Talata waaʼin sünain aʼwaajaa Jeowa sünain tü outkajawaa miyoʼu apünüinkat kaʼi
1. ¿Kasa wanaawaka amaa tü miʼiraa naainjapuʼukat na israeliitakana sümaa tü outkajawaa miyoʼu apünüinkat kaʼi?
1 Oʼunawaipuʼushi José sümaa nüpüshi otta waneeinnua aʼwaajülii Maleiwa sünain tü miʼiraa aainjünakat juyawai chayaa Jerusalén. Suʼunnaa tia, nnojotsü jülüjüin naaʼin tü kasa shapaakat atuma naaʼin shia jülüjaka naaʼin tü kasa sünainpünaakat nanoula. Sünain tia miʼiraakat eesü kaʼi napüla süpüla nasakireʼerüin naaʼin, naashajaain süchiki tü kasa anasü naapakat Jeowa namüin otta nekirajaain sünain tü nuluwataakat anain naya. Müshiʼiya wayakana, sünain tü outkajawaa miyoʼu apünüinkat kaʼi, waʼwaajeechi Jeowa sümaa talatüin waaʼin.
2. ¿Kasa paaʼinrajatka süpüla puʼunüin sünain tü outkajawaa miyoʼu apünüinkat kaʼi?
2 Yapainjana waya. Süpüla suʼunüin otta suuyantüin nüpüshi Jesuu Nazaretjee, waraittüshii naya maʼaka 200 kiloometüro. Mayaapejeʼe nnojoluin watüjaain saaʼu jeʼrashiin na nuwalayuukana Jesuu, eesü süpüla jülüjüin waaʼin tü naainjüinjatkat José sümaa María süpüla noʼunüin. ¿Kasa paainjaka süpüla puʼunüin soʼu tü apünüin kaʼi aainjünajatkat oʼu outkajawaakat tia? Eesü choʼujaale paashajaain nümaa chi pülaamainkai jee chi ekirajakai na püchonniikana süpüla püchuntüin tü kaʼi choʼujaakat süpüla oʼunaa. Choʼujaale pütunküin suluʼu wanee hotel, ¿püneeküitpa shia? ¿Eeshiche süpüla pükaaliinjüin wanee wawala choʼujaaka amüin akaaliinjünaa süpüla oʼunaa sünain tü outkajawaakat? (1 Juan 3:17, 18.)
3. ¿Jamüshii eeka süpüla aleewajiraain na judíokana sünain tü miʼiraa naainjakat?
3 Na atütüleʼerakana waaʼin. Sünain tü miʼiraa naainjakat na judíokana, atütüleʼerajiraashii naaʼin namaa na waneeinnua aʼyataaliikana nümüin Jeowa. Keeʼireekaja maʼin naaʼin na nüpüshikana Jesuu nantiraain namaa na kakaliainnakana naʼaleewain. Otta müsia, eeshii süpüla aleewajiraain naya namaa na judíokana otta na nnojoliikana judíoin nantiraakana amaa Jerusalén otta wopuluʼu.
4. ¿Kasa weeʼiyataka aka kojutüin wamüin na wawalayuukana?
4 Suulialeʼeya naapüin chi achepchieekai tü pütchikat suluʼu karaloukta, nukumajüin sukuwaʼipa süpüla woutkajaain sünain aapajaa tü ekirajünajatkat anain waya. ¿Jamüsü naainjaka tia? Shia süpüla watütüleʼerajiraain waaʼin (Heb. 10:24, 25). Yapa pia süpüla püntüin maalü soʼu tü apünüinkat kaʼi süpüla paashajaain namaa na puwalayuukana süpülapünaa nüküjüin chi aküjakai nanülia na ekirajüinjanakana suʼttüinjatüin tü muusikakat otta naikkalaainjanain na jutkatüshiikana. Wounejaain pia süpüla nnojoluin pujuʼitüin sünain ayaʼlajaa eküülü kaleʼu, shia anaka aluʼu pülüʼüjüle shia pipialuʼujee süpüla makatüin pia sünain aashajawaa namaa na jutkatüshiikana. Nüsülajala wamüin Jeowa na wawalayuukana makalaka kojutüinjanain naya wamüin (Miq. 2:12).
