Kojutü shia watuma
Outkajaweena waya awüriiroʼu 17
1. ¿Jarat tü pütchi nüküjakat chi eeʼiraikai sünainpünaaka maʼin sükalia Sotuin Waaʼin ouktüin Jesuu?
1 Sutuma nümüliajünüin otta taashin chi eeʼiraikai nutuma Jeowa, müshi nia: «¿Kaseetkajasaʼa tawalaajüin aka nümüin Jeowa süpüshuaʼa tü kasa naapakat tamüin?» (Sal. 116:12, NM). Kojuya juya süchikijee süküjünüin pütchikat tia, eesü tü kasa waapüinjatkat maʼin atuma analuʼut nümüin Jeowa, shia süka naakajirüin waya. Müsüjeseʼe keeʼireein waaʼin weeʼiyatüin kojutüin wamüin tia wanaa sümaa yapain waya süpüla Sotuin Waaʼin ouktüin Kürisüto awüriiroʼu 17 (Col. 3:15).
2. ¿Kasa kojutüinjatka anainjee wamüin waakajinnüin?
2 Tü eekat sutuma. Sükajee ouktüin Jesuu ‹alatinnüsü waainjala woulia› (Col. 1:13, 14). Sükajee sülatinnüin waainjala woulia eeshii süpüla waʼyataain nümüin Jeowa sümaa wulein waaʼin (Heb. 9:13, 14). Jee eeshii süpüla woʼuraajüin nümüin Jeowa sümaa nnojoliin mmoluin waya (Heb. 4:14-16). Otta süka weʼitaain waaʼin sünain naakajirüin waya Jesuu, eesü süpüla katüin woʼu waneepia (Juan 3:16, NM).
3. ¿Kasa weeʼiyataka aka nümüin Jeowa kojutüin wamüin naakajirüin waya?
3 Kojutü shia watuma. Wanee sukuwaʼipa süpüla weeʼiyatüin kojutüin wamüin waakajinnüin shia waashajeʼerüle weinshi suluʼujee Wiwüliakat tü pütchi aashajaakat süchiki tü alatakat nümüin Jesuu süpülapünaa ouktüin nia otta wasakirüle waaʼin sünain. Tü pütchikat «¿Está usted listo para el día más importante del año?», suluʼuka La Atalaya ojuʼitaka pewüreeroʼu 1 soʼu 2011, ashajuushi süpüla wainküin tia. Otta wanee shia waküjüle nümüin Jeowa kojutüin maʼin wamüin naakajirüin waya (1 Tes. 5:17, 18). Otta waneʼeya shia waaʼinrüle tü nuluwataakat anain waya Jesuu, woutkajaain süpüla Sotuin Waaʼin ouktüin nia (1 Cor. 11:24, 25). Otta müsia washatüle nukuwaʼipa Jeowa sünain aipüralin maʼin nia jee wachajaale sukuwaʼipa süpüla wounejaain wainma wayuu süpüla noutkajaain wamaa soʼu kaʼikat tia (Isa. 55:1-3).
4. ¿Kasa waainjüinjatka?
4 Chi aʼyataaikai nümüin Jeowa kojutükai amüin kasa, nnojotsü niʼrüinjatüin tü outkajawaakat eere Sotuin Waaʼin ouktüin Jesuu maʼaka saaʼin tü waneeirua outkajawaakat. ¡Shia wanee outkajawaa kojutüsü aainjünaka juyawai! Mayaasü sülüʼülüin tü sükaliakat shia keeʼireeka waaʼin waaʼinrüin tü nümakat chi eeʼiraikai: «Taʼwaajüin Jeowa süka süpüshuaʼa taaʼin otta nnojotsü motuin taaʼin tü naainjakat» (Sal. 103:2, NM).