«Puutkajeʼera tü wayuukalüirua»
1. ¿Kasa wanaawaka atuma tü outkajawaa miyoʼu apünüinkat kaʼi sümaa tü outkajawaa naainjapuʼukat na israeliitakana?
1 Sülatapa maʼaka jeʼra kaʼi süchikijee noʼunüin na israeliitakana Egiptojee, nuutkajeʼerüin naya Jeʼwaa nükajee Moisés chaa saaʼu tü uuchikat Sinaí. Süpülajatü naapajüin nünüiki Maleiwa, mmoluinjanain naya neema jee nekirajüinjanain nachonnii nüchiki Jeʼwaa (Deut. 4:10-13). Katchinkajasaʼa maʼin nanoula sünainjee tia. Apütaalasü maʼaka jeʼra kaʼi süpüla woutkajaainjanain sünain tü outkajawaa miyoʼu apünüinkat kaʼi jee noutkajaain na wawalayuu naatakana oumain. Yala ekirajüneena waya nutuma Jeʼwaa. ¿Kasa waainjüinjatka süpüla anain wakuwaʼipa sünain tü outkajawaakat?
2. ¿Kasa waainjüinjatka süpüla yapainjanain waya süpüla tü outkajawaa miyoʼu apünüinkat kaʼi?
2 Yapainjana waya. Naashin Jeʼwaa, yapajüinjana na israeliitakana süpüla noutkajaainjanain chaa saaʼu tü uuchikat Sinaí (Éx. 19:10, 11). Müshiijeseʼe yapajüinjanain napüshuaʼa na wayuu oʼunüinjanakana sünain tü outkajawaa miyoʼu apünüinkat kaʼi. Eeshii na achuntüinjanakana kaʼi namüin nalaamain. Eesüjaʼa süpüla müin pukuwaʼipa maʼaka naaʼin Nehemías. Keeʼireesü maʼin naaʼin oʼunaa sünain akumajaa süsepü Jerusalén. Makalaka nuchuntajachin kaʼi nümüin chi aluwataaikai Artajerjes, chi niʼyataakai amüin. Jülüjüsü naaʼin Nehemías eein süpüla nnojolin nüjütünüin. Müshijeseʼe nuʼuraajüin, nukumajüin sukuwaʼipa tü nünüikinjatkat nümüin jee nnojoishi mmoluin nia sünain achuntaa kaʼi. ¿Kasa alataka? Ajütünüshi nia nutuma Artajerjes jee naapüin nümüin tü kasa choʼujaakat süpüla sukumajünüin süsepü Jerusalén (Neh. 2:1-9). Puchunta kaʼi nümüin chi pülaamainkai, jülüja paaʼin kasain choʼujaain pümüin süpüla oʼunaa sünain tü outkajawaakat maʼaka saaʼin jalainjachi putunküin. Soto waaʼin nükaaliinjeenain waya na laülaashiikana sünain tü kasa choʼujaakat wamüin. Jee müsia püchajaa sukuwaʼipa süpüla püntüin maalü sünain tü outkajawaakat jee jülüja maʼin paaʼin tü pütchi ekirajünüinjatkalü anain (Heb. 2:1).
3. ¿Kasa waainjüinjatka süpüla yapainjatüin waaʼin süpüla tü outkajawaakat miyoʼu?
3 Yapainjatü waaʼin süpüla waapajüinjatüin nünüiki Maleiwa jee wekirajaain nüchiki (Esd. 7:10). Ojuʼiteerü suluʼu jw.org sünülia tü pütchi ekirajaanajatkalü anain sünain tü outkajawaa miyoʼu apünüinkat kaʼi maʼaka saaʼin tü wersiikulo ekirajaanajatkalü anain. Wekirajaa soʼu tü Ai Waʼwaajakalü oʼu Maleiwa sümaa wapüshi tia pütchikalüirua ekirajaanajatka sünain tü outkajawaakat. Eeshii wawalayuu eʼinprimiijaka tü karaloukta sünüliamaajatkat tü pütchi ekirajaanajatkalü anain jee nashajüin sünain tü pütchi kamalainkat namüin.
4. ¿Kasa jaainjüinjatka süpüla jikirajüin jüchonnii sünain tü outkajawaa miyoʼu apünüinkat kaʼi?
4 «Jikiraja jüchonnii.» Ekirajünüshii na tepichikana nüchiki Jeʼwaa natuma na kachonkana naya chaa saaʼu tü uuchikat Sinaí (Deut. 4:10). Makalaka anain süpüla nekirajüin na wayuukana nachonnii sünain tü outkajawaa miyoʼu apünüinkat kaʼi. Aikkalaainjana jia namaa na jüchonniikana jee jülüjüinjatü jaaʼin müleka jülüjüle naaʼin tü pütchi ekirajaanakalü anain. Eeshii süpüla jüsakirüin naya süchiki tü ekirajaanakalü anain kaʼiwai jee shiale wanaa sümaa jikirajaain soʼu tü Ai Juʼwaajakalü oʼu Maleiwa sümaa jüpüshi.
5. ¿Jameerü waaʼin sutuma woʼunüin sünain tü outkajawaa miyoʼu apünüinkat kaʼi?
5 Kojutüsü maʼin namüin na israeliitakana nupueulosein naya Jeʼwaa sutuma noutkajeʼennüin chaa saaʼu tü uuchikat Sinaí (Deut. 4:7, 8). Makalaka talatüinjatüin maʼin waaʼin süpüla tü outkajawaa miyoʼu apünüinkat kaʼi. Sünain tü apünüinkat kaʼi woutkajaainjatka oʼu, nnojoleerü jülüjüin waaʼin tü kasa mojusü alatakat maaʼulu, atütüleʼenneerü waaʼin jee talateerü maʼin waaʼin süka kottiraain waya namaa na wawalayuukana (Is. 35:7-9). Nnojo makatüin waya suulia tia outkajawaakat süka sülüʼülaain maʼin nükalia Jeʼwaa. Waainjüle tia, wachechereerü waaʼin sünain anoujaa (Heb. 10:24, 25).