5. ¿Kasa waaʼinrajatka süpüla anainjatüin wakuwaʼipa sutuma tü ekirajaanakat anain?
5 Ekirajünüshii waya sünain. Jintüliiwaʼaya Jesuu ekirajaʼawaishi nia nüchiki chi Nüshikai suʼunnaa tü miʼiraa naainjakat na judíokana (Luc. 2:41-49). ¿Kasa waaʼinrajatka sümaa wapüshi süpüla anain wakuwaʼipa sutuma tü ekirajaanajatkat anain? Nnojo pütamaain otta paashajaain suʼunnaa tü ekirajaanakat anain. Nnojo pumojujeʼerüin pukuwaʼipa otta nakuwaʼipa na waneeinnua sünain aapajaa tü pütchikat sükajee tü püserulaatsekat. Jülüja paaʼin chi ekirajakai otta püshaja süpüshi tü pütchi ekirajünakat anain. Süpüla natüjaain saaʼu naapajüle tü pütchikat nachonnii wanee wayuu, aikkalaainjana naya namaa. Aipaʼa, jaashajaa süchiki tü anakat jümüin sünainjee tü ekirajaanakat anain.
6. ¿Kasa sotuinjatka waaʼin süchiki washeʼin otta waʼanaaya?
6 Washeʼin otta waʼanaaya. Mapüleesat namüin na oikkaaliikana ayaawataa nüpüshi Jesuu otta na judío oʼunakana jee na ouyantakana sünainjee tü miʼiraakat. ¿Kasa nayaawataka aka? Shia sükajee tü sotkat nasheʼin otta tü jiitpai wüittüsü iipünaakat sünain sot nasheʼin (Núm. 15:37-41). Mayaapejeʼe nnojoluin eein wanee washeʼin wayaawatünaka aka, eʼraajünüshii waya süka anain waʼanaaya, washeʼin otta wulein shia. Jülüjüinjatü waaʼin anain wayolojo woʼunapa, waleʼejapa otta eere saainjünüin tü outkajawaakat. Jaʼitakajeʼe weeʼiratüle washeʼin ayatüinjatü anain waʼanaaya otta wanainjatü tü karaloukta sümaajatkat wanülia. Müle shia watuma naatajateerü wakuwaʼipa noulia na nnojoliikana aküjülin pütchi otta aneerü nanüiki wachiki na eʼrakana waya.
7. ¿Jamüsü anaka pükaaliinjüle sünain aʼyatawaa sünain tü outkajawaa miyoʼukat?
7 Choʼujaashii na akaaliinjüinjanakana. Süpüla anainjatüin sukuwaʼipa tü outkajawaakat, eeinjana na aʼyataainjanakana sünain. ¿Eeshiche süpüla pükaaliinjüin sünain? (Sal. 110:3.) Tü aʼyatawaakat sünain tü outkajawaa miyoʼukat, shia süpüshi tü aʼyatawaa waainjakat nümüin Maleiwa otta anasü nanüiki na waneeinnua sutuma. Süka ponuin naaʼin chi aluwataakai eere saainjünüin wanee outkajawaa miyoʼu tü naainjakat na akaaliinjakana sünain epitajaa, müshi nia: «Taapeein jümüin tü analuʼutkat saaʼu tü jaainjakat, anashaatasü maʼin, eiwaʼalia teʼrüin tia. Aküjünapuʼusü tamüin anain maʼin nakuwaʼipa na aküjüliikana pütchi nüchiki Jeowa, eʼraajünüshii maʼin naya waʼaka süka wulereʼeinya natuma eere noutkajaain. Shiaitpa wanee kasa anasü tü outkajaaleekat namüin na wayuukana jutuma otta natuma na wayuu nuʼuniraka Jeowa süka tü nütchinkat, jüinküin tia nakajee na wayuu teʼraajakana sümaa kamaneein maʼin».
8. ¿Jamüsü süpüla waküjüin pütchi eeinjatüle saainjünüin tü outkajawaakat?
