Sütütüleʼereerü waaʼin soʼu apünüin kaʼi

1. ¿Kasa eejeetka sünainjee tü outkajawaa miyoʼu apünüinkat kaʼi soʼu juyakat tüü?

¹ Maaʼulu yaa müsü aikai miyaasü namüin na wayuu nuluwataakana aaʼu Satanaa, akanasaʼa na aʼyataakana nümüin Jeowa ayatüsia miyoʼuin wüin namaʼana sümaa saamatüin shia (Isa. 58:11). Naapüin Jeowa tia namüin sükajee tü outkajawaa miyoʼu apünüinkat kaʼi juyawaika. Yapa waya sujuuna süntüin sükalia outkajawaakat tia soʼu juyakat tüü süpüla sütütüleʼennüin waaʼin jee watütüleʼerüin naaʼin na waneeinnua sünain anoujaa. ¿Jamüinjatü sukuwaʼipa? (Pro. 21:⁠5.)

2. ¿Kasa wayuu tü yapainjatkat watuma?

² Nnojoyürüle yapain putuma tü kaʼi paainjüinjatkat oʼu wanee kasa otta tü piʼyataainjatkat oʼu, anasü paainjüle shia süpüla chain pia soʼu tü apünüinkat kaʼi. ¿Pütüjaaitpa aaʼu jeʼreerüin oora choʼujaaka soʼukaiwai süpüla püntüin otta püchajaain piinase süpülapünaa suʼttüin tü ekirajaanajatkat anain? Shiimain nnojoluin amülouiweein watuma tü kasa naapakat Jeowa wamüin süpüla wanoula (Isa. 65:​13, 14.) ¿Eeitpa eeinjachire pütunküin otta tü püsapiainjatkat?

3. ¿Kasa akaaliinjeenaka waya süpüla anain wakuwaʼipa wayakana jee na wapüshikana sutuma tü outkajawaakat?

³ ¿Kasa waaʼinrajatka süpüla jülüjüin waaʼin tü ekirajaanajatkat anain? Müleka eere süpüla paainjüin tüü paainja shia: piisalaa aipaʼa maalü süpüla peemeraain, piirakaa nümüin chi ekirajakai, püchajaa süpüshuaʼa tü pütchi suluʼujeejatkat tü Wiwüliakat otta püshaja süpüshi tü ekirajünakat anain. Anashiireʼe kottiraale na wayuukana sümaa napüshi süpüla nakaaliinjüin na nachonniikana süpüla jülüjüin naaʼin tü ekirajaanakat anain (Pro. 29:15). Jee aipaʼa, jaashajaa süchiki tü anakat jümüin sünainjee tü ekirajaanakat anain. Süpüla ayatüinya katchin jaaʼin süchikijee tü outkajawaakat, eeshii süpüla jikirajaain sünain tü jünainpünaakat maʼin juʼwaajapa Maleiwa sümaa jüpüshi.

4. ¿Kasa eeka süpüla waainjüin süpüla sütütülaain nanoula na waneeinnua?

⁴ Nakaaliinjia na waneeinnua. Akatsaʼa keeʼireein waaʼin sütütülaain nanoula na waneeinnua. Soto paaʼin na wawalayuu laülaayuukana otta na kapüleekana amüin oʼunaa sünain tü outkajawaakat. Eere na makana akuwaʼipa eere puutkajaain, eeshii süpüla pükaaliinjüin naya (1 Juan 3:​17, 18). Nachajaainjatü sukuwaʼipa na laülaashiikana nakaaliinjünüinjanain naya wawalayuukana, naainjüinjatü maʼin tia na nekiipüʼükana na wawalayuukana.

5. ¿Jameerü shiitajia tü ounejaayakat? (Paashajeʼeraleʼeya tü pütchi süttakat suluʼu süpana 5.)

