Sotuinjatü waaʼin süpüla tü outkajawaa miyoʼu apünüinkat kaʼi
Sükalia tü ekirajaanajatkalü anain. Ojutanneerü soʼu tü piichikat 8:00 wattaʼa maalü. Oʼtteerü tü jayeechi aapajünakat palajana 9:20 wattaʼa maalü soʼu tü apünüinkat kaʼi. Suʼttapa tü muusikakat wachajaainjatü weinase süpüla anain suʼttia tü wekirajaainjatkalü anain. Ojutaajeerü tü outkajawaakat 5:00 aliika soʼu tü palajatkat otta tü piamakat kaʼi. Akatsaʼa soʼu tü apünüinkat kaʼi ojutaajeerü shia 4:00 aliika.
Waʼwaaja Jeʼwaa sükajee weeʼirajüin nümüin. Naʼwaajapuʼuin Jeʼwaa na judíokana sükajee tü jayeechi neeʼirajakat. Maaʼulu yaa, waʼwaajüin Jeʼwaa wanaa sümaa weeʼirajüin nümüin (Sal. 28:7). Eʼitaanüsü muusika maʼaka jeʼra minuuto süpülapünaa suʼttüin tü ekirajaanajatkalü anain. Nnojotsü eʼitaanaʼalüin tü muusikakat süpaʼa mma, eʼitaanüsü süpüla waʼwaajüin Jeʼwaa otta süpüla weʼraajüin nia. Makalaka nnojoliinjanain waraikuʼu wamüinjanain shiʼitaanapa tü muusikakat, yalainjana waya joyotuin sünain aapajaa tü muusikakat. Nnojoishii yootokokuʼu müinjanain waya. Waainjüle tia, weeʼiyatüin sünain kojutüin wamüin naʼyataain na wawalayuu akürawaajakana tü muusikakat. Piantua nakua juyawai Pattersonmüin (Nueva York) sünain akürawaajaa tü muusika waapajakat. Nawalaajüin tü nasapiakat, nnojotsü jaralüin awalaajüin namüin. Süchikijee waapajüin tü muusikakat, waʼwaajeechi Jeʼwaa sükajee weeʼirajüin nümüin.
Süpülee kemion. Nnojoleerü achekajünüin süpülee kemion wayale aaʼinmajüin shia. Pachiiruaainjatü süshaʼwaleʼennüin tü kemionkat. Eeshii süpüla kojuyain na antakana suluʼu wanee kemion müleka joʼuuchonle tü süpüleekat kemion. Eeinjatüle süshaʼwaleʼennüin neʼejena na ouktakana asaʼa, nnojotsü ashawaʼleʼenüinjatüin wanee kemion naata.
Einasee. Sujutannapa soʼu tü piichikat eeinjanale woutkajaain, nnojotsü anain wawataale maʼin sünain achajawaa tü weinaseinjatkat. Nnojoishii sünain waya wanee ayoujirawaa süpüla müinjatüin wakuwaʼipa. Shiainjatü kapülaka waaʼin nakuwaʼipa na waneeinnua suulia tü wakuwaʼipakat. Waainjüle tia, atüjaaneerü aaʼu wayain na anoujashii shiimainshiikana jee aʼwaajüneechi maʼin Jeʼwaa (Juan 13:34, 35; 1 Cor. 13:4, 5; 1 Ped. 2:12). Naya neʼe pükatalüinjanaka einase na antakana jee na kepiakana pümaa otta na pikirajüinkana sünain tü Wiwüliakat. Nnojo piʼitaain wanee kasa saaʼu tü einaseekat, aluʼusaʼa pükatarüle shia. Paainjüle tia, natüjaajeerü aaʼu na wawalayuukana jalainjanain naikkalaain. Nnojo püikkalaain saaʼu tü einasee napülajatka na laülaayuukana, na ayuuikana otta na wayuu akaaliinjakana naya.
Anainjatü waʼanaaya. Anainjatü tü waʼanaayakat sünain tü outkajawaakat. Nnojotsü müinjatüin aka saaʼin naʼanaaya na manoujüinsaliikana otta nnojotsü keemainjatüin shia (1 Tim. 2:9). Jülüjüinjatü waaʼin tia jaʼitainna chain waya eere watunkülee otta eepünaale wapasiajaain. Kapüleerü waaʼin shiʼnnüin wanain tü karaloukta wanüliamaajatkat otta nnojoleena japülin waya waküjüinjanapa pütchi sümüin wayuu eekai süsakirüin waya. anainjatü waʼanaaya otta anainjatü wakuwaʼipa süpüla talatüin naaʼin Jeʼwaa wamaa otta süpüla kapülain saaʼin wayuu tü sümakat tü Wiwüliakat (Sof. 3:17).
Serulaat sümaa taapüla. Pülüʼüjüinjachire püserulaatse jee pütaapülase, jalia shikeʼejayaa naaʼin na jutkatüshiikana. Piyuʼlüinjachire ayaakuaa otta pükürawaajüinchire suʼunnaa tü outkajawaakat, nnojo pikeʼejüin naaʼin na jutkatüshiikana, anashiinjatü namüin eʼraa chi wawala ekirajakai. Nnojotsü anain müleka puluwanaajüle mensaaje suʼunnaa tü outkajawaakat.
