Yapa waya süpüla tü Outkajawaakat süpüla Aʼyatawaa nümüin Maleiwa
1. ¿Kasapülajatü tü Outkajawaakat süpüla Aʼyatawaa nümüin Maleiwa? ¿Kasa waaʼinrajatka süpüla wayuʼlüin kasa anasü sünainjee?
1 Tü Outkajawaakat süpüla Aʼyatawaa nümüin Maleiwa süpülajatü wanoujirüin na wayuu wekirajakana. Aashajaasü süchiki aküjaa pütchi süchiki Nuluwataaya Maleiwa, ekirajaa wayuu sünain tü Wiwüliakat otta aküjaa süchiki sülüʼülüin tü kaʼi süsalainjatkat oʼu saainjala wayuu nutuma Maleiwa (Mat. 28:20; Mat. 24:14; 2 Ped. 3:7). Süpüla wayuʼlüin kasa anasü sünainjee outkajawaakat tia, ekirajaainjana waya süpülapünaa otta keeʼireeinjatü waaʼin wayalerüin wajapü.
2. ¿Kasa waaʼinrajatka süpüla yapain waya süpüla aapajaa wanee pütchi?
2 Pütchi. Shikirajünüinjatüle wanee pütchi aküjünawaisü sünain tü pütchi nümüinjatkat chi ekirajüinjachikai kasain kaluʼujeein shia. Makalaka eein süpüla wekirajaain sünain pütchikat tia, tü pütchi suluʼujeejatkat tü Wiwüliakat otta jülüjüin waaʼin jamüinjatüin shikirajia watuma sünain aküjaa pütchi.
3. ¿Kasa waaʼinrajatka süpüla yapainjanain waya süpüla asouktaa shiʼipajee tü asakinnakat anain?
3 Asouktaa shiʼipajee tü asakinnakat anain. Sünain ekirajawaakat tüü, aküjünüsü motsoʼo wanee pütchi suʼttiajee otta sajaʼttiamüin, süchikijee ekirajaana anainrü maʼaka sukuwaʼipa La Atalaya. Süpüla tüü, eesü süpüla wejeettüin tü shikirajakat maʼin anain wanee pütchi otta yapain waya süpüla anainjatüin maʼin wasouktia sümaa nnojoluin wainmain wanüiki.
4. ¿Kasa waaʼinrajatka süpüla yapain waya süpüla ekirajawaa namaa na wawalayuukana?
4 Ekirajawaa namaa na wawalayuukana. Mayaapejeʼe müin aka saaʼin shikirajaaya wanee pütchi, chi ekirajüikai asakireechi nia süpüla nasouktüin na jutkatüshiikana. Pejeettüle tü shikirajakat maʼin anain wanee pütchi otta paashajeʼerüle tü pütchi suluʼujeejatkat tü Wiwüliakat eesü süpüla püsouktüin shiʼipajee tü nüsakitkat anain chi wawalakai. Chi ekirajüinjachikai asakireechi maʼin süpüla naküjüin na jutkatüshiikana tü shikirajakat maʼin anain wanee pütchi.
5. ¿Kaseerü akaaliinjaka waya süpüla wayuʼlüin kasa anasü sünainjee tü ayaawasee eeʼiyatünakat?
5 Ayaawasee eeʼiyatünajatka. Süpüshi tü ekirajaanakat anain kayaawasesü shia atumawaa süpüla saainjünüinjatüin sünain tü aküjaakat pütchi. Na aainjakana tia, naya na laülaashiikana, na aküjülii pütchi atüjakana maʼin jee na pürekutsootkana. Tü waaʼinrajatkat süpüla yapain waya shia wasakireʼerüin waaʼin jameerüin sukuwaʼipa atumawaa. Shiiʼiyatünapa jamüinjatüin sukuwaʼipa, püküja shia sükajee pünüiki otta pünoukteʼera shia wanaajiraa sümaa nakuwaʼipa na wayuu püküjakana amüin pütchi. Nnojo motuin paaʼin tü karaloukta eeʼiyatünajatkat ayaawase. Pikirajaapa aipaʼa sümaa püpüshi eesü süpüla puuʼulaküin jamüinjatüin sukuwaʼipa süküjia süpüshi tü ayaawasee eeʼiyatünakat.
6. Püküja jamüshii yapainjanaka waya süpülapünaa tü Outkajawaakat süpüla Aʼyatawaa nümüin Maleiwa.
6 Tü Outkajawaakat süpüla Aʼyatawaa nümüin Maleiwa aneerü maʼin wamüin yapale waya süpüla otta jülüjüle waaʼin tü pütchi ekirajünajatkat. Otta müsia wachecherüin wanoula namaa na wawalayuukana sutuma (Rom. 1:11, 12). Wayuʼlale kaʼi süpüla yapain waya, wounteerü yapain waya süpüla aküjaa pütchi sutuma outkajawaakat tia (2 Tim. 3:17).