8 Waküja pütchi. Neʼreerü na wayuu kepiakana eere saainjünüin tü outkajawaakat, anain naʼanaaya otta nasheʼin na wayuu kanainkana tü karaloukta sümaajatkat nanülia. Eeshii süpüla nasakirüin süchiki tia otta waküja meeria süchiki tü outkajawaa miyoʼukat. Eeshi wanee jintüi pienchiirü juya nuuyase, nülüʼüjaka suluʼumüin tü ekaaleekat tü karaloukta aapünakat sünain tü outkajawaakat, niiʼiyataka shia sümüin tü eʼikajütkat eküülü. Sutuma tia, nounejaaka shia sünain tü outkajawaakat na kachonniikana nia.
9. ¿Jamüsü süpüla weeʼiyatüin kojutüin wamüin tü nüsülajakat Maleiwa maʼaka saainjüin shia nüpüshi Jesuu?
9 Talatüshii sümaa naʼatapajüin na judío aʼwaajeekana Maleiwa tü miʼiraa sümaiwajatkat (Deu. 16:15). Talatüsü nüpüshi Jesuu sutuma tü naainjakat süpüla noʼunüin otta nekirajaain sünain. Müshiʼiya wayakana, kojutüsü wamüin tü outkajawaa miyoʼu apünüinkat kaʼi süka nüsülajalain shia Jeowa (Sant. 1:17). ¡Yapa pia maalü süpüla puʼwaajüin Jeowa sümaa talatüin paaʼin sünain tü outkajawaa aainjünakat juyawai!
[Pütchi süttaka suluʼu süpana 10, 11]
Tü sotuinjatkat waaʼin süpüla tü outkajawaa miyoʼu apünüinkat kaʼi
◼ Sükalia tü wekirajaainjatkat anain. Tü wekirajaainjatkat anain soʼu tü apünüinkat kaʼi oʼttajatü 9:20 wattaʼa maalü. Ojutanneerü tü soʼukot piichi 8:00 wattaʼa maalü. Süpüla anain suʼttia tü wekirajaainjatkat anain wachajaainjatü weinase suʼttapa tü muusikakat. Ojutaajeerü tü outkajawaakat 4:55 aliika soʼu tü palajatkat otta tü piamakat kaʼi. Akatsaʼa soʼu tü apünüinkat kaʼi ojutaajeerü shia 3:40 aliika.
◼ Süpülee kemion otta wisiküleeta. Nnojoleerü achekajünüin süpülee kemion wayale aaʼinmajüin shia. Pachikuatüinjatü ashaʼwaleʼennüin tü kemionkat. Eeinjatüle süshaʼwaleʼennüin neʼejena na isakana achiki waraittaa namüiwaʼa, nnojotsü ashawaʼleʼenüinjatüin wanee kemion naata. Süka joʼuuchoin tü süpüleekat kemion otta wisiküleeta, eeshii süpüla wainmain na antakana suluʼu wanee kemion.
◼ Einasee. Naya neʼe wakatalüinjanaka einasee na antakana jee na kepiakana wamaa otta na ekirajaakana wamaa sünain tü Wiwüliakat (1 Cor. 13:5). Müle shia watuma, weeʼiyateerü kojutüin wamüin na wawalayuu laülaakana, na ayuuikana otta na eiwaʼaliikana outkajaain wamaa.
◼ Eküülü. Anasü walüʼüjüle weküin suulia oʼunaa sünain ayaʼlajaa wanaa sümaa weemeraain kaleʼu. Nnojotsü alüʼüjünüinjatüin sünain tü outkajawaakat wanee kaawa miyoʼu otta maraaja. Eesü süpüla sülüʼüjünüin wanee kaawa joʼuuchon ekerotoko suupünaa tü einaseekat.
◼ Nneerü asülajünaka. Süpüla waapüin tü analuʼutkat saaʼu tü outkajawaa miyoʼukat, wasülaja süpüshi wanneetse süpüla aküjaa pütchi sainküin mma. Eesü süpüla waainjüin shia sünain tü outkajawaakat jee suluʼu tü Piichi Outkajaaleekat.
◼ Eewawaa otta ayuuijawaa. Wanaa sümaa eein eewawaa otta ayuuijawaa sünain tü outkajawaakat, püküja süchiki nümüin chi jülüjakai aaʼin na antakana eekai pejein pünain. Naapireenaka na akaaliinjakana eeka ayuulin süpüla neʼrajaainjatüin shia na atüjakana süpüleerua.
