Kojuta wamüin naakajirüin waya Maleiwa
1. ¿Jamüshii waapaka analuʼut nümüin Jeowa?
1 Saʼakajee tü kasa anasü nüsülajakat Jeowa wamüin, shia kojutüleeka maʼin naapüin nikii chi nüchon aishikai nüpüla süpüla naakajirüin waya (Sant. 1:17). Wainma kasa anasü eeka sünainjee tia, maʼaka saaʼin sülatinnüin waainjala woulia (Éfe. 1:7). ¡Talatüsü waaʼin sutuma tia! Müsüjeseʼe suʼunnaa sükalia tü outkajawaakat eere Sotuin Waaʼin ouktüin Jesuu, ayuʼtshii waya kaʼi süpüla wasakireʼerüin waaʼin sünain tia kasa nüsülajakat Jeowa.
2. ¿Kasa waaʼinrajatka süpüla kooʼomüin watuma otta sutuma wapüshi sujutü naakajirüin waya Jeowa?
2 Kooʼomüin sujutü wamüin. Aainjüneerü maatsoʼu 30 soʼu juyakat tüü, tü outkajawaakat eere Sotuin Waaʼin ouktüin Jesuu. Süpüla kooʼomüin wamüin sujutü naakajirüin waya Jeowa, eesü süpüla wekirajaain sünain waneeirua pütchi aashajaakat süchiki tia soʼu tü Ai Waʼwaajakat oʼu Maleiwa sümaa Wapüshi. Eesü süpüla waashajeʼerüin suluʼujee tü Wiwüliakat tü pütchi aashajaakat süchiki tü alatakat nümüin Jesuu süpülapünaa ouktüin nia. Püsakireʼera paaʼin sünain jamüin anaka pukuwaʼipa sutuma naakajirüin pia Jeowa, jamüin pünüiki nüchiki Jeowa, püchiki piakai, nachiki na waneeinnua otta süchiki tü alateetkat mapeena sutuma tia. Pikirajaa sünain tü jayeechi eeʼirajünajatkat sünain outkajawaakat tia, shia tü jayeechikat 8 otta 109 (Sal. 77:12).
3. ¿Kasa weeʼiyataka aka kojutüin wamüin waakajinnüin?
3 Weeʼiyata sujutü wamüin. Süka Kojutüin wamüin naakajirüin waya Jeowa, aküjeena waya pütchi nüchiki otta süchiki tü niiʼiyatakat aka alin waya nüpüla wanaa sümaa nuluwataain chi Nüchonkai (Sal. 145:2-7). Makalaka eein wanee naʼakajee na apüshiikana pürekutsootka aaʼusiliaat maatsoʼulüjee sünainmüin maayoʼu. Nnojorüle süpüla paainjüin tia, ‹pükatala kaʼi› süpüla püküjüin maʼin pütchi (Éfe. 5:16, NM). Kojutüle wamüin waakajinnüin wounejaweena na wayuukana süpüla sotuin naaʼin ouktüin Jesuu (Alat. Map. 22:17). Püshaja suluʼu wanee karaloukta nanülia na puuyantakana anainmüin, na pikirajüinkana, na püpüshikana, na piʼyataajiraakana ama otta na kepiakana püʼütpaʼa. Piʼyataa maʼin sünain eitajaa tü karalouktairua ounejaayakat.
4. ¿Kasa waaʼinrajatka suʼunnaa sükalia tü outkajawaakat eere Sotuin Waaʼin ouktüin Jesuu?
4 Suʼunnaa sükalia tü outkajawaakat eere Sotuin Waaʼin ouktüin Jesuu, eesü süpüla weeʼiyatüin nümüin Jeowa kojutüin wamüin tü nüsülajakat. Weeʼiyata suʼunnaa tia, kojutüin wamüin waakajinnüin otta süpüshuaʼa «tü naʼanasiain Kürisüto mayaawatujukat aaʼu» (Éfe. 3:8, NM).