Atüjaana aaʼulu tü shiimainkat sutuma tü outkajawaa miyoʼu apünüinkat kaʼi
1. ¿Kasa naaʼinmaaka na israeliitakana suʼunnaa tü miʼiraa naainjakat nümüin Maleiwa?
1 Outkajaʼawaishii na israeliitakana apünüintua süpüla juyaka sünain tü miʼiraa naainjakat nümüin Maleiwa. Mayaapejeʼe nayainjanain neʼe chain na tooloyuukana, eeshii na oʼunapuʼukana sümaa napüshi Jerusalénmüin (Deu. 16:15, 16). Jülüjüsü naaʼin chayaa tü shiimain sünainpünaakat nanoula. Jülüjüsü naaʼin aipüralin Jeowa süka naapüin tü choʼujaakat namüin na aʼyataakana nümüin (Deu. 15:4, 5); jee niain anain süpüla oʼuniraa nakuwaʼipa jee naaʼinmajeenain naya (Deu. 32:9, 10), otta lotuinjatüin nakuwaʼipa maʼaka naaʼin Maleiwa sükajee naneekuushin nutuma (Deu. 7:6, 11). Müsia neʼe wakuwaʼipa maaʼulu sutuma tü outkajawaa miyoʼu apünüinkat kaʼi.
2. ¿Kaseerü wayaawataka aka tü shiimüinkat?
2 Wayaawateerü aaʼu tü shiimainkat sutuma tü ekirajaanajatkat anain. Sünain tü outkajawaa apünüinkat kaʼi, waapajeerü tü pütchi ekirajüneetkat, weʼreerü sukuwaʼipa wayuu maaʼulu, eeʼiyatüneerü sukuwaʼipa tü ekirajaanakat anain otta asakinneena na wawalayuukana, tia süpülajatü wayaawatüin saaʼu tü shiimain sümakat tü Wiwüliakat (Juan 17:17). Aʼyataashi maʼin chi achepchieekai sünain naapüin tü choʼujaakat sümüin sunoula wayuu sainküin mmaka (Mat. 24:45-47). Talatüsü paaʼin sutuma tia, ¿aashimüin?
3. ¿Kasa waaʼinrajatka süpüla anainjatüin wakuwaʼipa sutuma tü ekirajaanajatkat anain?
3 Süpüla anainjatüin wakuwaʼipa sutuma tü ekirajaanajatkat anain, oʼunüinjana waya soʼu tü apünüinkat kaʼi jee jülüjüinjatü maʼin waaʼin shia. Paashajaa nümaa chi pülaamainkai süpüla nuuʼulaain puʼunüin sünain tia outkajawaakat. Piisalaa maalü süpüla jülüjüinjatüin paaʼin tü aküjünajatkat soʼu tü apünüinkat kaʼi. Eeshii na anakana amüin chüntüle noʼu nünain chi ekirajakai otta nashajüle süpüshi tü ekirajaanakat anain. Jalia shikeʼejayaa paaʼin tü püserulaatsekat jee shikeʼejayaa naaʼin na waneeinnua. Nnojo yootokuʼu müin pia, puluwanaajüin mensaaje, pikaain jee püsakuʼu müin kasa suʼunnaa tü ekirajawaakat.
4. ¿Kasa naaʼinrajatka na wayuukana süpüla eejüinjatüin naaʼin na nachonniikana sünain tü outkajawaakat?
4 Soʼu tü juya neemeraakat oʼu na judíokana, outkajaʼawaishii na israeliitakana süpüla naapajüinjatüin tü nünüikikat Maleiwa suʼunnaa tü miʼiraa kalumaseyaakat oʼu naya. Jutkatüsü wayuu süpüshuaʼa sümaa süpüshi süpüla aapajaa jee ekirajünaa, namaashii «na tepichikana» (Deu. 31:12). Anasü maʼin eʼraa wayuu sümaa süpüshi sünain tü outkajawaakat jee eejüin naaʼin na tepichikana sünain tü ekirajünakat. Anasüleʼe nekirajaʼawaire aipaʼa sünain tü pütchi kamalainkat namüin. Süka ‹suluʼuin naaʼin chi jintüikai waneepia tü malaakat›, ‹achiaanüinjana› na tepichikana natuma na kachonniikana naya, jülüjüinjana naaʼin suʼunnaa tü eemerawaakat jee chapa naya eere tü natunkülekat, jaʼitainna jimaʼaliin jee majayünnüüin (Pro. 22:15; 29:15, NM).
