Waküja tü pütchi anasükat sükajee tü karalouktachenkat
1. ¿Jamüsü sukuwaʼipa tü karalouktachenkat sutuma nupueulose Maleiwa?
1 Kakaliairü aküjüin süchiki pütchi anasü tü nupueulosekat Maleiwa süka tü karalouktachenkat. Soʼujee 1880 oʼttüshi sünain akumajaa karalouktachen chi wawalakai C. T. Russell namaa na niʼyataajiraakana amaa süpüla naküjüin pütchi süka na aashajeʼerüliikana rewiisütakat Watch Tower. Kojutsü maʼin nümüin wawalakai Russell tü karalouktachenkat müsüjeseʼe niʼitaain tü pütchikat tract («karalouktachen») sünain tü kanüliakat Zionʼs Watch Tower Tract Society (eʼraajünakat maaʼulu süka Watch Tower Bible and Tract Society of Pennsylvania), nüshajirüin tia soʼu 1884 suluʼu laülaapiee süpüla süküjünüin süchiki Nuluwataaya Maleiwa masaloui. Süntapa tü juyakat 1918 alatsü suulia 300 miyoone karalouktachein neitajaka na Ekirajaaliikana sünain tü Wiwüliakat. Ayatsia anain maaʼulu aküjaa pütchi süka tia karalouktachenkat.
2. ¿Jamüsü anaka maʼin tü karalouktachenkat?
2 ¿Jamüsü anaka maʼin? Anajüsü maʼin sünoʼu tü karalouktachenkat. Kamalainsü namüin na wayuukana tü pütchi suluʼukat jee mapüleesat shia. Shia kamalainka namüin na wayuukana tü karalouktachenkat suulia wanee rewiisüta jee karaloukta. Eesü joo süpüla naküjüin pütchi süka na tepichicheinkana jee na eiwaliikana aküjüin pütchi. Anasü alüʼüjaataa eepünaale waya süka joʼuuchoin shia.
3. Püküja süchiki wanee kasa alatüitka pümüin jee shiale nümüin wanee wawala eeʼiyataka anain maʼin tü karalouktachenkat.
3 Wainma na wayuu suluʼukana nupueulose Maleiwa maaʼulu sutuma wanee karalouktachon. Jamüsüjaʼa wanee jierü chejeʼewat Haití, saapaain wanee karalouktachon palasütaka kaayeruʼu süpüla, süchikijee saashajeʼerüin sümaka: «¡Shiaʼaya shiimainkat tüü!». Mapa, suʼunakalaka sünainmüin tü outkajawaakat, shikirajaaka sünain tü Wiwüliakat jee suwoutisaajaka. ¡Alatsü tia sutuma süshajünüin nünüiki Maleiwa suluʼu wanee karalouktachon!
4. Waküjüinjanapa pütchi süka tü karalouktachenkat ¿kasainjatü maʼin keeʼireeka waaʼin?
4 Waküjapa pütchi süka sainküin piichi. Sutuma anain maʼin aküjaa pütchi süka tü karalouktachenkat, soʼujee nowienpüroʼu, eʼitaanawaijeerü shia süpüla waküjüin pütchi süka kashiwai. Tü keeʼireekat waaʼin shia waashajaainjanain namaa na wayuukana, nnojotsü shiain neʼe süpüla wapütüinjatüin tü karalouktachenkat sainküin piichi. Müleka kamalainre namüin na wayuukana tü waküjakalü achiki jee shiale soʼu wouyantüin wachikuaʼa, wekiraja naya jaralüin sukuwaʼipainjatka shikirajaaya tü karalouktakat Kasa shikirajaka jee waneeirua karaloukta. Waküjapa pütchi süka tü karalouktachenkat, ¿jamüinjatü sukuwaʼipa watuma? Ekirajaainjana waya palajana sünain süka kojuyain shiairua.
5. ¿Jamüinjatü sukuwaʼipa watuma tü karalouktachenkat waküjapa pütchi süka sainküin piichi?
