Tü akuwaʼipa kojutükat atuma Maleiwa

1. ¿Jamüshii watüjaanawaika aaʼu woʼunüinjanain sünain tü outkajawaakat miyoʼu?

¹ Atüjaanawai aaʼuchii waya woʼunüinjanain sünain tü outkajawaakat miyoʼu. Suluʼu wainma mma eere saainjünüin tü outkajawaakat miyoʼu, aküjünüsü namüin na wayuukana suluʼupünaa raawia otta telewisoot sünain woutkajaainjanain. Wotusü maʼin tü atunküleekalüirua natuma na aküjüliikana pütchi nüchiki Jeʼwaa, müsia eere suikkaanüin eküülü. Waraittapa kaayeruʼupunaa na wawalayuukana, eʼnnüsü nanain tü karaloukta nanüliamaajatkat. Wekirajaainjatü anain jooluʼu waneeirua pütchi süpüla tü outkajawaakat miyoʼu, akaaliinjeenaka waya süpüla kojutüin Maleiwa watuma süka tü wakuwaʼipakat (1 Ped. 2:12).

2. ¿Jamüshi kojuteechika Maleiwa anale sukuwaʼipa waʼanaaya sümaʼinruʼu chain waya sünain tü outkajawaakat miyoʼu?

² Anainjatü sukuwaʼipa waʼanaaya. Anale sukuwaʼipa tü waʼanaayakat sümaʼinruʼu chain waya sünain tü outkajawaakat miyoʼu, poneerü shia naaʼin na wayuukana. Ponoleejeeria naaʼin na wayuukana tü sukuwaʼipakat waʼanaaya wanaa sümaa wawaraijaain, wanaa sümaa wayaʼlajaain otta wanaa sümaa chain waya watunküleeruʼu. Acheküsü anainjatüin waʼanaaya süpüla nnojoliinjanain waponojünüin namaa na manoujüinsaliikana (Roma 12:2). Choʼujaasü walüʼüjüinjatüin tü karaloukta wanüliamaajatkat, müle shia watuma, meerü aka waapirakai saaʼin wayuu süka, eeshii süpüla waküjüin pütchi otta nayaawateena waya na wanee wawalayuukana.

3. ¿Kasa waaʼinrüinjatka süpüla weeʼiyatüin kamaneein jee nnojoliin kashaparaliin waya?

³ Kamaneeinjana waya, nnojoliinjana kashaparaliin waya. Maaʼulu yaa wainma wayuu jülüjakana aaʼin nakuwaʼipa neʼe namüiwaʼa, matüjüinka aapaa analuʼut. Aneerü naaʼin na wayuukana sutuma nnojoluin kashaparaliin maʼin waya otta kamaneein waya namüin, meerü aka saaʼin wanee jouktai anaka atuma saaʼin wayuu, nayaleekajaʼa namüin na wayuu aʼyataakana suluʼu miichi atunkülee otta eere suikkaanüin eküülü (2 Tim. 3:1-5). Jülüjüinjatü waaʼin nakuwaʼipa na waneeinnua waneeküinjatpa tü einaseekat otta wanaa sümaa wachuntüinjatüin tü karaloukta jekennuukat (1 Cor. 10:23, 24). Sünain tü palajatkat nukua wanee wayuu sünain tü outkajawaakat miyoʼu, müsü nünüiki: «Nnojotsü sotuin taaʼin süpüshuaʼa tü pütchi aküjünakat sünain tü outkajawaakat miyoʼu, shia sotoka taaʼin nakuwaʼipa na aküjüliikana pütchi nüchiki Jeʼwaa, müiria nnojoluin motuin taaʼin shia».

4. ¿Jamüsü anaka wakaaliinjüle sünain wanee kasa aaʼinnaka sünain tü outkajawaakat miyoʼu?

⁴ Akaaliinjüinjana waya. Eʼnnaajünüshii maʼin na anoujüshiikana sünain nakaaliinjüliin maʼin (Sal. 110:3). ¿Eeshiche süpüla pükaaliinjüin sünain tü aaʼinnajatkat sünain tü outkajawaakat miyoʼu? Eetaashii maʼaka 600 wawalayuu akaaliinjaka sünain naʼwulejüin tü miichikat eere saainjünüinjatüin tü outkajawaakat miyoʼu. Ponusü maʼin naaʼin na wayuu aʼyataakana suluʼu tia miichikat, müsü nanüiki: «Ponoshaatasü maʼin waaʼin tü naaʼinrakat, nnojotsü weʼrüirüin wanee kasa eeka müin aka saaʼin. Nnojotsü paala wanoujüin sünain nayain kaʼyataalain na anoujüshiikana tia sümaa nnojoluin nachekajüin saaʼu». Waʼatapüin maʼin tü outkajawaa miyoʼu apünüinkat kaʼi aainjüneetka soʼu 2013, eere waapajeerüin tü pütchikat, watüjüin sünainjee otta kojutüin watuma Jeʼwaa, chi Ekirajüikai waya.

[Pütchi süttaka suluʼu süpana 6]

Sotuinjatü waaʼin süpüla tü outkajawaa miyoʼu apünüinkat kaʼi 2013

◼ Sükalia tü ekirajaanajatkat anain. Ojutanneerü soʼu tü piichikat 8.00 wattaʼa maalü. Oʼtteerü tü jayeechi aapajünakat palajana 9.20 watta maalü soʼu tü apünüinkat kaʼi. Suʼttapa tü muusikakat wachajaainjatü weinase süpüla anain suʼttia tü wekirajaainjatkat anain. Ojutaajeerü tü outkajawaakat 4.50 aliika soʼu tü palajatkat otta tü piamakat kaʼi. Akatsaʼa soʼu tü apünüinkat kaʼi ojutaajeerü shia 3.35 aliika.