5. Anale waʼanaaya suluʼu tü mma kaluʼukat tü outkajawaakat, ¿jamüsü aneetka pütchi süchiki tü shiimüinkat?
5 Atüjaaneerü aaʼu tü shiimainkat anale wakuwaʼipa. Tü karaloukta wanüliamaajatkat, nnojotsü süpülajatüin neʼe neʼraajüin waya na wawalayuukana jee sütüjaanüin aaʼu tü outkajawaakat, süpülajatü sütüjaanüin aaʼu tü shiimainkat. Neʼreerü na wayuukana nayain kanain shia na anakana aʼanaaya sümaa nnojoluin nashatüin naʼanaaya na manoujüinsaliikana (1 Tim. 2:9, 10). Jülüjüinjatü waaʼin jamüin sukuwaʼipa waʼanaaya chapa waya sünain tü outkajawaakat. Nnojoleerü anain pütchi wachiki müleka chooreluʼule waya otta püraneeraluʼule. Anainjatü tü waʼanaayakat jaʼitairü jutatuulin eeinjanale woutkajaain. Waʼwanajaainjanale washeʼin süchikijee tü outkajawaakat süpüla weküin yalapünaa, jülüjüinjatü waaʼin anainjatüin waʼanaaya süka sünainyüliʼinya waya tü outkajawaakat.
6. ¿Kasa amaa kottiraaka atuma waya namaa na wawalayuukana?
6 Sünain tü miʼiraa naainjapuʼukat na israeliitakana, kottiraapuʼushii naya namaa na nawalayuu naatakana oumain (Aluw. 2:1, 5). Jaʼyasü kottiraain na wawalayuukana sünain tü outkajawaa miyoʼu apünüinkat kaʼi. Ponusü maʼin naaʼin tia na wayuukana (Sal. 133:1). Yootushii jee ekaashii waya namaa na wawalayuu nnojoliikana paala weʼraajüin müleka nnojoliire wojuʼitüin sünain ayaʼlajaa eküülü.
7. Eere süpüla waʼyataain sünain tü outkajawaakat, ¿jamüsü waaʼinrüinjatka tia?
7 Ponusü naaʼin na wayuukana anain maʼin sukuwaʼipa tü outkajawaakat, yaaʼaleekajaʼa natüjaapa saaʼu shiʼyataaushin anain masaloui. Eeshijaʼa süpüla ‹piʼyataain süka paaʼin pümüiwaʼa› sünain tü outkajawaakat (Sal. 110:3). Eeshii na wayuu aʼyataakana namaa nachonnii, mayaa nekirajüin naya sünain akaaliinjaa. Maʼaleewainre pia sutuma japüleʼein pia, aneerü pümüin pükaaliinjüle sünain tü outkajawaakat. Müsü sünüiki wanee wawala: «Nayaʼala neʼe teʼraajaka na tapüshikana otta na taʼaleewainkana sünain tü outkajawaakat. Akatsaʼa soʼu taküjüin tepitajeein, kojuyashii wawalayuu teʼraajakana. ¡Kamalainsü maʼin tamüin tia!». Waʼyataale sünain tü outkajawaakat, kooʼomüinjeena na waʼaleewainkana jee talateerü maʼin waaʼin sutuma (2 Cor. 6:12, 13). Nnojoyürüle paaʼinrüin tia, püsakira na laülaashiikana kasain achuntünüin süpüla tia.
8 ¿Jamüinjatü sukuwaʼipa naapiria na wayuukana?
8 Paapira na waneeinnua süpüla natüjaain saaʼu tü shiimainkat. Waapireena na wayuukana apünüin semaana süpülapünaa tü outkajawaakat maʼakaapuʼu watuma. Nachajaweerü sukuwaʼipa na wawalayuukana eere noutkajaain süpüla neitajüin süpüshuaʼa tü ounejaayakat (paashajeʼera tü pütchikat «Müinjatü pünüiki paapirapa na wayuukana»). Tü apütaakat, alüʼüjünajatü shia eeinjatüle tü outkajawaakat süpüla süküjünüin pütchi süka.