◼ Asapaatsee. Wainma wayuu eewaaka juyawai sutuma nasapaatse. Anasü jüneeküle sapaata eekai nnojoluin yaletüin süpüla nnojoluin jeewaain wanaa sümaa waraittüin jia sooʼopünaa kaleera otta eepünaale suwataain saamajülee wüin.
◼ Wayuu macheʼeka. Sünain waneeirua outkajawaa alatinneerü tü ekirajaanajatkat anain suluʼu raawia (FM). Saainjünüinjatüle tia, aküjüneerü soʼu tü palajatkat kaʼi. Süpüla tia, choʼujaasü wanee raawiachon kanainka audífono.
◼ Akürawaajia. Nnojotsü eʼitaanajatüin wanee akürawaajia sünain tü raawia alatinnakat aka tü pütchikat sünain tü outkajawaakat. Mojule nakuwaʼipa na waneeinnua sünain aapajaa, nnojotsü eʼitaanajatüin.
◼ Neʼejena na joʼuukana. Nnojotsü alüʼüjünüinjatüin tia sünain tü outkajawaakat. Akatsaʼa, eesü süpüla sülüʼüjünüin tü neinase eʼitaanakat naʼütpaʼa na kachonniikana nia.
◼ Perfume. Wainma tü outkajawaa aainjünakat suluʼu piichi eeka süttüin otta choʼujaaka amüin awaniiko. Makalaka weeʼiyatüin jülüjüin waaʼin nakuwaʼipa na waneeinnua wanaa sümaa nnojoluin woʼyotuin waaʼu perfume otta koloonia eeka alin seejuu, süka eein süpüla ayuuijaain na kapüleekana amüin asanalaa naaʼin (1 Cor. 10:24).
◼ Tü karalouktakat Sírvase visitar. Pülüʼüja wanee jee piamasü karalouktairua Sírvase visitar (S-43) süpüla püshajüin nanülia na püküjakana amüin pütchi otta nekirajaweein sünain tü Wiwüliakat. Eesü süpüla paapüin shia eere tü karalouktapüleekat jee shiale nümüin chi seküretaariokai eere puutkajaain (paashajeʼera Waʼyataain Nümüin Maleiwa, ojuʼitaka pewüreeroʼu 2005, süpana 6).
◼ Atunkülee. Eere süpüla waapüin atunkülee waashajaa nümaa chi seküretaariokai eere woutkajaain otta wepiraja tü karaloukta sümaajatkat. Puʼunüinjachire sünain wanee outkajawaa eeka wattain suulia pipia otta choʼujaale eeinjachire pütunküin, paashajaa nümaa chi seküretaariokai, pipiraja tü karaloukta süpülajatkat tia otta paapa shia nümüin chi wawalakai süpüla nuluwataain shia eeinjatüle saainjünüin tü outkajawaakat. Nnojo paaʼinrüin tia sülüʼütpa maʼin tü outkajawaakat süka sumojujeʼereerüin sukuwaʼipa naʼyataain na wawalayuu achajaakana tü atunküleekat (1 Cor. 14:40). Na wawalayuukana otta na nachonnii aapünakana amüin atunkülee, kojutüinjatü namüin nepia na wawalayuukana nnojoluinjatü namojujeʼerüin tü korolo namaʼanakat otta nnojoluinjana ekerotuin eere natunküin na kepiakana. Tü atunküleekat süpülajatü neʼe tü kaʼi eeinjatkat oʼu tü outkajawaakat. Nnojotsü anain makatüle waya kojuya kaʼi süchikijee tü outkajawaakat süpüla eʼraajaa tü kasa anakat maʼin eere saainjünüin tü outkajawaakat jee süpüla aaʼinraa waneeirua kasa.
◼ Eeka nakaaliinjeein. Talateerü paaʼin sünain tü outkajawaakat maka pükaaliinjüle sünain tü aʼyatawaa aainjünakat süpüla anain sukuwaʼipa (Aluw. 20:35). Na keeʼireekana aaʼin aʼyatawaa arütkaainjana eemüin na shikiipüʼükana. Eeshi süpüla niʼyataain chi 16 ouyase, akatsaʼa naainjüinjatü tia sümaa naaʼinmajünüin nutuma chi nüshikai, tü niikat jee niale wanee wayuu laülaakai naaʼu natuma na kachonniikana nia.