Wakaaliinja wayuu sünain oonoowaa nümaa Maleiwa
1. ¿Jarat tü poyeeto aapünakat wamüin sünain tü outkajawaakat miyoʼu «Sünta tü puluwataayakat»? ¿Jamüsü anaka maʼin shia?
1 Sünain tü Outkajawaa miyoʼu Apünüinkat kaʼi «Sünta tü puluwataayakat», aapünüsü wamüin piamasü poyeeto jekennuu: Poonoo nümaa Maleiwa süpüla katüin poʼu waneepia otta tü suwalaʼatakat Poonoo nümaa Maleiwa. Alatinneerü suluʼu naata anüikii süka paliʼirüin pütchi suluʼuka. Süpülapünaa shiitajünüin sünain tü outkajawaakat miyoʼu, aküjünatüjülia sülatinnüinjatüin suluʼu 431 anüikii naata.
2. ¿Jaralii aneenaka akuwaʼipa sutuma tü poyeetokot?
2 ¿Jaralii aneenaka akuwaʼipa sutuma? Jülüja waaʼin tü alatakat sainküin mmaka süpüshuaʼa:
• Niʼrüin wanee wawala ouyantakai nüchikuaʼa nünainmüin wanee wayuu ekirajaweekai, isain nüchiki aashajeʼeraa karaloukta.
• Aküjüshi pütchi wanee wawala sümüin wayuu sümaa nnojoluin karaloukta ashajuushika suluʼu sünüiki. Eeshii süpüla eein na matüjüinkana aashajeʼeraa suluʼu tü anüikii naashajaakat.
• Aküjüshi pütchi wanee wawala namüin na manüisaliikana eere nüküjüin pütchi.
• Nikirajüin wanee wawala na nüchonnii matüjüinkana aashajeʼeraa karaloukta.
3. ¿Jamüsü sukuwaʼipa tü poyeetokot Poonoo nümaa Maleiwa?
3 Sukuwaʼipa tü poyeetokalüirua. Paliʼirü tü pütchi ashajünakat suluʼu tü poyeetokot Poonoo nümaa Maleiwa. Eewaisü neʼe wünaapünaa sünain tü süpanakalüirua wanee pütchi mapüleesat jee eʼitaanüsü wanee wersiikulo sünainpünaaka tü ekirajaanakat anain. ¿Jamüsü makaʼa shia? Jülüjataa waaʼin saapünüle wamüin wanee karaloukta suluʼu wanee anüikii nnojotka weʼraajüin, jaʼitairü anain maʼin tü ayaakuaa sünainkat, nnojoleerü kasain saamüin wamüin. Müsia neʼe sukuwaʼipa tü karaloukta wainmakat aluʼu pütchi, nnojotsü kasain saamüin namüin na wayuu matüjüinkana aashajeʼeraa. Makalaka jouluin maʼin ayaakuaa sünain poyeetokot tüü sümaa anain maʼin atumaa sukuwaʼipa. Süpüla mapüleein wamüin tü ekirajawaakat, kayaawasesü atumawaa tü ayaakuaa wekirajüinjatkalü aka.
4. Püküja jamüin sukuwaʼipa Poonoo nümaa Maleiwa süpüla katüin poʼu waneepia.
4 Tü ayaakuaa sünainkat tü poyeetokot Poonoo nümaa Maleiwa sünainsia neʼe shia Poonoo nümaa Maleiwa süpüla katüin poʼu waneepia. Akumajünüsü shia süpüla nekirajünüin na wayuu isakana achiki aashajeʼeraa karaloukta otta na ekirajaakana sünain aashajeʼeraa. Wekirajüle süka tü karalouktakat Poonoo nümaa Maleiwa, eesü süpüla wanaʼlaain sümüin Poonoo nümaa Maleiwa süpüla katüin poʼu waneepia. Piamasü süpana waneesia ekirajaaya. Eeʼiyatünüsü suʼttiajee tü ekirajaayakat tü pütchi ekirajaanakat anain. Eesü pütchi suluʼujeejatü tü Wiwüliakat otta waneeirua pütchi sünain tü ayaakuaakalüirua. Wünaapünaa sünain waneeirua süpana tü karalouktakat, jaʼyasü pütchi joʼuuchonka ashajia sümaa waneeirua pütchi suluʼujeejatü tü Wiwüliakat; eeshi süpüla pikirajüin süka.
5. ¿Joujainjatü waapüin tü poyeetokot namüin na wayuukana? ¿Jamüinjatü sukuwaʼipa watuma?
