3 Suʼunnaa tü outkajawaakat miyoʼu. Puʼuneere suluʼu tü ashiijüleekat eesü süpüla paaʼinrüin shia süpülapünaa suʼttüin tü outkajawaakat. Piyokojoo püserulaatse suulia shikeʼejüin paaʼin jee suulia jülüjüin paaʼin aluwanaaja mensaaje suʼunnaa tü outkajawaakat. Nnojorüle piyokojooin shia anasü müleka meʼirale shia putuma suulia shikeʼejüin naaʼin na waneeinnua piyamaajünüle. Eere pümaʼana wanee tableta electrónica münakat, jülüjaa paaʼin nnojoleerüle shikeʼejüin naaʼin na waneeinnua. Nnojo wekaain wanee kasa jee wasüin wanee kasa suʼunnaa tü outkajawaakat miyoʼu (Ecl. 3:1). Jülüjaa paaʼin chi wawala ekirajakai otta jülüjaa paaʼin tü pütchi aashajeʼennakat suluʼujee tü Wiwüliakat. Anasü müleka püshajüle tü pütchi kamalainkat maʼin pümüin sünainjee tü ekirajünakalü anain.
4. ¿Kasa naaʼinrüinjatka na wayuu kachonniikana süpüla natüjüin sümaa jülüjüin naaʼin na tepichikana tü pütchi aküjünakat?
4 Keeʼireesü waaʼin natüjüinjanain na tepichikana sünainjee naapajüin tü pütchikat sümaa jülüjüin naaʼin shia. Müsü sünüiki Proverbios 29:15: «Chi jintüi nnojoikai achiajaanüin, japüijeerü nii nutuma». Müsüjeseʼe anain müleka naikkalaale na tepichikana sümaa nei jee nashi, nayeena aaʼinmajaka naya süpüla naapajüin tü pütchikat suulia yootokuʼu namüin, suulia naluwanaajakuʼu namüin mensaaje jee warai namüin yalapünaa. Jaʼitairü nnojoluin nayaawatüin saaʼu na tepichikana süpüshuaʼa tü pütchi aküjünakat, eeshii süpüla nekirajünüin sünain nnojoluin natunküinjanain otta nnojoluin kekeʼerain naya sünain tü outkajawaakat.
5. ¿Jamüsü anaka maʼin wekirajaale wachikuaʼa sünain tü pütchi waapajakat sünain tü outkajawaakat miyoʼu? ¿Jamüinjatü sukuwaʼipa watuma?
5 Süchikijee tü outkajawaakat miyoʼu. Piisalaa maalü süpüla peemeraainjachin. Püneeka maʼaka jeʼra minuuto süpüla pikirajaain sümaa püpüshi tü pütchi jikirajaakalü anain sünain tü outkajawaakat, müle shia jutuma soteerü jaaʼin tü jikirajaakat anain. Piyaʼlajüinjachire eküülü yalapünaa süpüla piküin namaa na paʼaleewainkana, eesüjaʼa süpüla püneeküin maʼaka waneeshia jee piama pütchi kamalainka pümüin. Eesüjaʼa süpüla piirakaain sümüin tü pütchi püshajakat suluʼu pükaraloukse. Soʼu tü ai puʼwaajakalü oʼu Maleiwa sümaa püpüshi jülüja paaʼin jaralüin tü pütchi anakat süpüla jiʼitaain sünain jukuwaʼipa. Otta eesü süpüla jüneeküin maʼaka jeʼra minuuto semaanawai süpüla jikirajaain sünain tü karaloukta jekennuukat.
6. ¿Kasapülajana woʼunaka sünain tü outkajawaakat miyoʼu?
6 Nnojotsü wamokojooinjatüin wanee eküülü aapünaka wamüin sünain wanee ekawaa, anainjatü sukuwaʼipa watuma. Müsia neʼe sukuwaʼipa tü ekirajünakat anain waya sünain tü outkajawaa miyoʼu apünüinkat kaʼi, anainjatü sukuwaʼipa watuma. Waapaja süpüshuaʼa tü pütchikalüirua, jülüja waaʼin otta weʼitaa shia sünain wakuwaʼipa.