9. Püküja tü eekat sutuma aapiraa na wayuukana.
9 ¿Eesü tü kasa anakat atuma tia? Sünain wanee outkajawaa, nüchajaain wanee wawala jülüjakai aaʼin na antakana niinase wanee wayuu sümaa nuʼwayuuse. Ounejaanüshii naya naashin makalaka nantüin. Nalatirüin suulia 300 kiloometüro süpüla nantajanain chamüin suluʼu kemion. Eetaasü wanee wawalaya, aküjüsü pütchi sainküin piichi saapaka wanee ounejaaya nümüin wanee wayuu. Sutuma kamalain shia nümüin, süküjaka nümüin tü saashajaakat achiki tü karalouktakat. Shiʼrakalaka tü wawalakat chia wayuukai sünain tü outkajawaakat nümaa wanee naʼaleewain sünain najapuluʼuin wanee karaloukta aapünakat soʼu tia.
10. ¿Jamüsü anaka woʼunüle sünain tü outkajawaakat juyawai?
10 Nüsülajala Jeowa tü miʼiraa naainjapuʼukat na israeliitakana süpüla naʼyataain nümüin sümaa ‹lotuin nukuwaʼipa jee ayatüinya naya sünain tü shiimainkat› (Jos. 24:14, NM). Müsia neʼe tü outkajawaa aainjünawaikat maaʼulu, ‹wanoujain tü shiimüinkat waneepia› sutuma otta sünainpünaasü maʼin shia tü aʼwaajaakat Jeowa (3 Juan 3). Kasataalejeseʼe anain nakuwaʼipa nutuma Jeowa na wayuu kojutükana amüin tü shiimainkat jee na oʼunakana sünain tü outkajawaakat juyawai süpüla anain nakuwaʼipa sutuma.
[Epiikürape suluʼu süpanaka 4]
Waapireena na wayuukana apünüin semaana süpülapünaa tü outkajawaakat maʼakaapuʼu watuma
[Pütchi süttaka suluʼu süpana 5-6]
Sotuinjatü waaʼin süpüla tü outkajawaa miyoʼu apünüinkat kaʼi, 2012
◼ Sükalia tü ekirajaanajatkat anain. Tü ekirajaanajatkat anain soʼu tü apünüinkat kaʼi oʼttajatü 9.20 wattaʼa maalü. Ojutanneerü tü soʼukot piichi 8.00 wattaʼa maalü. Süpüla anain suʼttia tü wekirajaainjatkat anain wachajaainjatü weinase suʼttapa tü muusikakat. Ojutaajeerü tü outkajawaakat 4.55 aliika soʼu tü palajatkat otta tü piamakat kaʼi. Akatsaʼa soʼu tü apünüinkat kaʼi ojutaajeerü shia 3.40 aliika.
◼ Süpülee kemion. Nnojoleerü achekajünüin süpülee kemion wayale aaʼinmajüin shia. Pachiiruaainjatü süshaʼwaleʼennüin tü kemionkat. Eeinjatüle süshaʼwaleʼennüin neʼejena na isakana achiki waraittaa namüiwaʼa, nnojotsü ashawaʼleʼenüinjatüin wanee kemion naata. Süka joʼuuchoin tü süpüleekat kemion, eeshii süpüla wainmain na antakana suluʼu wanee kemion.
◼ Einasee. Naya neʼe pükatalüinjanaka einasee na antakana jee na kepiakana pümaa otta na ekirajaakana pümaa sünain tü Wiwüliakat (1 Cor. 13:5).
◼ Eküülü. Anasü walüʼüjüle weküin suulia oʼunaa sünain ayaʼlajaa wanaa sümaa weemeraain kaleʼu. Nnojotsü alüʼüjünüinjatüin sünain tü outkajawaakat wanee kaawa miyoʼu otta maraaja. Eesü süpüla sülüʼüjünüin wanee kaawa joʼuuchon ekerotoko suupünaa tü einaseekat.
◼ Nneerü asülajünaka. Süpüla waapüin tü analuʼutkat saaʼu tü outkajawaa miyoʼukat, wasülaja süpüshi wanneetse süpüla aküjaa pütchi sainküin mma.
◼ Eewawaa otta ayuuijawaa. Wanaa sümaa eein eewawaa otta ayuuijawaa sünain tü outkajawaakat, püküja süchiki nümüin chi jülüjakai aaʼin na antakana eekai pejein pünain. Naapireenaka na akaaliinjakana eeka ayuulin süpüla neʼrajaainjatüin shia na atüjakana süpüleerua.