⁵ Maʼaka waainjapuʼuin shia, waapireena na wayuukana apünüin semaana süpülapünaa tü outkajawaakat. Neʼitaainjatü napüleerua na wawalayuukana neitajüin tü ounejaaya aapünakat namüin otta naapirüinjana na wayuu kepiakana eere naküjüin pütchi. Akatsaʼa nnojorüle shiitajüin püpüshi süpüshuaʼa tü ounejaayakat, pülüʼüja shia süpüla püküjüin pütchi süka eeinjatüle tü outkajawaakat. Aküjüneerü pümüin soʼu tü palajatkat kaʼi jamüinjatü sukuwaʼipa. Wainmale maʼin tü apütaakat, eesü süpüla paapüin nümüin chi jülüjakai aaʼin na antakana tü iseetkat püchiki piitajüin, paainja tia püntaiwaʼaya sünain tü outkajawaakat. Soto paaʼin pünaajaain waneesia ounejaaya süka saashajaaneerüin achiki sünain tü chiiruaajatkat pütchi soʼu tü apünüinkat kaʼi.

6. ¿Jarat tü akuwaʼipaa anasü weeʼiyatüinjatkat namüin na waneeinnua suʼunnaa tü outkajawaakat?

⁶ Anale wakuwaʼipa sümüin wayuu. Süka wainmain maaʼulu «wayuu eekai kapülain naaʼin nakuaippa neʼe namüiwa» ¡Anasü maʼin jutkataa namaa wawalayuu anaka akuwaʼipa namüin na wayuukana! (2 Tim. 3:⁠2.) ¿Kasa weeʼiyataka aka anain wakuwaʼipa namüin na wayuukana? Wanee sukuwaʼipa shia wekerotüle süka anaka akuwaʼipa sümaa nnojoliin washapajaain sujutannapa 8.00 wattaʼa maalü tü outkajaaleekat. Jee wakatarüle neinase na antakana jee na kepiakana wamaa otta na ekirajaakana wamaa sünain tü Wiwüliakat. Jee wanee shia woonoole nümüin chi aküjakai nanülia na ekirajüinjanakana wanaa sümaa nüchuntüin waikkalaainjanain süpüla waapajüin tü muusikakat jee kaserulaatsere waya anasü yokutüle jee sukutkujaale watuma süpüla nnojoluin shikeʼejüin naaʼin na waneeinnua. Jee tü anaakat akuwaʼipa sümüin wayuu sünainpünaasü nnojoliin yootuin waya, waluwataain pütchi süka serulaat, wekaain jee waraittüin suʼunnaa tü ekirajaanakat anain.

7. ¿Jamüsü süpüla natütüleʼerüin waaʼin jee watütüleʼerüin naaʼin na wawalayuukana namaapa waya?

⁷ Paaʼinwajiraajeena waya. Eeshii süpüla paaʼinwajiraain waya namaa na wawalayuukana sünain tü outkajawaakat miyoʼu (Sal. 133:1-3). Püchajaa pukuwaʼipa süpüla kooʼomüin na paʼaleewainkana jee piʼraajüin wawalayuu suluʼujee wanee outkajaalee naata (2 Cor. 6:​13, NM). Eesü süpüla piʼraajawalin soʼukaiwai waneeshia wawala jee nayale wawalayuu sümaa napüshi. Anasü paainjüle tia peemeraapa kaleʼu. Müsüjeseʼe anain pülüʼüjüle piküin pipialuʼujee süpüla makatüin pia namaa na wawalayuukana suulialeʼeya piyaʼlajüin eküülü yalapünaa. Süka eein süpüla piʼraajüin wayuu süpüla paʼaleewain naya waneepia.

8. Püküja jamüin wakaaliinjüinjanaka sünain tü outkajawaakat, ¿kasa eeka süpüla waʼyataain anain?

⁸ Anasü maʼin aʼyataajirawaa nümüin Maleiwa namaa na wawalayuukana. Eesü süpüla püküjüin piʼyataweein sünain tü outkajawaakat jee pükaaliinjeein na wawalayuukana eere puutkajaain nepitajapa (Sal. 110:3). Nnojorüle kasain piʼyataainjatüin anain, püsakira na aʼyataakana suluʼu Eeka Nakaaliinjeein. Wainmale na aʼyataakana, mamaʼasat tü aʼyatawaakat otta talatüshii na aʼyataakana.