Eküülü. Anasü walüʼüjüle weküin suulia oʼunaa sünain ayaʼlajaa wanaa sümaa weemeraain kaleʼu. Nnojotsü alüʼüjünüinjatüin sünain tü outkajawaakat wanee kaawa miyoʼu otta maraaja. Eesü süpüla sülüʼüjünüin wanee kaawa joʼuuchon kettaaka suupünaa tü einaseekat.
Nneerü asülajünaka. Sutuma talatüin waaʼin saaʼu wekirajünüin sünain tü outkajawaakat miyoʼu, anasü wasülajüle süpüshi wanneetse süpüla aküjaa pütchi sainküin mma.
Püsajüle wunuʼu. Püsajüle wunuʼu aluwataaushi pümüin natuma na tottootkana, pülüʼüja shia süka nnojoleerüin saapünüin pümüin sünain tü outkajawaakat. Müleka suukarale püsha otta piʼiteʼerüinjachire utia pünain, nnojo pujutüin neʼe yalapünaa tü utiakat, kapüleesü shia süka ayuuleemaajatüin shia. Nnojo pujutüin shia saʼaka tü wasuura eekat suluʼu tü outkajaaleekat otta eere pütunküin.
Asapaatsee. Eeinjatü waaʼin suulia weewaain sutuma washanaain jee wasiranajaain. Wainma wayuu eewaaka juyawai sutuma nasapaatse. Anasü jüneeküle sapaata eekai nnojoluin yaletüin shiiyoʼu süpüla nnojoluin jeewaain wanaa sümaa waraittüin jia sooʼopünaa kaleera otta saaʼu saamajülee wüin.
Wayuu moʼuka ekii. Sünain tü outkajawaakat alatinneerü tü ekirajaanajatkalü anain suluʼu raawia (FM). Süpüla tia, choʼujaasü wanee raawiachon kanainka audífono.
Neʼejena na joʼuuyuukana. Nnojotsü alüʼüjünüinjatüin neʼejana na joʼuuyuukana sünain tü outkajawaakat. Akatsaʼa eein süpüla sülüʼüjünüin tü neinase eʼitaanakat naʼütpaʼa na kachonniikana naya.
Koloonia. Eesü süttüle tü piichikat eeinjanale woutkajaain. Makalaka suchuntünüin wamüin nnojoliinjanain woʼyotüin müleʼu koloonia waaʼu jee nnojoluinjatüin alin maʼin seejuu suulia motsotuin naaʼin na wayuukana sutuma (1 Cor. 10:24).
Tü karalouktakat Si una persona mostró interes (S-43). Pülüʼüja wanee jee piamasü karalouktairua Si una persona mostró interés süpüla püshajüin nanülia na püküjakana amüin pütchi otta na ekirajaweekana sünain tü Wiwüliakat. Püleʼejapa sünainjee tü outkajawaakat miyoʼu, eesü süpüla paapüin tia karalouktakat eere shiitajünüin karaloukta jee shiale nümüin chi seküretaariokai eere puutkajaain (pütchikat tüü süpülajatü neʼe Wenesueela).
Atunkülee. Eere süpüla natunküin na wawalayuukana wepialuʼu, waashajaa nümaa chi seküretaariokai eere woutkajaain otta wepiraja tü karaloukta sümaajatkat. Puʼunüinjachire sünain wanee outkajawaa eeka wattain suulia pipia otta choʼujaale eeinjachire pütunküin, paashajaa nümaa chi seküretaariokai, pipiraja tü karaloukta süpülajatkat tia otta paapa shia nümüin chi wawalakai süpüla nuluwataain shia eeinjatüle tü outkajawaakat. Nnojo paaʼinrüin tia sülüʼütpa maʼin tü outkajawaakat süka sumojujeʼereerüin sukuwaʼipa naʼyataain na wawalayuu achajaakana tü atunküleekat (1 Cor. 14:40). Na wawalayuukana otta na nachonnii makatakana nepialuʼu na wawalayuukana, kojutüinjatü namüin nepia, nnojoluinjatü namojujeʼerüin tü korolo namaʼanakat otta nnojoluinjana ekerotuin eere natunküin na kepiakana. Tü atunküleekat süpülajatü neʼe tü kaʼi eeinjatkat oʼu tü outkajawaakat. Nnojotsü anain makatüle waya kojuya kaʼi süchikijee tü outkajawaakat süpüla eʼraajaa tü kasa anakat maʼin eere saainjünüin tü outkajawaakat jee süpüla aaʼinraa waneeirua kasa.
Eeka nakaaliinjeein. Na akaaliinjeekana sünain tü outkajawaakat, arütkaainjana eemüin na wawalayuu shikiipüʼükana tü aʼyatawaakat. Eeshi süpüla niʼyataain chi eekai 16 ouyase, akatsaʼa naainjüinjatüin tia sümaa naaʼinmajünüin nutuma chi nüshikai, tü niikat jee niale wanee wayuu laülaakai naaʼu natuma na kachonniikana nia.