◼ Süpülee kemion. Nnojoleerü achekajünüin süpülee kemion wayale aaʼinmajüin shia. Pachiiruaainjatü süshaʼwaleʼennüin tü kemionkat. Süka joʼuuchoin tü süpüleekat kemion, eeshii süpüla wainmain na antakana suluʼu wanee kemion. Eeinjatüle süshaʼwaleʼennüin neʼejena na isakana achiki waraittaa namüiwaʼa, nnojotsü ashawaʼleʼenüinjatüin wanee kemion naata.

◼ Einasee. Naya neʼe pükatalüinjanaka einasee na antakana jee na kepiakana pümaa otta na ekirajaakana pümaa sünain tü Wiwüliakat. Eesü kapüleere naikkalaainjanain kojuya wayuu sümaa wanee napüshi eekai laülaain otta ayuulin, süka palitchon tü einasee eʼitaanakat napüla. Nnojo püikkalaain saaʼu tia einaseekalüirua süka napülajatüin shia na laülaayuukana, na ayuuikana otta na wayuu akaaliinjakana naya (1 Cor. 13:5).

◼ Eküülü. Anasü walüʼüjüle weküin suulia oʼunaa sünain ayaʼlajaa wanaa sümaa weemeraain kaleʼu. Nnojotsü alüʼüjünüinjatüin sünain tü outkajawaakat wanee kaawa miyoʼu otta maraaja. Eesü süpüla sülüʼüjünüin wanee kaawa joʼuuchon ekerotoko suupünaa tü einaseekat.

◼ Nneerü asülajünaka. Sutuma talatüin waaʼin saaʼu wekirajünüin sünain tü outkajawaakat miyoʼu, anasü wasülajüle süpüshi wanneetse süpüla aküjaa pütchi sainküin mma.

◼ Püsajüle wunuʼu. Püsajüle wunuʼu aluwataaushi pümüin natuma na tottootkana, pülüʼüja shia süka nnojoleerüin saapünüin pümüin sünain tü outkajawaakat. Müleka suukarale püsha otta piʼiteʼerüinjachire utia pünain, nnojo pujutüin neʼe yalapünaa tü utiakat, kapüleesü shia süka ayuuleemaajatüin shia. Nnojo pujutüin shia saʼaka tü wasuura eekat suluʼu tü outkajaaleekat otta eere pütunküin.

◼ Asapaatsee. Wainma wayuu eewaaka juyawai sutuma nasapaatse. Anasü jüneeküle sapaata eekai nnojoluin yaletüin süpüla nnojoluin jeewaain wanaa sümaa waraittüin jia sooʼopünaa kaleera otta soʼu saamajülee wüin.

◼ Wayuu macheʼeka. Sünain tü outkajawaakat alatinneerü tü ekirajaanajatkat anain suluʼu raawia (FM). Süpüla tia, choʼujaasü wanee raawiachon kanainka audífono.

◼ Neʼejena na joʼuukana. Nnojotsü alüʼüjünüinjatüin tia sünain tü outkajawaakat. Akatsaʼa, eesü süpüla sülüʼüjünüin tü neinase eʼitaanakat naʼütpaʼa na kachonniikana.

◼ Tü karalouktakat Sírvase visitar (S-43). Pülüʼüja wanee jee piamasü karalouktairua Sírvase visitar süpüla püshajüin nanülia na püküjakana amüin pütchi otta na ekirajaweekana sünain tü Wiwüliakat. Püleʼejapa sünainjee tü outkajawaakat miyoʼu, eesü süpüla paapüin tia karalouktakat eere shiitajünüin karaloukta jee shiale nümüin chi seküretaariokai eere puutkajaain.

◼ Atunkülee. Eere süpüla natunküin na wawalayuukana wepialuʼu, waashajaa nümaa chi seküretaariokai eere woutkajaain otta wepiraja tü karaloukta sümaajatkat. Puʼunüinjachire sünain wanee outkajawaa eeka wattain suulia pipia otta choʼujaale eeinjachire pütunküin, paashajaa nümaa chi seküretaariokai, pipiraja tü karaloukta süpülajatkat tia otta paapa shia nümüin chi wawalakai süpüla nuluwataain shia eeinjatüle saainjünüin tü outkajawaakat. Nnojo paaʼinrüin tia sülüʼütpa maʼin tü outkajawaakat süka sumojujeʼereerüin sukuwaʼipa naʼyataain na wawalayuu achajaakana tü atunküleekat (1 Cor. 14:40). Na wawalayuukana otta na nachonnii makatakana nepialuʼu na wawalayuukana, kojutüinjatü namüin nepia na wawalayuukana, nnojoluinjatü namojujeʼerüin tü korolo namaʼanakat otta nnojoluinjana ekerotuin eere natunküin na kepiakana. Tü atunküleekat süpülajatü neʼe tü kaʼi eeinjatkat oʼu tü outkajawaakat. Nnojotsü anain makatüle waya kojuya kaʼi süchikijee tü outkajawaakat süpüla eʼraajaa tü kasa anakat maʼin eere saainjünüin tü outkajawaakat jee süpüla aaʼinraa waneeirua kasa.

◼ Eeka nakaaliinjeein. Na aʼyataweekana, arütkaainjana eemüin na shikiipüʼükana. Eeshi süpüla niʼyataain chi 16 ouyasekai, akatsaʼa naainjüinjatü tia sümaa naaʼinmajünüin nutuma chi nüshikai, tü niikat jee niale wanee wayuu laülaakai naaʼu natuma na kachonniikana nia.