5 Shieerü waashajaaka achiki tü karaloukta waneekakat jee tü kettaakat süpüla wayuu eepünaale waküjüin pütchi. Shia anaka aluʼu waapüle palajana tü karalouktakat namüin. Eesüjaʼa süpüla kamalainjeerüin namüin tü sünainkat tü sütakat. Tü wanee eekat süpüla waainjüin shia weeʼiyatüle kojuyasü namüin süpüla naneeküin waneeshia saʼakajee. Waküjüle pütchi eere nnojoluin sujutalüin soʼu shipia tü wayuukalüirua, eesü süpüla weeʼiyatüin tü karalouktakat namüin jee wasakirüle naya anale namüin wekerotirüle shia suupünaapüna soʼu tü miichikat süpüla naküjüin wamüin jamüin nanüiki süchi tü karalouktakat. Müleka shiale wanee asakiraa sünülia tü karalouktachonkot, eesü süpüla wasakirüin naya jamüin nanüiki süchiki tia jee wasakirüle naya sünain wanee kasa anaka süpüla waashajaain namaa. Shiasejeʼe süchikijee eesü süpüla waashajeʼerüin namüin süpüshi tü suluʼuka karalouktachenkat süpüla nasouktüin shiʼipajee tü pütchi asakinnakat suluʼu. Anasü müleka saashajeʼennüle suluʼujee tü Wiwüliakat tü pütchi saashajaakat maʼin achiki tü karalouktachonkot. Keraapa waya suulia yootoo namaa, wakumaja sukuwaʼipa süpüla waleʼejüinjanain wanee sukueena. Müleka napütawaire na wawalayuukana karaloukta sainküinpünaa piichi, eesü süpüla wapütüin wanee karaloukta sümaa nnojoluin jaʼyashiin shia namüin na wayuu alatakana.
6. ¿Jamüinjatü sukuwaʼipa watuma waküjapa pütchi süka tü karalouktachenkat kaayeruʼupunaa?
6 Waküja pütchi süka kaayeruʼupunaa. ¿Aküjüichi pia pütchi kaayeruʼupunaa süka tü karalouktachenkat? Eeshii wayuu nnojoliika aashajaweein wamaa sutuma nashapajaain maʼin, nnojotsüjeseʼe wayaawatüin saaʼu müleka kamalainjeerüle namüin tü pütchikat. Waapa namüin wanee karalouktachon süka nnojoluin watüjaain saaʼu naashajeʼereerüle tü rewiisüta ojuʼitakat jekenainka. Sutuma kamalain amüinyüü tü sünainkat tü sütakat jee paliʼirüin tü pütchi suluʼukat, eesü süpüla naashajeʼereerüin shia nnojoliipa kupaain naya. Naashajaweere wamaa, eesüjaʼa süpüla waküjüin namüin tü suluʼukat tü karalouktachonkot.
7. Paashajaa nachiki wanee wayuuinnua aküjakana pütchi süka tü karalouktachenkat eepünaale waraittüin naya.
7 Waküjapa pütchi eepünaale waya. Mapüleesat aküjaa pütchi süka tü karalouktachenkat eepünaweere waya. Eeshi wanee wawala eʼitaakai kojuyasü suluʼu nuwotsiiase süpülapünaa nujuʼitüin nipialuʼujee. Shiasejeʼe naashajaapa nümaa wanee wayuu maʼaka naaʼin wanee aʼyataai suluʼu tienta, naapüin tü karalouktachonkot nümüin. Eeshii wanee wayuu alüʼüjakana tü poyeeto Naciones münakat jee waneeirua karalouktachein suluʼu naata anüikii soʼu napasiajaain Nueva York, süka nütüjaatüjülüin saaʼu eejeerüin wayuu antaka suluʼujee naatajatü mma. Naapapa nanüiki na wayuu naatakana anüiki, naapamaatüin namüin wanee karalouktachon nanüikiruʼuka, jaʼitainna nayain na wayuu oikkaaliikana kaayeruʼupunaa, eemeraakana patkeruʼu jee nayale na ekaakana eere wanee oikkaalee eküülü.
8. ¿Jamüsü maʼaka aka saaʼin waüyee tü karalouktachenkat?
8 «Püpünaja tü puwaüyainkat.» Tü karalouktachenkat müsü aka saaʼin tü waüyeekat. Apünajüshii na apünajüliikana eepünaale neʼe süka nnojoluin natüjaain saaʼu jaleerüin süsotüin tü napünajüinkat. Müsüjeseʼe sümüin Eclesiastés 11:6: «Püpünaja tü püwaüyainkat wattaʼa maalü, waneʼereeya peemeraain suulia aliika süka nnojoluin pütüjaain saaʼu jaleerüin süsotüin, yaale shia, chale shia jee süsoteerüle piamaleʼeya». Ayata weitajüin tü karalouktachenkat süpüla sütüjaanüin saaʼu tü suluʼukat (Prov. 15:7).
[Epiikürape suluʼu süpanaka 3]
Sutuma anain maʼin aküjaa pütchi süka tü karalouktachenkat, soʼujee nowienpüroʼu, eʼitaanawaijeerü shia süpüla waküjüin pütchi süka kashiwai.