¡Woʼtta sünain ekirajaa sünain tü Wiwüliakat ouktupüroʼu!
1. ¿Kasa waküjüinjatka aka pütchi ouktupüroʼu?
1 Aküjeena waya pütchi ouktupüroʼu süka La Atalaya otta ¡Despertad! Naapajüle wanüiki na wayuukana, eeshii süpüla wouyantüin wachikuaʼa sümaa tü karalouktakat ¿Pücheküin pütüjaain saaʼu tü shiimainkat? süpüla woʼttüin sünain ekirajaa naya. Wekirajaa sünain jamüinjatüin sukuwaʼipa.
2. Wouyantapa wachikuaʼa nümaʼanamüin chi achekakai tü rewiisütakalüirua, ¿jamüsü süpüla woʼttüin sünain wekirajüin nia sükajee tü karalouktakat ¿Pücheküin pütüjaain saaʼu tü shiimainkat??
2 Wekirajia süka tia karalouktakat. Eesü süpüla pümüin: «Tü rewiisüta taapakalüinkat pümüin sükaaliinjüin na wayuukana sünain ekirajawaa sünain tü Wiwüliakat. [Paapa nümüin tü karalouktakat ¿Pücheküin pütüjaain saaʼu tü shiimainkat? otta piiʼiyata tü asakiraairua sünainkat süpana waneesia.] Asouktüsü tü Wiwüliakat shiʼipajee tü asakinnakat anain yaa. ¿Jarat pütüjaweeka aaʼu?». Jülüja paaʼin jamüin nünüiki. Süchikijee, paashajeʼera nümaa tü süküjakat tü karalouktakat süchiki tia otta püchajaa wanee pütchi eeʼiyatünaka suluʼujee tü Wiwüliakat. Püküja nümüin wainmain kasa shikirajaka anain tü Wiwüliakat. Süchikijee, paapa nümüin tü karalouktakat Kasa shikirajaka. Eesü süpüla paainjüin piamasü kasa: Eesü süpüla püchuntüin namüin na wayuukana naneekai wanee pütchi shikirajaka anain tü karalouktakat otta pikiraja naya sünain tü palajatkalüirua pütchi. Tü wanee shia püchajaain suluʼu tü karalouktakat sooʼomüin tü pütchi paashajaakat achiki paala. Sükaaliinjeechi pia tü pütchi yaakat wünaapünaa süpüla paainjüin tia:
● ¿Naaʼinmajüin waya Maleiwa?
● ¿Nnojoleetche atkawaa otta müliaa mapeena?
● ¿Kasa alataka wamüin ouktapa waya?
● ¿Kateerü noʼu nachikuaʼa na ouktüshiikana?
● ¿Kasa waainjüinjatka süpüla naapüin Maleiwa wanüiki?
● ¿Kasa waainjüinjatka süpüla talatüin waaʼin?
3. ¿Kasa eeka süpüla waainjüin wanaapünaa sümaa nakuwaʼipa na wayuukana?
3 Nnojorüle süpüla puʼttüin sünain ekirajaa sünain tü Wiwüliakat sükajee tü karalouktakat Kasa shikirajaka wanaa sümaa puuyantüin püchikuaʼa, eesü süpüla paashajaain nümaa soʼu wanee kaʼi naata püneekaka nümaa. Piʼrüle nücheküin chi wayuukai tü pütchikat eesü süpüla pikirajaain nümaa soʼu kojuyatua pukua sünain tü waneeirua asakiraa suluʼukat tü karalouktakat ¿Pücheküin pütüjaain saaʼu tü shiimainkat? süpülapünaa paapüin nümüin tü karalouktakat Kasa shikirajaka. Wekiraja maʼin wayuu sünain tü Wiwüliakat ouktupüroʼu süka tü karalouktakat ¿Pücheküin pütüjaain saaʼu tü shiimainkat? otta wakaaliinja na atüjaweekana saaʼu tü shiimainkat (Juan 8:31, 32).