◼ Püsajüle wunuʼu. Püsajüle wunuʼu aluwataaushi pümüin natuma na tottootkana, pülüʼüja shia süka nnojoleerüin saapünüin pümüin sünain tü outkajawaakat. Müleka suukarale püsha otta piʼiteʼerüinjachire utia pünain, nnojo pujutüin neʼe yalapünaa tü utiakat, kapüleesü shia süka ayuuleemaajatüin shia. Nnojo pujutüin shia saʼaka tü wasuura eekat suluʼu tü outkajaaleekat otta eere pütunküin.
◼ Asapaatsee. Wainma wayuu eewaaka juyawai sutuma nasapaatse. Anasü jüneeküle sapaata eekai nnojoluin yaletüin süpüla nnojoluin jeewaain wanaa sümaa waraittüin jia sooʼopünaa kaleera otta soʼu saamajülee wüin.
◼ Wayuu macheʼeka. Sünain waneeirua outkajawaa alatinneerü tü ekirajaanajatkat anain suluʼu raawia (FM). Saainjünüinjatüle tia, aküjüneerü soʼu tü palajatkat kaʼi. Süpüla tia, choʼujaasü wanee raawiachon kanainka audífono.
◼ Neʼejena na joʼuukana. Nnojotsü alüʼüjünüinjatüin tia sünain tü outkajawaakat. Akatsaʼa, eesü süpüla sülüʼüjünüin tü neinase eʼitaanakat naʼütpaʼa na kachonniikana nia.
◼ Tü karalouktakat Sírvase visitar (S-43). Pülüʼüja wanee jee piamasü karalouktairua Sírvase visitar süpüla püshajüin nanülia na püküjakana amüin pütchi otta na ekirajaweekana sünain tü Wiwüliakat. Eesü süpüla paapüin shia eere shiitajünüin karaloukta jee shiale nümüin chi seküretaariokai eere puutkajaain (paashajeʼera Waʼyataain Nümüin Maleiwa, ojuʼitaka maayoʼu 2011, süpana 3).
◼ Atunkülee. Eere süpüla natunküin na wawalayuukana wepialuʼu, waashajaa nümaa chi seküretaariokai eere woutkajaain otta wepiraja tü karaloukta sümaajatkat. Puʼunüinjachire sünain wanee outkajawaa eeka wattain suulia pipia otta choʼujaale eeinjachire pütunküin, paashajaa nümaa chi seküretaariokai, pipiraja tü karaloukta süpülajatkat tia otta paapa shia nümüin chi wawalakai süpüla nuluwataain shia eeinjatüle saainjünüin tü outkajawaakat. Nnojo paaʼinrüin tia sülüʼütpa maʼin tü outkajawaakat süka sumojujeʼereerüin sukuwaʼipa naʼyataain na wawalayuu achajaakana tü atunküleekat (1 Cor. 14:40). Na wawalayuukana otta na nachonnii makatakana nepialuʼu na wawalayuukana, kojutüinjatü namüin nepia na wawalayuukana, nnojoluinjatü namojujeʼerüin tü korolo namaʼanakat otta nnojoluinjana ekerotuin eere natunküin na kepiakana. Tü atunküleekat süpülajatü neʼe tü kaʼi eeinjatkat oʼu tü outkajawaakat. Nnojotsü anain makatüle waya kojuya kaʼi süchikijee tü outkajawaakat süpüla eʼraajaa tü kasa anakat maʼin eere saainjünüin tü outkajawaakat jee süpüla aaʼinraa waneeirua kasa.
◼ Eeka nakaaliinjeein. Na aʼyataweekana, arütkaainjana eemüin na shikiipüʼükana. Eeshi süpüla niʼyataain chi 16 ouyase, akatsaʼa naainjüinjatü tia sümaa naaʼinmajünüin nutuma chi nüshikai, tü niikat jee niale wanee wayuu laülaakai naaʼu natuma na kachonniikana nia.
[Pütchi süttaka suluʼu süpana 5]
Müinjatü pünüiki paapirapa na wayuukana
Motsoʼoinjatü wamaʼa süpüla waapirüin wayuu süpüshuaʼa. Eesü süpüla müin wanüiki: «Jamayaa. Aapinnüshii na wayuukana sainküinpünaa mmaka süpüshuaʼa sükajee karalouktakat tüü. Anuu tü pümüinjatkat. Puusüteerü anain sooʼomüin pütchi suluʼu türa karalouktakat». Talata paaʼin sünain tü eitajaakat. Piitaja rimiinkoʼu jee saawanoʼu tü rewiisütakalüirua müleka anashiire shia.