9. ¿Jamüsü jülüjüinjatka waaʼin tü wakuwaʼipakat otta tü waʼanaayakat suʼunnaa tü outkajawaakat?

⁹ Kamalainsü namüin na waneeinnua tü wakuwaʼipakat. Sünainshii waya tü outkajawaakat soʼu tü apünüinkat kaʼi, nnojotsü neʼe shiain soʼu tü ekirajaanajatkat anain. Müsüjeseʼe neʼrüinjatüin na wayuu kepiakana eere eein tü outkajawaakat naatain wakuwaʼipa noulia na waneeinnua (1 Ped. 2:12). Aʼwaajünüinjachi Jeowa sükajee tü washeʼinkat otta tü waʼanaayakat, jaʼitainna suluʼuin waya tü outkajaaleekat, tü watunküleekat otta tü oikkaaleekat eküülü (1 Tim. 2:​9, 10). Wanainre tü karaloukta sümaajatkat wanülia, natüjaajeerü aaʼu na wayuukana aküjüliin waya pütchi nüchiki Jeowa jee eeshii süpüla waashajaain namaa süchiki tü outkajawaakat otta eeshii süpüla waküjüin pütchi namüin.

10. ¿Kasa eeʼiyataka anain pütchi süchiki tü wakuwaʼipakat?

¹⁰ ¿Jamüsü nanüiki na wayuukana sutuma wakuwaʼipa suʼunnaa tü outkajawaakat? Saashin wanee karaloukta, müsü nünüiki wanee wayuu aluwataakai saaʼu eere saainjünawalin tü outkajawaakat: «Naya wanee wayuu anakana maʼin akuwaʼipa. Anasü maʼin wamüin yaain naya wamaa juyawai». Soʼu juyakat tiainka amülouisüinka nükatteetse wanee wayuu nnojoikai aküjülin pütchi suluʼu wanee oteet kalujutkat na antakana sünain wanee outkajawaa. Nümaka chi aluwataakai suluʼu tü oteetkat nümüin chi kakorotkai tü katteerakat naapapa shia nümüin sümaa nnojoluin kasain amülouilin suluʼujee: «Anakuwaʼipachi pia süka yaajanain pejepünaa na aküjüliikana pütchi sünain wanee outkajawaa jee wotuin tü oteetkat natuma. Nnojoliire naya nnojotsüjee aleʼejinnüin tü pükatteetsekat».

11. ¿Kasa waainjüinjatka wanaapünaa sümaa sülüʼülüin tü outkajawaakat? ¿Jamüsü waainjüinjatka tia?

¹¹ Alüʼütsü maʼin sükalia tü outkajawaa miyoʼu apünüinka kaʼi eeinjatkalüirua soʼu juyakat tüü. Wainma aʼyatawaa otta kaʼi ojutünaka süpüla sütütülaain waaʼin sutuma tü ekirajaanajatkat anain otta tü eeinjatkat sünain. Püchajaa pukuwaʼipa süpüla chain pia sünain tü apünüinkat kaʼi otta süpüla yapain pia süpüla tü naapüinjatkat Jeowa pümüin otta na nuʼunirakana süka tü nütchinkat. Pütütüleʼera naaʼin na waneeinnua sükajee tü pukuwaʼipakat namüin, namaain pia otta anain pukuwaʼipa noʼupala. Müle shia meerü wanüiki maʼaka saaʼin tü nüshajakat wanee chajachi sünain tü outkajawaakat soʼu juyakat tiainka: «Nnojotsü eein wanee kasa analeeka suulia».

[Epiikürape suluʼu süpanaka 4]

Maʼaka waainjapuʼuin shia, waapireena na wayuukana apünüin semaana süpülapünaa tü outkajawaakat.

