¡Aküjaa pütchi anaka maʼin! soʼujee ouktupüroʼu 20 sünainmüin nowienpüroʼu 16
1 Soʼujee luuneoʼu tü kashikat ouktupüroʼu 20 sünainmüinreʼeya pienchi semaana, aküjeena waya pütchi sainküin tü mmakat süpüshuaʼa süka tü karalouktakat ¿Pücheküin pütüjaain saaʼu tü shiimainkat? Sükajee karalouktakat tüü, keeʼireesü waaʼin shikirajaain sooʼomüin wayuu sünain tü shiimain shikirajakat tü Wiwüliakat (Juan 17:17).
2 Karalouktakat tüü, süsoukteerü aipiruasü asakiraa: ¿Naaʼinmajüin waya Maleiwa? ¿Nnojoleetche atkawaa otta müliaa mapeena? ¿Kasa alataka wamüin ouktapa waya? ¿Kateerü noʼu nachikuaʼa na ouktushiikana? ¿Kasa waainjüinjatka süpüla naapüin Maleiwa wanüiki? otta ¿Kasa waainjüinjatka süpüla talatüin waaʼin? Nnojotsü anain süsouktia asakiraakalüirua tüü sutuma tü iküleesia nnojotkat shiimain. Jaʼitaina na manoujuinsaliikana nasakira anainrü tia sümaa nnojoluin natüjaain aaʼu suluʼuin tü Wiwüliakat süsouktia asakiraakalüirua tia. Tüü shiiʼiyatüin wamüin, sücheküneerüin maʼin natuma na wayuukana tü pütchi suluʼukat karalouktakat tüü.
3 Piitaja sümüin wayuu süpüshuaʼa. Aküjüinjana maʼin waya pütchi namüin napüshuaʼa na wayuukana nepialuʼu. Wainmale maʼin na wayuu waküjüinjanakana amüin pütchi, na laülaashiikana suluʼu tü outkajaaleekat eesü süpüla nachuntuin namüin na aküjüliikana pütchi napütüin wanee karaloukta suluʼu tü piichi yüütüükat napüla. Paapa wanee karaloukta namüin na kepiakana püʼütpaʼa, na püpüshikana, na koleejiakana pümaa, na piʼyataajiraakana amaa jee na piʼraajakana. ¿Jamüsü saaʼin pümüin piʼyataale nümüin Jeowa 50 oora sünain aküjaa pütchi soʼu tü kashikat ouktupüroʼu jee nowienpüroʼu? Eere wanee püchon jee wanee pikirajüin aainjakai tü sümakat tü Wiwüliakat, paashajaa namaa na laülaashiikana suluʼu tü outkajaaleekat süpüla nujuʼitüin sünain aküjaa pütchi.
4 Jamüinjatü wanüiki. Süpüla waküjüin pütchi sümüin wainma wayuu nnojoishii kamaʼainjanain waya sünain aashajawaa. Wasakirüinjana naya sünain süpüshi tü aipiruasü asakiraa sünainkat süpana 1 otta wasoukta süka tü pütchi suluʼukat. Sutuma tia eesü süpüla wanoʼuteʼerüin sukuwaʼipa wanüiki pansaa sümaa nakuwaʼipa na wayuukana. Nikirajaweere wanee wayuu, püshaja nünülia, eere kepiain nia süpüla puuyantüin püchikuaʼa sünain ekirajaa. Saawanoʼu otta rimiinkoʼu eesü süpüla püküjüin pütchi süka tü rewiisütakat sümaa tü karaloukta weitajüinjatkat. Ooʼulaweena waya nowienpüroʼu 16 suulia eitajaa karalouktakat tüü, süchikijee aküjeena waya pütchi süka tü karalouktakat Kasa shikirajaka. Tü apütaakat eitajüneerü maʼaka saaʼin tü wanee karalouktachenkat.
5 Woʼttaa sünain ekirajaa wayuu süchiki tü Wiwüliakat. Karalouktakat tüü, sükaaliinjeena waya süpüla woʼttuin sünain ekirajaa wayuu süchiki tü Wiwüliakat. ¿Jamüinjatü sukuwaʼipa watuma? Wouyantüle eemüin wanee wayuu eeka shikirajaweein, eesü süpüla wasakirüin: ¿Jarat tü pütchi suluʼujeejatkat tü Wiwüliakat atütüleʼeraka paaʼin? Süchikijee eesü süpüla piiʼiyatüin süpana 4 eere süküjünüin sukuwaʼipa nekirajia na wayuukana sünain tü Wiwüliakat otta püpüta tü karalouktakat Kasa shikirajaka. Eesü süpüla paashajeʼerüin wanee jee piama pütchi suluʼujee tü ekirajaaya aashajaakat süchiki tü pütchi süneekakat.
6 Nuluwataain waya Jeowa sünain achajawaa na aʼwaajeekana nia süka tü «shiimainkat otta sümaa meʼrujuin nia» (Juan 4:23, NM). Süka keeʼireein waaʼin neʼraajeein na wayuukana tü shiimainkat ¡Waküja pütchi wapüshuaʼa süka karalouktakat tüü süpüla wakaaliinjüin naya!