Sukuwaʼipa tü karalouktachein jekennuukat
1. ¿Jarat tü karaloukta eeʼiratünakat sukuwaʼipa süpüla süküjünüin pütchi süka?
1 Sünain tü outkajawaa miyoʼu apünüinkat kaʼi eejatka 2013 natuma na aküjüliikana pütchi nüchiki Jeʼwaa, ojuʼitüsü jaʼraisü karalouktachein jekennuu. Jee müsia wanee eitajünaka maʼin shia tü karalouktakat Pütchi süchiki Nuluwataaya Maleiwa Nuum. 38 kanüliaka ¿Kateetche noʼu nachikuaʼa na wayuu ouktakana? Anasü maʼin sukuwaʼipa tü aipiruasükat karalouktachein. ¿Jamüsü shiiʼiratünaka sukuwaʼipa tü karalouktachenkat? ¿Kasa waainjüinjatka süpüla anainjatüin shiitajia watuma sainküin miichi?
2. ¿Kasa sükaaliinjeenaka anain waya tü karalouktachein jekennuukat?
2 ¿Jamüsü shiiʼiratünaka sukuwaʼipa? Anuu tü pienchisükat kasa waainjüinjatka süpüla anainjatüin wanüiki sünain aküjaa pütchi: 1) wasakirüinjatü wayuu sünain wanee kasa süpüla susouktüinjatüin shiʼipajee, 2) waashajeʼerüinjatü tü sümakat tü Wiwüliakat, 3) wapütüinjatü süpüla wanee karaloukta süpüla saashajeʼerüin otta 4) wasakirüinjatü sünain wanee kasa süpüla wasouktüin shiʼipajee waleʼejapa wachikuaʼa shipialuʼu jee wachajaainjatü sukuwaʼipa süpüla waleʼejüin wachikuaʼa. Makalaka sükaaliinjeenain waya tü karalouktachein jekennuukat süpüla waainjüin tü pienchisükat kasa.
3. ¿Kasa waaʼinrajatka süpüla waküjüin pütchi süka tü karalouktachein jekennuukat?
3 Tü sukuwaʼipainjatkat watuma. Wasakapa na wayuukana, eesü süpüla 1) weeʼiyatüin namüin tü asakinnakalü anain suluʼu süpana waneesia jee wasakira naya jamüin nanüiki süchiki tia, 2) wojutalüinjatü shia süpüla wekirajüin naya sünain tü pütchikat «tü sümakat tü Wiwüliakat». Süchikijee, waashajeʼerüinjatü tia wersiikulokot suluʼujee tü Wiwüliakat müleka anashiire shia namüin. Nnojoliire kupaain maʼin naya, wekiraja naya sünain tü pütchikat «¿Jamüsü aneetka wakuwaʼipa watüjaale saaʼu tia?», 3) wapüinjatü napüla tü karalouktacheinkat jee waküja namüin eein süpüla naashajeʼerüin tia pütchi apütaakat jimatapa naya, 4) süpülapünaa woʼunüin, weeʼiyatüinjatü namüin tü pütchi asakinnakalü anain sünain tü pütchikat «püsakireʼera paaʼin». Jee müsia wachajaainjatü sukuwaʼipa süpüla waleʼejüin wachikuaʼa nepialuʼumüin jee wasouktüin shiʼipajee tia pütchikat sükajee tü Wiwüliakat.
4. ¿Kasa waainjüinjatka süpüla wekirajüin wayuu sünain tü karalouktacheinkat wouyantapa wachikuaʼa shipialuʼumüin?
4 Mapüleesat ekirajaa wayuu wouyantapa wachikuaʼa shipialuʼumüin süka tü karalouktacheinkat. Waashajeʼerüinjatü tü wersiikuloko süsapoʼujeekat süpüla wasouktüin shiʼipajee tü pütchi wasakirakalü anain naya soʼu tü palajatkat wakua. Jee müsia weeʼiyatüinjatü namüin tü ayaakuaa suluʼujeejatkat tü poyeetokot Pütchi anasü. Süchikijee, eesü süpüla weeʼiyatüin namüin tü poyeetokot jee wachajaain namüin tü pütchi sünainpünaakat tü wekirajaakalü anain. Waküjüinjatü namüin wapüteein napüla tü poyeetokot. Naapaale tü poyeetokot, wachajaa sukuwaʼipa süpüla wekirajüin naya sünain tü karalouktakat. Mayaa, oʼtteena waya sünain ekirajaa wayuu sünain tü Wiwüliakat. Eesü süpüla waapüin namüin wanee karalouktachein süpüla wekirajüin naya sünain waleʼejapa wachikuaʼa.
5. ¿Jamüsü anaka maʼin aküjaa pütchi süka tü karalouktacheinkat?
5 Alatüirü suulia 130 juya sünain waküjüin pütchi süka tü karalouktacheinkat. Mayaainjeʼe shiiʼiratünüin maʼin sukuwaʼipa shiʼipaʼaya, ayatüsia anain maʼin aküjaa pütchi süka. Wachajaa maʼin sukuwaʼipa süpüla wekirajüin wayuu sünain tü Wiwüliakat süka tü karalouktachein jekennuukat (Prov. 15:71).