[Epiikürape suluʼu süpanaka 5]

Aʼwaajünüinjachi Jeowa sükajee tü washeʼinkat otta tü waʼanaayakat, jaʼitainna suluʼuin waya tü outkajaaleekat, tü watunküleekat otta tü oikkaaleekat eküülü

[Epiikürape suluʼu süpanaka 6]

Pütütüleʼera naaʼin na waneeinnua sükajee tü pukuwaʼipakat namüin, namaain pia otta anain pukuwaʼipa noʼupala.

Sotuinjatü waaʼin süpüla tü outkajawaa miyoʼu apünüinkat kaʼi, 2011

◼ Sükalia tü ekirajaanajatkat anain. Tü ekirajaanajatkat anain soʼu tü apünüinkat kaʼi oʼttajatü 9.20 wattaʼa maalü. Ojutanneerü tü soʼukot piichi 8.00 wattaʼa maalü. Süpüla anain suʼttia tü wekirajaainjatkat anain wachajaainjatü weinase suʼttapa tü muusikakat. Ojutaajeerü tü outkajawaakat 4.55 aliika soʼu tü palajatkat otta tü piamakat kaʼi. Akatsaʼa soʼu tü apünüinkat kaʼi ojutaajeerü shia 3.40 aliika

◼ Süpülee kemion. Nnojoleerü achekajünüin süpülee kemion wayale aaʼinmajüin shia. Pachikuatüinjatü ashaʼwaleʼennüin tü kemionkat. Eeinjatüle süshaʼwaleʼennüin neʼejena na isakana achiki waraittaa namüiwaʼa, nnojotsü ashawaʼleʼenüinjatüin wanee kemion naata. Süka joʼuuchoin tü süpüleekat kemion, eeshii süpüla wainmain na antakana suluʼu wanee kemion.

◼ Einasee. Naya neʼe pükatalüinjanaka einasee na antakana jee na kepiakana pümaa otta na ekirajaakana pümaa sünain tü Wiwüliakat (1 Cor. 13:5).

◼ Eküülü. Anasü walüʼüjüle weküin suulia oʼunaa sünain ayaʼlajaa wanaa sümaa weemeraain kaleʼu. Nnojotsü alüʼüjünüinjatüin sünain tü outkajawaakat wanee kaawa miyoʼu otta maraaja. Eesü süpüla sülüʼüjünüin wanee kaawa joʼuuchon ekerotoko suupünaa tü einaseekat.

◼ Nneerü asülajünaka. Süpüla waapüin tü analuʼutkat saaʼu tü outkajawaa miyoʼukat, wasülaja süpüshi wanneetse süpüla aküjaa pütchi sainküin mma. Eesü süpüla waainjüin shia sünain tü outkajawaakat jee suluʼu tü Piichi Outkajaaleekat.

◼ Eewawaa otta ayuuijawaa. Wanaa sümaa eein eewawaa otta ayuuijawaa sünain tü outkajawaakat, püküja süchiki nümüin chi jülüjakai aaʼin na antakana eekai pejein pünain. Naapireenaka na akaaliinjakana eeka ayuulin süpüla neʼrajaainjatüin shia na atüjakana süpüleerua.

◼ Püsajüle wunuʼu. Püsajüle wunuʼu aluwataaushi pümüin natuma na tottootkana, pülüʼüja shia süka nnojoleerüin saapünüin pümüin sünain tü outkajawaakat.

◼ Asapaatsee. Wainma wayuu eewaaka juyawai sutuma nasapaatse. Anasü jüneeküle sapaata eekai nnojoluin yaletüin süpüla nnojoluin jeewaain wanaa sümaa waraittüin jia sooʼopünaa kaleera otta eepünaale suwataain saamajülee wüin.