5 Müinjatü sukuwaʼipa watuma. Waküjapa pütchi sainküin piichi, eesü süpüla waapüin namüin na wayuukana tü poyeetokalüirua, jaʼitairü nnojoluin shiain tü waküjakat aka pütchi soʼu kashikat tia (paashajeʼera tü pütchikat «Waküjapa pütchi süka»). Wouyantapa wachikuaʼa nanainmüin na ekirajaweekana, waküja namüin eein wanee kasa wapüteeka napüla otta waapa namüin tü poyeetokot.
6. ¿Jamüinjatü wekirajia sükajee tü poyeetokalüirua?
6 Süka nnojoluin eein asakiraa sünain tü poyeetokot Poonoo nümaa Maleiwa, nnojoliinjana waya asakirüin sümaa waʼatapajüin nasouktüin na wekirajüinkana maʼakaapuʼu watuma süka tü karalouktakat Kasa shikirajaka. Kamalainsü sümüin wayuu maʼleekalia aapajaa süchiki aküjalaa. Püküja nümüin chi pikirajüinkai süchiki tü aküjalaa suluʼujeejatkat tü Wiwüliakat sükajee tü ayaakuaakalüirua. Püküja nümüin kasain shikirajeein anain tü ayaakuaakat. Talata pia otta puuʼulaa naashajaain chi pikirajüinkai. Pikiraja süka tü wersiikulo ashajünakat sajaʼttiamüin süpana tü karalouktakat. Püsakira nia süpüla naashajaain otta jülüja paaʼin niyaawatüle saaʼu tü ekirajaanakat anain. Shiale pikirajüin aka Poonoo nümaa Maleiwa süpüla katüin poʼu waneepia, aashajeʼennajatü tü pütchikalüirua wanaapünaa sümaa tü ayaakuaa eʼitaanakat süʼütpaʼa.
7. ¿Kasa waaʼinrüinjatka süpüla kooʼomüin nanoula na wekirajüinkana?
7 Wakaaliinja na wekirajüinkana. Keeʼireejeerü naaʼin chi ekirajaakai nütüjüin süpüleerua aashajeʼeraa karaloukta süpüla ayatüin nikirajaain nüchiki Jeowa (Mat. 5:3; Juan 17:3, NM). Pikirajüle maaʼulu wanee wayuu süka Poonoo nümaa Maleiwa, eeshi süpüla pikirajüin nia sünain aashajeʼeraa karaloukta süpüla pikirajüin nia süka Poonoo nümaa Maleiwa süpüla katüin poʼu waneepia. Nnojoleechi nia kettaain süpüla woutiisaa, jaʼitaichi nikirajaain sünain tü piamasükat poyeeto. Nikirajaainjatü anain palajana tü karalouktakat Kasa shikirajaka jee shiale wanee karaloukta süpüla nütüjaain saaʼu tü sümakat tü Wiwüliakat.
8. ¿Jamüshii talatüinjanaka waya süka eein wamaʼana piamasü poyeeto jekennuu?
8 Süpüla katüinjatüin noʼu waneepia na wayuukana, oonooinjana nümaa Maleiwa, chi Aluwataakai saaʼu tü kasakat süpüshuaʼa (Isa. 55:3). Tü keeʼireekat naaʼin Jeowa, shia soonooinjatüin nümaa «wayuu süpüshua», maʼaka naaʼin na isakana achiki aashajeʼeraa karaloukta (1 Tim. 2:3, 4). ¡Talatüsü maʼin waaʼin süka wamaʼanaitpain tü karaloukta wakaaliinjeenakat aka na wayuukana süpüla noonooin nümaa Maleiwa!
[Epiikürape suluʼu süpanaka 4]
Waküjapa pütchi süka
Piiʼiyata süpana 2 sümaa 3, otta püsakira: «¿Suluʼuweeshi pia wanee mma eekai müin akaʼa saaʼin tüü? [Puuʼulaa nüsouktai.] Süküjüin tü Wiwüliakat aneerüin maʼin sukuwaʼipa tü Mmakat nutuma Maleiwa soʼu palitchon kaʼi, nnojoleerü müliaa otta ayuulii. Jülüja paaʼin tü waaʼinrüinjatkat süpüla suluʼuin waya tia mma jeketkat. [Paashajeʼera tü pütchi iipünaakat sünain süpana 3, tia süküjüin tü sümakat Isaías 55:3.] Süküjüin pütchikat tüü woonooinjanain nümaa Maleiwa. «¿Kasa waaʼinrüinjatka süpüla woonooin nümaa Maleiwa?». Pikirajaa nümaa sünain tü sümakat süpana 4 otta 5. Kupaale chi wayuukai, paapa nümüin tü karalouktakat otta püma nümüin püleʼejeechin püchikuaʼa süpüla pikirajaain nümaa.