Anasü maʼin tü Nünüikikat Maleiwa süpüla wekirajüin wayuu sünain

1. ¿Kasaichi sünülia tü outkajawaa miyoʼu piamakat kaʼi eeinjatka soʼujee settienpüroʼu 2013? Püküja tü pütchi asouktüneetkalü eʼipajee.

¹ Nnojoishi eein wanee wayuu atüjakai maʼin ekirajaa maʼaka naaʼin Jeʼwaa (Is. 30:20, 21). Nikirajüin waya süka tü Nünüikikat, tü Wiwüliakat, nnojotsü eein wanee karaloukta eekai müin aka saaʼin. ¿Jamakuwaʼipalü anainjatüin wakuwaʼipa otta wanoula sutuma tü shikirajakalü anain tü Wiwüliakat? Asouktüneerü eʼipajee tia pütchikat sünain tü outkajawaa miyoʼu piamakat kaʼi eeinjatka soʼujee settienpüroʼu 2013. Müsü tü sünüliakat: «Anasü maʼin tü Nünüikikat Maleiwa süpüla wekirajüin wayuu sünain» (2 Tim. 3:16).

2. Püküja tü pütchi akaaliinjeenakat waya süpüla watüjaain saaʼu tü ekirajaanajatkalü anain.

² Tü ekirajaanajatkalü anain. Sükaaliinjeena waya pütchikalüirua tüü süpüla watüjaain saaʼu tü ekirajaanajatkalü anain:

• ¿Jamüsü wakuwaʼipa sutuma nikirajüin waya Maleiwa? (Is. 48:17, 18.)

• ¿Kasa weʼreetka wachajaale sukuwaʼipa süpüla waʼyataain nümüin Maleiwa waneepia? (Mal. 3:10.)

• ¿Kasa waainjüinjatka suulia jüüjüüin waya sümüin «pütchi neʼe naatajatü»? (Heb. 13:⁠9.)

• ¿Kasa waaʼinrajatka süpüla washatüin nukuwaʼipa Jesuu sünain ekirajaa? (Mat. 7:28, 29.)

• ¿Jamüsü waaʼinrajatka tü wekirajakalü anain? (Roma 2:21.)

• ¿Kasa anaka apüla tü Nünüikikat Maleiwa? (2 Tim. 3:16.)

• ¿Kasa eeka sünainjee nükatalüin Maleiwa na wayuukana? (Ageo 2:6, 7.)

• ¿Kasa eeka süpüla waainjüin naashin Jeʼwaa? (Éf. 5:⁠1.)

• ¿Jamüshii nnojoliinjanaka wekeʼejaain aaʼin suulia tü nikirajakalü anain waya Jeʼwaa? (Luc. 13:24.)

3. ¿Jamüshii nnojoliinjanaka makatüin waya suulia tü outkajawaakat?

³ Suluʼu 2 Timoteo 3:1-5, aashajaasü süchiki jamüinjatüin sukuwaʼipa wayuu sajaʼttiamüin tü kasakalüirua. Müshi Pablo süchiki tia wayuukalüirua: «Na wayuu eʼrüliikana wayumüin ooʼulaka na eʼikeʼerüliikana wayuu, nnojotsü nountüin ekirajaa sünain tü shiimüinkat [...]. Kooʼomüinsü maʼi waneepia namüin tü ekirajaakat sünain alawaa» (2 Tim. 3:13). Suulia weʼikeʼennüin aaʼin, anashii müleka woonoole sümaa tü nikirajakalü anain waya Maleiwa. Nnojo makatüin waya suulia tü outkajawaakat.