◼ Wayuu macheʼeka. Sünain waneeirua outkajawaa alatinneerü tü ekirajaanajatkat anain suluʼu raawia (FM). Saainjünüinjatüle tia, aküjüneerü soʼu tü palajatkat kaʼi. Süpüla tia, choʼujaasü wanee raawiachon kanainka audífono.

◼ Neʼejena na joʼuukana. Nnojotsü alüʼüjünüinjatüin tia sünain tü outkajawaakat. Akatsaʼa, eesü süpüla sülüʼüjünüin tü neinase eʼitaanakat naʼütpaʼa na kachonniikana nia.

◼ Tü karalouktakat Sírvase visitar. Pülüʼüja wanee jee piamasü karalouktairua Sírvase visitar (S-43) süpüla püshajüin nanülia na püküjakana amüin pütchi otta nekirajaweein sünain tü Wiwüliakat. Eesü süpüla paapüin shia nümüin chi seküretaariokai eere puutkajaain (paashajeʼera Waʼyataain Nümüin Maleiwa, ojuʼitaka nowienpüroʼu 2009, süpana 4 suluʼu alijunaiki).

◼ Atunkülee. Eere süpüla waapüin atunkülee waashajaa nümaa chi seküretaariokai eere woutkajaain otta wepiraja tü karaloukta sümaajatkat. Puʼunüinjachire sünain wanee outkajawaa eeka wattain suulia pipia otta choʼujaale eeinjachire pütunküin, paashajaa nümaa chi seküretaariokai, pipiraja tü karaloukta süpülajatkat tia otta paapa shia nümüin chi wawalakai süpüla nuluwataain shia eeinjatüle saainjünüin tü outkajawaakat. Nnojo paaʼinrüin tia sülüʼütpa maʼin tü outkajawaakat süka sumojujeʼereerüin sukuwaʼipa naʼyataain na wawalayuu achajaakana tü atunküleekat (1 Cor. 14:40). Na wawalayuukana otta na nachonnii aapünakana amüin atunkülee, kojutüinjatü namüin nepia na wawalayuukana nnojoluinjatü namojujeʼerüin tü korolo namaʼanakat otta nnojoluinjana ekerotuin eere natunküin na kepiakana. Tü atunküleekat süpülajatü neʼe tü kaʼi eeinjatkat oʼu tü outkajawaakat. Nnojotsü anain makatüle waya kojuya kaʼi süchikijee tü outkajawaakat süpüla eʼraajaa tü kasa anakat maʼin eere saainjünüin tü outkajawaakat jee süpüla aaʼinraa waneeirua kasa.

◼ Eeka nakaaliinjeein. Talateerü paaʼin sünain tü outkajawaakat pükaaliinjüle sünain tü aʼyatawaa aainjünakat süpüla anain sukuwaʼipa (Aluw. 20:35). Na keeʼireekana aaʼin aʼyatawaa arütkaainjana eemüin na shikiipüʼükana. Eeshi süpüla niʼyataain chi 16 ouyase, akatsaʼa naainjüinjatü tia sümaa naaʼinmajünüin nutuma chi nüshikai, tü niikat jee niale wanee wayuu laülaakai naaʼu natuma na kachonniikana nia.

[Epiikürape suluʼu süpanaka 5]

Shiitajia tü ounejaayakat.

Süpüla waapirüin napüshuaʼa na wayuukana, motsoʼoinjatü wamaʼa. Eeshii süpüla wamüin: «¿Jamayaa pia? Sainküinpünaa mmaka süpüshuaʼa eitajünüsü namüin na wayuukana wanee ounejaaya. Anuuka tü pümüinkat». Puusüteerü anain sooʼomüin tia suluʼu türa karalouktakat». Sünain tü palajatkat süpana eesü pütchi anasü maʼin makalaka paapüinjatüin shia namüin na wayuukana süka tia süpüla neʼrüin shia. Talata paaʼin sünain tü eitajaakat. Piitajüle shia saawanoʼuluwai otta rimiinkoʼuluwai eesü süpüla paapüin tü rewiisütakat sümaʼaleʼeya müleka anale shia.